Filipenses 2 - Biblia Dc en Mixe de Quetzaltepec

Kristë yu'unk'ajt naxym'ajtën ets ja myëj'ajtën jyääntyajtën

¹ Pën tëë mmo'ojëtë ja Kristë ja mëk'ajtën ets ja mjëëky mmëku'uk xyjyotmëkwinkajpxëtëty, xyajjotmëkta'aktëty, ets tu'ukyë ja winma'any xymyëët'atë ets xypya'ëyowtëty ja ja'ay,

² yajxoontaktëkës ko tu'ukyë myajpaattëty, ko tu'knax ja tsojkën ja'awën xymyëët'attëty, tu'ukyë mnäjyawëtëty ets tu'ukyë winë xytyuntëty.

³ Këtii tii xytyuntëty atsip a'äkë ëkë tsipkyëjxm; yë'ë oy ko yujy tëtä'äky mja'ay'atëty ets ko mmëku'uk xymyëj'ixtëty ets xywinkutsë'ëkëtëty.

⁴ Ka'ap pën kyë'ëm jotkujk'ajtën t'ixta'ajëty, yë'ë m'ixta'atëp mëti'ipë ni'ëmukë mtukjotkuk'attëpën.

⁵ Näyjyëtu'un ja winma'any xymyëët'atëty ijxtëm ja Kristë Jesús tmëët'atyën.

⁶ Yë Kristë, oy tjamëët'ajty näjyëtu'un ja kuttujkën ijxtëm ja Tiosën, ka'ap ojts jëtu'un nyäyajnaxyë Tiosën,

⁷ y'ëxmajtstaay tu'kë'ëyë mëti'ipë jyä'ä'ajtypyën ets ojts nyäpyëjktä'äkyë jëtu'un ijxtëm tu'uk yë mëtuunpën, jëtu'un ojts myëxu'unk'aty ijxtëm naaxwiinyëtë ja'ay myin kye'exyën.

⁸ Ojts kë'ëm naxym nyäpyëjktä'äkyë, myëmëtoow ja o'kën, ja o'kën kruutskëjxmëpë.

⁹ Paaty ja Dios ojts wäänë mëj myo'oyë ja kuma'ayën ets ni'ik yajmëjnajxë këtiinëm pën wiinkëtypë,

¹⁰ jëtu'un tääpë ja xëëw mëj'äämpy nyaxëty, mëti'ipë ja Jesús yajmooyën ets wyinkoxtänëtëty ni'ëmukë mëti'ipë jamën tsajpjotm, naaxwiiny ets naaxpa'tkë'p,

¹¹ ets ni'ëmukë tkajpxpaatëty ko Jesukristë, yë'ë Wintsën. Dios myëj'ajtën jyääntyajtën oypyë.

Jëtu'un ja mëpëjkpëtëjkëty ijxtëm ja ajaj atë'kxpën naaxwiiny

¹² Jëtu'un yam nëëmëtë mëku'uktëjkëty, ijxtëm xëmë të xymyëmëtowtënës, ka'ap jyääyëty koos të njam'aty ma miitsëtyën; mmëmëtoowtëkës tyam ni'ik maas jëkäm nyajpaatyën. Yajtsowpaatë mëët ja ko ëwaatsëtum myajpaatë,

¹³ jä'ä ko Dios jëtu'un të tuknipëjktaakë ma mjot mwinma'anyëtyën ets xytyuntëty mëti'ipë yë'ë tsyojkpyën.

¹⁴ Tuntë winë yajxon ets ka'ap y'atsip y'a'äkëty,

¹⁵ këtiipë pën mpoky'ixëtëty, wa'ats aaw wa'ats jot mja'ay'atëty ma ja ja'ayëtyën mëti'ipë ëxëëk juuky'ajtëpën ets ëxëëk ja y'aaw jyotëty. Jëtu'un tä matsa'ajën miits m'ajaj m'atë'kxtëty ma yë'ëjëtyën yaa naaxwiiny.

