Génesis 31 - Biblia Dc en Mixe de Quetzaltepec

Jacob ojts tnimay tnitajë wi'ix kyä'äka'anyën ma Labankën

¹ Yë Jacob nyija'awëy ko ja Labán ja y'u'unk y'ëna'këty y'ëna'antë ko yë Jacob të tpëjkëtyä'äy winë yë Labán paaty ja Jacob të nyäyyajkumeenytyä'äkyë.

² Näyjyëtu'un yë Jacob t'ijxy ko yë Labán äjkëp xëmë kyëxë'knë. Ka'ap ijty jëtu'un jyä'äy'äty ko yë Jacob jyemyjyä'äjty.

³ Ënet ja Jacob myëkajpxë ja Wintsën ets y'ënëmaayë: Wimpit ënät tyam ma ja nyaax kyajpnën ja mteety mtaak ets ma ja mjëëky mmëku'uk jam y'itën ëjts mijts njämyëët'atäämpy.

⁴ Ënet ja Jacob ojts tnikäxë ja Raquel ets ja Lea ets myintëty jam kamjotm ma ënety jam ja Jacob tsyajppax këwent'atyën ets kyupixyny këwent'atyën,

⁵ tääts t'ënëmaay: Ëjts nnija'apës ko yë mteetyëty ka'apës xy'ëk'oyjya'awënë, tä ijty xy'oyjyawënës ko myë''ëka'any'äjty; e ja Dios mëti'ipës ja nteety y'ëwtajtën, ka'apës xy'ëxmatsy.

⁶ Miitsëty wa'ats xynyijawëtë ko tuunpës mëk ma mteetyëtyën ets tëës mputëkë jëtu'un ijxtëm mëpaat tjëkyepyën ntunëtyës,

⁷ e yë'ë je'eyës xëmë xywyin'ëëny ets janaam jatsojkës yë nmëju'uny xyajkunajkë. E yë Dios mëti'ipës n'ëwtajtypën ka'ap tyajkutuky ets wi'ix xytyimtunëtyës;

⁸ ko ënety kë'ëm yë'ë y'ënä'äny: Oy yë'ë ntukmëjuyëty yë jëyujk mëti'ipë najaamëtyën; ënät ijty ja to'oxyëtypë aakjëtu'un y'u'unk myääy tyajja'të; e ko ënety y'ënä'äny: Tyam nmo'ojëty ja kupixyny mëti'ipë moxkeetsyëtyën, ënät ijty ja to'oxyëtypë aakjëtu'un y'u'unk myääy tyajja'të aak moxkeetsyëty.

⁹ Jëtu'un ja Dios ojts wäänjaty pyëjkxëty ja jyëyujk etsës ëjts xymyo'oy.

¹⁰ Tu'kxëëw tu'kpo'o ojts tëkok n'ixyës ma ënety ja kupixynytyo'oxy ets kupixyny yä'äy nyämyukëtën, nwin'ijxyës kuma'ay joty ko ja yä'äypyë tsajppaxëty, mëti'ipë mëët ja to'oxypyë nyämyukëtën aak namoxkeetsy, aak najaam, aak wooxy ënätyëty.

¹¹ Maas ënety jam jëtu'un nkuma'ayën, ënät ja Dios tsajpjotmëpë kyukäjpxy xytyukmëkäjpxyës ja nxëëwës etsës n'ëtsooy: Tyaajës jä'ä.

¹² Ënet xy'ënëmaayës: yajxon xy'ixëty ets m'ixëp ko ja yä'äypyë tsajppax ets kupixyny nyämyukëtëty mëët ja to'oxypyë mëti'ipë jaamëtyën, tsixëtyën ets moxkeetsyëtyën, jä'ä ko wa'atsës n'ixy wi'ix yë Labán mtunyën.

¹³ Ëjts jëtu'un Tios'ajtp, mëti'ipë ojts xy'ixyën jam Betel, jam ma ojts xykyënu'kxyën ja tsaa ets waantakën xytyuuny mëët ëjts. Paaty tyam jam ënät. Pëtë'ëk ets mtsoonëty ma ya'atë it naaxwiinyëtën. Nëjkx jatëkok ma ja mnaax mkajpnën ma ojts mëxu'unk'atyën.

¹⁴ Ënet ja Raquel ets ja Lea y'ëtsoowtë: Ëëtsëty nitii kuma'ayën nka'ëkjëjp'ijxnëtës maas yë nteetyëty yë jyëën tyëjkën.

¹⁵ Jëtu'un ëëtsëty xyjya'awënëtë, tä jaaypyaat jaaypyo'kxyën. Jëtu'un tpatnë ijxtëm jeexyë ëëtsëty të xytyo'knëtën, ko mijts kanu'un të xynyituun të xynyiye'eynyëtës maas yë nteetyën, mëët je'eyëp ko të napëktës mëët mijts.

