Génesis 37 - Biblia Dc en Mixe de Quetzaltepec

¹ Yë Jacob jam ojts wyi'imy juuky'ajtpë ma ënety yë tyeety të tsyëënën tu'kxëëw tu'kjëmëjt.

² Yaa yajnimëtyä'äky yë Jacob yë jyuukyajtën ets y'u'unk y'ëna'k. Ko ënety yë José majkmokx mäjtsk yë jyëmëjnë, tu'ukyë ijty mëët yë y'äjtyëjk kyupixyny këwent'atë. Yë y'u'unk y'ëna'k yë Bilhá ets Zilpá, yë tyeety yë y'atsoky tyo'oxytyëjk. Yë José yë'ë ënety tyuk'ëwa'anëtyääpy ja tyeety ko ja y'äjtytyëjkëty ëxëëk winë tuntë.

José ets y'äjtyëjkëty

³ Yë Jacob mëk ijty tsoky yë José këtiinëm jëtu'un ja wiinkëtpyë ja y'u'unk y'ëna'k. Jä'ä ko yë'ë ënety ok të jyaak miny naaxwiiny, ko ja Jacob ënety të myëjja'ayënë. Paaty ojts tu'uk yë nyijän janty oypyë t'oytyuunë kë'ëyenypë.

⁴ Ko ojts jëtu'un t'ixtë ja y'äjtyëjkëty, ko ja tyeety mëk ni'ik tsyokyë këtiinëm ja wiinkpë y'u'unk y'ëna'k, ënät ojts tmëtsiptsoontë ets ka'ap t'ëkmëkajpxanëtë.

⁵ Tu'kxëëw ojts yë José wyinkuma'ay ets ojts tukmëmëtya'ak ja y'äjtyëjk, e ja y'äjtyëjkëty ni'ikë ojts jyänty myëtsiptsoonëtë.

⁶ Ko jëtu'un y'ënäny: Ëkmëtoow'itë tyam ntukmëmëtya'aka'antë wi'ixës të nwinkuma'ayën.

⁷ Të nwin'ixyës, ko nitëkokyë ëëtsajtëm ënety kamjotm n'atsu'umtakëm yë tsajpmok, ënät yë njä'äjës të pyëti'iky kujkyë, e yë mjä'äjëty näjyëtu'un të tna'owtitë yë njä'äjës ets të tyajnikëxë'ëktë ja näywyinkutsë'kën.

⁸ Ënet ja y'äjtyëjk y'ëtsoowtë: ¿Tii jä'ätën mja'ëna'any ets mijts myajkutujkpë'atëty, tääts ëëtsëty xy'ënä'ämtëtyë? Ni'ikyë ojts jyänty myëtsiptsoonëtë ko jëtu'un wyinkumaay ets ko ojts nikäjpxy wi'ix ënety të wyinkuma'ayën.

⁹ Ënet yë José ojts jatëkok wyinkumaakojnëpë, mëti'ipë ojts tukmëmëtyä'äkyën ja myëkä'äxtëjk, tääts t'ënëmaay: Mnija'awëtëpë, tëëjës tyam nwinkumaakojnëpë; jëtu'unës të n'ixy tä xëëw po'ojën ets nimajktu'uk yë mëtsa'a xywyinkutsë'ëkës.

¹⁰ Ko yë José tnimëtyaktaay yë wyinkuma'ay ma tyeetyën ets ma myëkä'äxtëjkën, ënät ojts yë tyeety y'ojyë ets y'ënëmaayë: ¿Tiitën mjatijäämpy mëët ya'atë kuma'ay mëti'ipë mnimëtyäkpyën? ¿Ëkjä'ätën xyjyatsoky jeexyë mtaak ets mjëëky mëku'uk nwinkoxtänëtyë?

¹¹ Paaty ja jyiiky myëku'uk namëtsip'ajtëp ënety, e yë tyeety je'eyë tmëmay tmëtajy tu'kë'ëyë ya'atë wiinkëma'ay.