¹⁶ Mëj xyajnaxtëty ja Dios ja y'aaw y'ayuk, mëti'ipë ja juukyajtën xytyukpatëmën. Ko ënety ja Kristë myiny nëjkxëpës jotkujk näjyawëty ko ënety miits oy winë të xytyuntë ets n'ëna'anëtyës ko ka'ap të nyatëkë'aty ja ntuunkës.

¹⁷ Oyës jeexyë nja'o'kpë ets nwintsë'kën'atyës ets jëtu'un kya'pxëty ja wintsë'kën mëti'ipë myajktëpën ma Tiosën ko të mëpëktë, jotkujkës näjyawëty ets xoontakpës mëët miitsëty.

¹⁸ Jotkujk yajpaatë miits näjyëtu'un, ijxtëmës jotkujk ëjts nyajpaatyën.

Timoteo ets Epafrodito

¹⁹ Pën ënaanp ja Wintsën Jesús, nkäxëpës ja Timoteo ets nëjkx mku'ixëtë, etsës njotkujk'atëty ko tmëminëty ja aaw ayuk wi'ix ënety miits myajpaatën.

²⁰ Ka'ap pën jëtu'un myäy tyäjy ijxtëm yë'ëjën, jä'ä ko miits mjotmay'atëtë ets ja oyajtën xypyaatëty.

²¹ Aak kyë'ëm jotmay ja'ay myëmaay myëtajtëp ni pën ja Wintsën Jesukristë ja jyä'ä tkamëmaay tkamëtajë.

²² E tëë xynyijawëtë wi'ix ja Timoteo oytyunyën ets wi'ixës ja Dios ja y'aaw y'ayuk oy mëët të nkajpxwä'kxyën; jëtu'un të xypyutëkë ijxtëmës jeexyë yë'ë nmaankëtyën.

²³ Yë'ë miits ntuknikäxantëp koos ënety nnijawë tiis xyjyataanp xykyëpätaanpën,

²⁴ oyës njanijawë ma Wintsënën ets miits kë'ëm nëjkx nku'ixëtë.

²⁵ Jëtu'unës nmay ntajy ko kopkpëky etsës näjyëtu'un nkäxa'any ja nmëku'uk'ajtëm Epafrodito, mëti'ipë mëët tu'ukyë ntuunmukyënës ets ntsiptunyës, mëti'ipës ojts miits xytyuknikäxtën etsës xypyutëkëty ko tiiputëjkën nyajmëyatëtyës.

²⁶ Yë'ë mëk mja'amyätsëtë, mtukjotmay'ookëtë ni'ik, jä'ä ko ojts xynyijawëtë ko tëë pyikyë.

²⁷ Tëy ko tëë jyänty pyikyë, jawäänë të kya'ooky; je'eyëp ko tëë ja Dios pya'ëyoyë ets tëë tsyo'oky, ets ka'ap yi'iyëty nätyu'uk, näjyëtu'unës ëjts këtiipës nëkoo n'ëkjotmay'o'knëty.

²⁸ Paaty miits tsojk ntuknikäxtë ets xytyukxoonta'aktëty ko jatëkok xypyaatëty xy'ixtëty këtiipës nmonëty ntukëty.

²⁹ M'ëxajëtëp akujk jotkujk ko jam jya'tëty ets tsoktë jawëtë tä mmëkä'äxëtyën ma tu'ukyë mëpëktën ets tsoktë jawëtë oypyënëty mëti'ipë jëtu'un ja'ay'ajtëpën ijxtëm yë'ëjën.

³⁰ Jawäänë të kya'ooky ko tmëtuny ja Kristë. Tëë ja jyuukyajtën tpëjktä'äky kutsë'ëkëtum koos xymyo'oy ja putëjkën ko miits mkamëta'aktë.