Génesis 11 - Biblia Dc en Mixe de Quetzaltepec

Ja mëjpotsy mëti'ipë xyëëwajtypyën Babel

¹ Ko jyeky'äjty tu'ukyë ijty ja aaw ayuk mëti'ipë ja naaxwiinyëtë ja'ay kyajpxtëpën.

² Ko ja ja'ayëty tsyo'ontë jamtsow ma ja xëëw pyëtsimyën, ënät ojts tpaatë tu'uk ja joy'it jam ma ja it naaxwiinyëtë txëëwatyën Sinar. Tä jam tsyënaaytyaknpëjktë.

³ Tu'kxëëw tu'kjëmëjt ojts tkäjpxy'atë: Tsojk nyajkojëm yë muutsy ets jëënjoty nyajkë'ëwmëty. Muutsy kyë'ëw ojts tyajtuntë ijxtëm jeexyë tsaajën ets tukpojtstë yë mo'onts.

⁴ Ënet nyäy'ënanëtë: Mintë, tsojk nyajkojëm tu'uk yë kajpn ets nyajpëtë'kmëty tu'uk yë potsy mëti'ipë ja'tëpën tsajpwinm. Jëtu'un nyajjëkyajpmëty mëj'äämpy yaa naaxwiiny. Ka'ap nëjkx xity ko'oy n'ijtëmë.

⁵ Ënet ojts ja Wintsën tniku'ijxnaxy ja naax kajpn ets ja mëjpotsy mëti'ipë ënety ja naaxwiinyëtë ja'ay ëka'any kyojtso'ontaktëpën.

⁶ Tääts myääy tyäjy: Yë naax kajpn tu'ukyë nyäyaj'itëtë ets tu'ukyë yë aaw ayuk mëti'ipë kyajpxtëpën. Paaty të tyajtso'onta'aktë ya'atë tuunk. Tyam nitii jotmay tkamëët'atë ets t'ëxmatstëty mëti'ipë tëë tnipëjktaakëtën.

⁷ Nikë tim oy'atëp yowë ko yë y'ayukëty ntimyajnäyjyo'pëmëty, këtiipë nyäjyä'äkyukëtëty yë'ëjëty.

⁸ Jëtu'un'äämpy ojts yë Dios tyajye'eywya'kxta'ay ja ja'ay naaxwiinyëtë apëtsëmy ets ojts t'ëxmajtsnëtë ja kajpn mëti'ipë ënety të tkojtsoontën.

⁹ Ma tääpë ja it naaxwiinyëtën ojts ja Dios tyajtëkajtsta'ay ja aaw ayuk mëti'ipë ënety ja ja'ay naaxwiinyëtë apëtsëmy kyajpxtëpën ets ye'eywya'kxtaaytyë. E paatykyëjxm ojts tampë ja kajpn xyëëpety Babel.

Ja y'u'unk y'ok ja Sem

¹⁰ Ya'atë y'u'unk'ajt yë Sem. Ko myäjtsk jëmëjtpejty ma ënety ja komtuu të nyäxyën, ko ënety ja Sem mëko'px yë jyëmëjt ënät ojts ja y'u'unk myääy myëxu'unk'atë mëti'ipë xyëëwmooytyën Arfaxad.

¹¹ Ko yë Sem y'u'unk myääyëty myëxu'unk'ajtë, jä'ä ojts jyaakjuuky'äty mëkoxk mëko'px jëmëjt ets ojts tmëët'atë y'u'unkëty ye'etyëjkpë to'oxytyëjkpë.

¹² Arfaxad jä'ä ënety yë jyëmëjt i'px majkmokx, ko ojts yë y'u'unk myëxu'unk'aty mëti'ipë xyëëwajtypyën Sélah.

¹³ Ko ojts ja y'u'unk y'ëkmiiny naaxwiiny mëti'ipë xyëëwajtypyën Sélah, yë Arfaxad jä'ä ojts jyaakjuuky'äty taxk mëko'px ja tëkëëk jëmëjt ets ojts jyaak mëxu'unk'atë y'u'unkëty ye'etyëjkpë to'oxytyëjkpë.

¹⁴ Sélah jä'ä ënety yë jyëmëjt i'px majk ko myëxu'unk'ajty ëka'any ja y'u'unkëty mëti'ipë xyëëwmooytyën Éber.