¹⁶ Paaty tu'kë'ëyë jënu'un yë nteetyës Dios të pyëjkxëtyën winë, ëëts yë njä'ä'ajtëm ets n'u'unk'ajtëm n'ëna'k'ajtëm. Paaty mijts yë'ë tun mëti'ipë ja Dios të mtuk'ëne'emyën.

Ma ja Jacob ojts tsyo'onën jam Padán-aram

^17-18 Ënet yë Jacob ojts nyänyipëjktaakëty ets nyëjkxanë jatëkok Canaán ma ja tyeety Isaac tsyënaayën. Tääts tyajpäjtaay ja y'u'unk tyo'oxytyëjk jëyujkëjxy jëyujk jëku'uxkëjxy. Tää nyätyu'ujëjpëjkëtyë tu'kë'ëyë jënu'un ja Jacob tmëët'atyën ets jënu'un ënety të tpaatyën ma ja tyuunkën jam Padán-aram.

¹⁹ Jä'ä ënety ja Labán të tninëjkxy ja kyupixyny ets ja nyijëmk tnëkääpanë, e jam ënety muum yajpaaty ko ja Raquel ojts tmeetsy ja naaxpotsy u'unk mëti'ipë ja tyeety ijty y'ëwtajtypyën.

²⁰ Jëtu'un ojts ja Jacob twin'ëëny ja myë't Labán ja arameë ja'ay, ko ka'ap tuknija'awëy wi'ix ojts jam tsyo'onën.

²¹ Ojts tmëkäkta'ay tu'kë'ëyë jënu'un ënety tmëët'atyën, poj'am tuknajxtë ja Éufrates mëjnëë ets tuktëjkëtyë ja Galaad kopkjotm.

Labán tpapo'oy yë Jacob

²² Tëkëëk xëëw ënety të nyajxnë, ko ja Labán tnija'awëy ko ja Jacob të kye'eky.

²³ Ënet ojts tnitsoontë nimay mëët ja jyiiky myëku'uk ets tnajtspatëtyë kom wëxtujk xëëw jam Galaad kopkjotm.

²⁴ E jä'ä tsu'um ja Labán y'ënëmaayë ja Dios teety kuma'ayjoty: Ëkmëtow yajxon, këtii yë Jacob xymyëkajpxëty mëët yë äkë.

²⁵ Yë Labán jam ojts tnajtspaatë yë Jacob ma ja Galaad kopkjotmën, ma ënety ja Jacob të jyajtä'äkyën, najamtëkë tni''ijxëtyë ja jya'ajtakn myaatakn ja Labán mëët ja myëku'uktëjk, winkon ma ënety ja Jacob jam näjyëtu'unën

²⁶ Ënet ja Labán ojts tuk'ojy ja Jacob, wi'ix ko jëtu'un të y'ëti'itsy ets t'ënëmaay: ¿Tii të xytyuny? ¿Wi'ix ko të xywyin'ëënyës? Jëtu'unës yë n'u'unk nmaayës yaa të xyajmiinë tsumjyä'äy matsyjyä'äyën.

²⁷ ¿Wi'ix ko të xywyin'ëënyës ets jëtu'unyë të mke'eky, nitii të xykyatuk'ëwaanës? Koos jeexyë të nnijawë, oy tsuj jeexyë të n'ëxmatsy mëët yë xuxpë wojpë ets ëëpë koopë.

²⁸ Ni yë'ëjës wäänë yë nnëëx etsës yë n'ok'u'unk n'ok'ëna'k të xykyatuk'ixy etsës jeexyë të ntsu'kxy, täänëm jeexyë akujk jotkujk të näy'ëxmajtsënë. Jëtu'un mijts të m'ëtëtsnë tä tsuuja'ayën.

²⁹ Ëjts ka'apës nkajaty jeexyë mijts ëxëëk ntuntë ets jeexyë yam nyajtsëyut nyajwintëkoytyë, Tiosës tyam koots të xymyëkäjpxy etsës të xy'ënëëmë: Ëkmëtow, këtiis yë n'u'unk Jacob xymyëkajpxëty mëët yë tsip äkë.

³⁰ Pën mijts mjanty wyinpitanëp ënety ma ja mteety ja jyëën tyëjkën ets paaty të mtsoony. ¿Wi'ix ko të xy'ëkmä'tspë ntsaamëxanës?

³¹ Ënet ja Jacob t'ëtsooy ja Labán: Jä'ä ko mijts ënety ntsë'këp, tyaajës ënety nmay ntajy ko ntij mijts atsip ja mnëëx xy'ëkpëjkënëtyës.

