Génesis 40 - Biblia Dc en Mixe de Quetzaltepec

Yë José tyajniwij mäjtsk yë kuma'ay

¹ Tëkok, nimäjtsk ënety yë ja'ayëty mëti'ipë myëtuuntëpën yë yajkutujkpë, jampë yajkutukyën Egiptë, tu'uk mëti'ipë uuky'atä'ämëpën ets tu'uk mëti'ipë yajtsajp kääkyojpën, nimäjtskëty tyajjoot'anpëjktë yë wyintsën.

² Ënet yë yajkutujkpë ojts tukjoot'anpëjky ja nimäjtskpë ja ja'ayëty, mëti'ipë nyiwintsën'ajtypyën ja uuky ets ja tsajpkääky.

³ Paaty nimäjtsk yajtsuumtë, ma näjyëtu'un ja José ënety tsumy y'ityën.

⁴ Tä ja pujxntëjkëwent'ajtpë t'ënëmaay ja José ets yë'ë t'ixëty tunëty ja tsumjyä'äytyëjk, e ja José ojts jëtu'un tjantytyuny. Nyäjx jëtu'un ja xëëw jëmëjt y'itë jap pujxn tëkoty.

⁵ Tëkok ojts koots kyuma'atë ja nimäjtskpë ja tsumjyä'äyëty, mëti'ipë ja tsajpkääky ets ja uuky nyiwintsën'ajtypën, ja kuma'ay aaktam ja nyiwinma'any wi'ix nyiwijja'anyën.

⁶ Komjopy ojts yë José t'ijxkojy ja tsumjyä'äytyëjkëty ets tpaty janty maay janty tajtëp.

⁷ Ënet tyajtëëy: ¿Wi'ix ko mmaytyë mtajtë? ¿Ëkë mmontë mtuktë?

⁸ Ya'atë tsu'umës të nwinkuma'atë ets ka'ap pën mëti'ipë mëpaat tyajniwijyën, jëtu'un y'ëtsoowtë. ¿Tii këtii yë'ëjëtyë Dios mëti'ipë xytyukyajniwijëmën winë? Jëtu'un ojts yë José y'ënä'äny: Tukmëmëtyaktëkës mëti'ipë të xykyuma'atën.

^9-10 Ënet ja uukywyinkëëpyë tukmëmëtyäky ja kyëma'ay yë José mëët ya'atë aaw ayuk: Ma yë nkuma'ayënës tu'ukës të n'ixy yë tsatym kyepy myëët'ajtyp tëkëëk yë xye'enty ets të n'ixyës ja tsatym kyepy yë pyijy, jëtu'un y'awinpity ijxtëm yë tsatym tsya'amën.

¹¹ Ëjts nmëët'ajtyptyëmës ja yajkutujkpë ja y'a'ukën maas nkë'ëjën etsës npëjkë'ëkytyëm ja tsatymtyëëm etsës nwinma'atsy. Ënet näjyëtu'un ja yajkutujkpë ja y'a'ukën ntukë'ëkonëstëm.

¹² Tääts yë José y'ënäny: Yë mkuma'ay yë'ë jëtu'un tyijäämpy, ko mijts të xy'ixy tëkëëk yë tsatym kyepyxye'enty, tëkëëk xëëw yë t'antijy,

¹³ kom tëkëëk xëëw yë yajkutujkpë mijts jatëkok mja'amyätsa'anyë ets mpëjta'aka'anyë ma mtuunkën, tääts je'eyëm jatëkok ja y'a'ukën xytyukkë'ëkonëty, tä ijty xytyuunk'atyën.

¹⁴ Ko jëtu'un tyunëtëty jyatëtëty xyjyä'ämyätsëpës, mtunëp yë mëyajtën, xymyëkajpxëty yë yajkutujkpë mëët ëjtskyëjxm ets xyajpëtsëmëtyës pujxn tëkoty. Pa'ëyo'ow najts'ëyo'owëkës.

¹⁵ Ëjts jamës ojts tsoony ma hebreo ja'ayëtyën yë nyaaxjotëtyën, e ëjts ka'apës nitii poky të ntuny, koos yaa tsumy xyaj'itë.

¹⁶ E ko ojts tmëtoy, mëti'ipë ja tsajpkääky nyiwintsën'ajtypyën, janty'oy ja José tyajniwij ja kuma'ay, ënät näjyëtu'un y'ënäny: Ëjts näjyëtu'unës të nwinkumaapë, ko tëkëëk katsy ënety yë tsajpkääky nmëët'atyës maas yë nkëpajkën.

¹⁷ Yë katsy mëti'ipë këjxm ijtpën myëët'ajtyp ënety yë tsajpkääky janty xu'kxëtypë, mëti'ipë ja yajkutujkpë kyäyäämpyën. E yë joonëty jëyujkëty yë'ë ënety jyänty jyë'kxtëp mëti'ipës nkukë'ë'ajtypyën.

¹⁸ Ënet yë José y'ëtsooy: Yë mkuma'ay tyaa nyiwija'any: yë tëkëëk katsypë tsajpkääky, tëkëëk xëëw yë'ë,

¹⁹ kom tëkëëk xëëw yë mëj yajkutujkpë tnipaye'eyä'äny yë mpoky ets myajyo'ktëyä'äny ma tu'uk yë kepyën, yë joon jëyujk yë'ë mnini'kx nëjkx tsyu'utsyë.

²⁰ Kom tëkëëk xëëw yë yajkutujkpë yë xyëëw tpaty ets mëj nyänyixëëwtuunë wyoowtaay tu'kë'ëyë ja'ayëty mëj'äämpyëtypë. Jam ma mayjyä'äy ënety të myuktën, jam ojts yë yajkutujkpë tnikäxë yë pujxntëjkja'ayëty, mëti'ipë nyiwintsën'ajtëpën yë uuky ets tsajpkääky, tääts pyëtsëmtëty pujxn tëkoty.

²¹ Yë mëti'ipë yë uuky nyiwintsën'ajtypyën ojts jatëkok tyuunkpaaty ets ja y'a'ukën ja yajkutujkpë tukkë'ëkonëty;

²² e mëti'ipë ja tsajpkääky nyiwintsën'ajtypyën, ojts ni'ënä'ämë tääts yajyo'ktëyëty, jëtu'un ijxtëm ënety yë José të tyajniwijyën.

²³ Mëti'ipë ja uuky nyiwintsën'ajtypyën ka'ap ojts t'ëkja'amyäjtsnë wi'ix ënety ja José të jya'ënë'ëmxëtyën.