Gálatas 4 - Biblia Dc en Mixe de Quetzaltepec

¹ Yë'ës ntijpy: Ko ja ja'ay ja y'u'unk mutsknëm mëti'ipë ja kuma'ayën y'ëxajëjäämpyën, oy ja kuma'ayën tu'kë'ëyë jyapaatyë, jëtu'un ja y'itynyëm ijxtëm jeexyë ja mëtuunpë nitookpyën.

² Tam ja ja'ay mëti'ipë ijx'ijtëp këwent'ajtëpën koonëm tpaatëty ja xëëw jëmëjt mapaat ja tyeety të tuknipëjktaakën.

³ Näyjyëtu'un ijty ëëts nyajpatëmë ko ja Kristë ënety ka'anëm myiny, jëtu'un ijty nyajpatëmë ijxtëm ja pi'k ëna'kën, jëtu'un ntsëna'ayëm njuuky'ajtëmë mëët ja naaxwiinyëtë winma'any.

⁴ E ko ja tiempo ojts tpaaty, tääts ja Dios ja y'u'unk ojts tkexy, to'oxytyëjk ojts yajminy yajja'tyë ko tyuuny ja Moisés ja y'ënä'ämën,

⁵ jä'äkyëjxm ets ka'ap n'ëk'ijtënëty ënä'ämënpa'tkë'ëm ets ja Dios xykyupëjkmëty ijxtëm ja y'u'unkën.

⁶ Paaty ojts tkexy ja y'u'unk myääy ma ja n'aaw'ajt njot'ajtëmën ets tyaj'ijxë ko xy'u'unk'ajtëmë, jëtu'unts ja Jya'awën xyaj'ëna'anëmë: Abbá. Tatë

⁷ Jëtu'un ka'ap mijts m'ëk ijnëtë ijxtëm ja tuunpë nitookpyën, Dios mijts m'u'unk'ajtënëtëp ets ko yë'ë m'u'unk'atëtë, näjyëtu'un ja Dios të tuknipëjktaakë ets mmo'ojëtëty ja kuma'ayën.

Ko ja Pablo tmëmay tmëtajy ja mëpëjkpëtëjk

⁸ Ko ijty miits ja Dios ka'ap xynyijawëtë, yë'ë ijty mmëtuuntëp ja ka'apë Tyiosëtyën.

⁹ E tyam ko ja Dios të xynyijawëtë, ëkë n'ëna'anmëty ko ja Dios të mnijawëtë, ¿wi'ix miits xykyupëjkojnëtëpë ja winma'any mëti'ipë ka'ap tsyoowpaatyën ets je'eyë yaj'ëyoy yajjotëkoy? ¿Yë'ë jëtää miits mtsojktëp ets mëtuunpë m'awinpitëty jatëkokë?

¹⁰ Mnixëëwtuuntëp miits ja xëëw, po'o ets jajëmëjt.

¹¹ Njëjpja'awëpës ko wä'änxyëp ja ntuunkës të kya'oyë ma miitsëtyën.

¹² Mëku'uktëjkëty, tyam miits nmënu'kxta'aktë ets mja'ay'atëty ijxtëm ëjtsën, jä'ä ko tëëjës jëtu'un nwinpity ijxtëm miitsëtyën. Ka'apës miits tii të xytyukmëtuuntëkoytyë.

¹³ Ijxtëm xynyijawëtën, pa'amkyëjxmës ojts ëka'any nkajpxwä'kxy ja oy aaw oy ayuk ma miitsëtyën.

¹⁴ Oy ojts miits n'ëk'atsiptë yë'ëkyëjxm koos ënety npëkyë, kä'äp ojts xypyäxtës, ni'ikyë xykyupëjktës ijxtëm ja Dios ja y'anklësën, ëkë ijxtëm jeexyë ja Jesukristë kë'ëmën.

¹⁵ ¿Wi'ix të mjatë ko tyam ka'ap jotkujk m'ëkyajpatnëtë? Tëëyëp ojts miits xypyutëkëtës, oy yë'ëpaatëty mwiin ojts xyajuuta'antë ets xyamo'ojantës ëjts ets jeexyë ntso'okyës.

¹⁶ E tyam ¿Mëtsipës jëtää të n'awinpityë jä'äkyëjxm koos të nnikäjpxy ja tëypyë jaantypë?

¹⁷ Tääpë ja'ayëty, yë'ë ni'ik tsyojktëp ets miits mnäpyëjkta'akëtëty ma yë'ëjëtyën. Je'eyëp ko ka'ap y'oyëty mëti'ipë tyukniwinma'ayëtëpën. Yë'ë tsyojktëp ets miitsëty ëjts xy'ëxmatstëty ets yë'ë xytyuntëty mëti'ipë yë'ë tsyojktëpën.

¹⁸ Oy yë'ë ko nmëma'ay nmëtajmëty ja wiinkëtypë, je'eyëp ko oyjyot oywyinma'any mëët ets xëmë jëtu'un, ka'ap jyääyëty koos njää'atëty mëët miitsëty.