³² E pën jääts pën ma ëëtsëtyën të tkoonke'eky ja mtsaamëxan, wä'än t'ooky. Yë nmëku'ukajtëm yë'ë wë'ëmtëp ijxpë mëtoowpë, pën nmëët'ajtypyës winë mëti'ipë mijts mjä'ä'ajtypyën. Ko tii xypyaatëty ma ëëtsëtyën mëti'ipë mijts mjä'ä'ajtypyën oy xyajnëjkxëty. Yë Jacob ka'ap ënety tnijawë pën Raqueltëm ënety myëët'ajtyp ja tsaamëxan mëti'ipë ja Labán nyikäjpxypën.

³³ Ënet ja Labán tyëjkëy ma ja Jacob ja wyitnikemyën, tääts tyëjkëy näjyëtu'un ma ja Lea ja jyä'äjën ets ma ja nimäjtskpë ja tyo'oxytyëjktuunpëtyën, ka'ap tpaty ja tsyaamëxan. Ko pyëtsiimy ma ja Lea ja wyitnikkämën, ënät tyëjkëy ma ja Raquel ja jyä'äjën.

³⁴ Ënet ja Raquel ojts pojën ja tsaamëxan tyu'utsy yujktuumpäjnpa'tkë'p ets jam tni'ënyaaypyejty. Yë Labán tëë ënety tja'ixtaaytyä'äy ja tsyaamëxan ma ja wit tëjkën, ka'ap nimaa tpaty.

³⁵ Ënet yë Raquel t'ënëmaay yë tyeety: Tatë, këtii m'äkëtëty oyës nkawä'ätsë'ëkëty, mijts mwintuuy, ëjts ëmaay'ijtpës tyam. Yë Labán ojts tjajaak'ixtaay'ëti'itsy ja tsyaamëxan, e nikä'äpyëm nimaa tpaty.

³⁶ Ënet ja Jacob ojts jyoot'anpëjknë ets ojts t'ojy ja Labán, tä t'ënëmaay: ¿Tiitën mijts të ntukmëtëkoy? ¿Ets tii pokyën ëjts të ntuny ko mijts janty jëtu'un xy'ixjëtijt xypyajjëtijtnës?

³⁷ Tëë xy'ijxnajxta'ay xypyëjknajxta'ay maas winë nmëët'atyën. ¿E tii të xypyääty mëti'ipë mjä'ä'ajtypyën ma mjëën mtëjkën? Pëjkta'ak yaa itkujky pën tëë winë xypyääty ets t'ixtëty ja mëku'uktëjk etsës ja nmëku'uktëjk näjyëtu'un t'ixtëty ets yajnijawëty pën mëtëy ënaanp.

³⁸ I'pxjëmëjtës mijts të nmëtuny ma mtëjkën ets nijëna'a ja mtsajppax ets ja mkupixyny të kya'u'unk'ookyë, ets nitëkokës wäänë të nkatsu'utsy yë mtsajppax ets mkupixyny.

³⁹ Nijëna'a mijts yë mjëyujk ooky të nkatukwinkuwitsë mëti'ipë yaj'o'këtëpën kaa jëyujk; ko ijty jyëtu'un'aty ënetyës ijty xytyimnatukujuy ko tu'uk muum pyutëkoy ets ko ijty xëëny ëkë koots pën tmeetsy.

⁴⁰ Ko xyiinyëty mëpaatëpës ijty n'an'ooky mëët yë xëëw'an; e ko kyootsëty, mëpaatëpës ijty ntip'ooky, ëts käknëpës ënety ja ntsuunë.

⁴¹ I'px jëmëjt mijts të nku'itë ma mjëën mtëjkën, ix wi'ixës tyam xy'ëktuka'anë: yë nimäjtskpë yë mnëëx majkmajkts jëmëjtës të nituny, e mëët ja mjëyujk mëti'ipës tyam njä'ä'ajtypyën, tëtujkjëmëjtës të xytyuknituny; ets janaam jatsojkës ijty yë nmëju'uny xyajtëkajtsë.

⁴² Ko jeexyë ja Dios xykyani''ijxkëtä'äkyës mëti'ipë yë Abraham y'ëwtajtën, ja Dios mëti'ipës ijty ja nteety Isaac y'ëwtajtypyën, katii nija'awën wä'änxyëp jeexyë jëtu'unyë mijts të xy'ëkwinpakäjxnës. Yë Dios yë'ë të t'ixy, ko ënety ëjts mon tuk nyajpaaty ets koos ënety mëk ntuny n'ëyoy, paaty ya'atë tsu'um të mëkmëkäpxyë.

