Génesis 32 - Biblia Dc en Mixe de Quetzaltepec

Jacob mëët yë Esaú nyäpyäätyë

¹ Tam ënety yë Jacob tyu'uye'ey, ko t'ijxpaty may yë Dios yë tsyajpjotmëtë kukäjpxy nyiminyë.

² Ko jëtu'un t'ijxy yë Jacob tää y'ënäny: Ya'atë n'ixyësën Dios yë tsyiptuunpëtëjk, paaty ojts txëëwmo'oy ja tampë ja it naaxwiinyëtë Mahanaim.

³ Ënet yë Jacob mäjtsk tëkëëk tkejxy yë tyuunpë jam Seir ma ja nyaaxjotmën ja Edom, tääts tuk'ëwaanëja'any ja y'äjty Esaú ko tää wyinkony.

⁴ Ya'atë aaw ayuk tyuknikäjx: Jëtu'un xy'ënëëmëty yë n'ajtyës Esaú: Yë m'uty Jacob yë'ëjës xytyukmëkäjxëp ya'atë aaw ayuk ets m'ënë'ëmxëty: Jamës të n'ity të ntsëënë ma Labán yë jyëën tyëjkën, jënu'un ya'atë xëëw jëmëjt të nyäxyën.

⁵ Nmëëtës jëyujk, tsajpkaa, tsajppax, kupixyny, tuunpë, ye'etyëjkpë to'oxytyëjkpë. Tyam nkexyës ya'atë aaw ayuk ma mijts myajpaatyën wintsën, n'ëwxityës ets ya'atë aaw ayuk oy tsuj xy'ëxajëty xykyupëkëty.

⁶ Ko ojts wyimpijnëtë mëti'ipë yaj'ëyukye'eytyëpën, ënät t'ënëmaaytyë ja Jacob: Tëës ojts n'ixtë ja m'ajty Esaú, jëtu'un të y'ëtsoy ko tää kë'ëm myina'any ets m'ixa'anyë mpaata'anyë mëët nimajktaxk mëko'px yë jyä'äy.

⁷ Ko jëtu'un tmëtooy yë Jacob ënät ojts ja tsë'ëkë tyuktëkëty ets tyëjkëy moonpë tujkpë. Ënet tyajnäywyä'kxyë mäjtskpëky ja jyä'äy, mëti'ipë ënety jam mëëtën; näjyëtu'un tyajwa'kxtaay ja jyëyujk, tsajpkaa, tsajppaxëty ets ja kyupixynyëty.

⁸ Jä'ä ko tyaa ënety myäy tyäjy: Pën miimp yë Esaú ets tnipëtë'ëky tu'kpëky, jatu'kpëky jyëkyäpëp kyä'äkëty.

⁹ Tää ojts tyëkë nu'kxtakpë ets ja Dios tmëpëjktsooy: Wintsën mëti'ipë y'ëwtajtën ja ntatwelës Abraham ets ja nteetyës Isaac, mijtsës të xy'ënëëmë koos nwinpitëty maas ja nnaax nkajpnën, ma tsyëënëtën jyuuky'atën ja njëëky nmëku'ukës. Mijtsës të xy'ënëëmë näjyëtu'un, ko oy tsuj xyajwinpita'anyës.

¹⁰ Ëjts ka'apës xyjyapaaty, je'eyë mijts oy tsuj xymyëët'atyës. Koos ya'atë Jordán mëjnëë ntuknajxy, yi'iyës ënety nkë'ëkap'ajtypyës yë ntajkës, nitiijës ënety nkamëëtëty. E tyam mäjtskpëkyës të nyajwä'kxy mëti'ipës nmëët'ajtypyën.

¹¹ Paaty tyam tun yë mëyajtën kuwaank nixajkës ma kyë'ë y'aawën yë n'ajtyës Esaú. Ntsë'këpës ko y'ëkmiinëty ets t'ëkyaj'o'ktaaynyëty ja to'oxytyëjktëjkëty mëët ja u'unk ëna'k.

¹² Mijts jëtu'un të m'ëna'any koos oy mëk xyajwinpita'any ets ko may ja n'u'unk n'ëna'kës xymyo'oja'any. Jëtu'un xyajnimayëja'any tä nëë'ajinën, ka'apë tjëkyepy yajmëtyowëtyën.

¹³ Jam ojts yë Jacob tyajnaxy ja tsuu ets mëti'ipë ënety kë'ëjoty myëët'ajytpyën twin'ijxtaay mëti'ipë ja y'äjty Esaú ënety nyamo'ojäämpyën:

¹⁴ mäjtsk mëko'px ja tsajppaxto'oxy ets i'px ja yä'äypyë, mäjtsk mëko'px ja kupixynytyo'oxy ets i'px ja yä'äypyë,

¹⁵ i'px majk yë jëyujk jëku'ux, aakmëët yë y'u'unk ets wëxtyikxy yë tsajpkaato'oxy ets majk yë mëjtsajpkaa, i'px yë krukts to'oxy ets majk yë yä'äypyë.

¹⁶ Ënet ja tyuunpë tukë'ëtëjkëtyääy ja jëyujk ets t'ënëmaay: Jaamë'ëktë miitsëty ets ëwä'kxyjyäty yë jëyujk xyajye'eytyëty.

