Hebreos 10 - Biblia Dc en Mixe de Quetzaltepec

¹ Ja Dios ja y'ënä'ämën mëti'ipë Moisés jyääywyë'ëmën, jëtu'un jä'ä ijxtëm jeexyë nyikojtu'utyën ja oypyë mëti'ipë ënety minaanpën, ka'ap jyä'äjëty mëti'ipë mëtëyën. Paaty ja ënä'ämën ka'ap tyaj'awinpity oy mëti'ipë ja wintsë'kën winjëmëjt jyayajktëpën Dios wintum.

² Ko jeexyë ja ënä'ämën yajpokywyä'ätsy, ka'ap jeexyë tii poky tjawëtë ets ka'ap jeexyë ja wintsë'kën t'ëkyajknëtë.

³ Ko ja wintsë'kën tyaktë winjëmëjt, yë'ë tukja'amyäjtsëtëp ko pyokymyëët'atë

⁴ jä'ä ko ka'ap ja tsajpkaa ne'pyny, tsajppax ne'pyny yajpokywyä'ätsy.

⁵ Paaty ja Kristë t'ënëmaay ja Dios ko myiiny naaxwiiny: Mijts ka'ap xytsyoky ets myajtukwintsë'ëkëty ja jëyujk, ëjts tëëjës xymyo'oy ja ni'kx kopk.

⁶ Ka'ap të xy'oyjyawë ko jëyujk jyëëntë'ëtsy ets ko myajtukwintsë'ëkë winë ets jeexyë ja pyoky jyënäky.

⁷ Ënätës të n'ëna'any: Mijts Dios, tyaajës, jëtu'un ijxtëm jaaypyety y'ityën etsës ntunëty mëti'ipë mijts mtsojkpyën.

⁸ Tëë ja Kristë jëwyiin nimëtyä'äky ko ja Dios ka'ap tsoky ets ka'ap tukjotkëtä'äky ja wintsë'kën ko ja ja'ay ja jëyujk tjayaj'ooktë ets tyajnitoytyë ets ja poky jeexyë wya'atstë.

⁹ Ënet ja Kristë y'ënäny: Tyaajës nminy etsës ntuna'any mëti'ipë mijts mtsojkpyën. Jä'ä yajja'akyukë, ets tjëpëkëky ja wintsë'kën ka'apë y'ëktuunën ets tpëjkta'akëty ja jempë.

¹⁰ E tëë ja Dios xykyënu'kxëmë jä'ä ko ja Jesukristë të tuny mëti'ipë ja Dios tsyojkpyën, tëë tkë'ëyäky ja nyi'kx kyopk ets të wyintsë'kën'aty je'eyë tu'ktëkokyë.

¹¹ Jëpom jëpom ja teetyëjk tyaktë ja wintsë'kën, oy ja poky tkayajwa'atsy.

¹² E ja Kristë tëë tyäky ja wintsë'kën tu'k'okyë ko ja ja'ay pyokymëët'atë, tääts nyaaxwe'tsy Dios y'aka'any'äämpy.

¹³ Jam y'ëwxity koonëm yë Dios tmëmëtakta'ajëty yë myëtsip,

¹⁴ Jä'ä ko tu'ukyë ja wintsë'kën të y'ity ets xëmëkyëjxm të tyajwatsta'ay tëkokyë mëti'ipë ja Dios të kyënu'kxëtën.

¹⁵ Ets ja Kënu'kxymyëkajtën tnikajpxë ko y'ënä'äny:

¹⁶ Ja käjpxytyu'unën mëti'ipës ntunäämpyën, yë'ë ya'atë, jëtu'un y'ënä'äny ja Wintsën: npëjkta'akäämpyës ja ënä'ämën ma jyuukyjotmën ets njaaypyäta'anyës ma wyinma'anyëtyën.

¹⁷ Ets nijëna'ajës nkaja'amyätsa'anyës ja pyokyëty ets ja y'ëxu'uktu'un y'ëxëëk kajpxënëty.

¹⁸ Jëtu'un, ko yë poky tëë yajnimä'kxnë, ka'ap y'ëkkopkpëky'ajnë yajyakëty ja wintsë'kën mëti'ipë ja poky yajtukunajxpën.

Mëwinkontë ja Tios

¹⁹ Mëku'uktëjkëty, tyam jyëkyejpy ntëjkëmëty akujk jotkujk jap tsajptëkoty mëët ko ja Jesukristë ja nye'pyny të temy të tje'etsy,

²⁰ ets yajpanëjkxëty ja jemytyu'u mëti'ipë juukyajtën tukpatpën, mëti'ipë ojts tyajniku'ëwa'atsyën ko wit atëëytyuk ojts kyë'ëtswä'kxy jap tsajptëkoty, yë'ë tyijpy ja jyot nyi'kx ko tsyëtyujty wyintëkooy.

²¹ Jä'ä ko ja Jesús yë'ë nTeetywintsën'ajtëm mëti'ipë yajpatpën ma ja Dios ja tyëjkën.

