Génesis 9 - Biblia Dc en Mixe de Quetzaltepec

Ja käjpxytyu'unën mëti'ipë tyuunën ja Tios mëët yë Noé

¹ Dios ojts tkënu'kxy yë Noé mëët yë y'u'unk y'ëna'k ets y'ënäny: Mëët'atë yë m'u'unk m'ëna'këty nimay ets xyajwintuktëty yë naaxwiinyëtë.

² Tu'kë'ëyë jëyujk naaxwiinypë jyuuky'atën nëjkxëp mtsë'ëkëtë. Tu'kë'ëyë jëyujkëty mëti'ipë pojotm kääkjëtijtëpën, naaxkëjxypyë ets nëëjotypë y'itën, jam yajpata'atë ma kyutujkënën.

³ Jyëkyejpy mijts xytsyu'utstëty xyjyë'kxtëty oymyëti'ipë jëyujkëty ets oymyëti'ipë aay myëti'ipë ujtsëty, mëti'ipë ënety mtsojkën'ajtëpën. Ëjts nyäjkpyës yam.

⁴ Yë'ë tëy ka'ap xyjyë'kxtëty yë ne'pny, tsu'utsy mëti'ipë ne'pnytyuk'ookën këtii yë xyjyë'kxtëty. Jä'ä ko yë ne'pny, yë'ë juukyajtën'ajtp.

⁵ Ëjts nyajtëwäämpyës yë jyot nye'pyny yë ja'ayëty ets jëyujkëty nitu'ukjaty. Ko ënety pën yë myëku'uk täämë tjä'tsë yë jyot nye'pyny nipaye'eyäämpyës yë'ë.

⁶ Pën yë myëku'uk yaj'o'kpy, nän ja'ay nëjkx yaj'ookyë. Jä'ä ko yë naaxwiinyëtë ja'ay jëtu'un yë të kyojy ijxtëm yë Dios kë'ëm y'ixëtyën.

⁷ E miitsëty may yë u'unk maay xymyëët'atëty, ets yë'ë tyajwintuktëty yë naaxwiinyëtë.

⁸ Dios näjyëtu'un t'ënëmaay yë Noé ets y'u'unk y'ëna'k:

⁹ Ëk'ixtë yajxon; ëjts käjpxytyu'unën ntunäämpyës mëët miitsëty ets mëët yë m'u'unk m'okëty,

¹⁰ ets jëyujkëty mëti'ipë të mpapëtsëmëtën jap kepy nëëwinye'epyëjoty: joon, jëyujkëty mëti'ipë yujyëtyën ets mëti'ipë ëwa'anëtyën ets jëyujkëty jënu'un naaxwiiny naaxkëjxy y'itën.

¹¹ Yë nkäjpxytyu'unënës mëti'ipës yam ntuunpyën mëët miitsëty, kajëna'a kyatëkatsëty. Ka'apës n'ëkyajkutëkoyanë yë naaxwiinyëtë ja'ayëty ets jëyujkëty mëët yë komtuu. Ka'ap jëtu'un y'ëkomtuunëty ets naaxwiinyëtë jatëkok nyikoompätëty.

¹² Ya'atë jëtu'un wa'anëp ijxpäjtën xëmëkyëjxm, ko yë käjpxytyu'unën të ntu'unëm mëët miitsëty ets mëët yë jëyujkëty.

¹³ Tyamës të npëjktä'äky yë n'i'tsyës mëti'ipë yajtuk'ixëp koos yaa naaxkëjxy yë nkäjpxy tyu'unën nyajwë'ëmy.

¹⁴ Koos yë poj yoots nyajminëty, yë n'ityës yë'ë jam ënätyë nänyikëxë'ëkëtëp.

¹⁵ Ënätës yë'ë ntukja'amyätsëty koos ënety ëjts ja käjpxytyu'unën të ntuny mëët miitsëty ets mëët ja jëyujkëty ets ka'ap y'ëkjää'ajtnëty ja nëë tuu mëti'ipë yajkutëkoyëpën ja naaxwiinyëtë.

¹⁶ Ko yë i'ty nyänyikëxë'ëkëtëty yootsjoty etsës n'ixëty, yë'ëjës ntukja'amyätsëp koos ënety ja nkäjpxy tyu'unën të ntuny mëët ja ja'ay ets ja jëyujk mëti'ipë naaxwiiny ijtëpën.

¹⁷ Ya'atë jëtu'un ijxpäjtën'ajtp, mëti'ipës nyajwë'ëmpyën ma naaxwiinyëtë ja'ayën ets ma jëyujkën naaxwiinypë y'itën tsyëënëtën. Jëtu'un ojts yë Dios myëtyä'äky mëët yë Noé.

Yë Noé ets ja y'u'unk y'ëna'k

¹⁸ Yë y'u'unk y'ëna'k yë Noé mëti'ipë ojts pyëtsëmtën jap ma ja kepytyëjkën nëëwinye'epyë, jä'ä ojts txëëwatë Sem, Cam, yë tyeety yë Canaán ets Jafed.

¹⁹ Ya'atë jëtu'un y'u'unk'ajt y'ëna'k'ajt yë Noé ets yë'ë ojts jatëkok tyajwintuktë yë naaxwiinyëtë.

²⁰ Yë Noé naaxtuunpë ja'ay ijty, yë'ë ojts ëka'any tpeny tkojy ja ujtstëëm mëti'ipë yajtijpën tsatsymtsya'am.

²¹ Tëkok yë Noé ojts t'uuky yë tsatym nyëë mëti'ipë të nyimaanaxyën ets ojts myukpëjkënë ets ojts jäpyë myaanaxy tyëjk'itkujky niwa'ats ëxwa'ats.

²² Ko jëtu'un ja Cam t'ijxy ja Canaán ja tyeety, ko ja Noé niwa'ats ëxwa'ats jap kyo'knë tëjk'itkujky, ënät ojts ja myëkä'äx tukmëmëtyä'äky ja nimäjtskpë.

²³ Ënet ja Sem ets ja Jafed t'ijxtë tu'uk ja wit ets nyätyukejkyjyëpijpëtë ets ja tyeety ojts jä'ä tuknipä'äntë. Ënet ojts jatëkok wyimpitë ets wiinktsow nyajts'ixëtë, këtiipë ja tyeety t'ixtëty niwa'ats ëxwa'ats.

²⁴ Ko ja Noé ojts wyijy, ënät tnija'awëy ko ënety jëtu'un ja myaank ja mutskpë të y'ëti'itsy,

²⁵ ets y'ënäny: Poky y'itëty yë Canaán Tuumpë je'eyë wya'anëty ma ja nimäjtskpë y'äjtyën.

²⁶ Ënet ojts ok tjaaknikäjpxy ets jyaak'ënany: Yë nWintsënës Dios yë'ë kyënu'kxëp yë Sem, ets je'eyë tuunpë twa'anëty yë Canaán.

²⁷ Dios yajkutukëp yë Jafed ets myëjëty kyëjääjëty; ets jam näjyëtu'un jyuuky'atëty ma ja Sem ja tsyënaaytyaknën, ets yë'ë näjyëtu'un wya'anëp tuunpë yë Canaán.

²⁸ Ko ojts jëtu'un ja komtuu y'ëknaxy, jä'ä ojts yë Noé jyaakjuuky'äty tëkëëk mëko'px ja wëxtyikxy majk jëmëjt.

²⁹ Paaty ko ojts y'o'knë jä'ä ënety yë jyëmëjnë taxtujk mëko'px ja wëxtyikxy majk.