Hechos 16 - Biblia Dc en Mixe de Quetzaltepec

Ko ja Timoteo tjämyëët'aty ja Pablo ets ja Silas

¹ Tääts ja Pablo ets ja Silas jyajtë jam Derbe ets Listra. Jamts tpatë tu'uk ja mëpëjkpë, Timoteo xyëëwajtyp. Jutiis ja'ay tyaak'ajtyp, mëpëjkp näjyëtu'un; je'eyëp ko tyeety, griego ja'ay.

² Ja Timoteo, oy nyikäjpxyë ja mëpëjkpëtëjk mëti'ipë tsënaaytyëpën jam Listra ets Iconio.

³ Tääts ja Pablo wyinmaay ets ja Timoteo pyajämyëët'atëtëty, je'eyëp ko jëyëjp ojts tnatsujk'ëwtijtë ja ye'etyëjkajtën ets ka'ap ja jutiis ja'ay y'ijxma'atëtëty, jä'ä ko wa'ats ja jutiis ja'ayëty ënety tnijawëtë ko ja Timoteo ja tyeety griegë ja'ay.

⁴ Ënet tsyo'ontë ets ojts nyëjkxtë maajaty ja kajpnën. Jamts tnikäjpxy tnimëtyaktë wi'ix ja ijxpëjkpëtëjk mëët ja mëjja'aytyëjk ënety të tyaktën ja kajpxwijën jam Jerusalén.

⁵ Jëtu'un ja mëpëjkpëtëjk tu'ukyë ja wyinma'any tpëjktaktë ets nyimayëtë winjëpom.

Ko ja Pablo yajktuk'a'ijxnaxy ja Macedonia ja'ay

⁶ Tääts ja Pablo mëët ja myëku'uktëjk tsyo'ontë ets ojts nyëjkxtë Frigia ets Galacia, jä'ä ko ka'ap ja Kënu'kxymyëkajtën ojts tyajkutuky ets ja Dios ja y'aaw y'ayuk tkajpxwa'kxtëty jam Asia.

⁷ Ko jam jyajtë Misia tsëpa'an'ëkë'ëm, Bitinia ënety jyanëjkxa'antë; je'eyëp ko ja Jesús ja Kyënu'kxymyëk'ajtën ka'ap ojts tyajkutuky ets jam nyëjkxtëty.

⁸ Ënet ja Misia tnanajxtë jëkäm, ets ojts nyëjkxtë jamm Troas.

⁹ Jamts ja Pablo koots yajtuk'a'ijxnajxy, tu'uk ja Macedonia ja'ay jam tyänë ets myënu'kxtä'äkyë ets nyëjkxëty Macedonia y'itjotm ets ja ja'ay jam tputëkëty.

¹⁰ Ko ja Pablo jëtu'un t'a'ijxnajxy, ënät ojts nwinmaytyës ko ja Dios jam xywyowtëpës Macedonia ets jam nkajpxwa'kxtëtyës ja oy aaw oy ayuk.

Wi'ix jyatë kyëpätën ja Pablo ets ja Silas jam ma Filipo ja'ayëtyën

¹¹ Ënätës ojts ntëkëtë kepy nëëwinye'epyëjoty, jamës ntsoontë Tróade ets ojts nnëjkxtë tëyë jam Samotracia, komjëpomës nja'ajtës jam Neápolis.

¹² Jamës ntso'ontë etsës ojts nnëjkxtë Filipos, Roma jam ënä'ämp ma tääpë kajpnën, mëj'äämpy nyäxy ma Mecedonië nyaaxjotmën. Jamës n'ijtë jeky jyawë.

¹³ Po'kxënxëëw ënety koos ojts nnëjkxtë jam mëjnëë ëkë'ëm, maas ënety të nijawëtën ko jam ja jutiis ja'ay nyëjkxtë Dios mëkajpxpë. Etsës jam naaxwä'tstë, ntuk'ëwaanëtës ja oy aaw oy ayuk ja to'oxytyëjkëty mëti'ipë ënety jam të nyiye'eypyätën.

¹⁴ Tam ënety tu'uk ja to'oxytyëjk mëti'ipë xyëëwajtypyën Lidia, Tiatira kyukajpnëty, wit to'kp, aakjä'ä ijty tyo'kpy ja tsu'unk wit. Ya'atë to'oxytyëjk wyintsë'këp ijty ja Dios. Wintsën ojts winma'any myo'oyë ets tja'akyukëty wi'ix ja Pablo y'ënä'änyën.

