Hechos 17 - Biblia Dc en Mixe de Quetzaltepec

Ja näkyäjpxytsyiikë jam Tesalónica

¹ Tääts ko jam tsyo'ontë ets nyaxtë Anfípolis ets Apolonia, jyajtë jam Tesalónica kajpnjotm. Jam ijty ja jutiis ja'ayëty tmëët'atë tu'uk ja tsajptëjk.

² Ënet ja Pablo tyëjkëy tsajptëkoty, ijxtëm xëmë tuny'ätyën ets tnimëtyäky ja Dios ja y'aaw y'ayuk. Tëkëëk sëmaan ja ja'ay mëët nimëtyaktë ja Dios ja y'aaw y'ayuk.

³ Tnimëtyä'äky ko kopkpëky ko ja Kristë ënety jëtu'un y'ëyo'onpaata'any ets jatëkok jyuukpyëka'any. Ojts y'ënä'äny: Ja Jesús mëti'ipë miits tyam ntuk'ëwa'anëtëpën, yë'ë jëtu'un ja Kristë.

⁴ Ënet ja jutiis ja'ay jënaakën tmëpëjktë ets tu'ukyë yajpatë mëët ja Pablo ets ja Silas ets näjyëtu'un may myëpëjktë ja ja'ayëty ka'apë jyutiis ja'ay'atën ets may ja to'oxytyëjkëty mëj'äämpyë wintsë'ëkëpë y'itën.

⁵ Tam ja Judá ja'ayëty mëti'ipë joot'anpëjktën ets twoowmujktë ja ëxëëkja'aytyëjk mëti'ipë jëtijtëpën jam kajpnjotm ets ja ja'ay tyajjoot'anpëjktë ets ënätyë ye'eymyujktë. Ënet ojts pëyi'ikyë nyëjkxtë ma ja Jasón ja tyëjkën, ja Pablo ets Silas myatsantëp ets tkë'ëka'antë ma kutuunkën;

⁶ e ko ka'ap tpatë ja Pablo ets ja Silas jap tëkoty, ënät tyajtso'ontë ja Jasón mëët ja wiinkpë ja mëpëjkpëtëjkëty; witsy jëtuty jam tyajtso'ontë, ets tukyax tukjojkëtë: Ya'atë ja'ayëty tëë tyajma'ta'atë yë naax kajpn naaxwiinyëtë apëtsëmy, e tëë yaa näjyëtu'un myintë,

⁷ ets ya'atë Jasón tëë tyajjajtä'äky jam ma tyëjkën. Tëkokyë yë'ëjëty ka'ap tmëjpëjkta'aktë ja yajkutujkpë kopk César ja y'ënä'ämën, jä'ä ko jëtu'un y'ëna'antë ko tää wiinkpë yajkutujkpë mëti'ipë xyëëwajtypyën Jesús.

⁸ Ko jëtu'un tmëtoowtë ja mayjyä'äy ets ja kutuunktëjkëty ënät jyotmaytyëjkëtyë.

⁹ E ja Jasón ets ja myëku'uktëjk ojts ja meeny may tyajktë ets jap pujxn tëkoty pyëtsëëmtë.

Wi'ix jyatë kyëpätë ja Pablo ets ja Silas jam Berea

¹⁰ Ko kyootsëy, ënätyë ja mëpëjkpëtëjk tnajtskäjxëtë ja Pablo ets ja Silas jam Berea. Ko jam jyajtë, ënät ojts nyëjkxtë ma ja jutiis ja'ayëty ja tsyajptëjkëtyën.

¹¹ Ja Jutiis ja'ayëty mëti'ipë jamëtyën Berea, oy ja winma'any tyajkëxë'ktë këtiinëm jyëtu'un'atë ja ja'ayëty mëti'ipë jamën Tesalónica. Ojts t'ëxajëtë ja Pablo, ets tmëtoow'ijtë ja oy aaw oy ayuk. Jëpom jëpom ja Dios ja y'aaw y'ayuk ijty t'ixpëjkëtë ets nijawëja'antë pën janty tëy mëti'ipë yajtukmëmëtyaktëpën.

¹² Tääts may ja jutiis ja'ay myëpëjktë, näjyëtu'un ja griegë ja'ayëty; jëtu'un ja to'oxytyëjkëty mëj'äämpë ets wintsë'ëkëpë y'itën ets näjyëtu'un ja ye'etyëjkëty nimay.

¹³ Ko tnija'awëtyë ja jutiis ja'ayëty mëti'ipë jam tsënaaytyëpën Tesalónica ko ja Pablo tam tkajpxwä'kxy ja Dios ja y'aaw y'ayuk jam Berea, ënät ojts nyëjkxtë ets ja ja'ay t'akajpxëtë ets tkajpxjoot'anpëjktë.

¹⁴ Ënet ja mëpëjkpëtëjk ënätyë kyäjxtso'onëtë ja Pablo, ets nyëjkxëty maatsow ja mejypya'ajën yë Silas ets Timoteo ojts wyë'ëmtë jam Berea.

¹⁵ Mëti'ipë ja Pablo jyämyëët'ajtëpën, Atenas paat ojts tpaja'të. Ko wyimpijnëtë, ënät ja Pablo tuknikejxy ja ayuk ets nëëmëtëty ja Silas ets ja Timoteo ets ënätyë myintëty.

Wi'ix jyäty kyëpetyën ja Pablo jam Atenas

¹⁶ Jam Atenas, tam ënety ja Pablo tjëjp'ixy ja Timoteo ets ja Silas. Ënet t'ijxpaty ko ujts ënety ja kajpn yajpaaty mëët ja awinax.

