Génesis 38 - Biblia Dc en Mixe de Quetzaltepec

Judá mëët yë Tamar

¹ Tëkok yë Judá ojts tpuwa'ktutnë yë myëkä'äxtëjk ets ojts nyijkxy tsënääpyë ma tu'uk yë ja'ayën jä'ä xyëëwajtyp Hirá, jam ënety kyukajpnëty Adulam.

² Jam ojts tu'uk yë to'oxy'ëna'k t'ixy, yë'ë nyëëx tu'uk yë Canaán ja'ay, jä'ä xyëëwajtyp Sua ets ojts mëët pyiky.

³ Ënet ojts wyi'imy u'unk mëët, e ko tyajmëxu'unk'ajty, jä'ä txëëwmooy Er.

⁴ Ënet jatëkok wyë'ëmkojnëpë u'unk mëët, e ko tyajmëxu'unk'ajty, jä'ä txëëwmooy Onán.

⁵ Tää wiinkpë u'unk maay tjaakyajmëxu'unk'ajty, jä'ä tukxëëwajty Selá, yë Selá jää ojts myëxu'unk'aty ma ënety yë Judá jam yajpaatyën Quezib.

⁶ Yë Judá ojts yë myaank tyajpëky mëti'ipë xyëëwajtypyën Er, jä'ä ënety kä'äxkopk'ajtp; yë'ë mëët tyajpëjky tu'uk yë to'oxytyëjk mëti'ipë xyëëwajtypyën Tamar.

⁷ Yë Er ëxëëk ënety yë jyot wyinma'any ets ëxëëk ijty jyä'äy'äty; aakyë'ë tyuunpy mëti'ipë yë Dios ka'ap t'oy'ixyën, paaty yë jyuukyajtën ojts tpëjkë.

⁸ Ënet yë Judá wiinkpë ja myaank t'ënëmaay mëti'ipë xyëëwajtypyën Onán: Puwa'akë yë to'oxytyëjk mëti'ipë yë m'ajty të tku'ookyën, mijts jëtu'un mpatëp, jä'ä ko mijts mkäpy'ätyë. Jëtu'un yë m'ajty tmëët'atëty yë y'u'unk y'ok mëët mijtskyëjxm.

⁹ E yë Onán tyaa ojts jyotwinmay, ko ja u'unk ëna'k mëti'ipë mëxu'unk'atëpën, ka'ap nëjkx yë'ë tjä'ä'aty. Paaty ko ënety tmëëtko'knë ja ku'ooktyo'oxy mëti'ipë ja y'äjty të tni'o'ktu'utyën, ka'ap tsoky ets wyë'ëmëty u'unk mëët paaty ijty tnaki'tu'uty ënätyë këtiipë ja y'äjty ja y'u'unk y'ok tmëët'atëty mëët yë'ëkyëjxm.

¹⁰ Yë Wintsën ka'ap jëtu'un oy t'ijxy ko jëtu'un yë Onán y'ëti'itsy, paaty ojts ja jyuukyajtën tpëjkë.

¹¹ Ënet yë Judá t'ënëmaay yë xyäkxy Tamar: Wë'ëm jëtu'un atu'uk ma mteety yë tyëjkën, koonëm yë nmaankës, Selá y'ëkyääk, y'ëkpatëty. Yë Judá namääpy natajp ënety, jä'ä ko näjyëtu'un nëjkx ja myaank Selá y'ëk'o'knë, ijxtëm ënety ja myëkä'äxtëjk të jyat të kyëpätën. Ënet yë Tamar ojts nyëjkxnë tsënääpyë ma ja tyeety ja tyëjkën.

¹² Nyäjxy jëtu'un yë xëëw jëmëjt, ok ojts y'o'knë ja Judá ja tyo'oxytyëjk, ja nyëëx ja Súa. Ko ja Judá nyäjxy ja myonyë tyukyë, mëët ko ënety ja tyo'oxytyëjk të y'ooky, tä tsyo'ony ets ojts nyijkxy ma tu'uk yë kajpn txëëwatyën Timnat, ma ja ënety ja ja'ayëtyën jam mëti'ipë ja kupixyny ja jyëmk kyä'ptëpën, yë'ë ojts mëët nyijkxy yë myëku'uk mëti'ipë xyëëwajtypyën Hirá, Adulam ja'ay ënety.

¹³ Ko yë Tamar tnija'awëy ko ënety ja tyu'u të nyijkxy jam Timnat ets tnikääpa'any yë kyupixyny.

¹⁴ Ënet tjeeny ja wyit mëti'ipë myëku'ookytyo'oxy'äjtypyën ets nyätyukwinkuyä'pëy yë wit këtiipë pën y'ixkapëtëty ets jam nyaaxwe'tsy tu'u'am, ma ja kajpn yajnitëkën, mëti'ipë xyëëwajtypyën Enaim. Jam yë tu'u nyäxy mëti'ipë nëjkxpën Timnat. Paaty jëtu'un yë Tamar wyinma'anypyäty ets jëtu'un y'ëtë'ëtsëty, jä'ä ko jya'ijxnëp ënety ko ja Selá myëjnë'ajnë, e ka'ap nyäky pyiky mëët yë'ë.

¹⁵ Ko yë Judá t'ijxy jëtu'un jyotwinmaay, ko yë'ë to'oxytyëjk mëti'ipë nätyo'këpën, jä'ä ko tëë ënety nyäwyinkuyä'äpëty mëët yë wit.

¹⁶ Ënet ojts tpuwa'ktu'uty ja myëku'uk ets tmëkajpxa'any ja to'oxytyëjk, ni tkanijawë pën jä'ätëm ja xyäkxy, ënät t'ënëmaay: ¿M'a'ixëp ets nmëët'itëtyë? Ënet y'ëtsooy ja to'oxytyëjk: ¿Tii mnayakëp koos xymyëët'itëty?

