Génesis 10 - Biblia Dc en Mixe de Quetzaltepec

Ja Noé ja y'u'unk y'ëna'k ets ja y'ok'u'unk y'ok'ëna'k

¹ Yaa yë xyëëw myintë mëti'ipë y'u'unk'ajt y'ëna'k'ajtëp Sem, Cam ets Jafed. Ja y'u'unk y'ëna'k ja Noé mëti'ipë ojts pyëktë y'uuktën ets tmëët'ajtë ja y'u'unk y'ëna'këty ma ënety ja mëk komtuu të nyajxnën.

² Ya'atë ojts t'u'unk'aty t'ëna'k'aty yë Jafed mëti'ipë xyëëwajtën Gómer, Magog, Madai, Javán, Tubal, Mésec ets Tiras.

³ Yë y'u'unk y'ëna'k yë Gómer jä'ä ojts txëëwatë Asquenaz, Rifat ets Togarmá.

⁴ Yë y'u'unk y'ëna'k yë Javán jä'ä ojts txëëwatë Elisá, Tarsis, Quitim ets Rodanim.

⁵ Ya'atë ojts t'u'unk'aty t'ok'aty yë Jafed mëti'ipë tyajwintuktën ja nëëpa'a, nitu'ukjaty ja naax kajpnëty myëët'ajtëp ja nyaaxëty kyamëty ets kyë'ëm ayuk kyajpxtëp.

⁶ Ja y'u'unk y'ëna'k ja Cam jä'ä ojts txëëwatë Cus, Misraim, Fut ets Canaán.

⁷ Ja y'u'unk y'ëna'k ja Cus jä'ä xyëëwajtë Sebá, Havilá, Sabtá, Raamá ets Sabtecá. Ets ja y'u'unk y'ëna'këty ja Raamá je'eyë ojts nimäjtsk y'itë, mëti'ipë xyëëwajtën Sebá ets Dedán.

⁸ Cus ojts txëëwaty ja Nimrod ja tyeety mëti'ipë ojts më''ëka'any y'ityën jotmëk yaa naaxwiiny.

⁹ Nimrod jëyujk majtsp ijty. Dios ojts jëtu'un tyajkutuky jyëyujkmatsëty. Jää ja ayuk tsyoony mëti'ipë ënaanpën: jä'ä ko yë Wintsën jëtu'un tyajkutujky Nimrod jëyujk majtsp ijty.

¹⁰ Ya'atë kyajpn'ajt yë Nimrod ma ojts y'ëne'emyën: Babel, Erec, Acad ets Calné, mëti'ipë jam yajpatpën Sinar nyaaxjoty.

¹¹ Ma ya'atë it naaxwiinyëtën ojts tsyoony ets ojts nyijkxy Asur, jam ojts tyajkojy yë Nínive kajpn, Rehobot ets Quélah,

¹² ets tu'uk ja kajpn mëjpë yajxëëpäjtën Résen jam yajpaaty itkujky ma Nínive kajpn ets Quélah.

¹³ Yë Misraim jä'ä y'u'unk y'ëna'k ojts txëëwatë Lud ja'ayëty, Anam ja'ayëty, Lehab ja'ayëty ets Naftu ja'ayëty.

¹⁴ Näy jam tsyoontë mëti'ipë xyëëwajtëpën patrusejë ja'ayëty, Caslu ja'ayëty, Cafto ja'ayëty ets ojts ok txëëwajnëtë filistejë ja'ayëty.

¹⁵ Canaán, yë Sidón yë tyeety mëti'ipë ojts mëtu'uk t'u'unk'atyën ets Het.

¹⁶ Yë ja'ayëty mëti'ipë xyëëwajtëpën Jebús ja'ayëty, Amor ja'ayëty ets gergeseos ja'ayëty yë'ë yë Canaán tyeety'ajt y'ap'ajtëp,

¹⁷ ets näjyëtu'un mëti'ipë xyëëwajtëpën Heve ja'ayëty, aracejë ja'ayëty ets sinejë ja'ayëty,

¹⁸ näjyëtu'un yë Arvad ja'ayëty, zemarejë ja'ayëty ets Hamá ja'ayëty. Oknëm ojts nyäwya'kxtaayënëtë yë Canaán ja'ayëty.

¹⁹ Yë nyaaxjotëty yë Canaán ja'ayëty jampaat ojts t'ëkniwa'knëtë ma ja nyaaxjotmën yë Guerar ets jampaat nyäxy ma ja Sidón kajpnën ets ma ja mutsk kajpn txëëwatyën Gaza ets tyimja'ty jam Sodomë ets Gomorra, Admá ets Seboím, ma ja kyajpnën ja Lesa.

²⁰ Ya'atë ojts t'u'unk'aty t'ok'aty yë Cam mëti'ipë yam të yajnimëtyä'äkyën, nitu'ukjaty aakmëët yë jyä'äyëty ets it nyaaxwiinyëtëty ets kyë'ëm y'ayuk kyajpxtëp.

²¹ Sem, yë y'äjty yë Jafed nän tam ijty yë y'u'unk. Tu'kë'ëyë y'u'unkëty yë Éber yë'ë y'u'unk y'ok yë Sem.

²² Ya'atë ojts t'u'unk'aty yë Sem, Elám, Asur, Arfaxad, Lud ets Aram.

²³ Ya'atë y'u'unk'ajt yë Aram mëti'ipë xyëëwajtën Uz, Hul, Guéter ets Mas.

²⁴ Yë Sélah yë'ë ojts teety'äty yë Arfaxad, e yë Éber yë'ë ojts teety'äty yë Sélah.

²⁵ Yë Éber mäjtsk ojts yë y'u'unk jyaak mëxu'unk'aty, tu'uk jä'ä ijty xyëëwajtyp Péleg, paaty ojts jëtu'un txëëwaty, jä'ä ko ojts jyuuky'äty jää ojts yë naax kajpn nyäwyä'kxyë. E ja myëkä'äx ja Péleg jä'ä ijty xyëëwajtyp Joctán.

²⁶ Joctán ojts txëëwaty ja tyeety yë Almodad, yë Selef ets Azar-mavet, näjyëtu'un yë Jérah,

²⁷ yë Adoram, Uzul ets Diclá.

²⁸ Yë'ë y'u'unk txëëwajt Obal, Abimael ets Sebá,

²⁹ ets Ofir, Havilá ets Jobab. Aakyë'ë ya'atë ojts t'u'unk'aty yë Joctán.

³⁰ Jam ojts tsyëënëtë ma ja mëj'it xëëw'atyën Mesá. Jampaat ja itjot nyäxy ma ja naaxjot txëëwatyën Sefar, ya'atë itjot kopkjoty ijty, mëti'ipë jam wë'ëmpën matsow ja xëëw pyëtsimyën.

³¹ Ya'atë jëtu'un ojts t'u'unk'aty t'ok'aty yë Sem ets nitu'ukjaty tam yë nyaax kyamëty ets mëët yë kyë'ëm'aaw kyë'ëm'ayukëty.

³² Ya'atë jyä'äy'ajtë yë y'u'unkëty y'ëna'këty yë Noé, wi'ixëty ojts nitu'ukjaty jyä'äy'atë ets aakmëët yë nyaax kyamëty. Yë'ë ya'atë mëti'ipë ojts wyë'ëmtën ko ojts ja komtuu y'ity, nitu'ukjaty xim yam ojts ye'eywya'kxtaaynyëtë naaxwiinyëtë apëtsëmy.