Génesis 35 - Biblia Dc en Mixe de Quetzaltepec

Tios tkënu'kxy yë Jacob jam Betel

¹ Ënet yë Dios t'ënëmaay yë Jacob: Pëtë'ëk ets nëjkx jam mtsëënë Betel, jam xy'oytyunëty tu'uk yë wintsë'këntyakn, mëti'ipë Dios jyä'ä'atëpën, ma ojts nyänyikëxë'ëkyën ma mijtsën ko ënety ja m'ajty Esaú xykyuke'eky.

² Ënet ja Jacob ja y'u'unk y'ëna'k t'ënëmaay ets tu'kë'ëyë jënu'un ënety mëët tsyëënën jyuuky'ätyën: Yajpëtsëmtë tu'kë'ëyë jënu'un xytyijtën Dios ets ka'apë tiosëtyën, tsi'iwtë xëtstë ets jääntëkatstë yë mwitëty mtujkxyëty.

³ Jam tyam nja'amëty Betel, maas tu'uk yë wintsë'këntyakn n'oytyuna'anyën etsës yë Dios nwintsë'ëkëja'any mëti'ipës ojts xypyutëkën ma ënety mon tuk nyajpaatyësën ets mëti'ipës xëmë të xyjyämyëët'atyën oyës maa nnaxy ntëkë.

⁴ Tä tukkë'ëtëjkëtyääytyë ja Jacob, tu'kë'ëyë mëti'ipë ënety ka'ap tiosëtyën ets tyajjënajktaaytyë ja tyatsktëyëty, jam ojts ja Jacob tnitajta'ay ma tu'uk yë xoj'ëjxën, jam winkon Siquem.

⁵ Ko yë Jacob tsyo'ontë jam ma kajpnën mëët tu'kë'ëyë y'u'unk y'ëna'k y'u'unk tyo'oxytyëjk ets tu'kë'ëyë jënu'un ënety winë tmëët'atyën, ënät ja ja'ayëty tsyë'këtyaktë, mëti'ipë jam kukajpnajtëpën, paaty ojts ka'ap twinmaytyë tpaatsoontëty ja Jacob ets mëët tu'kë'ëyë ja jyä'äy.

⁶ Yë Jacob ets mëët tu'kë'ëyë ja'ayëty mëti'ipë ënety mëët y'ityën, xëëny jam jya'ajtë kajpnjotm ma txëëwatyën Luz, mëti'ipë näjyëtu'un yajtijpën Betel jam Canaán naaxjotm.

⁷ Tä ojts tu'uk tyaj'oyë yë wintsë'këntyakn ets jä'ä txëëwmooy El-betel, paaty jëtu'un txëëwmooy jä'ä ko jam ojts yë Dios t'ixy, ko ënety ja y'äjty tkuke'eky.

⁸ Jam ojts y'ooky ja Débora, mëti'ipë ënety ja Rebeca të kyëwent'atyën, tääts tyajnaaxtëjkëy ma tu'uk yë xoj'ëjxën jam Betel. Jä'ä ojts yë Jacob txëëwmo'oy ja jampë ja it naaxwiinyëtë Ja xoj ma ja'ay ya'axtën.

^9-10 Ko ojts yë Jacob wyimpijnë Padán-aram, ënät yë Dios mëët jatëkok nyäpyäätyë ets ojts tkënu'kxy mëët ya'atë aaw ayuk: Mijts jä'ä mxëëwajtyp Jacob, ka'ap tyam jëtu'un xy'ëkxëëwatanë. Tyam jä'ä mxëëw'atäämpy Israel. Ko ja Dios ojts ja xyëëw yajtëkajtsxëty,

¹¹ ënät ojts y'ënë'ëmxëty: Ëjts jëtu'un Dios, mëti'ipë mëk'ajtën mëëtën. Mëët'atäämpy yë m'ok'u'unk m'ok'ëna'k nimay. Ma mijtsën may yë ja'ay pyëtsëma'any ets maynyaax maykyajpn; ma mijts yë m'ok'u'unk m'ok'ëna'kën pëtsëmëp näjyëtu'un mëti'ipë itëpën yajkutujkpë, mëti'ipë ënä'ämëpën ma nyaax ma kyajpnën.

¹² Yë it naaxwiinyëtë mëti'ipë të nmo'oyënës yë Abraham ets Isaac, näjyëtu'un mijts tyam nmo'oy, e nmo'ojäämpyës näjyëtu'un yë m'ok'u'unk m'ok'ëna'k.