¹⁷ Ënet ja Judá y'ëtsooy: Tsajppax tu'uk ntuknikäxëp. Tää ja to'oxytyëjk y'ëtsooy: Oy'atëp, e yajwë'ëm oynatii mëti'ipës ntukmëpëkëpën ko xyjyänty kyäxa'any.

¹⁸ Ënet yë Judá tyajtëëy: ¿Tiixë mtsojkpy ets ntukmëwë'ëmëty? Mooykyës yë mëti'ipë jëyujk mtuktsääpyën mëët yë nyipiity ets nän mooykyës yë mtajk, mëti'ipë jam mkë'ë'am'ajtypyën. Ënet ja Judá tmooy ets ojts tmëëtko'knë ja to'oxytyëjk, tä ojts tyajwë'ëmy u'unk mëët.

¹⁹ Tä yë Tamar ojts jatëkok nyëjkxkojnë ets nyätyukwinpëjktutë ja wit jatëkok, mëti'ipë ënety jam wyinpëk'ajtypyën, tääts tuktëjkëy ja wyit mëti'ipë ënety ku'ookytyo'oxy yajkëxë'këpën.

²⁰ Komjeky yë Judá ojts ja myëku'uk Adulam ja'ay tukmëkäxë yë tsajppax ma ja to'oxytyëjkën ets ja to'oxytyëjk jatëkok myooywinpitëtëty ja mëti'ipë ënety të tyajwë'ëmyën mëët yë'ë. E ja myëku'uk ka'ap ojts ja to'oxytyëjk t'ëkpatnë.

²¹ Tä tjayajtëëy ma ja ja'ayëtyën, mëti'ipë jam tsënaaytyëpën: Maa ënät ja to'oxytyëjk mëti'ipë nätyo'këpën jampë tsyoonyën Enaim, mëti'ipë naamnëm jam tu'u'am npatëpësën. Ënet y'ëtsoowtë ja ja'ayëty: Ka'ap yaa nijëna'a ma yaj'ixy yë to'oxytyëjk mëti'ipë nätyo'këpën.

²² Ënet ojts jatëkok wyimpijnë ma ja Judájën ets t'ënëmaay: Ka'apës të npaaty ja to'oxytyëjk, tëës njayajtëy yë ja'ayëty mëti'ipë jam tsënaaytyëpën, jëtu'unës të xy'ëtsowtë, ko ka'apëk jam nijëna'a t'ixtë to'oxytyëjk, mëti'ipë nätyo'këpën.

²³ Ënet ja Judá y'ëtsooy: Wä'änts tmëwë'ëmy mëti'ipës të nmo'oyën, këtiipës tukxi'iky nwë'ëmëty, ëjts tëëjës njaakuuytyuny, mëti'ipës ntukwinwa'anëyën ets mijts tëë xyjyamë'otsy ja tsajppax ets ka'ap të xypyääty.

²⁴ Kom tëkëëk po'o ojts ja Judá ja ja'ayëty nyimiinëtë ets y'ënëmaayë: Yë Tamar, mijts yë mxäkxy, tëë yë ye'etyëjk myëët'atyë ets të wyi'imy u'unk mëët. Ënet yë Judá mëk jyänty yujk'ënany: Yajpëtsëmtë ets nino'oktë.

²⁵ Ko ënety jam jëtu'un tyajpëtsëmtë ja to'oxytyëjk ets tnino'oka'antë, ënät tnikäjxëy ja tsyu'u ets t'ënëmaay: Ya'atë tsa'a mëët yë nyipiity ets ya'atë tajk yë nyiwintsën, yë'ëjës të xy'u'unkmo'oy, ijxkap yajxon pën yë jyä'ä.

²⁶ Ko yë Judá t'ixkäjpy ko yë'ë jyä'ä ja tsa'a mëët yë nyipiity ets ja tajk, ënät y'ënäny: Yë'ë oy jëtu'un tä të wyinma'anypyäätyën, ëjts tëy yë poky nmëët'ajtyp, koos të nkayajpëky mëët yë nmaankës Selá. Ka'ap yë Judá ojts nijëna'a t'ëkmëëtko'knaaynyë ja Tamar.

²⁷ Ko yë Tamar yë y'u'unk myääy tyajmëxu'unk'ajty, amäjtsk ojts myintë naaxwiiny,

²⁸ tu'uk ojts yë kyë'ë txajpëtsëmy ma to'oxytyëjk yë y'u'unk myääy tyajmëxu'unk'atyën. Ënet ja to'oxytyëjk, mëti'ipë ënety jam këwent'ajtëpën, tkë'ëtsuumy ja pi'k'ëna'k mëët tu'uk yë tsaptspiity ets y'ënäny: Ya'atë jëtu'un të myëxu'unk'aty jëyëjp.

²⁹ Ënätyë ojts ja pi'k'ëna'k jatëkok ja kyë'ë t'atijë ets ja myëku'uk jä'ä jëyëjp myiiny naaxwiiny. Paaty ja to'oxytyëjk mëti'ipë ënety putëjkëpën ma ja Tamarën tyajxëëwpejty ja pi'k'ëna'k, mëti'ipë jëyëjp miinën Fares. Jä'ä ko y'ënäny: Tëë yë mtu'u xyajni'ëwaatsë.

³⁰ Ënet ojts jyä'ty ok naaxwiiny ja mëti'ipë ënety myëët'ajtypyën ja tsaptspiity ma kyë'ëjën ets txëëwmooy Zérah.