¹⁵ Tää ojts nyëëpety mëët ni'ëmukë mëti'ipë jam tsënaaytyëpën ma tyëjkën. Täätsës xymyënu'kxtaktës ets y'ënäny: Tuntë mëyajtën, mintë maas yë ntëjkën, pën m'oyjya'awëtëp miits koos nmëpeky ja Wintsën. Ënätës kwanë ojts xyajnëjkxtë.

¹⁶ Tëkok ojts jyäty kyëpety, jamës ënety nnëjkxtë ma ja ja'ay ja Dios tja'amyätstën, täätsës mpatë tu'uk ja to'oxy'ëna'k mëti'ipë ja ku'oypyë myëët'ajtypyën, ets tyuknajtsjawëty mëti'ipë tunan jatanëpën. Ëne'emy ijty y'ity; yajxon ja wyintsën myeenypyääty mëti'ipë ënä'ämëpën.

¹⁷ Ja to'oxy'ëna'k ojts ëëts xypyatsoontë, ets y'ënäny mayjyä'äyjoty: Ya'atë ye'etyëjkëty, Dios ni'ik këjxmëpë myëtuuntëp. Yë'ë mtukmëmëtyakëtëp wi'ix xypyaatëty ja nitsokën.

¹⁸ Ko jëtu'un kanaak xëëw y'ëtitsy, yä'äxy jyoky; tää ja Pablo tsyijpënë ets tniwa'akwinpijty ets t'ënëmaay ja ku'oypyë mëti'ipë ja to'oxy'ëna'k ënety myëët'ajtypyën: Jesukristë xyëëwkyëjxm yam mijts n'ëne'emy, ëxmats yë to'oxy'ëna'k. Tääts ja to'oxy'ëna'k ënätyë y'ëxmajtsë ja ku'oypyë.

¹⁹ Ko ja to'oxy'ëna'k ja wyintsën t'ijxtë ko ka'ap y'ëkmeenypyatnëtë, ënät tmajtstë ja Pablo ets ja Silas, ets ojts tyajnëjkxtë ma ja kutuunkën, jap kajpn'ikujky.

²⁰ Ko yajmëjajtë ma ja kutuunkën ënät t'ënëmaaytyë ja kutuunktëjk: Ya'atë ja'ayëty, jutiis yë'ëjëty, nëkoo kajpn t'ëk'atsijpnëtë.

²¹ Jä'ä ko yë'ë tyuk'ijxpëjktëp mëti'ipë ka'ap kyutukyëtyën ets ka'ap tjëkyepy ëëts ntuntëty, jä'ä ko Roma ëëts näkyumatsëtë.

²² Tääts ja mayjyä'äy jyoot'anpëjktë ets ni'ënä'ämëtyë ma ja kutuunkëtyën ets ja Pablo mëët ja Silas yajnijäntëty ets yajkepywyoptëty.

²³ Ko yajwojptaaytyë, tääts yajtsuumtë ets ja pujxntëjk këwent'ajtpë ojts yajtuk'ëne'emy ets mëk tkëwent'atëty.

²⁴ Ko jëtu'un tmëtooy, tää ojts tpëjktä'äky wäänë o'okwinmpy. Ënet ja tyeky yajtuknaaxkukë'ëyëtë tu'uk ja pu'uy tuknitsatsëpë, naaxkutsumë mëët ja pujxntejpxy.

²⁵ Tsu'umkujk ënety, tap tmëtowtë ja wiinkëtypë ja pujxntëjkja'ayëty ko ja Pablo mëët ja Silas tyëjkëtyë Dios mëkajpxpë ets tkuuy'ëwtë.

²⁶ Ajotkumonë ojts ja mëk ujx myiny ets ja pujxntëjk yu'kxpëjky, ënät ja pujxntëjk'aaw y'ëwatsy, näjyëtu'un kya'ataay ja tsumyjä'äy ja pyujxntejpxy pujxnëty.

