Génesis 19 - Biblia Dc en Mixe de Quetzaltepec

Tios tyajkutëkoy yë Sodomë ets Gomorra kajpn

¹ Tsu'ujënëp ënätynyë ko ojts nimäjtsk jya'të yë tsajpjotmëpë kukäjpxy jam Sodomë. Jam ënety yë Lot ma kajpn yajnitëkën, ma ja'ay may yajpaatën. Ko ojts yë t'ixy ja tsajpjotmëtë kukäjpxy ënät ojts tjëjpye'eyi'iky. Tä nyäkyoxtënaaytyakë ets nyaaxkooy.

² Tä t'ënëmaay: Mëku'ukëty tuntë mëyajtën nmënu'kxtaktëp yam ets mjamtëty maas yë ntëjkën, jam yë tsuu xyajnaxtëty ets mkë'ëpuj mtekpyujtëty, jopynyëm tsojk jatëkok mtu'upëktëty. Ënet ojts y'ëtsowtë: Ka'ap, Dios kyujuyëp ko jëtu'un mja'ëna'any, jëtu'unyë ëëts yë tsuu muum nyajnaxa'antë muum tu'ujoty.

³ Yë Lot ni'ikyë y'ënaan'ëtë'ëtsy ets ja ja'ay wyë'ëmtëty, ënätnëm ojts tkupëktë ets tpanëjkxtë ja Lot ma ja tyëjkën. Ko ojts jya'të, ënät yë Lot tyaj'o'oyëy ja a'ux, ojts tyaj'oyë tsajpkääky jëtu'unyë tsäk ka'apë tsyooymyëëtëtyën ets y'a'ux'ajtë ja'ajtakpëty.

⁴ Ka'anëm ënety myanaxtënëm, ko ja Sodomë ja'ayëty ojts ja Lot yë tyëjk tyajnaatujktaayëtë, jënu'un yë mutsk'ëna'këty ets mëjja'aytyëjk.

⁵ Ënet tyëjkëtyë yaxpë jojkpë. Yë Lot yajmëkajpxp, jëtu'un y'ëna'antë: ¿Ma ënät ja ja'ayëty mëti'ipë të xyaja'ajtä'äkyën ma mtëjkën? Yajpëtsëm nmëëtko'knëjantëpës yam.

⁶ Ënet yë Lot tnipëtsëëmy ja ja'ayëty. Tä yë tyëjk tyaj'ëtujky jëxkë'p'äämpy,

⁷ tä t'ënëmaay: Mëku'ukëty tuntë mëyajtën këtii jëtu'un yë ëxëëk winma'any xypyaatë ets tëkatsy winë xytyuntëty.

⁸ Ëjts nmëët'ajtypyës mäjtsk yë nnëëxës, mëti'ipë ka'ap yë ye'etyëjk tmëëttsëënëtënëm, oyës nyajpëtsëmëty ets xy'ixtëty wi'ix xytyuntë. Këtiipë wi'ix xytyuntëty yë ye'etyëjkëty mëti'ipës xynyimiinp xynyija'ajtëpën.

⁹ E yë'ëjëty tä ojts y'ëtsowtë: Mijts ëkjëwa'akmës, ka'ap tjëkyepy tu'uk yë jaaypyo'kxyjyä'äy xy'ënä'ämtëtyës. Paaty tyam ni'ikwäänë o'ktëy, ënät yam ntuntëty, këtiinëm tääpë ye'etyëjkëty mëti'ipë të xyajja'ajtä'äkyën. Ënet ojts ja Lot ëxëëk tuntë, ojts ja tyëjk aaw t'awa'kpäjtëtë ets tjakujëpijpnaxantë.

¹⁰ E ja tsajpjotmëtë kukäjpxy mëti'ipë ënety të jyajta'aktën ojts nixajwootstë ja Lot jap tëkotsyow ets ja tëjk'aaw tyaj'ëtujktë.

¹¹ Tu'kë'ëyë ojts wyë'ëmta'atë ja ja'ayëty wiints jënu'un yë mëj ëna'këty ets mutsk ëna'këty, ojts y'ënu'kxëtyääynyëtë ko tjajanty'ixtaaynyëtë ja tëjk'aaw.

