Génesis 8 - Biblia Dc en Mixe de Quetzaltepec

Ko ojts ja komtuu nyajxnë

¹ Ënet yë Dios ojts tja'amyetsy ja Noé ets ja jëyujkëty jënu'un ënety jap yajpaatën mëët ja Noé ma kepy nëëwinye'epyën. Tääts tyajpëtsëëmy yë jëënpoj naaxwiiny ets ojts ëka'any ja nëë jyënajktsoony.

² Ojts y'ëtuky ja mëj nëëjut mëti'ipë ënety jap të y'ëwa'atsyën naaxpa'tkë'p ets ja nëë tuu mëti'ipë ënety jam të kyupëjyën tsajpwinm. Jëtu'un'äämpy ojts ja tuu nyajxnë.

³ Ënet ëka'any ja nëë wäänjaty tyëtstso'onë. Ko mëko'px ja wëxtyikxy majk y'apejty kujk ënety ëka'any ja nëë tyëtsnë.

⁴ E ko myajkmokxmäjtsk aany ja mëwëxtujkpë ja po'o, ënät ojts ja kepy nëëwinye'epyë ëka'any nyaaxpaaty ma tu'uk ja kopk txëëwatyën Ararat.

⁵ Ja nëë ni'ikyë ënety jyënajk'ëtë'ëtsy ets jëtu'un tyëtsnë wäänjaty. E ko tyu'uk aany ja po'o ja mëmajkpë këxë'knëp ënety kanaak ja kopk mëti'ipë këjxmëtyën.

⁶ Kom wëxtyikxy xyëëw ojts ja Noé tyaj'ëwa'atsy ja kepy nëëwinye'epyë ja nyi'ëwa'atsajtën mëti'ipë ënety të t'oytyunyën.

⁷ Ets ojts tnajtsmatsë tu'uk yë jooky. Ja jooky je'eyë ojts kyäkminy kyäkxëpy tja'ëwxity jëna'a ja naaxwiinyëtë y'ëknitëtstu'uty.

⁸ Ko ojts jëtu'un t'ëknajtsmatsë ja jooky, ënät ojts ok tnajtsmajtsëkyojnëpë tu'uk yë pak. Ets t'ixa'any pën kujk ënety ja naaxwiinyëtë nyitëtstu'uty.

⁹ Wäänë y'ijty tä ja pak jatëkok wyimpijty ma ja kepy nëëwinye'epyën. Jä'ä ko ka'ap ënety të tpaaty ma ja pyo'kxtakn. Ja naaxwiinyëtë ka'anëm ënety oy nyitëtstu'utynyëm. Ënet ja Noé xyajpëtsëëmy ets tyajtëjkëy ja pak maa ja kepytyëjkën nëëwinye'epyë jatëkok.

¹⁰ Wëxtujk xëëw ojts yë Noé y'ëwxity ets ojts jatëkok tnajtsmatsë ja pak.

¹¹ Kujk ënety ëka'any jyajmoonë, ko ja pak jatëkok wyimpijty. Tam t'atsëm'aty tu'kxe'enty yë ujts'aay ma y'axokxën. Jëtu'un'äämpy ojts ja Noé ëka'any t'ixy ko ja naaxwiinyëtë kujk ëka'any nyitëtstu'uty.

¹² Ënet ojts nän ja wëxtujk xëëw jatëkok jyaakëwxity. Tää ja pak tnajtsmajtsëy. E ko ja pak tnajtsmajtsëy tu'ukyë ojts nyëjkxnë, ka'ap ojts y'ëkwinpijnë.

¹³ Ko ënety ja Noé tëtujkmëko'pxtu'uk ja jyëmëjt jää ojts ja naaxwiinyëtë nyitëtstutnë. Ko tyu'uk'aany ja mëtu'kpo'opë ënät ojts ja Noé tniwë'ëntu'uty ja kyepytyëjk nëëwimye'epyë. Ets t'ijxy ko ja naaxwiinyëtë tëë ënety nyitëtstu'uty.

¹⁴ Ko ja mëmäjtskpë ja po'o y'i'px wëxtujk'aany, ja naaxwiinyëtë tëë ënety yajxon nyitëtstutaaynyë.

¹⁵ Tää ojts ja Dios kë'ëm t'ënëëmë ja Noé:

¹⁶ Pëtsëëmnë ënät tyam jap ma kepytyëjkën nëëwinye'epyë mëët tu'kë'ëyë m'u'unk m'ëna'k ets m'u'unk mto'oxytyëjk ets mtsu'utëjk.

¹⁷ Yajpëtsëëmta'a näjyëtu'un tu'kë'ëyë jëyujk, jënu'un jap xymyëët'atyën, joonëty, jëyujkëty mëti'ipë yujyëtyën, mëti'ipë mëpaat ja'ay tyajtsëënën ma jyëën tyëjkën ets mëti'ipë naaxwin'a'tspën. Wä'än tukye'eyëtya'atë naaxwiinyëtë ets y'u'unkëty y'ëna'këty tyajnimayëtëty ets tyajwintuktëty jëtu'un yë naaxwiinyëtë jatëkok.

¹⁸ Ënet ja Noé mëët ja tyo'oxytyëjk ets ja y'u'unk y'ëna'këty ets ja tsyu'utëjk ojts pyëtsëëmta'atë jap ma ja kepy nëëwinye'epyën.

¹⁹ Ojts näjyëtu'un pyëtsëëmta'atë jëyujkëty, ëwa'anëtypë ets yujyëtypë, mëti'ipë naaxwin'a'tspën ets joonëty.

²⁰ Tä yë Noé ojts tnipëjktaakë ets t'oytyuuny tu'uk wintsë'këntyakn. Yë Noé ojts yë Dios tukwintsë'ëkë jëyujk ets joonëty jëyujkëty mëti'ipë wa'atsëtyën, tu'kë'ëyë jëyujk wi'ixëty y'ixë'atën.

²¹ Ko jyä'äjty ja xu'kën janty'oy jam Dios wyintum, ënät y'ënäny yë Wintsën: Nijëna'ajës yë naaxwiinyëtë jëtu'un nka'ëkpojknëty mëët ko ënety yë naaxwiinyëtë ja'ay pyokymyëët'atë. Jä'ä ko yë naaxwiinyëtë ja'ay mutsknëm jëtu'un tmëtso'ontaakëtë tuuntëko'oy kajpxtëko'oyën. Yë jëyujkëty nän ka'apës nëjkx n'ëkyajkutëkooynyë, ijxtëm tyam të jyäty të kyëpetyën.

²² Maanëm yë naaxwiinyëtë jyä'äjëtyën, jää'atëp näjyëtu'un yë nipën kojën ets tu'unën ye'eyën. Jää'atëp yë jokx'ajtën ets tëtyk'ajtën. Jää'atëp näjyëtu'un yë potm'ajtën ets xëkopk'ajtën. Ets xëënyajtën mëët yë kootsajtën.