²⁷ Ko ja pujxntëjk këwent'ajtpë ojts nyiwijy nyikejy, tääts t'ijxpaty ko ënety ja tëjk'aaw të y'ëwatsta'ay. Jëtu'un tjëjp'ixy tëë yowë ja pujxntëjkja'ay kyäkta'atë, ënät ja tyiypyujxn tju'ty ets jyanäyaj'ookanë.

²⁸ Ko ja Pablo t'ijxpaty ko nyäyaj'ooka'anyë, tääts mëk t'ënëmaay: Ka'ap wi'ix mnätyunëtëty. Aak tyap ëëtsëty ni'ëmukë.

²⁹ Ojts ja pujxntëjk këwent'ajtpë t'amëtoy ja kutë'kxn, ets tyëjkëy tsëyuuypyë pujxn tëkoty ets nyäkyoxtënaaytyakë Pablo ets Silas wyintuuy.

³⁰ Tääts ja pujxntëjk këwent'ajtpë tyajpëtseemy ja Pablo mëët ja Silas ets tyajtëëy: Mëku'ukëty, ¿tiis ntunëp etsës nnitso'okëty?

³¹ Ënet ja Pablo ets ja Silas t'ëtsoowinpijtë: Mëpëk ja Wintsën Jesukristë ets mnitso'okëty mëët ja m'u'unk mto'oxytyëjk.

³² Ënet ja Pablo ets ja Silas tuk'ëwa'anëtyë ja Dios ja y'aaw y'ayuk ja pujxntëjk këwent'ajtpë mëët ni'ëmukë ja myëku'uktëjk jënu'un tyu'kjëën'at tyu'ktëjk'atën.

³³ Näy ënätyë ja pujxntëjk këwent'ajtpë ojts tpujy ja Pablo ets ja Silas ja tsyëtyutëty ets nyëëpäjtë ni'ëmukë mëti'ipë tsënaaytyëpën jam ma jyëën tyëjkën.

³⁴ Tää ja Pablo ets ja Silas wyoowëtë ja pujxntëjk këwent'ajtpë ma tyëjkën kääpyë ukpë. Janty jotkujk nyäjya'awëyë mëët ja jyä'äy ko ënety tëë ja Dios tmëpëktë.

³⁵ Ko xyiinytyäky, ënät ja kutuunk tkäjxtë ja kyäjpxynyajxpë ma ja pujxntëjk këwent'ajtpën ets n'ënëëmëtëty wä'än ja Pablo ets ja Silas tnajtsmatsë.

³⁶ Ënet ja pujxntëjk këwent'ajtpë t'ënëmaay ja Pablo: Tëës ja kutuunktëjk xytyuk'ënä'ämtë ets n'ëxmatstëty. Oy mnëjkxtëty akujk jotkujk.

³⁷ E jëtu'un ja Pablo t'ënëmaay ja kukäjpxy: Nen Romë ja'ay ëëtsëty, ets tëëjës nyajwop nyajka'atstë mayjyä'äyjoty nanëkookyëjxm, ka'anëm ënety ja npokyës yajpaye'eynyëm, ets tëëjës näjyëtu'un nyajtsumtë. ¿Wi'ix ko ënät tyam yu'utsy me'tsy xy'ëxmatsa'antës? Ka'ap jëtu'un myëtëyëty. Wä'än kë'ëm tmintë ja kutuunktëjkëty etsës yë'ë xyajpëtsëmtëty.

³⁸ Ets ja kukäjpxy wyimpijtë ets tuk'ëwa'anëtyë ja kutuunk wi'ix ja Pablo ja ayuk ënety të t'ëtsoowinpityën. Ënet ja kutuunk tsyë'këtyë ko tnija'awëtyë ko ja Pablo ets ja Silas Romë ja'ayëty.

³⁹ Tä ja kutuunk ojts nyëjkxtë ma ja Pablo ets ja Silas jamëtyën ets yajpëtsëëmëtë je'eyëp ko jëyëjp ja mä'kxën tpëjktsoowtë ma ja Pablo ets ja Silas: Tuntë mëyajtën, pëtsëmtë yaa kajpnjoty.

⁴⁰ Ko pyëtsëëmtë pujxn tëkoty ets ojts nyëjkxtë ma ja Lidia ja tyëjkën. Jamts mëët nyäpyaatëtë ja mëpëjkpëtëjkëty. Ojts tjotmëkmo'ojtë, tää jam tsyo'onëtë.