¹⁵ Ko ja y'u'unkëty jëtu'un y'ëkmëxu'unk'ajty yë Sélah, jä'ä ojts jyaakjuuky'äty taxk mëko'px ja tëkëëk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

¹⁶ Yë Éber jä'ä ënety yë jyëmëjt i'px majkmajkts ko myëxu'unk'ajty yë y'u'unk mëti'ipë xyëëwajtypyën Péleg.

¹⁷ Ko jëtu'un y'ëkmëxu'unk'ajty yë Péleg, yë Éber jä'ä ojts jyaakjuuky'äty taxk mëko'px ja i'px majk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

¹⁸ Péleg jä'ä ënety yë jyëmëjt i'px majk ko myëxu'unk'ajty y'u'unkëty, mëti'ipë xyëëwmooytyë Reu.

¹⁹ Ko yë Reu jëtu'un y'ëkmiiny naaxwiiny yë Péleg jä'ä ojts jyaakjuuky'äty mäjtsk mëko'px ja taxtujk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²⁰ Reu jä'ä ënety yë jyëmëjt i'px majkmäjtsk ko myëxu'unk'ajty ja y'u'unk, mëti'ipë xyëëwmooytyën Serug.

²¹ Ko yë Serug jëtu'un y'ëkmëxu'unk'ajty yë Reu jä'ä ojts jyaakjuuky'äty mäjtsk mëko'px ja wëxtujk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²² Serug jä'ä ënety yë jyëmëjt i'px majk ko myëxu'unk'ajty yë y'u'unk mëti'ipë xyëëwmooytyën Nahor.

²³ Ko yë Nahor jëtu'un y'ëkmëxu'unk'ajty, yë Serug jä'ä ojts jyaakjuuky'äty mäjtsk mëko'px jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²⁴ Nahor jä'ä ënety yë jyëmëjt i'pxtaxtujk ko myëxu'unk'ajty yë y'u'unk mëti'ipë xyëëwmooytyën Taré.

²⁵ Ko yë Taré jëtu'un y'ëkmëxu'unk'ajty yë Nahor jä'ä ojts jyaakjuuky'äty mëko'px ja majkmokx majktaxk jëmëjt ets ojts jyaak mëxu'unk'atë y'u'unkëty ye'etyëjkpë ets to'oxytyëjkpë.

²⁶ Taré jä'ä ënety yë jyëmëjnë tëkë'px majk ko myëxu'unk'ajtë yë y'u'unkëty mëti'ipë xyëëwmooytyën Abram, Nahor ets Harán.

Ja y'u'unk y'ok ja Taré

²⁷ Ya'atë jëtu'un ja y'u'unk y'ok yë Taré mëti'ipë tyeety'ajtën yë Abram, Nahor ets Harán. Harán, yë tyeety yë Lot,

²⁸ jam ojts y'ooky Ur, ma ja Caldeo ja'ayëty ja nyaaxjotmën. Ka'anëm ënety yë tyeety Taré y'ookynyëm ko ojts yë'ë y'ooky. Jam y'o'ky ma myiinyën naaxwiiny.

²⁹ Abram yë'ë ojts mëët pyiky tu'uk yë to'oxytyëjk mëti'ipë xyëëwajtypyën Sarai. E yë Nahor yë'ë ojts mëët pyiky ja to'oxytyëjk mëti'ipë xyëëwajtypyën Milcá, yë'ë nyëëx yë Harán, yë'ë y'uty yë Iscá.

³⁰ Sarai ka'ap ijty tjëkyäp y'u'unk'ixëty, jä'ä ko jëtu'un ënety jyä'äy'äty.

³¹ Taré ojts jam tsyo'onë Ur ma ja Caldeo ja'ayëty ja nyaaxjotmën ets ojts nyijkxy ma ja it naaxwiinyëtë txëëwatyën Canaán. Ojts twoownëjkxy ja y'u'unk mëti'ipë xyëëwajtypyën Abram ets ja y'ok'u'unk mëti'ipë xyëëwajtypyën Lot ets ja tsyë'ë Sarai. E ko jya'ajtë ma ja kajpn txëëwatyën Harán, jam ojts wyë'ëmtë tsënääpyë.

³² Ets Taré jam ojts y'o'knë Harán, jä'ä ënety yë jyëmëjt mäjtsk mëko'px ja mëkoxk ko y'o'ky.