Génesis 20 - Biblia Dc en Mixe de Quetzaltepec

Abraham ets Abimélec

¹ Ënet yë Abraham ojts jam tsyo'onë ma ënety tsyëënën ets ojts nyëjkxnë ma ja naaxwiinyëtë txëëwatyën Négueb. Jam tu'uk ja kajpn txëëwaty Guerar, jam ojts wyi'imy tsënääpyë. Itkujky wyi'imy yë Guerar mëët yë Cadés ets Shur.

² Ko ojts jam jyä'ty Guerar, tä y'ënäny ko yë Sara, yë Abraham yë tyo'oxytyëjk, y'uty ënety. Paaty yë Abimélec mëti'ipë jam ënä'ämpë'ajtpën Guerar, ojts tnikäxë yë Sara ets to'oxytyëjk'ata'any

³ E jä'ä tsu'um ojts yë Abimélec wyinkuma'ay ma ja Dios ojts y'ënë'ëmxëtyën kuma'ayjoty: M'ookëp ënät, mëët ko ja to'oxytyëjk të xywyoy mëti'ipë pëkynyën.

⁴ Yë Abimélec ka'anëm ënety tkë'ënixajynyëm yë Sara, paaty t'ëtsooy ja Dios: Wintsën. ¿Wi'ix ko xyaj'ooka'any mëti'ipë ka'ap tii poky tunyën?

⁵ Kë'ëmës yë Abraham të xy'ënëëmë ko y'uty yë'ë to'oxytyëjk. E yë Sara näjyëtu'un kë'ëm të y'ënä'äny, ko yë Abraham t'ay'äty. Paaty jëtu'un të nwoyës mëët oyjyot oywyinma'any. Ëjts ka'apës yam nitii ëxëëkpë të ntuuntëkoy.

⁶ Ënet ja Dios y'ëtsoowë nän kuma'ayjoty: Ëjts wa'atsës nijawë ko mëët ja oyjyot oywyinma'any jëtu'unpë të xytyuny. Paatyës ka'ap të nyajkutuky ets xykyë'ënixajëty tääpë to'oxytyëjk, këtiipë mpokytyunëty ma ëjtsën.

⁷ E tyam yajwinpijtë ënät yë tyo'oxytyëjk tääpë ye'etyëjk, jä'ä ko käjpxynyajxpë yë'ë, yë'ëjës xymyënu'kxta'akaanp ets mijts mjuuky'atëty. E pën ka'ap xyajwinpijtë yë tyo'oxytyëjk, tyam yajxon ntim'ënëëmë ko o'kta'ajantëp niwinë ja'ay mëti'ipë mmëët'ajtypyën.

⁸ Komjëpom yë Abimélec myä'äypyëti'ky ets ojts tmëkajpxmuky yë tyuunpëtëjk ets tukmëmëtyaktaay mëti'ipë ënety të tkuma'ayën. Ko ja tyuunpëtëjk jëtu'un tmëtoowtë, ënät ojts mëk tsyë'ëkëtë.

⁹ Yë Abimélec ojts twoowtsoy ja Abraham ets t'ënëmaay: Ëk'ix tii ko jëtu'un të xytyunyës, tii mijts të ntukmëtuuntëkoy. ¿Tii ko ya'atë nëë poky të xymyëminy të xyajminy maas ëjts yë njëën ntëjkën ets maas tu'kë'ëyë nmëkunaax nmëkukajpnën? Ya'atë ka'ap jëtu'un tyuunpëty.

¹⁰ ¿Tii ënety mmääpy mtäjpy, ko ojts jëtu'un m'ëtë'ëtsy? Jëtu'un ojts ja Abimélec t'ënëëmë ja Abraham.

¹¹ Tä yë Abraham y'ëtsooy: Ëjts tyaajës ënety nmay ntajy, ko ka'ap ntij yaa pën yë Dios tsë'ëkë ma ya'atë naax kajpnën, xyaj'ooktëpës ntij koos n'ënanëty, ko yë Sara nto'oxytyëjk yë'ë.

¹² Tyam mijts jatëkok n'ënëëmë, ko tëyajtën yë'ë, koos nmëku'ukëty ets koos nmëkä'äxëty. Jä'ä ko yë'ëjës yë nteety yë nyëëx, je'eyëp ko ëpëky tyaak. Paaty ojts tjëkyepy ets yë'ë mëët npëkëtyës n'uukëtyës.

¹³ Koos ojts ja Dios xy'ëne'emy etsës ëjts mpëtsëmëty maas ja nteety ja jyëën tyëjkën. Ënätës ojts n'ënëëmë ja nto'oxytyëjk, ko oymyaanaax myaakajpn ntimjya'tëtyës, jëtu'un y'ëna'anëty koos xy'äy'äty ets koos yë'ë n'uty'äty.

¹⁴ Tä ja Abimélec ojts jatëkok ja tyo'oxytyëjk tmo'oy yë Abraham, ojts tukmëyoxy yë tsajpkaa, kupixyn ets ja'ay mëti'ipë yajtunëpën ye'etyëjk to'oxytyëjk,

¹⁵ ets t'ënëmaay: Ëk'ix nkajpnjotyës yaa mijts myajpaaty, win'ix yë it naaxwiinyëtë mëti'ipë mtsojkën'ajtypën ets jam mtsëënëty mjuuky'atëty.

¹⁶ Tä näjyëtu'un ja Sara t'ënëmaay: Yë mëti'ipës yë m'ay të nmo'oyën mëj këjää oy yë wit meeny tnëkëjxmëty, e yë'ëts mnätyukputëkëtëp ets mëj'äämpy yë ja'ay mjawëtëty oymyaajëty ets mwintsë'ëkëtëty mëti'ipë mëët m'ijtmuk mtsënaamyuktën. Ni pën tkajëkyäpëty ëxëëk mtijëtëty.

¹⁷ Ënet yë Abraham ojts yë Dios tmënu'kxtä'äky, tä ja Dios jatëkok tyajjëwä'ky ja yuu pa'am ma ja Abimélec ja jyot nyini'kxën ets ma ja tyo'oxytyëjkën. Ojts näjyëtu'un tsyo'oktë y'akëta'aktë ja tyuunpë ets mëpaat y'u'unk'ixtë.

¹⁸ Mëët yë'ëkyëjxm yë Sara, Dios ënety të tuknipëjktaakë ets ni pën kya'u'unkpaatëty ja to'oxytyëjkëty ma ja Abimélec ja tyuunpëtëjkën.