¹³ Ko ja Dios ojts tsyo'onë ma mëët ja Jacob të kyäjpxy të myëtyä'äkyën,

¹⁴ ënät ojts tu'uk yë tsaa tyajtënaakyukë ma ja it naaxwiinyëtën, ma ënety ja Dios të myëkäjpxyën, tä tmooy yë oyajtën ets tuknija'axy yë on mëët yë tsatym nyëë tëëpë nyimaanaxyën, jam ma ja tsaajën mëti'ipë ënety të tyajtënaaykyukën.

¹⁵ Ënet ojts txëëwmo'oy ja it naaxwiinyëtë Betel.

Raquel ookanëp

¹⁶ Ënet ojts nyëjkxtë ma it naaxwiinyëtë txëëwatyën Betel, jëkäm wäänjaty wyi'imy yë Betel mëët yë Efrata, ko ojts yë Raquel yë u'unk maay tyajminy naaxwiiny, tsip ojts tyajmëxu'unk'aty.

¹⁷ Ma ënety jëtu'un oy mëk tsyipëtyën, ënät ojts y'ënë'ëmxëty ja ja'ay mëti'ipë ja'axpën: Këtii mtsë'ëkëty, tëë u'unk maay xyajminy xyajja'ty naaxwiiny ye'etyëjkpë.

¹⁸ Yë Raquel tim o'këtaknëp ënety jamnë, ko ojts jyaak mëkxejy, ënät tjaakxëëwmooy ja u'unk Ben-oni, e yë tyeety jä'ä xyëëwmooyë Benjamín.

¹⁹ Jëtu'un ojts yë Raquel y'ooky tyëkoy ets jam nyaaxtëjkëy tu'u'am, ma ja Efrata y'itjotmën, mëti'ipë tyam txëëwajtnëpën Belén.

²⁰ Jam ojts tu'uk yë potsy tyajpëtë'ëky yë Jacob, ma ënety ja tyo'oxytyëjk Raquel të nyaaxtëkën, tyampaat ja potsy je'eyëm jam y'ity mëti'ipë tyukja'amyäjtstëp yë Raquel ma ojts nyaaxtëkën.

²¹ Yë Israel ojts tyu'uye'ey'ëti'itsy ets ojts jam jyä'ty ma ja mëjpotsy txëëwatyën Edar, jam ojts wäänë tu'ktsojkyë y'ity.

²² Jam ënety yë Israel të tsyënaaytyaknpëjknëtë ko yë Rubén ojts tmëëtko'knë yë Bilhá, mëti'ipë ënety ja tyeety të tmëmäjtsk to'oxytyëjk'atyën. Ko yë Jacob tnija'awëy ko ënety jëtu'un yë Rubén të y'ëti'itsy, ënät ojts yajxon jyantyjyoot'anpëky. Yë Jacob yë y'u'unk y'ëna'këty nimajkmäjtsk ojts y'itë.

Yë Jacob yë y'u'unk y'ëna'këty

²³ Mëti'ipë y'u'unk'ajtën mëët yë Lea, jä'ä xyëëwajtë Rubén, ja kä'äxkopk, ok myëxu'unk'ajtë Simeón, Leví, Judá, Isacar ets Zabulón.

²⁴ Mëti'ipë y'u'unk'ajtën mëët ja tyo'oxytyëjk Raquel, jä'ä xyëëwajtë José ets Benjamín.

²⁵ Mëti'ipë y'u'unk'ajtën mëët ja Bilhá, ja Raquel ja tyuunpë, jä'ä xyëëwajtë Dan ets Neftalí.

²⁶ E mëti'ipë y'u'unk'ajtën mëët ja Zilpá ja Lea ja tyuunpë, jä'ä xyëëwajtë Gad ets Aser. Ya'atë jëtu'un y'u'unk'ajt yë Jacob mëti'ipë ojts jam Padán-aram myintë jya'tën.

Ko yë Isaac y'o'ky

²⁷ Ënet yë Jacob ojts yë tyeety Isaac tninëjkxy jam Mamré, ma ënety tu'uk ja kajpn txëëwatyën Arbá ëkë Hebrón. Jam ma ënety të tsyëënën yë Abraham ets Isaac.

²⁸ Jä'ä ënety yë Isaac yë jyëmëjt mëko'px ja majkta'px ko ojts y'o'knë.

²⁹ Mëjja'ay yë Isaac ojts y'o'knë tyëkooynyë, ja nimäjtskpë ja y'u'unk ojts yajnaaxtëkëty, Esaú ets Jacob.