Hebreos 7 - Biblia Dc en Mixe de Quetzaltepec

Jëtu'un ja Jesús tyeety'äty ijxtëm ja Melquisedec y'ijtyën

¹ Ya'atë Melquisedec yë'ë ojts yajkutuky jam Salem ets tyeety'äjty ma ja Dios ni'ik këjxmëpë tmëtuunyën. Ko ja Abraham wyimpijty ma ënety ojts të tsyiptunyën ko tmëmëtäky ja yajkutujkpëtëjk, ënät ja Melquisedec ojts jyëjpye'eyi'ikyë ets ojts kyënu'kxyë;

² ënät ja Abraham tmooy ja Melquisedec tu'kpëky ja majk pëkpyë mëti'ipë pyëjkën ko myëtäky ma tsyiptuunyën. Ja Melquisedec ja xyëëw jä'ä y'ayukwinpëtsëmy yajkutujkpë mëti'ipë kijpxy'äjtyën myëët'ajtypyën ets ko jam Salem yajkutuky, näjyëtu'un yajtijy yajkutujkpë mëti'ipë kijpxyajtën myëët'ajtypyën, jä'ä ko jëtu'un ja Salem y'ayukwinpëtsëmy Jotkujkajtën.

³ Ka'ap yajnikäjpxy pën tyaak'ajt tyeety'ajt ëkë pën y'ap'ajt y'ok'ajt ets ni kyayajnikäjpxy wi'ix myëxu'unk'ajty ets ko ojts y'o'knë, je'eyëp ko jëtu'un yaj'ijxy ijxtëm ja Dios U'unk tyeety'ätyën xëmëkyëjxmëpë.

⁴ Tsojk nja'akyujkëmë ko ja Melquisedec mëj ojts y'ity, yë'ëpaat ja n'ap'ajtëm Abraham ojts tpuyäky tu'kpëky ja majk pëkpyë mëti'ipë ënety të tpëkyën ko myëtäky jam tsipjotm ets ojts tmo'oy tu'kpëky ja Melquisedec.

⁵ Jëtu'un ja Moisés ja y'ënä'ämën y'ënä'äny ko ja teetyëty mëti'ipë Leví y'u'unk'ajtyp y'ok'ajtypyën, yë'ë yajmooytyë ja tëyajtën ets ja jyiiky myëku'uk tukyaktëty tu'kpëky ja majk pëkpyë, oy ja Abraham tja'u'unk tja'okëty.

⁶ E ja Melquisedec, oy ënety ka'ap ja Leví t'ap t'ëkëty, ojts tukyäky ja Abraham tu'kpëky ja majk pëkpyë. Jëtu'un ja Melquisedec ojts tkënu'kxy ja Abraham;

⁷ yajnija'ap ko wäänë mëj ni'ik mëti'ipë kënu'kxpën këtiinëm mëti'ipë yajkënu'kxpën.

⁸ Yë teetyëty mëti'ipë yajmooytyëpën tu'kpëky ja majk pëkpyë ijxtëm ja Moisés ja y'ënä'ämën y'ënä'änyën, o'ktëp jä'ä; je'eyëp ko Dios ja y'aaw y'ayuk jëtu'un tnimëtyä'äky ja Melquisedec ijxtëm tu'uk ja ja'ayën mëti'ipë juukyajtpën.

⁹ Jyëkyejpy n'ëna'anmëty ko ja Leví y'u'unk y'ok, ja teetytyëjkëty mëti'ipë pyëjktëpën tu'kpëky ja majk pëkpyë, näjyëtu'un tmooytyë tu'kpëky ja majk pëkpyë ja Melquisedec ets ja Abraham tkuyaktë,

¹⁰ jä'ä ko ja Melquisedec ko ojts tjëjpye'eyi'iky ja Abraham, oy ënety ka'anëm myëxu'unk'atynyëm ja Leví, tam ënety tnëkëjxm'aty ja Abraham mëti'ipë ka'ap myëxu'unk'atënëm.

¹¹ Yë Israel kajpn ojts t'ëxajë ja ënä'ämën mëti'ipë ja Leví ja'ayëty yajtuuntëpën. Ko jeexyë ja Leví ja'ayëty ojts t'ëkyajwa'atstë ja naaxwiinyëtë ja'ay, ka'ap jeexyë kyopkpëkyëty ets wiinkpë ja teety jyää'aty, ets ka'ap jeexyë y'ëkyë'ë'ajnë ja Abraham ja y'u'unk y'ok, yë'ë ja Melquisedec ja y'u'unk y'ok jeexyënë.