¹⁷ Paaty jam tsajptëkotm nikajpx nimëtyaktë mëët ja jutiis ja'ayëty ets ka'apë jyutiis'atën mëti'ipë ja Dios y'ëwtajtëpën ets xëmë winjëpom ijty tnimëtya'aktë ko ye'eymyuktë.

¹⁸ Mäjtskpëky ënety ja wijyjyä'äytyëjk jam yajpaatë: epicúreos tu'pëky yajtijtë, ets jatu'kpëky estoicos, ets y'ëna'antë: ¿Tii tääpë ja'ay atsä'pxy nyimëtyaktëp? Ets ja wiinkpë y'ënantë: Wiink tios yë yowë nyikajpxtëp. Paaty jëtu'un y'ënantë jä'ä ko ënety ja Pablo tnikäjpxy tnimëtyä'äky ja Jesús ets ko o'kpë jyuukpyëka'any.

¹⁹ Tääts tyajtso'ontë ja Pablo ets ojts tyajnëjkxtë ma tijtën Areópago ets tyajtëëwtë: Yë'ë ëëts njanijawëjantëp, ¿tii ijxpëjkën jempyë tyam myajmiinpy?

²⁰ Tëkatyës nmëtowtë. Yë'ës njanijawëjantëp tiitën mjanikäjpxyp.

²¹ Paaty ja Pablo jëtu'un yajnëmaay, jä'ä ko jam Atenas yë'ë ja ja'ay ijty myëtowantëp ja jemypyë ja winma'any, mëti'ipë jemy yajmëtoy'ajtpën.

²² Ënet ja Pablo wya'kujkëy jam Areópago mayjyä'äy akujky, ets y'ënäny: Miits, Atenas ja'ayëty, mëtowtë. N'ijxypyës ko miitsëty ni'ik mëk xywintsë'ëkëtë mëti'ipë mtios'ajtëpën.

²³ Koos yaa nnaxy ntëkë ma mnaax mkajpnëtyën, ënätës të n'ixy ma miits ja mtios xy'ëwtatën jam kyëxja'ayëty: Ja Dios ka'apë yaj'ixy'ätyën. E oy, ja mëti'ipë m'ëwtajtëpën ets ka'ap xy'ixy'atë, yë'ëjës ëjts nnikäjpxy nnimëtyäkpy.

²⁴ Ja Dios, mëti'ipë yajkojën ja naax ets tu'kë'ëyë mëti'ipë yaa naaxwiiny ijtpën, yë'ë nyiwintsën'ajtääpy tu'kë'ëyë winë ma ja tsajpën ets ja naaxën. Ka'ap jap y'ity ma ja tsajptëjkën mëti'ipë ja'ay y'oytyuuntëpën

²⁵ ets ka'ap tyajmëyäty tii ntukmëtu'unmëty, jä'ä ko yë'ë xymyo'oyëm ja juukyajtën, poj ets tu'kë'ëyë winë.

²⁶ Dios pyëjktak ja ye'etyëjk mëti'ipë ja naaxwiinyëtë ja'ay tyeety'at tyaak'atëpën, jëtu'unts tyajwintukëty tu'kë'ëyë ja naaxwiinyëtë, ets tëë tmo'oy ja xëëw jëmëjt mapaat tyajjuuky'ata'anyën,

²⁷ ets ja Dios t'ëxta'atëty, wä'änxyëp yun këtaw tpaatëty, oy jyamëtëyëty ko yë Dios ka'ap nmëjëkäm'ajtëmë.

²⁸ Jä'ä ko yë'ë ja juukyajtën xymyo'oyëm ets yë'ëkyëjxm nnajxëm ntëjkëmë ets nyajpatëmë; jëtu'un ijxtëm jënaakën ma miitsëtyën ja mmëku'uk y'ëna'antë: Dios ëëts xy'u'unk'ajt xy'ok'ajtëm.

²⁹ Jä'ä ko ëëtsajtëm Dios xy'u'unk'ajt xy'ok'ajtëmë, ka'ap tjëkyepy jëtu'un nmä'ämyëty ntajmëty ko yë Dios jëtu'un tä awinaxën mëti'ipë oytyunyën mëët yë poop pujxn, pu'ts pujxn ëkë kepy tsaa mëti'ipë yë ja'ay yajkojtëpën ijxtëm myäytyën tyajtën.

³⁰ Dios ka'ap ojts tëëyëp tmëjpëjktä'äky oy ja ja'ay ka'ap oy myäytyë tyajtë, tyam yë'ë tsyojkpy, ets tëkokyë ja ja'ay wyimpijta'atëty ma yë'ëjën

³¹ Jä'ä ko tëë ja Dios tuknipëjktaakë jëna'a ja naaxwiinyëtë ja'ay tpaye'eyä'änyën ijxtëm pyaat'atyën. Yë'ë të tuknipëky tu'uk ja ja'ay mëti'ipë të twin'ixyën; ets tëë xytyuk'ijxëmë ja myëk'ajtën ko ojts tyajjuukpyiky jatëkok oy ënety të y'ëk'ooky.

³² Ko ja ja'ay tmëtoowtë ko ja Pablo y'ënä'äny ko ja o'kpë jyuukpyiky, tääts ja Atenas ja'ay je'eyë xyiktë; tam wiinkpë mëti'ipë ënantën: Jää ënety jatëkok xyjyaaknikäjpxy.

³³ Tääts ja Pablo wyinye'eytyutëtë.

³⁴ Tam jënaakën y'ijtë mëti'ipë ojts myëpëktën ets ja Pablo tpatso'ontë. Tu'uk txëëwaty Dionisio mëti'ipë wintsën'ajtpën jam Areópago ets tu'uk ja to'oxytyëjk txëëwaty Dámaris ets ja wiinkëtypë mëti'ipë mëpëjktën.