Gálatas 3 - Biblia Dc en Mixe de Quetzaltepec

Ënä'ämën ets ja mëpëjkën

¹ Miits, Galacia ja'ayëty kutsuujëty. ¿Pën të mpatoy të mpanaxëtë? Tëëts yajxon ntuk'ijxpëktë miits mwintuuyëty ijxtëm ja Jesukristë ojts kyëruutspetyën.

² Yi'iyës ntsojkpy ets miits xy'ëtsoowinpitëty mëti'ipës nyajtëëwtëpën: ¿Ojts miits ja Kënu'kxymyëkajtën xy'ëxajëtë ko xypyatuntë ja Moisés ja y'ënä'ämën, ëkë ko xymyëpëjktë ja aaw ayuk mëti'ipë mmëtoow'ijtënë?

³ ¿Mtimtsyuu miitsëty, këtiijë? Tëë mëët ja Kënu'kxymyëk'ajtën xy'ëkyajtso'onta'aktë ja mmëpëjkënëty, ¿ets ënät tyam xyajkukëxëja'antë mëët ja mwinma'anyëtyë?

⁴ ¿Oywyi'ix miits xyajtëkoya'antë mëti'ipë të xykyu'ëyowëtënë? ¿Tii ko nëkoo të xykyu'ëyowëtë?, pën ka'ap xyajtsowpaata'antë.

⁵ Ko ja Dios mmo'ojëtë ja Jyot jya'awën ets tyaj'ixyë ja myëj'ajtën ma miitsëtyën, ¿tii ko jëtu'un tuny? ka'ap yë'ëkyëjxmëty ko xypyatuntë ja Moisés ja y'ënä'ämën, yë'ëkyëjxm ko xymyëpëktë ja Dios ja y'aaw y'ayuk mëti'ipë tëë xymyëtoow'itën, ¿këtiijë?

⁶ Näyjyëtu'un ja Abraham, ojts ja Dios tmëpëky, paaty ja Dios yajnajxë wa'ats.

⁷ Jëtu'un xyjyä'äkyukëtëty ko yë'ë ja Abraham y'u'unk'ajtyp y'ok'ajtyp mëti'ipë jëtu'un mëpëjktëpën tä yë'ë ojts myëpëkyën.

⁸ Ma ja Dios ja y'aaw y'ayuk këxja'ay myinyën, tap nimëtyä'äky ko mëpëjkënkyëjxm ja ja'ay oy wyi'imy mëët ja Dios mëti'ipë ka'ap jyutiisëty ets jëtu'un ja Abraham yajtuk'ëwa'anëy ja oy aaw oy ayuk ko ja Dios y'ënëmaayë: tu'kë'ëyë naaxwiinyëtë ja'ay kënu'kxy nëjkx wyë'ëmta'atë mëëtkyëjxm ko mijts të mmëpëky.

⁹ Paaty, pën ja Dios myëpëjktëpën, kënu'kxanëtëp ja Dios mëët ja Abraham, mëti'ipë ojts näjyëtu'un myëpëkyën.

¹⁰ Mëti'ipë yi'iyë tyuk'ijxpäjtëpën ja Moisés ja y'ënä'ämën, kajpxpoky ja yajpaatë, jä'ä ko jëtu'un ja Dios ja y'aaw y'ayuk y'ënä'äny mëti'ipë këxja'ay miinpën: Kajpxpoky ja ja'ay y'ity mëti'ipë ka'ap kä'pxy tpatunyën ja ënä'ämën mëti'ipë këxja'ay miinpën.

¹¹ E jëtu'un, yajxon yajja'akyukë ko ka'ap pën wa'ats nyäxy ko ja ënä'ämën tpatuny, jä'ä ko jëtu'un ja Dios ja y'aaw y'ayuk y'ënä'äny mëti'ipë këxja'ay miinpën: Ja wa'ats ja'ay ja mëpëjkën mëët jyuuky'ata'any.

¹² Ja ënä'ämën ka'ap yë'ëjëty ja mëpëjkën mëët tyuny, jä'ä ko y'ënä'äny: Pën ja ënä'ämën pyatuumpy, yë'ë yajjuuky'atëtëp.

¹³ Tëë ja Kristë xyajpëtsë'ëmëmë ma ijty kajpxpoky n'ijtëmën, jä'äkyëjxm ko ja Kristë ojts nyätyukjä'ätijyë ja kajpxpojkën mëti'ipë ënety ëëts njä'ä'ajtëmën, jëtu'un këxja'ay myiny: Kajpxpoky tu'kë'ëyë winë y'ity mëti'ipë kepykyijxy këx'o'kpën.

¹⁴ Paatykyëjxm jëtu'un tyuunë jyajtë ets ja Dios ja kyënu'kxën jya'atëty ma ja ja'ayëtyën ka'apë jyutiis'atën, mëti'ipë ja Dios tyukwinwa'anëyën ja Abraham, ets näjyëtu'un ja Kënu'kxymyëkajtën n'ëxajëmëty ni'ëmukë mëti'ipë ja Dios tëë twaantä'äkyën.

