Gálatas 5 - Biblia Dc en Mixe de Quetzaltepec

Ja ëwaatsë'ajtën mëti'ipë yajpatpën ko Kristë yajmëpëky

¹ Tëë ja Kristë xymyo'oyëmë ja ëwaatsëtum'ajtën ets ëwa'atstuuy nyajpatmëty. Paaty tyam itë amëk jotmëk ma ëwaatsëtum myajpaatën ets këtii jatëkok m'ëk m'ëknäkyë'ëyajkënëtëty ma të myajpaatën ijxtëm jeexyë mnitooky'atën.

² Ëjts nxëëwajtyp Pablo, mëtoow'itë wi'ixës yam n'ëna'ana'anyën. Pën mkupëjktëp miits ets yajnatsujk'ëwtitëty ja mye'etyëjk'ajtënëty, tii ja Kristë nyawa'anëty ma miitsëtyën.

³ Tyam miits jatëkok ntuk'ëwaanëtë: Oypyënëty pën kyupëjkpy ets ja ye'etyëjkajtën yajnatsujk'ëwtitëty, atsip tpatuunta'ajëty ja Moisés ja y'ënä'ämën.

⁴ Miitsëty, mëti'ipë tsyojkën'ajtëpën ets mëët ja Dios oy mwë'ëmtëty ko xypyatuna'antë ja ënä'ämën, tëë xy'ëxmatstë ja Kristë ets të mnäpyëjkta'akëtë ma ka'ap xypyaatëtyën ja Dios ja tsyojkën jya'awën.

⁵ E ëëtsajtëm mëët ja Kënu'kxymyëkajtën nnija'awëm ko npata'anmëty ja oypyë ja nipaye'eyën ko të nmëpëjkëmë.

⁶ Ko tu'ukyë nyajpatëmë mëët ja Kristë Jesús, ka'ap tii y'ëktsow'ajnë ko ja'ay yajnatsujk'ëwtity ja ye'etyëjkajtën ëkë ko ka'ap. Yi'iyë tuunëp ko nyajnikëxë'kmëty ja mëpëjkën ets ko nmëku'uk'ajtëm n'oyjya'awëmëty.

⁷ Oy ijty miits mtu'uye'eytyë, ¿pën jëtää të y'ëti'itsy ko ka'ap xy'ëkpanëjkxnëtë ja tëypyë jaantypë?

⁸ Ka'ap jyamëty ja winma'any tsyoony ma Tiosën, mëti'ipë të myaxtsowëtën.

⁹ Yajnija'ap ko yi'inëmpë ja levadura tu'kë'ëyë ja jëtsy tyajxuunta'ay,

¹⁰ e ëjts jamës yë nwinma'any npëjktä'äky ma Tiosën ko miitsëty ka'ap tëkatsy mmaya'an mtaja'antë. Yajtëytyunaanp ja ja'ay mëti'ipë ënety myajwinma'anytyëkooyëtëp, oypyënëty.

¹¹ Mëku'uktëjkëty, ko jeexyë ëjts n'ëkni'ënä'ämë ets ja ja'ay yajnatsujk'ëwëtitëty ja ye'etyëjkajtën, ka'ap jeexyë yë jutiis ja'ay xymyëtsip'attës, jä'ä ko ka'ap jeexyë ja Kristë ja y'aaw y'ayuk t'ëxëëkjawëtë, ko yajnimëtyä'äky ko yë'ë të y'ooky kruutskëjxm.

¹² Mëti'ipë miits myajwinma'anytyëkooyëtëpën, nikë oy ko jeexyë timkyatstsuktë ja yëtyëjk'ajtënëty.

¹³ Mëku'uktëjkëty, miits të myajwootsowtë ets ëwaatsëtum m'itëty. E ka'ap yë'ëjëty ets miits xytyuntëty mëti'ipë mmaay mtajtëpën ko ënety ja ëwaatsëtumpë xypyaatë, yë'ëkyëjxm ets mnäpyutëkëtëty nixim niyam mëët ja tsojkën.

