Hebreos 12 - Biblia Dc en Mixe de Quetzaltepec

Mpëjktakëm ja jot winma'any ma ja Jesusën

¹ Paaty, ko të nnija'awëmë ko may ja ja'ay na'ëwtity yajpaatë mëti'ipë të myëpëktën, tsojk n'ëxmajtsëm tu'kë'ëyë mëti'ipë ëxëëktuunpën, ets ja poky mëti'ipë yajwinma'anyjyo'pën ets ntu'unmëty mëti'ipë ja Dios tsyojkpyën, ijxtëm ja ja'ay myëjaaw t'ixyën mëti'ipë pëyë'kijpxtëpën.

² Mpëjktakëm ja njoot'ajt nwinma'any'ajtëmë ma Jesusën, jä'ä ko yë'ë yäjkpy ets yajkä'pxyp ja nmëpëjkën'ajtëm. Ëyoow ja Jesús kruutskëjxm, ka'ap tmëjpëjktäky ja tsëtyu'un ko y'o'ky, jä'ä ko nyija'ap ënety ko ok y'ita'any ja xoontakën; tëë nyaaxweetsy aka'any'äämpy ma ja Dios ja kyutujktaknën.

³ Mëmay mëtajtë mëti'ipë yë Jesús të tnajtstunën, mëti'ipë kyu'ëyo'owën ja pokyjyä'äy ja nyëë pyoky; paaty miitsëty këtii m'ënu'kxëtë ets këtii mmontëty mtuktëty.

⁴ Ka'anëm miits m'ooktë ko mtsiptuntë mëët ja poky.

⁵ Miitsëty tëë xyjyä'ätyëkoytyë ja ayuk mëti'ipë Dios mtukmëkajpxëtëpën, ko mkajpxwijëtë ma m'u'unk'atëtën. Jëtu'un ja Dios ja y'aaw y'ayuk y'ënä'äny: Mijts, u'unk, mëjpëjkta'ak ko ja Wintsën tii mtukmëkajpxëtëty ets ko mjëjpwijtswinpitëtëty, ka'ap xy'ëxëëkjawëty ko m'ojëtëty.

⁶ Jä'ä ko ja Wintsën, yë'ë wyijtswinpijtyp mëti'ipë tsyojkpyën ets tsyäätsytyuunpy ni'ëmukë mëti'ipë y'ëxajëpën, jä'ä ko t'u'unk'aty.

⁷ Mëtänëtë ja ëyo'on jotmay. Paaty ja Dios mwijtswinpitëtë jä'ä ko m'u'unk'atëtë. ¿Ëkë jää jëtää ja u'unk ëna'k mëti'ipë ka'ap ja tyeety wyijtswinpityënë?

⁸ Pën ka'ap ja Dios mwijtswinpitëtë ma m'u'unk'atëtën, ka'ap ënety m'u'unk'atëtë; jëtu'un ja tpaaty ijxtëm jeexyë miits wiink ja'ay m'u'unk'atëtën.

⁹ Näyjyëtu'un ko të nmutsk'ajtëm, tëë ja nteety'ajtëm yaa naaxwiiny xywyijtswinpijtën ets tëë nwintsë'këm. ¿E tii ko nkawintsë'këmëty ja Dios, mëti'ipë tsajpjotmën? Wä'än xywyijtswinpijtën ets npatmëty ja juukyajtën.

¹⁰ Ja nteety'ajtëm yaapë naaxwiinyëtën xytyuk'ojëm ijty ko tii oy nkatu'unëm, jëtu'un ijxtëm yë'ë oy tmëmay tmëtajtën; e ja Dios, yë'ë xytyukwijtswinpijtëm ets ntuk'oy'ajtmëty ets wa'ats n'ijtmëty ijxtëm yë'ë wa'ats y'ityën.

¹¹ Ko pën tii yajtuk'ojy ëkë yajtuk'ënëëmë ka'ap oy nyäjyawëty, ni'ikyë yajmëkjawë; e ko oy yajja'akyukë, oy ja ja'ay tukjuuky'äty ets mëtëy winë tuny.

Ja ëyo'on ko ja Tios ja y'aaw y'ayuk kyayajmëmëtoy

¹² Paaty miitsëty, yajjotmëkpëktë ja mkë'ë m'aawëty tëëpë y'ënu'kxën ets ja mkë'ë mtekyëty tëëpë xyuxyën;

¹³ ixta'atë ja tëytyu'u ets tsyo'okëty ja teky mëti'ipë ma'atën ets ka'ap ni'ikyë nyäwëty.

¹⁴ Jotkujk itë mëët ja ja'ayëty oypyënëty ets wa'ats mjuuky'atëty. Pën ka'ap wa'ats jyuuky'äty, ka'ap ja Dios nëjkx t'ixy.