José tyookyë yë myëkä'äxtëjk

¹² Tu'kxëëw tu'kjëmëjt yë José yë myëkä'äxtëjk ojts nyëjkxtë jam ma ja it naaxwiinyëtë txëëwatyën Siquem, yë'ë ojts ninëjkxtë jam yë jëyujk jë'kxy mëti'ipë ja tyeety jyä'ä'ajtypyën.

¹³ Ënet yë Israel t'ënëmaay yë myaank José: Ëk'ix. Yë mmëkä'äxtëjk jam të nyëjkxtë Siquem jëyujkëwent'ajtpë, tsajppax këwent'ajtpë ets kupixyny këwent'ajtpë, e ëjts yë'ëjës ntsojkpy ets xynyinëjkxëty ma jam yë'ëjëtyën. Ënet y'ëtsooy yë José: Oyës nnëjkxëty.

¹⁴ Oy mnëjkxëty, jëtu'un y'ënäny yë Israel. Nëjkx ix wi'ix yajpaatë jam ja mmëkä'äxtëjk ets näjyëtu'un ja jëyujk tsajpkaa, tsajppax ets kupixyny, e ko mwinpitëty täätsës xytyukmëmëtya'akëty wi'ix ënety jam të xy'ixy të xykyoyën. Ënet yë Israel tkejxy yë José, jam ojts tsyoony Hebrón ets jyä'äjty Siquem. Tam ënety tyimja'tanë

¹⁵ ko yë José tyu'utëkooy. Ënet jam tu'uk tpaty yë ja'ay ets y'ënëmaayë: ¿Tii m'ixtääpy?

¹⁶ Ënet yë José y'ëtsooy: Nmëkä'äxës n'ixtääpy. ¿Këtiis xytyuk'ëwaanëty ma jëtää jä'äjëty të nyëjkxtë?

¹⁷ Ënet y'ëtsooy ja ja'ay: Tëë ja yaa tsyo'onëtë, e jëtu'unës nmëtoy'äty jam të nyëjkxtë Dotán. Ënet ja José ojts tninëjkxy ja y'äjtyëjk jam Dotán ets jam tpaty.

¹⁸ Yë'ëjëty jëkämnëm t'ijxpatë ko ja José myiny, tääts pojën ja winma'any t'ixtaaytyë, wi'ix mëpaat t'ëkyaj'ooktën.

¹⁹ Jëtu'un nyäy'ënëmaayëtë xim yam: Ëk'ixtë, xim myiny ja mëti'ipë tyäty wyinkumaapën.

²⁰ Mintë wä'än nyaj'o'këmë ets muum n'apëjkëmëty nëëjutjoty ets n'ëna'anmëty ko jëyujk të myätsyë ets të yaj'ookyë. Tä n'ëkjanty'ijxmëty, pën ëk'atëëp ja wyinkuma'ay.

²¹ Ko yë Rubén jëtu'un tmëtooy, ënät tjanikajpxtu'utany yë y'uty ets y'ënäny: Ka'ap y'oy'atëty ko ntimyaj'o'kmëty.

²² Këtii ne'pyny xytyämtë xyoktë nëkoo, nikë jap pëjkta'aktë nëëjutjoty mëti'ipë jamën wintë'ës'itum ets këtii ëxaty xytyuntëty. Yë Rubén paaty ojts jëtu'un jya'ëna'any jä'ä ko ka'ap ënety tsoky ets ëxëëk jyatëty kyëpätëty yë y'uty, jä'ä ënety myäy tyäjy ets oy mëk jatëkok wyimpitëty ma ja tyeetyën.

²³ Ko yë José jyä'äjty ma ënety jam ja y'äjtyëjkën, ënät tyuknipëjktutëtë ja nyijän mëti'ipë myëët'ajtypyën.

²⁴ Tääts yajmajts'o'oyëy yë ets yajkujëpijpëy nëëjutjoty, jam ënety tu'uk yë nëëjut mëti'ipë ka'ap yë nëë tmëëtëtyën.

²⁵ Tää jam tyëjkëtyë kääpyë ukpë. E ko wäänë y'ijty tä t'ijxpatë ko jam myintë yë Ismael ja'ayëty, mëti'ipë tso'ontëpën Galaad, yë'ë jëyujk jëku'ux wyojpmiintëp jap Egiptë tukmënëjkxtë yë pa'akxu'kpë mëti'ipë yajtijpën bálsamo ets mirrë ets on mëti'ipë oy xu'kpën.

