Génesis 33 - Biblia Dc en Mixe de Quetzaltepec

Jacob mëët yë Esaú nyämyë'oypyikyë

¹ Ko yë Jacob t'ijxy ko nyiminyë ja y'äjty Esaú mëët nimajktaxk mëko'px yë mayjyä'äy, ënät ojts twoowä'kxy yë Lea mëët yë Raquel, aakmëët ja y'u'unkëty y'ëna'këty ets ja tyo'oxytyëjktuunpë.

² Jëyëjp ojts twoowä'kxy ja nimäjtskpë ja tyo'oxytyëjktuunpë mëët ja y'u'unk y'ëna'këty. Mëmäjtsk tääts ja Lea näjyëtu'un ëpëky tpëjktäky nän mëët ja y'u'unk y'ëna'k, ets oknëm ja Raquel ëpëky tpëjktäky mëët ja myaank José.

³ Ënet ojts ye'eyi'iky ets nyaaxkooy, ja wyimpok tyukpatyp ja naax, wëxtujk'ok jëtu'un tuuny, koonëm tmëwinkoony ja y'äjty.

⁴ Tä ja Esaú tnipëyë'ktso'ony ets ojts tninëjkxy ja y'uty Jacob ets tyo'kmënäänajxy, tä ojts tsu'kxy, tä tyëjkëtyë nimäjtsk yaxpë.

⁵ Ko t'ijxy ja Esaú ja to'oxytyëjkëty ets ja y'u'unk y'ëna'këty, ënät tyajtëëy: E ya'atë to'oxytyëjkëty mëët yë y'u'unk y'ëna'këty. ¿Pën yë'ëjëty? Tä Jacob y'ëtsooy: Ëjts yë n'u'unk n'ëna'k mëti'ipës yë Dios të xymyo'oy të xykyexyën.

⁶ Ënet ja nimäjtskpë ja to'oxytyëjktuunpëty wyinkoontë ma ja Esaujën ets nyaaxkoowtë, koonëm ja wyimpok tukpatë ja naax.

⁷ Mëmäjtsk tä ja Lea näjyëtu'un wyinkoony mëët ja y'u'unk y'ëna'k ets nyaaxkoowtë näjyëtu'un koonëm ja wyimpok tukpatë ja naax. Oknëm ja Raquel näjyëtu'un myiiny mëët ja myaank José ets nyaaxkoowtë näjyëtu'un, koonëm ja wyimpok tukpatë ja naax.

⁸ Ënet ajotkumonë yë Esaú tyajtëëy yë y'uty Jacob: Tiitën mniwinma'ayëp ko kanaakpëky yë mjëyujk të xy'ëkäjxnë. Xii yaajës muum njanty wyinnajxnë. Ënet ja Jacob y'ëtsooy: Patyës të nkexy ets mijts xytsyok xy'oyjyawëtyës.

⁹ Tä yë Esaú y'ënäny: Ka'ap mëku'uk këtii nëkoo mnämyä'äy mnätyajxëty. Tëës yë Dios näjyëtu'un xymyo'oy xykyexy yë njä'äjës, yajwë'ëm, mëët'at mëti'ipë mijts mjä'ä'ajtypyën.

¹⁰ E ja Jacob ni'ikyë y'ënaan'ëtë'ëtsy: Ka'ap, tun yë mëyajtën, pën jää'ajtp ja oyjyot oywyinma'any ma ëtsajtëmën, kupëk ya'atë näynyamo'ojë, ko mijts tyam nwinku'ixë, jëtu'unës näjyawëty Tiosës yowë ntimy'ijxyp kë'ëm. Ëjts nja'awëkyëtäkpyës koos mijts tyam oy xy'ëxaj xykyupëky.

¹¹ Mëyajtënës mpëjktsoopy ets ya'atë xy'ëxajëty mëti'ipë yam ntuknimiimpyën, mëti'ipë yam namo'ojäämpyën. Ëjts tëëjës yë Dios xypyutëk xypyupety, tëës xyajjotkujktä'äky ets nitiijës tyam xykyatëkoy'ajtxë. Yë Jacob ni'ikyë tjanty'ënëmaay'ëti'itsy ja y'äjty Esaú, koonëm tukkupëjky ja mëti'ipë nyamo'ojäämpyën.

¹² Tä yë'ë y'ënäny: Oy nja'amëty, min ëjts n'ëktu'uwinye'ey, ëjts mijts xypyaye'eyëp.

¹³ Ënet yë Jacob y'ëtsooy: Mëku'uk, mijts wa'ats xynyijawë ko yë pi'k'ëna'këty ka'ap nëkooyë kyumëjaaw'atë ets mëpaatës näjyëtu'un nmëmay nmëtajy yë njëyujkës, ijxtëm yë tsajppax, kupixyny ets jëyujk tsajpkaajëty. Tyaa ënätyë y'ëk'ënu'kxëtyääynyëtëty ets y'ëk'o'ktaaynyëtëty.

¹⁴ Oy mijts mjaamë'ëkëty, ëjts ëtyä'äkyës nnëjkxa'any, mëëtës yë njëyujk ets n'u'unk n'ëna'kës. Jä'ä ko ëtyä'äkyë ye'eytyë. Jam tëy näpyatëmëty ma ja it naaxwiinyëtë txëëwatyën Seir.

¹⁵ Ënet yë Esaú y'ëtsooy oy'atëp: E min n'ëkyajwë'ëmyës mäjtsk tëkëëk yë nja'ayës mëti'ipë mëët minëtyën. Tä ojts yë Jacob y'ëtsoy: Tun yë mëyajtën. ¿Këtii nëkoo mnäjyotmaytyunyë?

¹⁶ Jä'ä xëëw yë Esaú jatëkok wyimpijty jam Seir.

¹⁷ Yë Jacob jam ojts nyëjkxpë Sucot ets jam tu'uk yë tyëjk tni''ijxëy ma yë'ë y'itëtyën ets näjyëtu'un t'oytyuuny yë ujtsxo'omytyëjk ma ja jyëyujk tyänëtëtyën. Ënet ja it naaxwiinyëtë tyajxëëwpejty ma ënety jam y'itën Sucot.

¹⁸ Ko yë Jacob tsyo'ony jam Padán-aram, oy mëk jam jyä'äjty Canaán ets jam tsyënaaytyaknpëjky winkon ma ja it naaxwiinyëtë txëëwatyën Siquem.

¹⁹ Ënet jam tu'uk tjuuy ja naax kam, jä'ä tsyoowpaty mëko'px ja nyimeeny, mëti'ipë tukmëto'kën ja y'u'unk y'ëna'këty ja Hamor, yë Siquem yë tyeety, jam ja wyittëjk ojts tkojy.

²⁰ Ënet näjyëtu'un t'oytyuuny tu'uk ja wintsë'këntyakn ets tyajxëëwpejty El-Elohé Israel.