¹² Ënet ja ja'ajtakpëty t'ënëmaaytyë ja Lot: ¿Wi'ix jaakjää mijts yë mjëëky mëku'ukë? Ënëmaaytya'a yë mmaank ets mnëëx, yë mmë't ets tu'kë'ëyë mëti'ipë mëët'ajtypyën yaa kajpnjoty, mëpëtsëëmta'a ets mënëjkx jëkäm.

¹³ Jä'ä ko tyamës ya'atë kajpn nyajkutëkoya'antë. May oy yë tsyip y'äkë të nyipäjtnëtë yë ja'ayëty mëti'ipë yaa ijtëpën jam Dios wyintum. E paatyës të nyajkäxtë ma ya'atë kajpnën ets nyajkutëkoytyëtyës.

¹⁴ Ënet ojts ja Lot tninëjkxy ja nimäjtskpë ja myë't, yë'ë mëti'ipë ënety pëkantëpën mëët ja nyëëx ets t'ënëmaay: Pëtë'ëktë ets kä'äktë ma ya'atë kajpnën, jä'ä ko yajkutëkoyäämpy yë Wintsën ya'atë kajpn tyam. Yë myë'tëty ninu'un ojts tkamëjpëjkta'aktë ja Lot ja y'aaw y'ayuk.

¹⁵ Tim xëënyënëp ënätynyë ko yë tsajpjotmëtë kukäjpxy t'ënëmaaytyë ja Lot: Pëtë'ëkoj tim poj'am ets tso'onkojtë timtyämyë mëët yë mto'oxytyëjk ets nimäjtskpë yë mnëëx. Ënet jëtu'un pën këtii m'ooka'any, ko ënety ëëtsëty nyajkutëkoytyë yë kajpn.

¹⁶ E yë Lot jaakpoxp ënety, paaty myajtsë kyë'ëkëjxm yë tsajpjotmëtë kukäjpxy. Jä'ä ko yë Wintsën myëët'ajtyp ënety yë pa'ëyo'owën najts'ëyo'owën ma yë'ëjën. Ënet ojts näjyëtu'un yë tyo'oxytyëjk ets nimäjtskpë nyëëx yajmatstë kyë'ëkëjxy ets pyëtsëëmtë jam kajpnjotm ets tsyoktë.

¹⁷ Ko ënety tëë yë kajpn tukpëtsëëmtaaynyëtë, ënät ojts yë tsajpjotmëtë kukäjpxy y'ëna'antë: Pe'tym pëyë'ëktë ets näyyajtso'okëtë, këtii mnäjyë'ixëtëty ets këtii mwa'ak'awëtëty. Nëjkx kopkkëjxm, pën myajtso'okäämpy yë mjuukyajtën.

¹⁸ Ënet yë Lot y'ëtsooy: Ka'ap, Wintsën, tun mëyajtën.

¹⁹ Miitsëty mëjmëyajtën të xytyuntë koos yë njuukyajtën të xyajtsokëtë. Ëjts ka'apës njëkyepy nëjkxëty kopkkëjxm, jä'ä ko tsojkës yë ëyo'on muum xynyajtspaatëty etsës n'ëk'o'knëty

²⁰ Tsyääyë winkon tu'uk yë mutsk kajpn ma tjëkyepyën nkäktso'okëtyës, käjxkës jää wä'änës jam n'ëknëjkxy ets jëtu'unës yë njuukyajtën tsyo'okëty, mutsk ja kajpn, ka'ap nëkooyë myëjëty.

²¹ Ënet ojts tu'uk y'ëtsoy ets y'ënäny: Tëëjës yam nmëtoy mëti'ipë të xy'amëtoyën, ka'apës nyajkutëkoyä'äny yë kajpn mëti'ipë mnikäjpxypën.

²² Oy mnëjkxëty, nëjkx jam, tim nëjkx jëtu'un tyämyë jä'ä ko ka'apës mëpaat tii ntuny pën ka'ap jam mja'tynyëm ma tääpë kajpnën. Paaty jëtu'un ojts ja kajpn yajxëëwmo'oy Zoar.

²³ Ko ojts xyiinytyä'äky, Lot tëë ënety nyajja'anë jam Zoar.

²⁴ Tä yë Dios tyajjëëntu'uy atsë'ëk ajawë jam Sodomë ets Gomorra.

