Habacuc 1 - Biblia Dc en Mixe de Quetzaltepec

Ma käjpxynyajxpë myëtyä'äkyën mëët yë Wintsën

¹ Ya'atë aaw ayuk ojts yë Wintsën tuknijawë yë Habacuc käjpxynyajxpë.

² Wintsën, ¿jëna'a xy'ëtsowa'anyës? njaniyäxy njanijojkpyës yë näypyutëkë. ¿Jëna'ajës xyajtso'oka'any? Ëjts wiinkës yë tsip käjpxy n'ixy.

³ ¿Tii ko xytyuk'ixyës yë monyëtukyë ets ëxëëkpë tu'unën kajpxën? Tsip käjpxy ets o'kën tëko'oyën je'eyë ijtp nwintuuy npë'aayës; xiitsow yaatsow aak tsiptuump ets näyajjoot'anpëjkëp yë ja'ay.

⁴ Ka'ap ja ënä'ämën tëyajtën tyuny, ka'ap tii mëtëy yajnipaye'ey, ja ëxëëk ja'ay y'ixjëtijtyp pyajëtijtyp ja oyjyä'äy ets ma'tnëp ja tëyajtën.

⁵ Ixtë ja naax kajpn mëti'ipë mëët mnäpyaatëtën; ixtë wi'ix jyatë kyëpätë ets mtsë'ëkëtëty. Ëjts mëjës winë ntuna'any ets ka'ap nëjkx xymyëpëktë ko pën mjatukmëmëtya'akëtëty.

⁶ Ëjts yë'ëjës yam yë caldeo ja'ay nyajtsiptunantëp, ëxëëk tääpë ja'ay jyä'äy'atë, y'aye'eytyääytyëp yë naaxwiinyëtë ets tjä'äpëktë mëti'ipë ka'ap tjä'ä'atën.

⁷ Ëxëëkëm kyëxë'knëtë ets atsë'ëk ajawë yaj'ijxnëtë, yë'ëjëty kyë'ëmtëyajtën mëët myëta'aktë, ka'ap nimëti'ipë ënä'ämën kuttujkën t'ixkaptë.

⁸ Ni'ik yë kyëwaayëty pe'tym pyëyë'knëtë këtiinëm jyëtu'un'atë yë kaa; ni'ik y'ajëjnëtë këtiinëm jyëtu'un'atë yë wax të'ëts'itjotmëpë. Nimay yë kyëwaayëty jyänty myintë pëyi'ikyë ma jam ja tsip y'ita'anyën, jëtu'un myintë tä yë witsn tnikëtä'äkyën yë jëyujk mëti'ipë myatsäämpyën.

⁹ Maajaty nyäxyën ëxëëk y'ëti'itsy; maajaty nyëjkxtën aak tsë'k aak ja'awëtyëp yë ja'ay, jëtu'un tä yë poj twinpäätë'ëkyën yë jin jam të'ëts'itjotm jëtu'un yë ja'ay tsumtë tmatstë

¹⁰ Nyëxik tyukxiktëp yë yajkutujkpëtëjk ets mëti'ipë ja'ay mëj'äämpy yajpatëpën. Je'eyë tnëxi'ik tukxi'iktë yë naax kajpn mëti'ipë këwent'aty ijtpën jä'ä ko yë'ëjëty ko jëtu'unpë kajpn tnitëkëja'antë je'eyë twinwëëtëtë ets jap tyëkëtë.

¹¹ Mëk pojën nyaxtë ets ka'ap nimëti'ipë tios mëj t'ixtë, yi'iyë tyukjotkujk'ajtëp yë jyot myëjaawëty.

¹² Mijts Wintsën, xëmëkyëjxm mjuuky'äty ets wa'ats mTios'aty ¿këtiijë? Wintsën, mëti'ipës xykyuwaanp xynyixajpën, mijts të xymyo'oy mëk'ajtën yë caldeo ja'ayëty ets yë'ë tuntëty ja paye'eyën.

¹³ Mijts wa'ats ni'ik myajpaaty ka'ap tjëkyepy xy'oyjyawëty yë ëxëëkpë ets ka'ap tjëkyepy xy'oy ixëty yë ma'atpë; ¿wi'ix ko amonyë m'ity ko yë ja'ay yajja'ay'ooktë ets ka'ap tii ayuk xykyäjpxy ko ëxëëkja'aytyëjk tyajtëkoy ja mëti'ipë jëtu'un katim ja'ay'ajtpën tä yë'ëjën?

¹⁴ ¿Wi'ix ko ja'ay jëtu'un xyajjaty nëë jëyujkën ets jëtu'un winë tuntë aayjëyujk ujtsjëyujkën mëti'ipë ka'ap pën tyu'uwinwoopën?

¹⁵ Yë caldeo ja'ayëty jëtu'un yë naax kajpn tuntë, tä ja'ay nyëë jëyujk matsyën, tä ja'ay nëë jëyujk txuyën ets tjëpipyën ets ko ënät t'ixy tëë may tmatsy tääts tukxoontä'äky.

¹⁶ Paaty yë ja'ay mëti'ipë nëë jëyujk majtspën jëtu'un yaj'ixy y'ëwtajtyp yowë tsyääy ets xyu'uny ets tyimwintoopy tyimwinno'kpy mëët yë poom ets yäjkpy yë nyiwintsë'kën, jä'ä ko jam jyi'kxypyääty.

¹⁷ ¿Jëtu'un jëtääjën yë caldeo ja'ay ënät jeky ëëts xymyëët'ata'antë tä yë ja'ay nëë jëyujk txuyën ets tjëpipyënë? ¿Jëtu'un jëtääjën je'eyë xëmë yajja'ay'ooka'antë ets ka'ap ni pën tpa'ëyowa'antë?