¹⁴ Jëtu'un ja ënä'ämën tu'kë'ëyë yajpatuunta'ay: Tsok ja mmëku'uk ijxtëm kë'ëm mnätsyokyën.

¹⁵ Ko aak miitsëty kë'ëm mnäykyäy mnätsyu'utsëtë ijxtëm ja tënë'k nyätsyu'uts nyäwyëtsëtën winpity atëjy, kë'ëm nëjkx mnäyajkutëkoyëtë.

Ko njuuky'ajtmëty ijxtëm ja Kënu'kxymyëkajtën tsokyën

¹⁶ Ya'atë miits ntuk'ëwa'anëtyëp: Juuky'atë ijxtëm ja Kënu'kxymyëkajtën mtukmëtsokëtën, jëtu'un ka'ap xyajtuntëty mwinma'anyëty.

¹⁷ Jä'ä ko ja ja'ay mëti'ipë yajtuumpyën ja kyë'ëm winma'any, myëtsip'ajtyp ja Kënu'kxymyëkajtën ets ja Kënu'kxymyëkajtën myëtsip'ajtyp ja ja'ay mëti'ipë yajtuumpyën ja kyë'ëm winma'any. Jä'ä ko aak nämyëtsip'ajtëtëp yë'ë winpity atëjy, paaty ka'ap y'oypëtsimy mëti'ipë miits mjatsojkën'ajtëpën.

¹⁸ Pën mwinma'anymyooyëtëp ja Kënu'kxymyëkajtën, ka'ap miits myajpaata'antë Moisés y'ënä'ämënpa'tkë'ëm.

¹⁹ Nikëxë'ëky yë'ëjëty mëti'ipë tyuuntëpën ja kyë'ëm winma'any: xim yam pën mëët tsyënaaymyuktë, tyuuntëp kyajpxtëp ja ka'apë y'oyëtyën, myëët'ajtëp ja ëxëëk atsojkën,

²⁰ y'ëwtajtëp mëti'ipë ka'ap Tyiosëtyën, patooy panajxtëp, atsip a'äkë jyuuky'atë, mëtsip'ajtëp, pojën jyoot'anpëktë mëët yi'inëm tii, kyë'ëm oyajtën y'ixtaaytyëp, yajnäwya'kxëtëp ja ja'ay, ëpëky nyäpyëjkta'akëtë,

²¹ tyukmëtsip'ajtëp oytyiijëty ja myëku'uk, uktëp mukëtëp, ajëën akax jyä'äy'atë ets kanaakpëky tii ëxëëk tuntë. Tyam miits jatëkok ntukja'amyätstë ijxtëm të ntuk'ëwaanëtën, pën ya'atë tyuuntëp kyajpxtëp, ka'ap tyëkëja'antë ma ja Dios ja kyutujktaknën.

²² E ko ja ja'ay tyajtuntë mëti'ipë ja Kënu'kxymyëkajtën yäjkpyën, nätsyojkëtëp ja nixim niyam, ijtëp xoontëp, jotkujk yajpaatë, mä'kxtujktëp, amëku'ukëty, tyuuntëp mëti'ipë paat'ajtëpën,

²³ yujy tëtä'äky jyä'äy'atë ets ka'ap tyajtuntë ja kyë'ëm winma'anyëty. Nimëti'ipë ënä'ämën ya'atë xykyatukpoky'ajtmëty ko oy tii ntu'unmëty.

²⁴ Pën ja Kristë jä'ä''ajtëtëp jëtu'un tpaaty ijxtëm jeexyë të tyajkruutspätën ja y'ëxëëkjot y'ëxëëk winma'anyëty.

²⁵ Pën jëtu'un ëëts njuuky'ajtëm ijxtëm ja Kënu'kxymyëkajtën tsokyën, nkupëjkëm näjyëtu'un ets ja Kënu'kxymyëkajtën xynyë'ëmo'oy xytyu'umo'omyëty.

²⁶ Ka'ap amëj akëjxm nja'ay'ajtmëty, ka'ap pën nyajjoot'anpëjkmëty ets ka'ap tii nätyuk'ëxëëk ijxëmëty aak ëëts'ajtëmë.