Hechos 10 - Biblia Dc en Mixe de Quetzaltepec

Pedro ets Cornelio

¹ Jam ma Cesarea kajpnën, jam ijty tu'uk ja ja'ay tsyëënë; Cornelio xyëëwajtyp, tsiptuunpë wintsën ijty tyuunk'ajtyp ma ja soldadëtëjkëtën mëti'ipë yajtijtëpën Italiano.

² Xëmë ja Cornelio ijty twintsë'ëkë ja Dios, näjyëtu'un mëti'ipë tsënaaytyëpën jam ma tyëjkën, pyutëjkëp ijty ja ja'ay mëët ja wit meeny ko pën kyaka'ajtxëty ets xëmë tja'amyetsy ja Dios.

³ Jënäkyxyëëw ënety, ko ojts t'a'ijxnaxy tu'uk ja Dios ja y'anklës myëwinkonyë ets y'ënëmaayë: Cornelio.

⁴ Tääts ja Cornelio tsë'ëkë tsë'ëkë twin'ijxpejty ja tsajpjotmëtë kukäjpxy ets t'ëtsooy: ¿Tii?, Wintsën. Tää ja tsajpjotmëtë kukäjpxy y'ënëmaayë: Y'ijxyp nyija'ap yë Dios ko xyjyä'äymyetsy ets wi'ix xypyutëkën ja ëyoopëja'aytyëjkëty.

⁵ Käx yë mkukäjpxy ets nyëjkxëty Jope, wä'än twoy ja Simón, mëti'ipë yajtijpën Pedro.

⁶ Jam jya'ajtä'äky ma ja tyëjkën ja wiinkpë ja Simón, po'oko'tsk tyuunk'ajtyp, jam winkon tsyëënë mejypyë'am.

⁷ Tääts ko ja tsajpjotmëtë kukäjpxy tsyo'ony, ënät ja Cornelio tmëjwooy nimäjtsk ja tyuunpë ets näjyëtu'un tu'uk twoowtsooy ja tsiptuunpë mëti'ipë myëku'ukja'apën ets wyintsë'këp ja Dios.

⁸ Tääts tuk'ëwa'anëtyääy ijxtëm ënety ja Dios ja y'anklës të y'ënë'ëmxëtyën ets tkejxy.

⁹ Komjëpom, kujkyxyëëwëjaanpën, tam ënety ja käjpxynyajxpë tyu'uye'eytyë winkon ma ja Jope kajpnën, ënät ja Pedro pyejty jap tëjkëjxy Dios ëwtajtpë.

¹⁰ Yuu'o'këp ënety mëk ets kayaanp. E tap ënety ja kyääky tyojkx yaj'oytyunyëm, ko ja Dios tyuk'a'ijxnajxë

¹¹ jam tsajpkëjxm y'ëwa'atsy ets kyëtä'äky ijxtëm ja mëj witën ets wiinxë taxk täk.

¹² Jap witjoty kanaakjëjp ojts t'ixy ja jëyujk taxkpë tyekyën, nän tap ja tsa'any ets ja jëyujk mëti'ipë kääkëtijtpën.

¹³ Ënet tmëtooy tu'uk ja ayuk mëti'ipë ënaanpën: Pëtë'ëk, Pedro, yaj'ook ets xytsyu'utsëty.

¹⁴ Tääts ja Pedro y'ëtsooy: Ka'ap, Wintsën. Nijëna'ajës ëjts nkatsu'uty mëti'ipë ëxëëkën ets mëti'ipë ka'ap mëpaat yajktsu'utsyën.

¹⁵ Ojts jatëkok tmëtoy ja ayuk ets y'ënëmaayë: Mëti'ipë Dios të tyajwa'atsyën, ka'ap tjëkyepy xytyijëty ëxëëk.

¹⁶ Tëkëëk ok jëtu'un tmëtooy, ënät ja wit pya'tëjkënë tsajpjotm.

¹⁷ Tam ënety ja Pedro je'eyë tmëmay tmëtajy wi'ix nyiwijyën mëti'ipë y'a'ijxnajxypyën ko ja Cornelio ja kyäjpxynyajxpë jyajtë jam tëjk'ëkë'ëm, jä'ä ënety yajnitë'ëwëtëp ja Simón ja tyëjk.

¹⁸ Ko jam jyajtë, ënät ojts mëk tyajtëwtë pën jap ja Simón mëti'ipë näjyëtu'un yajtijpën Pedro.

¹⁹ Tam ënety ja Pedro tmëmay tmëtajynyëm mëti'ipë të yajktuk'ixyën, ko ja Kënu'kxymyëkajtën y'ënëmaayë: Simón, tää ja'ay nitëkëëk m'ixta'ayë.