²⁵ Yajkutëkooytyääy tu'kë'ëyë mëti'ipë ënety jam tsënaaytyëpën ets tyajkëjxtaay winëjaty mëti'ipë jam yä'kp päjtpën joyjyotm.

²⁶ Yë tyo'oxytyëjk yë Lot mëti'ipë ënety ëx'ok miinpën ojts nyäjyë'ixyë ets ojts jëtu'un wyi'imy kaanpotsyën.

²⁷ Komjëpom jopyëp ojts yë Abraham nyijkxy jam ma ja naaxjotmën ma ënety mëët ja Dios të kyäjpxy të myëtyä'äkyën.

²⁸ Ënet ojts jam nyas'ixë Sodomë ets Gomorra ets ma pya'ajën nyuxën ets t'ijxy ko jam yë jëënjok pyëti'iky ijxtëm jeexyë tsijtkjoty yë jëën tyoyën.

²⁹ Jëtu'un ojts kyutëkooytyä'äy yë Sodomë ets Gomorra kajpn ets mëët yë pya'a nyux ma ënety yë Lot të jyuuky'ätyën, e ojts yë Abraham yajja'amyetsy, paaty jëtu'un ojts yë Lot yajjuuty ëyo'onjoty.

Ma ojts tsyo'onë'ëky tsyo'onta'aktën yë Moab ja'ayëty ets Amón ja'ayëty

³⁰ Yë Lot natsë'këp ënety jam ma tsyënaaytyaknpëjktën ma ja it naaxwiinyëtë txëëwatyën Zoar. Paaty ojts nyijkxy mëët ja nimäjtskpë ja nyëëx jam. Jëtu'un ojts nitëkëëk wyë'ëmtë tsënääpyë ma tu'uk ja aankën.

³¹ Tëkok ojts ja nyëëx ja mëjpë t'ënëëmë ja y'uty: Ëk'ix mijts wa'ats xynyijawë ko nteety'ajtëm tëë myëjja'ayënë, e yaa ma ya'atë it naaxwiinyëtën ka'ap yaa pën ye'etyëjk mpatmëty mëti'ipë jeexyë mëët mpëjkëm n'ukëmë jëtu'un ijxtëm yajtu'unën'atyën.

³² Paaty tyam tsojk nteety'ajtëm n'a'ukëmë ets myu'ukëtëty, tääts ka'ap t'ixëty ets tjawëty ko nmëëtko'knä'ämyëty, e jëtu'unts yë'ë xyaj'u'unkpatmëty.

³³ Jä'ä koots ojts ja tyeety t'a'uukëtë, ja mëjpë jä'ä ojts ëka'any mëët myä'äy ja tyeety. Ja tyeety ka'ap ojts tjawë wi'ix ja nyëëx ja mëjpë pyuki'tëyë ets wi'ix ojts nyaki'tutkojënë.

³⁴ Komjëpom ja mëjpë t'ënëmaay ja y'uty: Ëk'ix ya'atë tsu'um të nyäxyën ëjts mëët yë nteety'ajtëm të nma'ayës e ëwään koots jatëkok yë nteety'ajtëm n'a'ukëmëty, tääts mijts näjyëtu'un xymyëëtko'knëty. Jëtu'unts nimäjtsk yë y'u'unk nyajmëxu'un'ajtëmëty.

³⁵ Jä'ä tsu'um ojts ja tyeety jatëkok t'a'uukëtë ets ojts tyajmuktëkoyëtë, ënät ja mutskpë nyäkyo'kë mëët ja tyeety. Ja tyeety ka'ap tja'awëy wi'ix ojts tpuki'itë ets wi'ix ojts tpuki'tutkojnëpë.

³⁶ Jëtu'un ojts wyë'ëmtë u'unk mëët ja nimäjtskpë ja nyëëx ja Lot, mëët ko ojts mya'atë mëët ja tyeetyëty.

³⁷ Ja mëjpë ja nyëëx ojts tu'uk ja y'u'unk tyajmëxu'unk'aty mëti'ipë xyëëwmooyën Moab, mëti'ipë ojts ja y'u'unk y'ëna'k yajtijtën Moab ja'ayëty.

³⁸ E ja mutskpë ja nyëëx ojts näjyëtu'un tyajja'ty ja y'u'unk myääy mëti'ipë tyijën Benami. Yë'ë jëtu'un ojts ja y'u'unk y'ëna'k txëëwatë Amón ja'ayëty.