¹⁵ Nämyëjotëkoyëtë këtiipë pën tyëkoy'ajtxëtëty ja Dios ja tsyojkën jya'awën. Nitu'uk mka'itëty ijxtëm ja ta'am ujtsën mëti'ipë pa'amtuunpën ets mayjyä'äy tukpaaty.

¹⁶ Exkëm miits nitu'uk mjot mnini'kx xytyo'knëtë, këtii xypyäxtëty ja Dios ja myëj'ajtën, ijxtëm ja Esaú y'ëtitsyën ko ja kyä'äxkopk'ajtën ojts tukwinkupëky ja tojkx mëti'ipë je'eyë tu'k'ok tyojkxën.

¹⁷ Ets mnija'awëtëp miits ko ja tyeety ka'ap myooyë ja kënu'kxën ko ojts ok tja''amëtoownë jëëpy yaxp, niwi'ix'äämpy ojts kya'ëk'o'oyënë ets tyëkatsëty mëti'ipë ënety të tunyën.

¹⁸ Miitsëty ka'ap ojts tii xymyëwinkontë, ijxtëm ja Israel ja'ayëtyën, mëti'ipë yajtoonpën ets mëti'ipë toopyën jëënjoty, ma ënety kyootsëtyën ets ma ënety myëkpojyën;

¹⁹ ni ja xuxn ojts xykyamëtowtë, ni ja Dios ja y'aaw yo'kn. Mëti'ipë myëtoowtë ja aaw yo'kn ojts tmënu'kxta'aktë ja Moisés këtiipë y'ëkmëkajpxënëtëty,

²⁰ jä'ä ko ka'ap tmëtënaaytyë ja ënä'ämën, mëti'ipë ënaanpën: Pën najtswa'këp ma ja kopkën, kopkpëky ko y'ookëty kuka'atsy, ëkë mëët ja ku'umën, oy yë'ëjëty yë jëyujk.

²¹ Atsë'ëk ajawë ojts t'ixtë. Yë'ëpaat yë Moisés y'ënäny: Tsëyuupyës mëët ja tsë'ëkë.

²² E miitsëty tëë xymyëwinkontë ja Sión kopk, ma ja Jerusalén tsajpjotmëpën, ja Dios Juukpyë myëjkajpn, ma kanaak mil ja tsajpjotmëtë kukäjpxy nyämyukyën jotkujk ets ja Dios tyajmëjnaxtë.

²³ Näy tëë xymyëwinkontë nimay ja Dios ja y'u'unk y'ëna'k mëti'ipë ja xyëëw jaaypyety tsajpjotm yajpatëpën. Miits të xymyëwinkontë ja Dios, mëti'ipë ni'ëmukë ja ja'ay pyaye'eytyëpën ets nän miits të xymyëwinkontë ja ja'ay jyot wyinma'anyëty mëti'ipë oyjyä'äy'ajtë ets ojts y'ooktë ets ja Dios ojts pyëjkta'akëtë oy wa'ats,

²⁴ tëë ja Jesús xymyëwinkontë, mëët ko ja Dios të tuny ja jempyë käjpxytyu'unën ja Jesús mëti'ipë nye'pyny y'ëxmajtsën ko ojts tyäxy jyä'äy ets wäänë oy nimëtyä'äky këtiinëm ja Abel ja nye'pyny.

²⁵ Näkyëwent'atëtë, mëmëtowtë ja Dios. Mëti'ipë ja Dios kyamëmëtoowtën ko ojts jyamëkajpxëtë yaa naaxwiiny, kyëpäjtë jä'ä. Näyjyëtu'un nëjkx njajtëm pën npäjxëm mëti'ipë xymyëkajpxëmën tsajpjotm.

²⁶ Ko ja Dios ojts kyäjpxy kopkëjxm, ojts yu'kxy ja naaxwiinyëtë, e tyam jëtu'un y'ënä'äny: Nyajyu'kxäämpyës jatëkok ja naax; je'eyëp ko ka'ap yi'iyëty naax, näjyëtu'un ja tsajp.

²⁷ Ko ja Dios y'ënä'äny ko jatëkok tyajyu'kxa'any ja naax ets ja tsajp, jëtu'un yajja'akyukë ko tyajkwintëkooytya'aja'any tu'kë'ëyë mëti'ipë ojts tpëjktä'äkyën ets y'ita'any xëmëkyëjxm mëti'ipë ka'ap yu'kxyën.

²⁸ Ja Dios xymyo'oja'anëm mëti'ipë ka'ap yu'kxyën, paaty ja Dios nkukajpxëmëty ets nmëjja'awëmëty njaantyja'awëmëty oyjyot oywyinma'any mëët ijxtëm tsokyën.

²⁹ Jä'ä ko jëtu'un ja nTios'ajtëmë ijxtëm ja jëënën mëti'ipë yajtooytyëkoopyën winë.