²⁰ Pëtë'ëk, jënak ets panëjkx tääpë ja'ayëty, këtii xymyëmay xymyëtajëty jä'ä koos yë nkejxyp.

²¹ Tääts ja Pedro jyënäjky ets t'ënëmaay ja Cornelio ja kyäjpxynyajxpëtëjkëty: Ëjts jëtu'un mëti'ipë miitsëty m'ixtaaytyëpën. ¿Tii mnimiintëp?

²² Tää ja kukäjpxy y'ëtsoowtë: Ja tsiptuunpë wintsën Cornelio, yë'ëjës xykyäjxtëp. Oy ets mëtëy jyuuky'äty ets wyintsë'këp ja Dios, oyjya'awëyëp ets tsojkëtëp ja jutiis ja'ayëty. Tu'uk ja Dios ja y'anklës të nyë'ëmxëty ets mijts myajwowëty ets nja'amëty ma ja Cornelio ja tyëjkën ets xytyuk'ëwaanëty mëti'ipë mkajpxäämpyën.

²³ Tääts ja Pedro tyajja'ajtäky ma jam y'ityën ets jam ja tsuu tyajnajxtë. Komjëpom tsyo'ontë ets ja Pedro jënaakën jyämyëët'ajtëtë ja mëpëjkpëtëjkëty mëti'ipë jam tsënaaytyëpën Jope.

²⁴ Komjëpom jyajtë ma ja Cesarea kajpnën, ma ja Cornelio ënety jam y'ëwxityën mëët ja myëku'uktëjk ets ja wyin'ixytyëjk mëti'ipë ënety të twoomukyën.

²⁵ Ko ja Pedro jyä'äjty ma ja tëjkën, tääts ja Cornelio ojts pyëtsimy tyëjk ëkë'p ets nyäkyoxtënaaytyakë Pedro wyintum ets t'ëwtata'any.

²⁶ Ja Pedro ënätyë twijtsë'ky ets t'ënëmaay: Tänë. Ja'ayës ëjts näjyëtu'un ijxtëm mijtsën.

²⁷ Tam ënety myëtyä'äkynyëm mëët ko tyëjkëy tëkoty ma jap nimay ja ja'ay të ye'eymyuktën.

²⁸ Ënet ja Pedro y'ënäny: Ejxtëm xynyijawëtën, ka'apës ëjts yë n'ënä'ämën kyutuky ets jutiis ja'ay mëët ye'eymyuk nyajxmuktëty ja ja'ay mëti'ipë ka'ap jyutiisëty, nän ka'ap tjëkyepy tyëkëty ma tyëjkën. E tëëjës ja Dios xytyuknijawë ko ka'ap y'oyëty koos pën ntijëty ëxëëk.

²⁹ Paatyës të nminy ënätyë yaa ets nitii ayukës të nkapaaty, yë'ëjës njanijawëjäämpy tiis ko të xywoowtsowtë.

³⁰ Tääts ja Cornelio y'ëtsooy: Tyam mëmajktaxk xëëw ma ya'atpë horë yaa n'ayuu'atyës maas ntëjkën. Tiosës nja'amyejtsyp jënäkyxyëëw, ko ojts ajotkumonë n'ijxpaatyës tu'uk ja ye'etyëjk xywyintänës. Atë'kxp ajajp ja wyit kyëxë'ëky.

³¹ Ënätës xynyëmaay: Cornelio, tëë ja Dios ja m'aaw m'ayuk tmëtoy, y'ijxyp nyija'ap ko të xyjyä'äymyetsy ets wi'ix ja mëyajtën xytyunyën ma ja ja'ayëtyën xypyutëkën.

³² Käx yë mkukäjpxy ets nyëjkxëty jam Jope. Wä'än nëjkx twoy ja Simón, mëti'ipë yajtijpën Pedro. Tam jya'ajtä'äky ma ja yajpo'otëtspë ja tyëjkën, mëti'ipë näjyëtu'un xyëëwajtypyën Simón. Mejypyë'aay tsyëënë.

³³ Paatyës yë nkukäjpxy ënätyë të nkexy ets mwowëtëty. Oy ko yë mëyajtën të xytyuny ko të mminy. E tyamts ëëts tu'ukmukyë nyajpaatë Dios wyintum ets yaj'amëtoow'ita'any ja aaw ayuk mëti'ipë ja Wintsën të mtuk'ëne'emyën etsës xytyuk'ëwaanëtëty.