²⁶ Ënet yë Judá t'ënëmaay yë myëkä'äxtëjk: ¿Tii mpatmëp ko yë n'uty'ajtëm nyaj'o'kmëty ets ënät ok nkuyu'tsmëty, ko ënety ëtsajtëm të n'ëkyaj'o'këm?

²⁷ Nikë tim oy'atëp ko ntukmëto'kmëty yë'ë Ismael ja'ayëty, ka'ap jëtu'un tpaatëty ko ntimyaj'o'kmëty ets oy jeexyë wi'ix njama'ay njatajëmpë, n'uty'ajtëmën yë'ë. Ënet ja myëkä'äxtëjk oy tmëtoowtë ja winma'any, mëti'ipë ënety ja Judá nyikäjpxypën.

²⁸ Ko ja ajuupyëtëjk mëti'ipë Madián ja'ayëtyën jam nyajxtë winkon, ënät ja José yaju'tpëtsëëmy jap jutjoty ets yajto'ky ma ja Madián ja'ayëtyën mëti'ipë Ismael y'ap'ajtëpën, i'px tkujuuytyë aakyë'ë poop pujxn meeny. Jëtu'un ojts tyajnëjkxnëtë ja José jap Egiptë.

²⁹ Ko yë Rubén jatëkok wyimpijty ma ja nëëjutën, ka'ap ojts t'ëkpatnë ja y'uty José, tä ja wyit, mëti'ipë ënety jam pyëjktäkpyën, t'akë'tsëy tyajnikëxë'ëky jëtu'un ko ënety mëk tjajawë ko ja y'uty të tyëkoy.

³⁰ Tä ojts tninëjkxy ja myëkä'äxtëjk ets t'ënëmaay: Ka'ap jap pën ja mëxynyë ma të n'apëjkëmën, tyam ¿tiijës ënät ntuunta'akëp?

³¹ Ënet ojts twijtsë'ëktë ja José ja wyit ets tukkooytyääytyë yë tsajppax ne'pyny, mëti'ipë ënety të tyaj'ooktën;

³² ets tuknikäjxtë ja tyeety mëët ya'atë aaw ayuk: Ya'atës të npaatë, ëk'ix yajxon, pën yë'ë m'u'unk yë wyit.

³³ E ko yë Jacob t'ijxwatsy ko yë'ë y'u'unk ja wyit ne'pnymyëëtpë, ënät y'ënäny: Pën yë'ëjës yë n'u'unk yë nyijän, tii jëyujk ënät të myätsyë ets të yaj'ookyë, të y'atsu'uts të tyuktsu'utsëty.

³⁴ Ënet yë Jacob ojts yë wyit tukëëtsë ets nyätyukxojxë ja wit mëti'ipë kuumpën u'kxpën ets nyätyukniwëjtaayë naaxway; jekpyaat ojts nijë'ëy niyä'äxy ja myaank ko ënety të y'ooky të tyëkoy.

³⁵ Yë Jacob yë y'u'unk y'ëna'k ojts jya'ënë'ëmxëty ets jeexyë ka'ap mon tuk y'ëkyajpatnë, e yë'ë ka'ap t'a'ijxëy, ni'ikyë tyëjkëy moonpë tujkpë, ko pën wi'ix y'ënë'ëmxëty ets ijty y'ënä'äny: Nimon nitukëpës yë n'u'unk nmaay ijxtë koonëmës n'ookëty, täätsës mëët jatëkok näpyaatëtëty o'kpë akujky.

³⁶ Yë Madián ja'ayëty jap ojts tkutookëtë yë José Egiptë, ma tu'uk yë ja'ayën, jä'ä xyëëwajtyp Potifar, wintsën ënety y'ity ma yajkutujkpën, mëti'ipë ënä'ämpën jap Egiptë; yë'ë ënety wintsën ijtp ma tsiptuunpëtëjkëtyën mëti'ipë kyëwent'ajtëpën yë yajkutujkpë.