¹⁹ U'unk ëna'këty, mëk miits jatëkok nku'ëyowëtë ijxtëm tu'uk ja u'unktaak y'ëyoyën ko y'u'unk tyajmëxu'unk'ata'any ets nku'ëyoowëtëtstëp koonëm jëtu'un mjuuky'attëty ijxtëm ja Kristë tsokyën.

²⁰ Ni'ikës njatsoky jampëkës jeexyë tyam mëët miitsëty ets jeexyë jemy nmëmëtya'aktë. Jä'ä ko ka'apës ja winma'any n'ëkpatnë wi'ix miits njaaknëëmëtëty.

Agar ets ja Sara nyi''ijxpät

²¹ Miitsëty, mëti'ipë ja Moisés ja y'ënä'ämën pyatunanëtëp, nikajpxtë, ¿ka'ap xynyijawëtë wi'ix ja ënä'ämën y'ënä'änyë?

²² Jëtu'un kyëxja'ayëty ko ja Abraham mäjtsk ijty yë y'u'unk: tu'uk t'u'unk'aty mëët ja to'oxytyëjk mëtuunpë nitookpyë ja jyä'ä ets tu'uk mëët ja kyë'ëm to'oxytyëjk ja jyä'ä.

²³ Mëti'ipë ja mëtuunpë nitookpyë y'u'unk'ajtypyën, jëtu'un ojts myëxu'unk'aty ijxtëm oy pën pi'k ëna'kën, e ja mëti'ipë y'u'unk'ajtën ja to'oxytyëjk mëti'ipë ëwaatsëtum ijtpën, jä'ä ojts myëxu'unk'aty ets kya'pxëty wi'ix ënety ja Dios të twaantä'äkyën.

²⁴ Ijxpäjtën ya'atë mpëjktä'äkyës. Ja to'oxytyëjk nimäjtskpë, mäjtsk ja käjpxytyu'unën tkutänë. Mëtu'uk ja käjpxytyu'unën, mëti'ipë ja Moisés yajmooyën ma ja Sinaí kopkën, yë'ë ja Agar kyutënääpy. Pën tyuk'ijtëtëp ya'atë käjpxytyu'unën, jëtu'un ja y'u'unk y'ëna'k myintë kyä'äxtë ets y'itëty ijxtëm ja mëtuunpë nitookpyën.

²⁵ Yë'ë ja Agar kyutënääpy ja Sinaí Kopk jam Arabië, mëti'ipë tyam nyitënääpyën ja Jerusalén, ya'atë kajpn ëne'emy tyam y'ity mëët yë y'u'unk y'ëna'k.

²⁶ E ja Jerusalén tsajpjotmëpë, ëwaatsëtum jä'ä ets jëtu'un tpaaty ijxtëm jeexyë ëëts yë'ë nwintaj'ajtëmën.

²⁷ Jä'ä ko jëtu'un ja Dios ja y'aaw y'ayuk kyëxja'ayëty: Jotkujk mijts to'oxytyëjk mëti'ipë ka'ap të tyajminy të tyajja'tyën ja u'unk ëna'k, mëti'ipë ka'ap tmëëtëtyën ja u'unk ëna'k. Ëw ya'ax mëët ja jotkujk'ajtën, jä'ä ko ja to'oxytyëjk mëti'ipë të yaj'ëxmatsyën, wäänëmay ja y'u'unk tpaata'any këtiinëm ja mëti'ipë jamën ja nyiye'etyëjk.

²⁸ Mëku'uktëjkëty, jëtu'un ëëts'ajtëmë ijxtëm ja Isaac, näjyëtu'un ja xypyaat'ajtëmë mëti'ipë Dios të twaantä'äkyën.

²⁹ Ja to'oxytyëjk ja myaank mëti'ipë mëxu'unk'ajtën ijxtëm oy pën pi'k ëna'kën, jä'ä ojts tmëtsipëky ja mëxu'unk mëti'ipë mëxu'unk'ajtën mëët ja Kënu'kxymyëkajtën. Näyjyëtu'un tyam tyunyë jyätyë.

³⁰ ¿E wi'ix ja Dios ja y'aaw y'ayuk y'ënä'äny? Jëtu'un y'ënä'äny: Jëkäx yë to'oxytyëjk nitookpyë mëët yë y'u'unk, jä'ä ko ka'ap yë y'u'unk pyäätyë ja kuma'ayën mëti'ipë yajmo'ojaanpën ja ëwaatsëtumpë ja to'oxytyëjk ja y'u'unk.

³¹ Jëtu'un mëku'uktëjkëty, ka'ap njëtu'un'ajtëmë ijxtëm ja mëtuunpë y'u'unkën, jëtu'un ëëts'ajtëmë ijxtëm ja y'u'unkën ja to'oxytyëjk ëwaatsëtumpë.