Génesis 12 - Biblia Dc en Mixe de Quetzaltepec

Ko ojts yë Tios tmëkäjpxy yë Abram

¹ Tëkok ja Dios t'ënëmaay ja Abram: ëxmats yë mnaax mkam, mjëën mtëjk, mjëëky mëku'uk ets mteety mtaak, nëjkx jam ma ja it naaxwiinyëtën mëti'ipë yam ntukni''ixëjäämpyën.

² Ëjts nyajkojäämpyës mëjpë ja naax kajpn mëët ja m'u'unk m'ok. Mijts nkënu'kxäämpyës mëjwiin këjää ets mëj'äämpy nyaj'ita'any ets mëët mijtskyëjxm kënu'kxy nëjkx may yë ja'ay y'itë.

³ Nkënu'kxäämpyës mëti'ipë ënety mkënu'kxëpën, npokäämpyës mëti'ipë ënety mpojkëp mijts kyëjxmën; mëët mijtskyëjxm nkënu'kxta'ajäämpyës yë ja'ay naaxwiinyëtë apëtsëmy.

⁴ Ojts yë Abram jam tsyoony Harán ijxtëm ënety yë Dios të y'ëne'emyën, jä'ä ënety yë jyëmëjt tëkë'px majkmokx ko jam tsyo'ony ets ojts nyijkxy jam Canaán nyaaxjotm.

⁵ Ojts yë tyo'oxytyëjk näjyëtu'un twoownëjkxy mëti'ipë xyëëwajtypyën Sarai ets ja tsyojkmaank mëti'ipë xyëëwajtypyën Lot. Näyjyëtu'un ojts tyajnëjkxta'ay tu'kë'ëyë jënu'un ënety winë tjä'ä'atyën ets ja tyuunpëtëjk ninaak tmëët'atyën jam Harán. Ko jyajtë jam Canaán,

⁶ Abram ojts tuknajxta'ay tääpë it naaxwiinyëtën ets jyä'äjty ma jam ja itjot txëëwatyën Siquem, ma ënety jam tu'uk ja xoj kepyën kënu'kxypyë mëti'ipë jyä'ä'ajtypyën yë Moré. Yë Canaán ja'ayëty jamnëm ënety tsyëënëtë ma ja jampë ja it naaxwiinyëtën.

⁷ Ënet ojts jam yë Dios nyänikëxë'ëky ma Abramkën ets y'ënëmaayë: Ya'atë naaxwiinyëtë yë'ëjës yë m'u'unk m'ok nmo'ojäämpy. Ënet ojts yë Abram pojën t'oytyuny tu'uk ja wintsë'këntyakn, jä'ä ko ënety jam yë Dios të nyänyikëxë'ëkyë.

⁸ Ënet ojts yë Abram nyijkxy ma ja it naaxwiinyëtën kopkjotmëpë, mëti'ipë wë'ëmpën a'oytsyow ma Betel kajpnën, jam tpëjktäky yë tsyënaaytyakn. Yë Betel anajnytsyow ënety wyi'imy ma ja tsyënaaytyaknën, e ja kajpn mëti'ipë xyëëwajtypyën Aí a'oytsyow wyi'imy. Ma tääpë ja it naaxwiinyëtën ojts yë Abram tyajkojy jam yë wintsë'këntyakn ets ojts tpa'tmëkäjpxy ja Dios ja xyëëw.

⁹ Jëtu'un ja Abram tyu'uye'ey, xii yaa muum wäänjaty tsyënaaytyaknpëky ets jam jyä'äjty Négueb y'itjotmën.

Abram jap Egiptë

¹⁰ Tëkok ojts yë yuu xëëw jam y'ity ma ja Abram tsyëënën. Ënet ojts nyijkxy jap Egiptë tsënääpyë tu'kxëëw tu'kjëmëjt. Jä'ä ko ka'ap ënety jam t'ëkpatnëtë tii jyë'kxtëp ets jyuuky'atëty.

¹¹ Ko jap Egiptë jyä'äjty, ënät ja Abram ja tyo'oxytyëjk Sarai t'ënëmaay: Ëk'ix, ëjts wa'atsës nijawë ko mijts m'oyëty mtsujëty.

¹² E ko ënät m'ixëtëty yë Egiptë ja'ayëty, ëna'antëp ënät: Xiipë to'oxytyëjk yë'ë yowë xiipë ye'etyëjk nyiye'etyëjk'ajtyp ets tsojk ënät xyaj'ooktëtyës ets mijts mwë'ëmëty juuky ets mëët'ita'an mëëtsëënëja'anëtëty.

¹³ E paaty yam n'ënëëmë, këtiipës wi'ix njatëty nkëpätëty ets këtiipës nëjkx xyaj'ook xyajtëkoytyë mëët mijtskyëjxm. Jëtu'un m'ëna'anëty ko mijts n'utyëty.

¹⁴ Ko yë Abram jya'ajtë jap Egiptë, ënät yë Egiptë ja'ayëty ojts y'ëna'antë ko yë Sarai janty'oy, janty tsuj y'ixë'aty.

¹⁵ Näyjyëtu'un yë yajkutujkpë yë tyuunpëtëjk janty'oy ojts t'ixtë ja Sara. Ënet ojts ninëjkxtë ja yajkutujkpë mëti'ipë jap Egiptë ënä'ämpën ets tukmëmëtyaktë ko ja to'oxytyëjk ënety janty'oy, janty tsuj të t'ixtë. Tääts twoowmiintë ja to'oxytyëjk ma ënety ja mëj'ënä'ämpë jap yajkutukyën.

¹⁶ Mëët Sarai kyëjxm yë mëj'ënä'ämpë janty'oy ojts tjawë yë Abram, ojts tnamo'oy yë jëyujk tsajpkaa, tsajppaxëty, jëyujk jëku'uxëty ets tuunpë.

¹⁷ Näyjyëtu'un mëët Sarai kyëjxm yë Wintsën mëk ojts yë mëj'ënä'ämpë tëytyuny mëët ja jyiiky myëku'uk mëti'ipë jam yajpatëpën ma jyëën tyëjkën.

¹⁸ Ënet ojts yë mëj'ënä'ämpë tyaxtsoy yë Abram ets t'ënëmaay: ¿Wi'ix ko mijts jëtu'un m'ëtë'ëtsy? ¿Wi'ixës ko të xykyatuk'ëwaanë ko ya'atë to'oxytyëjk mijts yë mto'oxytyëjk?

¹⁹ Mijts tyaajës të xy'ënëëmë ko xy'utyëty. E ëjts tsojkës jeexyë të n'ëkto'oxytyëjkniwanë. Paaty tyam nëjkx, tyam jatëkok ja mto'oxytyëjk nmo'oy. Ëxajë kupëk ets mnëjkxëty.

²⁰ Tä ojts yë mëj'ënä'ämpë t'ëne'emy yë tyuunpëtëjk ets tyajpëtsëmtëty ja Abram jap Egiptë, mëët ja tyo'oxytyëjk ets mëët tu'kë'ëyë jënu'un winë tmëëtëtyën.