Hebreos 4 - Biblia Dc en Mixe de Quetzaltepec

¹ Paatykyëjxm ma tyam njaakyajpatëmën ets ntëjkëmëty ma Dios ja pyo'kxtaknën, mëpaat näkyëwent'ajtëmë këtiipë pën wyë'ëmëty.

² Jä'ä ko ëëtsajtëm tëë nyajtuk'ëwa'anëmë ja aaw ayuk oypyë ijxtëm yë'ëjëty yajtuk'ëwa'anëtyën; je'eyëp ko yë'ëjëty ka'ap ojts tyajtuunkpaatë, nëkoopë tyajnatëkë'ajtë oy tjamëtoowtë, ka'ap tpuwa'këtyë mëti'ipë mëtoowtën mëët ja mëpëjkën.

³ E ëëts'ajtëmë, mëti'ipë ja Dios nmëpëjkëmën, tëkëja'anëm ma ja pyo'kxtaknën, ijxtëm ja Dios y'ënänyën: Paaty ojts n'ëwa'antä'äkyës ko xyajjoot'anpëktës ets n'ënanyës ko: Nijëna'a kyatëkëtëty maas ja npo'kxtaknën. Jëtu'un ja Dios y'ënäny oy tjayaj'apatëy ja tyuunk ko tyajtso'ontäky ja naaxwiinyëtë.

⁴ Jää jatu'kpëky jaaypyety y'ity wi'ix ja wëxtujk xëëwpë: Ko ojts ja Dios ja tyuunk tyaj'apaatë, kom wëxtujk xëëw ojts pyo'kxy.

⁵ Ets nän tap y'ënaankojnëpë ma jaaypyety y'ityën: Nijëna'a kyatëkëtëty maas ja npo'kxtaknën.

⁶ Jaaktëkoy'ajtëpnëm yë ja'ay ets jyaak tëkëtë ma tääpë po'kxtaknën, mëët jä'ä ko kyäjpxykyumëtoownajxtë mëti'ipë jëyëjp jyamëtoow'ijtën ja aaw ayuk paaty ojts ka'ap tyëkëtë.

⁷ Paaty ja Dios jatëkok të tpëjktä'äky tu'uk ja xëëw, tyampë, mëti'ipë ja Dios ojts tuknikäjpxyën ja David, ko y'ënäny: Pën mëmëtoowtëp miits ja Dios ja y'aaw y'ayuk, këtii ja mjot mwinma'any juun xypyëjkta'aktëty.

⁸ Ko jeexyë ja Josué ojts tmo'oy ja po'kxtakn ja Israel ja'ayëty, ka'ap jeexyë ja Dios ja wiinkpë xëëw të tnikäjpxy.

⁹ Paatykyëjxm ja po'kxtakn të jyaak wë'ëmy ets ja Dios ja jyä'äy tpaatëty ma pyo'kxtëtyën.

¹⁰ Pën tëjkëp ma ja Dios ja pyo'kxtaknën, po'kxëp jä'ä ko ënety ja tyuunk tyaj'apaatë, jëtu'un ijxtëm ja Dios ojts pyo'kxyën ko tyaj'apatëy ja tyuunk.

¹¹ Tsojk njotmay'ajtëm ets ntëjkëmëty ma ya'atë po'kxtaknën këtiipë ja jëtu'unpë ja winma'any npanëjkxmëty ijxtëm y'ëtëtstën mëti'ipë ka'ap tmëpëjktën ja Dios.

¹² Ja Dios ja y'aaw y'ayuk myëët'ajtyp ja juukyajtën ets ja mëk'ajtën. Ni'ik jyëjpëty këtiinëm ja tëypyujxn tëëpë mäjtskpa'a yajme'eyën; tyukku'umëtyääpy ja jot winma'any këkpaat; ets tpaye'eytyä'äy pën tii pën myëmääpy myëtäjpy.

¹³ Nitii tkajëkyepy ja Dios yajtukwinkuyu'utsëty mëti'ipë të tyajkojyën, aak wyintum wyinkujkm winë yajpata'ay, ets ma yë'ëjën nëjkx nkë'ëyajkta'ayëm tëkokyë tii të ntu'un të nkajpxëmën.

Jesukristë, ja teety wintsën mëti'ipë pa'ëyoopën

¹⁴ Jesús, ja Dios U'unk, yë'ë ja nTeetywintsën'ajtëmë mëti'ipë të pya'tëkën tsajpjotm. Paatykyëjxm mëk ja mëpëjkën nmëët'ajtmëty mëti'ipë të mpatëmën.

¹⁵ Jä'ä ko ja nteety wintsën'ajtëmë, xypya'ëyo'owëm yë'ë ets nyija'awëp wi'ix nkamëtakëmën, jä'ä ko näjyëtu'un të yajpëjktä'äky wi'ix jeexyë pyokytyunyën, jëtu'un ijxtëm ëëtsajtëm nyaj'ijxmajtsëmën.

¹⁶ Tsojk nmëwinko'onëm ja Dios ja kyutujktakn akujk jotkujk, ets xypya'ëye'emyëty mëët ja y'oywyinma'any ets xypyutëjkëmëty ma ënety tii nyajmëyajtëmën.