Hageo 2 - Biblia Dc en Mixe de Quetzaltepec

Ja jemtsyajptëjk ja myëj'ajt y'oyajtën

¹ Ma y'i'px tu'uk anyën ja mëwëxtujkpo'opë, jää ojts yë Dios jatëkok tmëkäjpxy yë käjpxynyajxpë Hageo,

² ets tuknipëjky t'ënëëmëty ja Zorobabel, ja Josué ets ja ja'ayëty:

³ Pënjaty y'ijxtën wi'ix ijty oy yë tsajptëjk kyëxë'ëkyën ets ko t'ijxkijpxtëty mëët mëti'ipë tyamën, ¿mëti'ipë ni'ik oy këxë'kp, këtii jyä'äjëty mëti'ipë ijty tëëyëp jääjënë?

⁴ Zorobabel, jotmëk yajpaat. Josué jotmëk it, ma xynyiwintsën'atyën yë teetytyëjkëty ets nitëkokyë miitsëty kunaax kukajpnëty tuntë mëtowtë, ëjts tääjës nyajpaaty mëët miitsëty. Ëjts, mëti'ipë Wintsën'ajtpën, mëti'ipë maaytyääyëpën winë, ëjts ënaanp.

⁵ Jëtu'un ijxtëm ojts ntukwinwanëtën ko jap Egiptë mtso'ontë, yë njot nwinma'anyës xëmë yajpaaty ma miitsëtyën. Këtii mtsë'ëkëtë.

⁶ Ëjts tsojkës nyajyu'kxa'any yë naaxwiinyëtë ets tsajp, yë mejy ets mëti'ipë ta'tspëkyën.

⁷ Nyajyu'kxta'ajäämpyës yë naax kajpn wiinkëtypë muum yajpaatën ets tmëmintëty yë wyit myeenyëty ets jyotkujk'ajtënëty maas yë ntsajptëjkën ets ja ntsajptëjkës y'utsa'any mëët yë mëj'ajt oyajtën. Yë Wintsën mëti'ipë maaytyääyëpën winë, yë'ë jëtu'un ënaanp.

⁸ Ëjts yë poop pujxn ets pu'ts pujxn njä'ä'ajtyp.

⁹ Ya'atë tsajptëjk, mëmäjtskpë yam kyojyën ni'ik oy ni'ik y'ita'any këtiinëm jyëtu'unëty ja mëjëyëjpë. Ënätnëm nëjkx jyää'aty yaa ja jotkujk'ajtën. Ëjts Wintsën, mëti'ipë maaytyääyëpën winë, ëjts ënaanp.

Ma ja Tios t'ojyën ja kajpn ka'apë myëj'ixyën

¹⁰ Ma y'i'px taxk anyën ja mëtaxtujk po'opë nän jää jëmëjt ma ja Darío yajkutukyën, jää ojts yë Wintsën tmëkäjpxy yë Hageo käjpxynyajxpë,

¹¹ ets tyuknipëjkë ets mëët ja Dios xyëëwkyëjxm, mëti'ipë maaytyääyëpën winë tyajtëwëty ja teetytyëjkëty wi'ix tnijawëtë ja ënä'ämën kuttujkën:

¹² Ko tu'uk yë ja'ay tsu'utsy tmënëjkxëty winpity mëët yë wit ets ja wit tpaatëty ja tsajpkääky, ja tojkx, ja tsatym nyëë, ja on ëkë tukka'any: ¿Yë'ëkyëjxm ënety wa'ats të wyi'imyë? Ets ja teetytyëjkëty y'ëtsoowtë ko ka'ap.

¹³ Ënet ja Hageo käjpxynyajxpë jyaak'ënany: Ets nyajtëëy näjyëtu'un: Mpëjktakmëty tu'uk yë ja'ay, mëti'ipë ëxëëk të wyi'imyën ko yë o'kpë të tony ets näjyëtu'un tonëty oytyiijëty mëti'ipë yam të yajnikäjpxyën: ¿Wä'än jëtää ëxëëk wyë'ëmëty mëti'ipë ënety tyoomypyënë? Ënet ja teetytyëjkëty y'ëtsoowtë ko jëtu'un.

¹⁴ Ënet ja Hageo y'ënäny: Jëtu'un yë Wintsën y'ënä'äny: Ko nän timjëtu'un jyäty kyëpety ma ya'atë ja'ayëtyën, tëkokyë mëti'ipë tyuuntëpën ets mëti'ipë wyintsë'kën'ajtëpën aak ëxëëk yë'ë.

¹⁵ Tyam jëtu'un mmaytyëty mtajtëty naamka'anëm xykyojtso'onta'aktë ja tsajptëjk,

¹⁶ ¿tiitën ko ijty jëtu'un mjatë mkëpätë? Ko ijty pën tninëjkx i'px tsim ja tsajpmok, je'eyë majk tsim tpaaty; ets ko ijty pën nyijkxy jam ma tsatym nyëë nyäxyën ets wëxtyikxy majk tu'ts tpëka'any, je'eyë ijty tpëky i'px tu'ts.

¹⁷ Ëjts ojtsës nyajma'ta'ay mëët yë tëtsn tuu yë mpëjktä'äkyëty ets pya'amtëjkëtyääy, e miitsëty ka'apës xyjyä'ämyajtstë. Ëjts Wintsën, ëjts ënaanp.

¹⁸ Tyam, ma y'i'px taxk anyën yë mëtaxtujk po'opë, tëë nyipëtë'ëkë yë ntsajptëjkës.

¹⁹ Ëk'ixtë, tyam ka'ap y'ëmaaytya'aka'any jë'kxy pëky ma mjëën mtëjkëtyën. Ka'anëm tpaaty ma tsatym pyëti'ikyën ets higos, granadas ets olivë yajtuunk'atyën, ëjts yam miitsëty nkënu'kxta'ajantëp.

Ma Wintsën winë tukwinwanën yë Zorobabel

²⁰ Jä'ä xëëw ojts yë Dios jatëkok tmëkäjpxy yë Hageo,

²¹ ets tuknipëjky t'ënëëmëty yë Zorobabel, ja Judá yajkutujkpën: Nyajyu'kxäämpyës yë tsajp ets naaxwiinyëtë;

²² nyajkutëkoyäämpyës yë yajkutujkpëtëjk naaxwiinypë ets nyajkujijnaxa'anyës yë pyo'kxtaknëty; nyajma'atäämpyës yë pyujxn wintëkäämpëty mëti'ipë myëtsiptuuntëpën etsës nyajkënajxta'aja'any mëti'ipë jam ënyääytyëpën ets y'o'kta'atëty yë kyëwaayëty ets mëti'ipë këwaaytyuk'ënyääytyëpën; nitu'ukjaty aakyë'ë nëjkx kyupuxëtë yë myëkä'äxtëjkëty.

²³ Jä'ä xëëw, mijts Zorobabel, mëti'ipës ntuunpë'ajtypyën nëjkx nkuwa'any ets jëtu'un nëjkx ntimy myëët'aty tääjës nmëët'atyën yë nkë'ëjiitsës mëti'ipës winë noky ntuktsääpyën, jä'ä koos mijts kë'ëm të nwin'ixy. Ëjts Wintsën, mëti'ipë maaytyääyëpën winë, ëjts ënaanp.