Ënä'ämën ets ja waantakën

¹⁵ Mëku'uktëjkëty, tyam miits ntuknijawëja'antë wi'ix ja ja'ay tii tmëtyä'äkyën. Ko tu'uk ja ja'ay tkäjpxy'äty tii ets tyajkojy tu'uk ja noky ets tsa'ay, ka'ap pën myäyëtëty tyajma'atëty ëkë tyajkojtëkatsëty.

¹⁶ Näyjyëtu'un ënät, Dios ojts tukwinwanë ja Abraham mëët ja y'u'unk y'ok ja oypyë ja juukyajtën. Yë Dios yë y'aaw y'ayuk ka'ap ni'ëmukë ja'ay tijta'ay: U'unk ok, jä'ä y'ënäny mijts yë m'u'unk m'ok, ja Kristë yajtijp.

¹⁷ Ya'atës jëtu'un ntijpy: Dios ojts tuny ja käjpxytyu'unën mëët ja Abraham ets ojts nikajpxë. Paatykyëjxm ja Moisés ja y'ënä'ämën mëti'ipë ojts myinyën kom taxk mëko'px ja i'px majk jëmëjt, ka'ap tjëkyepy tyëkoyëty ets nyatëkë'atëty mëti'ipë ja Dios wyaantakën.

¹⁸ Ko jeexyë jam kyëxmëtä'äky ma ja Moisés ja y'ënä'ämën mëti'ipë ja Dios të xytyukwinwa'anëmën, ka'ap jeexyë y'ëkwaantakën'ajnë; e yë Dios ojts tukwinwanë yë Abraham jëtu'unyë namëyajtën ka'ap jyuyëty.

¹⁹ ¿E tii wya'anëty ja Moisés ja y'ënä'ämën? Mëti'ipë ok yajmooyën ets nyikëxë'ëkëty ja naaxwiinyëtë ja'ay ja pyokyëty, koonëm myinëty ja u'unk ok mëti'ipë ja Abraham ojts yajtukwinwanën. Kukäjpxy ojts yajtuknipëktë ets nikajpxtëty ja ënä'ämën ets ja Moisés je'eyë ojts tjaaynyäxy.

²⁰ E ko ja Dios ja wyaantakën ojts tyajwë'ëmy mëët ja Abraham, kë'ëm twaantäky, ka'ap ojts pën ëpëky tkajpxnaxy.

Tii ko ja Moisés ja y'ënä'ämën kyixy nyäxy

²¹ Ëkë, ¿jä'ä jëtää tijy ko Moisés ja y'ënä'ämën ko tmëtsip'aty ja Dios ja wyaantakënë? Niwi'ix'äämpy. Ko jeexyë ja Moisés ja y'ënä'ämën t'ëkyäky ja juukyajtën, jyëkyejpy jeexyë ja ja'ay oy wyi'im Dios wintum ko tpatuny ja Moisés ja y'ënä'ämën.

²² E ja Dios ja y'aaw y'ayuk jëtu'un y'ënä'äny ko ni'ëmukë ja ja'ay pokyjotm y'ijta'atë ets tpaatëty mëti'ipë ja Dios të twinwanën ko ja Jesukristë të tmëpëktë.

²³ Ko ënety ka'anëm ja Kristë myiny, jëtu'un ja ënä'ämën ijty xyaj'ijtëmë tsumpyë matsypyën, yaj'ëwxity ets ja mëpëjkën yajpaatëty.

²⁴ Ja ënä'ämën jëtu'un ijty xykyëwent'ajtëmë ijxtëm tu'uk yë mëtuunpë tkëwent'atyën ja pi'k ëna'k; koonëm myiiny ja Kristë ets ojts mpatëmë ja ëwaatsë'ajtën.

²⁵ E mëët ko tyam të nmëpëjkënë ja Kristë, ka'ap ja ënä'ämën xy'ëk'ijx'ijtënë,

²⁶ Dios miits tyam ni'ëmukë m'u'unk'ajtënëtëp ko të xymyëpëktë ja Jesukristë,

²⁷ jä'ä ko ni'ëmukë mëti'ipë të nyëëpätën mëët ja Kristë ja xyëëw, tëë ja Kristë ja jemywyit myo'ojëtë.

²⁸ Ka'ap ma y'ëktuunnë pën jutiis kajutiis, mëtuunpë ëkë kamëtuunpë, ye'etyëjk ëkë to'oxytyëjk, jä'ä ko tu'ukyë miitsëty ijxtëm ja ja'ay tu'ukpën, jä'äkyëjxm ko tu'ukyë mëët ja Kristë Jesús m'itë.

²⁹ Ets pën Kristë miits të xymyëpëktë, ja Abrahamën näjyëtu'un m'u'unk'ajt m'ok'ajtëtëp ets miits xyjyä'ä'atë ja kuma'ayën mëti'ipë ja Dios të tuknipëjktaakën.