¹² Jä'ä ko pën ka'ap ja Aarón ja y'u'unk y'ok yë'ë y'ëkteety'ajnëtë, tëkajtsnëp näjyëtu'un ja ënä'ämën mëti'ipë yajnikutujkëpën pën teety'atëpën;

¹³ ets ja nWintsën'ajtëmë, mëti'ipë ja Dios ja y'aaw y'ayuk tyijpyën, wiink Israel ja'ay ja tyijpy, ma ka'ap ja teety jam nitu'uk pyëtsimnyëmën.

¹⁴ Yajnija'ap wa'ats ko ja Wintsën jam pyëtsiimy ma Judá y'u'unk y'okën, yë Moisés ka'ap ojts nikäjpxy ko jam pyëtsëma'any ja teety ma ja Judá ja y'u'unk y'okën.

¹⁵ Ets ya'atë wa'ats yajja'akyukë ko ja jemypyë ja teety jëtu'un jyä'äy'äty ijxtëm ja Melquisedec y'ijtyën,

¹⁶ tu'uk ja teety mëti'ipë kuttujkën myëët'ajtypyën ets tyeety'atëty jä'ä ko jyuuky'äjty xëmëkyëjxm, ka'ap yë'ëkyëjxmëty ko jyääty ja ënä'ämën mëti'ipë ënaanpën ets y'u'unk y'ok tyeety'atëty.

¹⁷ Yë'ë ja Dios nëmaayë: Mijts xëmëkyëjxm mteety'ajtp ijxtëm ja Melquisedec y'ijtyën.

¹⁸ Paaty ja Moisés y'ënä'ämën kyutëkooy ko mëk'ajtën tkamëët'aty ets ka'ap tyuny,

¹⁹ jä'ä ko ja Moisés ja y'ënä'ämën nitii ojts oy wa'ats tkayajwë'ëmy, ëëtsajtëm yë'ë jawäänë oypyë njëjp'ijxëm, paaty nmëwinko'onëm ja Dios.

²⁰ Dios ojts yë xyëëw yajkajpxpaaty ets ja Jesús tyeety'atëty. Ja wiinkëtypë ja teety jëtu'unyë ojts tyeety'atë, ka'ap ja Dios ja xyëëw yajkajpxpaty.

²¹ E ja Dios ojts kë'ëm nyäyajkäjpxyë ets ja Jesús tyeety'atëty ko t'ënëmaay: Tëës nnäyajkäjpxyë, ka'apës ja nwinma'any tyëkatsëty, xëmëkyëjxm mijts mteety'atëty.

²² Paaty mëëtkyëjxm ja Jesús ja Dios xymyo'oyëm tu'uk ja käjpxytyu'unën mëti'ipë wäänë oyën.

²³ Nimay ja teety të y'itë, ka'ap jeky të tyuntë jä'ä ko të y'ooktë;

²⁴ e ja Jesús, jä'ä ko xëmëkyëjxm jyuuky'äty, paaty ja tyeety'äty xëmëkyëjxm.

²⁵ Paaty myäyë tyaj'ëwaatsëpëtsëmëty xëmëkyëjxm mëti'ipë myëwinkoontëpën ja Dios, jä'ä ko jyuuky'äty xëmëkyëjxm ets tninu'kxta'akëty ma ja Tiosën.

²⁶ E jëtu'un yë Jesús, të nyäxy Mëj teety wintsën mëti'ipë ënety nyajmëyajtëmën. Yë'ë kënu'kxy, wa'ats, ka'ap poky tmëëtëty, ka'ap pyokyjä'äyëty ijxtëm ëëtsajtëmën, wäänë këjxm yë'ë y'ity këtiinëm ja tsajp.

²⁷ Ka'ap jyëtu'unëty ijxtëm ja wiinkëtypë ja teety wintsënëtyën jëpom jëpompë tyaktën ja wintsë'kën ko pyokytyuntë, ets ko ja naax kajpn näjyëtu'un pyokytyuntë. Jesús tu'k'ok ojts je'eyë twintsë'ëkë ja Dios ko ojts yë'ë kë'ëm wyintsë'kën'aty ets ja ja'ay ja pyoky ojts nimä'kxtaayë.

²⁸ Ja Moisés ja y'ënä'ämën yë'ë nyikäjpxyp ets tyeetywintsën'atëty mëti'ipë pokyjyä'äyën, e ok ojts ja Dios nyäyajkäjpxyë ets ja y'u'unk teety wintsën y'itëty mëti'ipë xëmëkyëjxm tunëpën mëtëy.