²² Tsojk nmëwinko'onëm ja Dios ëmuumtu'ukjot ets tsojk nmëpëjkëmë; wa'ats ja jot winma'any nmëët'ajtmëty ets ja jot nini'kx.

²³ Tsojk njëjp'ijxëm ëmuumtu'ukjot mëti'ipë ja'ay ntukmëmëtyakëmën, jä'ä ko Dios, kyuuytyuunpy mëti'ipë wyaantäkpyën.

²⁴ Tsojk n'ixta'ayëm wi'ix nnäpyutëjkëmëty nixim niyam, wi'ix nätsyojkëmëty ets wi'ix ntu'unmëty ja oypyë.

²⁵ Ka'ap nye'eytyujkmëty ma nye'eymyujkëmën, ijxtëm jënaakën y'ëtë'ëtstën, näjyotmëkwinkajpxëmë nixim niyam; tyam wäänëni'ik tsyokyë ko ja xëëw wyinkoonën ma ja Jesukristë myina'anyën.

²⁶ Pën nnija'awëm ëëtsajtëm ja mëtëypyë ets npokytyu'un'ëtëtsëm, ka'ap ma tiinë ja wintsë'kën mëti'ipë poky yajwa'atsëpën,

²⁷ yi'iyë ja ëyo'on njëjp'ijxënëp ets ja tëytyu'unën ets mëj jëën ma y'ëyowtëtyën mëti'ipë ja Dios myëtsip'ajtëpën.

²⁸ Ko ijty pën tkapatuny ja Moisés ja y'ënä'ämën, o'kp ijty, jä'ä ko tam ja mëti'ipë ni'ë'ënëpën nimäjtsk nitëkëëk, paaty ka'ap yajpa'ëyoy,

²⁹ ¿wi'ix jëtää tkapaatëty ja tëytyu'unën mëti'ipë ja Dios U'unk kyamëjpëjktäkpyën, mëti'ipë jëtu'un tyuuntëpën ijxtëm jeexyë t'atään tuktääntën; mëti'ipë pyäjxtëpën ja Jesús ko të y'ooky ets ka'ap t'oyjya'awëtë ja Kënu'kxymyëkajtën, mëti'ipë tsojkëtëpën? Tääpë ne'pny yë'ë myë'ijtyp ja käjpxytyu'unën ets yë'ë mëët të yajkënu'kxtë.

³⁰ Nnija'awëm ëëtsajtëm ko Dios të y'ënä'äny: Ëjts xypyaat'ajtp ets yajpaye'eyëty, ëjts ntukëpätëp. Ets ko näjyëtu'un y'ënä'äny: Yë Wintsën pyaye'eyäämpy yë nyaax kyajpn.

³¹ Mëj ëyo'on yë'ë ko Dios Juukpyë xytyiytyu'unmëty.

³² Këtii xyjyä'ätyëkoytyë ja xëës jëmëjt mëti'ipë të nyäxyën ma të xymyëpëktën ja Dios ja y'aaw y'ayuk, amëk jotmëk ojts xymyënax xyajnaxtë ja ëyo'on jotmay.

³³ Tam miits jënaakën myajwinkajpx myajjëjpkajpxtë ets ëxëëk myajtuntë jam mayjyä'äyjotm. Näy tam miits wiinkëtypë ja mmëku'uk mëj'ëyoowpätëtë mëti'ipë jëtu'un jajtëp këpäjtëpën.

³⁴ Ojts xypya'ëyowtë ja tsumyjä'äy ets jotkujk ojts xymyo'otë mëti'ipë ënety mjä'ä'ajtëpën ko myaj'amëtoowtë, jä'ä ko xynyijawëtë ko wäänë oypyë mmëët'ajtëp jam tsajpjotm mëti'ipë xëmëkyëjxm ijtpën.

³⁵ Paaty miitsëty jam xypyëjkta'aktëty ja mjot mwinma'anyëty ma Tiosën. Yë'ë nëjkx këjää mmo'ojëtë ja kuma'ayën.

³⁶ Mëët'atë ja mä'kxtujkën. Ko xytyuntëty ijxtëm ja Dios tsokyën, ënät nëjkx xyjyä'ä'atë mëti'ipës ja Dios të twaantä'äkyën.

³⁷ Jëtu'un ja Dios ja y'aaw y'ayuk y'ënä'äny: Mëti'ipë minaanpën, tsojk jä'ä myina'any, ka'ap pyo'oxa'any.

³⁸ Yë n'u'unkës mëtëy jyuuky'ata'any mëët ja mëpëjkën; jää tëy ko tyu'utëkatsëty ka'apës nëjkx oy näjyawëty.

³⁹ Ka'apës njëtu'un'atë ijxtëm y'ëtë'ëtstën mëti'ipë tu'utëkajtstëpën ets tyu'utëkoytyë, yë'ëjës nmëjwa'kpäjtëp mëti'ipë mëpëjktëpën ets ja nitsokën tpaatë.