¹⁷ Ënet ojts tuk'ëne'emy ja mëti'ipë jëyëjp kyäjxën ets t'ënëmaay: Ko xypyaatëty ja n'ajtyës Esaú ets ko m'ënë'ëmxëtëty: ¿pën mwintsën'ajtyp? ¿maatën mnëjkxy ets pën yë jyä'ä tääpë jëyujk mëti'ipë mënëjkxypyën?

¹⁸ Tyaa xy'ëtsowëty: Mijts wintsën Esaú, yë'ë yë näynyamo'ojë mëti'ipë mtukmëkäjxëyëpën yë m'uty Jacob mëti'ipë m'oyjya'awëyëpën, tä ja näjyëtu'un myiny ëx'ok.

¹⁹ Näyjyëtu'un ja mëmäjtskpë tkejxyën ets ma mëtëkëëkpë ets aakjëtu'un t'ënëmaay ninaak ojts tkexyën: Ko mja'tëty ma Esaujën aakjëtu'un xy'ënëëmëtëty ijxtëm yam të n'ëna'anyënës,

²⁰ Ënëëmëtë näjyëtu'un: yë Jacob tää näjyëtu'un myiny ix'ok. Jëtu'un ënety ja Jacob myäy tyäjy: Wä'än jëtu'un yë tsyip y'äkë nyanaxëty yë n'ajtyës Esaú, oknëmës kë'ëm ntim'ixëty wä'änxyëp jëtu'un'äämpy xynya'ëxaj xynyakupëkëtyës.

²¹ Jëtu'un ja näynyamo'ojë jëyëjp tkäjxë'ky, e yë'ë ojts jyaak maawë'ëmy ma jam ja wyittëjkën.

Tsyiptuny yë Jacob mëët tu'uk yë Tios kyukäjpxy

²² Ënet yë Jacob ojts koots pyëti'iky ja tsu'um ets pyëtë'ktë nimäjtsk ja tyo'oxytyëjk näjyëtu'un ets näjyëtu'un nimajktu'uk ja y'u'unk y'ëna'këty. Tä tyajnëënajxtaay ma tu'uk ja mëjnëë txëëwatyën Jaboc.

²³ Tyajtso'ontaay tu'kë'ëyë jënu'un ënety winë tmëëtëtyën.

²⁴ Ko ja Jacob ojts atu'uk wyi'imy, ënät tu'uk ja ye'etyëjk ja'ay tyëjkëy mëët tsiptuunpë. Jeky ojts tsyiptuntë ijxtë koonëm xyiinyëy.

²⁵ E ko ja naaxwiinyëtë ja'ay t'ijxy ko ka'ap ja Jacob myäyë, ënät ojts wäänë tyajtsëtyut ma pyuuykyopkën. Tä jëtu'un ja Jacob ojts ja tyekpyajk jyäjxma'aty, ma ënety jam jëtu'un tsyiptuntën.

²⁶ Ënet ja naaxwiinyëtë ja'ay ojts ja Jacob y'ënë'ëmxëty: Ëxmajtskës, jä'ä ko tää xyiinyënë. Pën ka'apës xymyo'oy yë kënu'kxën, ka'ap yam mijts n'ëxmatsëty, jëtu'un y'ëtsooy ja Jacob.

²⁷ Ënet ja naaxwiinyëtë ja'ay yajtëëwë: ¿Tiixë yë mxëëwajtyp? Tää y'ëtsooy: Jacob ëjts nxëëwajtyp.

²⁸ Tää ja naaxwiinyëtë ja'ay y'ënëmaayë: Ka'ap tyam mijts xy'ëkxëëwajtnëty Jacob, Jä'ä mxëëwajtnëty Israel. Jä'ä ko mijts Dios tyam mëët të mtsiptuny ets mëët tu'kë'ëyë yë naaxwiinyëtë ja'ay ets tëë xymyëmëtä'äky.

²⁹ Ënet ja Jacob ojts näjyëtu'un tyajtëy ja naaxwiinyëtë ja'ay: Mijts ënät tyam tuk'ëwa'anëkës, ¿tii mxëëwajtyp? Tää ja naaxwiinyëtë ja'ay y'ëtsooy: ¿Wi'ixës ko yë nxëëw xyajtëy? Ënet ja naaxwiinyëtë ja'ay jämyë kyënu'kxë.

³⁰ Tä yë Jacob tyajxëëwpejty ja jampë ja it naaxwiinyëtë Penuel, jä'ä ko y'ënäny: Tyam tëëjës ënät ja Dios kë'ëm ntim'ixy wiinxë jëjpxë ets ixës tyam njaakjuuknyëmëty.

³¹ Tam ënety yë Jacob tuknajxtaaynyë ja it naaxwiinyëtë mëti'ipë xyëëwajtypyën Penuel, ko ja xëëw pyëtsiimy. E jä'ä ko tëë ënety ja tyeky jyäjxma'aty, paaty ënety na'ëxma'at ye'ey.

³² Yë Israel ja'ayëty tyampaat ka'ap tsu'utstë yë eemy'u'unk mëti'ipë yajpatpën ma pajk nyämyukyën. Jä'ä ko jää ojts yë Jacob tsyëtyuty.