³⁴ Ënet ja Pedro kyajpxtso'ony: Tyamës n'ixy nijawë ko ja Dios tsyojktääpy ja ja'ay ni'ëmukë,

³⁵ kyupëjkpy pën wintsë'këyëp ets pën tyuunpy mëti'ipë paat'ajtëpën.

³⁶ Dios ojts tmëkäjpxy ja Israel ja'ay ja y'u'unk y'okëty, tuk'ëwaanë ja jotkujk'ajtën mëët ja Jesukristë, ko yë'ë nyiwintsën'ajtääpy winë.

³⁷ Mnija'awëtëp miits mëti'ipë tuunën jajtën jutiis ja'ay nyaaxjotyëty; tsyo'ontäky jëyëjp Galilea, ko ja Juan Yajnëëpäjtpë tkajpxwä'kxy ets ja ja'ay t'ëxmatstëty ja y'ëxëëk winma'anyëty ets nyëëpätëty.

³⁸ Mnija'awëtëp näjyëtu'un ko ja Dios tmooy ja Jesús ja Kënu'kxymyëkajtën mëët ja mëk'ajtën, ets ko ja Jesús tuuny ja oypyë ko jyëtijty naaxwiiny ets tyajtsoky ja ja'ay ni'ëmukë mëti'ipë ënety ja mëjku'u yaj'ëyoowëtëpën. Jëtu'un ojts ya'atë tuny jä'äkyëjxm ko ja Dios mëët yajpaaty.

³⁹ Ets ëëtsëty ojtsës n'ixtë nnijawëtë tu'kë'ëyë mëti'ipë ja Jesús tyuun kyajpxën jam Jerusalén ets ma ja wiink naax wiink kajpnën, Judea nyaaxjotm ets ojts ëëts n'ixtë nijawëtë ko yaj'o'këtë ja ja'ay ets ko yajmëjwojpejty kruutskëjxm.

⁴⁰ Ënet ja Dios ojts yajjuukpyikyë jatëkok kom tëkëëk xëëw ets nyänyikëxë'kë ma ëëtsëtyën.

⁴¹ Ka'ap ja ja'ay ni'ëmukë t'ijxtë, ëëts je'eyë n'ijxtë, mëti'ipë ja Dios të twin'ixyën. Ojts ëëts mëët nkaytyë n'uuktë ko jyuukpyijky.

⁴² Tääts ojts xytyuk'ënä'ämtës ets yajkajpxwa'kxëty ja Dios ja y'aaw y'ayuk, ets ja ja'ay ntuk'ëwaanëtëtyës ko Dios të tpëjktä'äky yë Jesús ets tpaye'eyëty ja juukpyë ookpyë.

⁴³ Ni'ëmukë ja Dios ja kyäjpxynyajxpëtëjk tëë ënety tnikäjpxy tnimëtya'aktë ja Jesús ets tëë ënety y'ëna'antë ko pën ja Jesús myëpëjktëp, jä'ä pyoky yajnimä'kxantëp.

Ko ja Kënu'kxymyëkajtën t'ëxajëtë ja ja'ay mëti'ipë ka'ap jyutiis'atën

⁴⁴ Tam ënety ja Pedro kyäjpxynyëm ko ja Kënu'kxymyëkajtën tyukëtakëtë ni'ëmukë ja ja'ayëty mëti'ipë jam myëtoow'ijtëpën ja Pedro ja y'aaw y'ayuk.

⁴⁵ Ja mëpëjkpëtëjkëty mëti'ipë ja Judá ijxpëjkën mëpëjkën tyuk'ijtëtyëpën, mëti'ipë ënety ja Pedro mëët të jya'tën, jä'ä ojts mëj'ixy t'ixtë ko ja'ayëty yajmo'otë ja Kënu'kxymyëkajtën mëti'ipë ka'ap jyutiis'atën,

⁴⁶ ojts tmëtowtë ko tkajpxtë ja wiink ayuk ets ja Dios tmëjja'awëtë tjaantyja'awëtë.

⁴⁷ Tääts ja Pedro y'ënäny: ¿Mëpaat jëtää pën t'ëtukëty ets ya'atë ja'ay ka'ap nyëëpätëtyë? Tëë ja Kënu'kxymyëkajtën t'ëxajëtë näjyëtu'un ijxtëm ëëtsajtëmën.

⁴⁸ Tääts ja Pedro ojts tni'ënä'ämë ets nyëëpätëty Jesús xyëëwkyëjxm. Ja mëpëjkpëtëjkëty ojts nëëmëtë ja Pedro ets tjaakwë'ëmëty ti'k xëëw mäjtsk xëëw jam mëëtëty.