Gálatas 6 - Biblia Dc en Mixe de Quetzaltepec

Näpyutëkëtë nixim niyam

¹ Miits mëku'uktëjkëty, ko pën xy'ixtëty tëë pokyjotm kyä'äy, miitsëty mëti'ipë näyaj'ijtëtëp mëët ja Kënu'kxymyëkajtën putëkëtë ets kajpxwijtë mëët ja nätsyokë näjyawë ets näkyëwent'atëtë këtiipë mka'atëty näjyëtu'un pokyjotm.

² Neypyutëkëtë nixim niyam ma ja ëyo'on jotmayën, jëtu'un'äämpy xypyatuntëty ja Kristë ja y'ënä'ämën.

³ Pën jää pën mëj nyäyajnaxyë ko nyäjyawëty mëj'äämpy y'ity ets ka'ap jyëtu'unëty, kë'ëm nyäwyin'ëënyë.

⁴ Kë'ëm mëpaat yajmëmay yajmëtajy tii oy ka'oy yatuump; pën mëj näyajnaxanëp, ka'ap wyi'ixëty, je'eyëp ko yë'ë nätyukyajmëjnaxëtëp mëti'ipë ënety tii oy të tunyën, ka'ap yë'ëjëty ma wiink ja'ay tii oy të tunyën.

⁵ Këëkjä'ä ja tuunk ëyo'on yajtuunk'aty.

⁶ Ko tu'uk ja ja'ay t'ëxajëty ja ijxpëjkën ma ja oy aaw oy ayuk ni''ijxpëkën, pyutëkëp ja mëti'ipë yaj'ijxpëjkëpën ma tii tyajmëyätyën.

⁷ Ka'ap mnäwyin'ëënëtëty, ni pën mëpaat ja Dios ja jyä'ä tkatukxikë. Mëti'ipë yajnip yajkojpën, yë'ë yajpëjkmujkp.

⁸ Pën nyipy kyojpën ja ëxëëk winma'any, yë'ë pyatäämpy ja o'kën tëko'oyën. Pën nip kojpën ijxtëm ja Kënu'kxymyëkajtën tsokyën, yë'ë pyëjmukäämpy ja juukyajtën xëmëkyëjxmëpë.

⁹ Ka'ap n'ënu'kxëmëty ko ja oypyë ntu'unmëty. Ko ka'ap nwinmaaytsyëkajtsmëty, npatmëp ja oyajtën ko ënety ja tiempo tpaaty.

¹⁰ Paaty, oy tyimjëna'ajëty, ntu'unmëp ja oypyë ma ja ja'ayëtyën ets yë'ë ka'ap nja'atyëko'omyëty yë nmëku'uk'ajtëmë mëti'ipë näjyëtu'un mëpëjktëpën.

Ko kajpxwijën ets kajpxpo'kxën tjaakyäky

¹¹ Ixtë, mëj letrë yam mëët nnijäyëtë ets kë'ëmës yam ntimyjyä'äy.

¹² Ya'atë ja'ayëty mëti'ipë tsyojktëpën ets ja ja'ay y'oyjyawëtëty mëët mëti'ipë tyuuntëpën, yë'ë m'atsip'atanëtëp ets yajnatsujk'ëwëtittëty ja mye'etyëjk'ajtënëty. Jä'äkyëjxm jëtu'un tuntë ets ja ja'ay y'oyjyawëtëty ets ka'ap tsyiptëkëja'antë ko tkajpxwa'kxtë ko ja Kristë tëë xykyu'o'këmë kruutskëjxm.

¹³ Ni yë'ë ja'ay mëti'ipë natsujk'ëwtityën ja ye'etyëjk'ajtënëty të tkapatuntë ja ënä'ämën tëyajtën. E yë'ëjëty tsyojktëp ets natsujk'ëwtittëty yë mye'etyëjk'ajtënëty ets yë'ë nyätyukyajmëjnaxa'anëtë ko të mtukupëkëtë ets jam ma mnini'kx xymyëët'atëty ya'atë tay.

¹⁴ Ëjts ka'apës tii nätyukumayë, yi'iyës nmëjpëjktäkpy ko ja Wintsën Jesús të xykyu'ookës kruutskëjxm ets jä'äkyëjxm ko të xykyu'ookës kruutskëjxm ets ko të nmëpekyës, jëtu'un tpaaty ijxtëmës jeexyë të nkruutspety mëët ja naaxwiinyëtë juukyajtën.

¹⁵ Ka'ap tsyowpaaty oy ja ja'ay ye'etyëjk'ajtënën jyanatsujk'ëwtityëty; yi'iyë tsoowpatp ko ja'ay tmëëtëty ja juukyajtën jempyë.

¹⁶ Pën juuky'ajtëp ijxtëmës të n'ëna'anyën ets ni'ëmukë mëti'ipë ja Dios jä'ä''ajtëtëpën, jotkujk'atë ets ëxajëtë ja Dios ja pya'ëyo'owën.

¹⁷ Jëtu'unës nkajpxwë'ëmy. Ka'apës ntsoky etsës pën xy'ëtukëty. Tyamës nmëët'aty ja tay mëti'ipë yajknikëxë'kpyën koos nmëtuny ja Jesús.

¹⁸ Mëku'uktëjkëty, wä'än ja Wintsën Jesukristë mkënu'kxëtë ni'ëmukë. Oy jyëtu'un'atëty.