Hechos 4 - Biblia Dc en Mixe de Quetzaltepec

Ko ja Pedro ets ja Juan yajpaatë ma ja kutuunktëjkëtyën

¹ Tam ënety ja Pedro ets ja Juan ja ja'ay tmëëtmëtya'aktënëm, ko jyajtë ja teetytyëjkëty ets ja mëjtsajptëjk këwent'ajtpë wintsënëty ets ja saduceostëjkëty.

² Tëë ënety jyoot'anpëktë, jä'ä ko ja Pedro ets ja Juan ja ja'ay tyaj'ijxpëktë ko tëë nyikëxë'ëky ma ja Jesusën ko ja o'kpë jyuukpyëktë.

³ Ënet ojts tmatstë ets tsuumtë. Paaty ojts tsumtë jä'ä ko tëë ënety tsyu'ujënë, komjëpomnëm tyajpëtsëëmtë.

⁴ May ja ja'ay myëpëjktë mëti'ipë ënety të tmëtowtën ja aaw ayuk; ja mëpëjkpëtëjkëty, yi'iyë ye'etyëjktëjkëty, jä'ä nyimay'ajtë mëkoxk mil.

⁵ Komjëpom ja kutuunktëjk, mëjja'aytyëjkëty ets ja tsajptëkotyëtë yaj'ijxpëjkpëtëjk ye'eymyujktë jam Jerusalén.

⁶ Tam ënety ja Anás, mëti'ipë teety wintsënën, ja Caifás, ja Juan ets ja Alejandro, aaktam ënety ja teety wintsën ja myëku'uktëjkëty.

⁷ Ënet ja Pedro ets ja Juan yajwoowmiintë ets jam itkujky yajkuwo'owëtyë ets tyajtëëwtë: ¿Pën yë mëk'ajtën mmooyëtëp ëkë pën jëtu'un mnëmaayëtëp ets jëtu'un winë xytyuntëty?

⁸ Tääts ja Kënu'kxypyë Mëk'ajtën ja Pedro tyukëtakë ets t'ëtsooy: Wintsëntëjkëty, mëjja'aytyëjkëty,

⁹ Miitsëty yë'ë myajtëëwtëp ko ja oypyë ëëts të ntuntë, wi'ix tu'uk ja tekymya'at të tsyo'okyën.

¹⁰ E oy ko xyajtëwtë, tyamës nikajpxtë ma miitsëtyën ets ma tëkokyë ja Israel ja'ayëtyën; ko ya'atë ja'ay, mëti'ipë yam m'ijxtëpën: ja Jesús ja xyëëw, mëti'ipë Nazaret kukajpn'ajtën yë'ë të yajtso'okyë, mëti'ipë miits myajkruutspäjtën ets mëti'ipë ja Dios jatëkok të yajjuukpyikyën.

¹¹ Yë Jesús yë'ë tyam jëtu'un të nyäxy ijxtëm ja tsaakopkën, mëti'ipë miitsëty, ja pojtspëtëjk ojts xy'ixka'atstën. E tëëts ja y'awinpity jëtu'un ijxtëm tu'uk ja mëjtsaakopkën mëti'ipë myëtënääpyën ja jëën tëjk.

¹² Ka'ap maa wiinkpë yajnitsokpë, ka'ap maa naaxwiinyëtë apëtsëmy ja ja'ay mëti'ipë ja Dios të xymyo'oyëmën ets xyajnitsokmëty.

¹³ Ko ja kutuunktëjkëty t'ijxtë ko amëk jotmëk kyajpxtë ja Pedro ets ja Juan ets ko tnijawëtë ko ka'ap ënety maa të tni''ijxpëkëtë, mëjmëtoy ojts tmëtowtë; ënät nija'awëtyë ko yë'ë ja Jesús ja y'ijxpëjkpë.

¹⁴ Ets tam ënety ja ja'ay yajpaaty mëët yë'ëjëty mëti'ipë të tsyo'okyën, paatykyëjxm ka'ap tjëkyepy wi'ix y'ëna'antëty.

¹⁵ Tääts ja Pedro ets ja Juan tkäjxpëtsëëmtë jap juntëjoty ets aakyë'ë tyëjkëtyë mëtyakpë.

¹⁶ Ets nyäy'ënanëtë: ¿Tii winma'any ënät npatmëp mëët ya'atë ja'ayëty? Y'aaknija'awëtyëp yë Jerusalén ja'ayëty ko yë mëj'ajtën të tyaj'ixëtë. Ka'ap tjëkyepy nkuyu'tsmëty.

¹⁷ Ets këtiipë ya'atë aaw ayuk myëjwiin kyëjääjëty, tsojk nkajpx'ëtsë'këmë këtiipë muum t'ëknimëtyaknëtëty yë Jesús.

¹⁸ Tääts jatëkok twoowtsoowtë ja Pedro ets ja Juan ets mëk'äämpy t'ënëmaaytyë ko ka'ap ja ja'ay t'ëktukmëmëtyaknëtëty ja Jesús.

¹⁹ Tääts ja Pedro ets ja Juan y'ëtsoowtë: Miits kë'ëm yajxon ëkwinmay ëkwintajtë pën paat'ajtëp Dios wyintuuy ko miits myajmëmëtowtëty ets Dios ka'ap.