Jacob mëët yë Labán tuntë tu'uk ja käjpxytyu'unën

⁴³ Ënet yë Labán t'ëtsooy yë Jacob: Yë to'oxy'ëna'këty ëjts yë n'u'unk ets yä'äy ëna'k u'unkëty ëjts näjyëtu'un yë n'ok'u'unk n'ok'ëna'k, e näjyëtu'un yë jëyujk ëjts yë njä'ä. Tu'kë'ëyë jënu'un ya'atë tyam xy'ixyën aak'ëjts yë njä'ä. E koos n'ëkmay n'ëktajy, ¿wi'ixës jëtää nkë'ëm'u'unk nkë'ëm'ëna'k n'ëktuna'any. Etsës yë n'ok'u'unk n'ok'ëna'k tiijës n'ëktukpaatäämpy?

⁴⁴ Paaty tyam mijts n'ënëëmë ets tu'uk ja käjpxytyu'unën ntu'unmëty, mëti'ipë yajtukja'amyätsëpën ko tyam ëtsajtëm oy tsuj winë nkajpxmujkëmë nkajpx'o'oyëmë.

⁴⁵ Ënet ja Jacob tu'uk ja tsaa tkoonë'ky mëjpë ets t'ënyääytyäky kujkyë tä tu'uk yë xenyën.

⁴⁶ Tääts t'ënëmaay ja jyiiky myëku'uk: Koonmujkta'atë tsaa mëjpë mutskpë. Tääts jam nyaaxwä'tstaaytyë jënu'un jam yajpaatën ets tyëjkëtyë kääpyë ukpë jam winkon ma jam ja may tyaa të tnikoompätën.

⁴⁷ Jä'ä ojts yë Labán tyajxëëwpety tampë ja it naaxwiinyëtë Jegar Sahaduta, jëtu'un ijxtëm ënety yë'ë kyäjpxyën; e yë Jacob jä'ä ojts txëëwmo'oy Galaad jëtu'un ijxtëm ënety yë'ë kyäjpxyën.

⁴⁸ Ënet yë Labán y'ënäny: Ya'atë tsaa mëti'ipë yam të yajnipiiwpetyën, yë'ë ijxpë mëtoowë wë'ëmp ma ëëtsajtëmën ets yë'ë nëjkx nyajtukja'amyäjtsëmë. Paaty jëtu'un ojts yajxëëwmo'oy ja it naaxwiinyëtë Galaad.

⁴⁹ Mispá ojts näjyëtu'un yajtijy, jä'ä ko ja Labán y'ënäny: Dios xy'ijxijt xykyëwent'ajtmëp ëëtsajtëm nimäjtsk. Oy jëna'a nka'ëknäy'ijx nka'ëknäypyatënëty.

⁵⁰ Pën ëxëëk xytyuny ja n'u'unkës nnëëxës ets pën mpëjkpy m'ukpy wiinkpë ja to'oxytyëjk, oy ënety pën tka'ixy tkanijawë, Dios yë kë'ëm kyëwentëpëkëp.

⁵¹ Tä yë Labán tjaakënëmaay yë Jacob: Ëk'ix, ya'atë tsaa mëti'ipës tëë mpëjktä'äkyën tänë tä xenyën ma ëëtsajtëmën nimäjtsk.

⁵² Yë'ë jëtu'un ijxpë tuunpë ko ka'ap pën nyäy'ënaxëtëty ma ëtsajtëmën nimäjtsk ets ka'ap näpyëjkëmëty ja naax kam ma ja tsëpa'an nmëët'ajtëmën.

⁵³ Wä'än yë'ë tkëwentëpëky yë Dios mëti'ipë yam nikajpxëmën nimëtyakëmën, mëti'ipë y'ëwtajtën yë mtatwelë Abraham etsës yë ntatwelë Nahor. Ënet yë Jacob ojts tukë'ëwan tukë'ëyaaxë ja Dios mëti'ipë ënety jam y'ëëwmujk kyajpxmujktëpën, ja Dios mëti'ipë ja tyeety Isaac y'ëwtajtën.

⁵⁴ Jëtu'un yë Jacob tyaj'apatëy tu'uk yë wintsë'kën jam kopkëjxm, tääts tmëkajpxmujktaay ja jyiiky myëku'uk ets mëët kyäyä'äny y'uuka'any. Ojts jam nimay kyäytyë y'uuktë ets jam jëtu'un ja tsuu tyajnajxtë kopkkëjxm.

⁵⁵ Komjëpom ja Labán ojts myä'äypyëtë'kojy jopyëp ets tsu'kxtaay ja y'ok'u'unk y'ok'ëna'k ets ja nyëëx nimäjtskpë, jä'ä ko jëtu'un ënety tu'unën'atë. Tää tkënu'kxtaay nitu'ukjaty, tä ojts wyimpijnë ma ja nyaax kyajpnën.