²⁰ Ëëtsëty ka'ap tjëkyepy amonyë n'itëtyës ets nkanikajpxtëtyës mëti'ipës të n'ixy të nmëtowtën.

²¹ Ënet ja kutuunktëjkëty ojts kyajpx'ëtsë'ëkëtë je'eyë ets jëtu'unyë y'ëxmajtsëtë, ka'ap tpatë ja winma'any wi'ix tyiytyunëtëty, jä'ä ko ja ja'ayëty tyukmëjja'awëtyëp ja Dios mëët mëti'ipë ënety të tyuny të jyätyën.

²² Wëxytyikxy jëmëjt naxy ënety ja ja'ay ja jyëmëjt mëti'ipë tsokën mëët ja Dios ja myëj'ajtën.

Ko ja mëpëjkpëtëjk t'amëtowtë ma ja Tiosën ja jotmëk'ajtën

²³ Ko ja Pedro ets ja Juan y'ëwa'atspëtsëëmtë, tääts ja myëku'ukëty ojts tninëjkxtë ma ënety jamëtyën, ets tukmëmëtyaktë wi'ix ënety ja teety wintsëntëjk ets ja mëjja'aytyëjk të y'ënë'ëmxëtën.

²⁴ Ko ja myëku'uk jëtu'un tmëtoowtë, ënät ja Dios ni'ëmukë tja'amyäjtstë: Wintsën, mijts të xyajkojta'ay tu'kë'ëyë winë, wä'än tsajpëty, tnaaxëty, tnëëjëty, tmejyëty ets oy tyimtiijëty,

²⁵ jëtu'un xyaj'ënany ja mKënu'kxymyëk'ajtën ets ja nteety n'apëtyës David, ja mtuunpë: ¿Tii ko yë naaxwiinyëtë ja'ay xim yam myuktë xyu'umtë? ¿Tii ko nitsuu nipoj tii tuknipëjktaakëtë?

²⁶ Ets mëti'ipë yajkutujktëpën ets ënä'ämtëpën naaxwiinyëtë tëë kyäjpxykyumëtoownaxtë ets të tnipëtë'ëktë ja Wintsën, ets ja tyuunpë mëti'ipë të twin'ixyën.

²⁷ Tëyajtën yë'ë, ko yë Herodes ets ja Poncio Pilato yaa të ye'eymyuktë mëët ja mayjyä'äy, ma ya'atë kajpnën, jutiis ets mëti'ipë ka'ap jyutiisëty, ets ja mWa'ats Tuumpë Jesús të yajmëtsippëky, mëti'ipë të xywyinwitsyën.

²⁸ Jëtu'un winë të tuntë ijxtëm ënety mijts të xytyuknipëjktaakën tyunëtëty jyatëtëty.

²⁹ E tyam, Wintsën, ix wi'ix kyajpx'ëtsë'ëkëtën ets yajkutuk ets ja mtuunp amëk jotmëk tnimëtya'aktëty ja m'aaw m'ayuk.

³⁰ Mooytyëkës ja mëk'ajtën ets nyajtso'oktëtyës ja pa'amja'ay ets nyaj'ixëtëtyës ja mëk'ajtën mëët ja xyëëw ja wa'atspë ja mtuunpë Jesús.

³¹ Ko ja Dios tja'amyäjtstaaytyë, tääts ja tëjk tsyëyuuypyijky ma ënety jam të nyiye'eypyätën ets ja ja'ayëty t'ëxajëtyääytyë ja Kënu'kxymyëk'ajtën ets amëk jotmëk nimëtyaktë ja Dios ja y'aaw y'ayuk.

Ko ja mëpëjkpëtëjk tu'ukyë tjä'ä''atë ja pyëjktä'äkyëty

³² Ja mayjyä'äy mëti'ipë myëpëjktën ja Jesús, tu'ukyë ijty ja jyot wyinma'any tyaj'itë; ni pën ja pyëjktä'äky tkajä'äpëjktä'äky nätyu'uk, aak tu'knax tyajtuntë.

³³ Ets ja ijxpëjkpëty ni'ikyë mëk'ajtën mëët tnikäjpxy tnimëtya'aktë ko tëë ja Wintsën Jesús jyuukpyiky jatëkok. Ni'ikyë ja Dios kyënu'kxëtë ni'ëmukë.

³⁴ Ka'ap ijty nitii pën tyajmëyäty, pën myëët'ajtyp ja naax ëkë ja tëjk, tyo'kpy ijty ets ja meeny tyajminy,

³⁵ ets tukë'ëtëkëtë ja ijxpëjkpëtëjk, jä'äts ja meeny yajwa'kxtëp ets tmo'otë mëti'ipë yajmëyajtëpën.

³⁶ Jam ijty tu'uk ja Israel ja'ay mëti'ipë ja Leví y'u'unk'ajtyp y'ok'ajtypyën; Josee'ajtp, Chipre kyukajpnëty, mëti'ipë ojts ja ijxpëjkpëtëjk yajxëëwpetyën Bernabé jä'ä nyiwijy Yajotkujk'ajtpë.

³⁷ Jä'ä ja nyaax tyo'k ets ja naaxtsow tukë'ëtëjkëy ja ijxpëjkpëtëjk.