Filipenses 1 - Biblia Dc en Mixe de Quetzaltepec

¹ Pablo ets Timoteo, Jesukristë myëtuunpë, tyam ntuknikäxtë ja kajpxpo'kxën miitsëty mëpëjkpëtëjkëty ni'ëmukë jampë yajpaatën Filipos ets mëti'ipë nyikopk'ajtëpën ja mëpëjkpëtëjkëty ets ni'ëmukë jënu'un yajpaatën mëët tu'ukyë mëët ja Kristë.

² Wä'än ja nTeety'ajtëm Dios ets Wintsën Jesukristë mmo'ojëtë ja kënu'kxën ets ja jotkujk'ajtën.

Ko Pablo tuknija'amyätsë ja Tios ja mëpëjkpëtëjkëty

³ Tëkok tëkok miits nja'amyätstë, nkukajpxëpës ja Dios;

⁴ ets koos ja Dios nja'amyetsy, xëmë nimëpëjktsowëtë akujk jotkujk,

⁵ jä'ä ko tu'knax të ntu'unëmë ets myëjwiin kyëjääjëty ja aaw ayuk oypyë, tyimtso'ontäky ko ojts mmëpëktë ets tyampaat.

⁶ Njëjp'ijxypës ko ja oypyë tuunk mëti'ipë ja Dios yajtso'ontakën ma miitsëtyën, yë'ë oy yajtu'uye'eyäämpy koonëm ja Jesukristë wyimpitëty.

⁷ Jëtu'un pyaat'atyë ko miits nmëmay nmëtajtëty, jä'ä ko mëk miits n'oyjyawëtë ets jä'ä ko nän mëët miits n'itë ma ja Dios ja kyënu'kxënën, oyës tsumy matsy nyajpaaty ëkë oyës ja kutuunktëjk nwinkuwa'akëty, ja oy aaw oy ayuk jootjoty nwinma'anyjyotyës yajpaaty.

⁸ Dios nyija'ap ko miits mëk nja'ixa'antë mëët ja Wintsën Jesukristë ja tsyojkën jya'awën.

⁹ N'amëtoopy npëjktsoopyës ja Dios ets wäänëni'ik ja m'oyjot m'oywyinma'anyëty jyaaktimkyëjääjëty ets ja Dios ni'ik mjaaktimmyo'ojëtëty ja wijy'ajt ets ja'aykyujkën,

¹⁰ ets xynyijawëtëty wi'ix xywyin'ixtëty mëti'ipë oyën, jëtu'unts ja juukyajtën wa'atspë xymyëët'attëty ets ka'ap tii poky xytyuntëty ko ja Kristë wyimpitëty.

¹¹ Myaj'ixëtëp ja oypyë ja tuunk mëti'ipë ja Jesukristë mtukmëtuuntëpën; jëtu'un ja Dios wintsë'ëkë ets mëjjaw jaantyjawë y'itëty.

Kristë ëjts xyajjuuky'ajtp

¹² Mëku'uktëjkëty, ntsojkpyës ets xynyijawëtëty ko mëti'ipës të xyäty të xykyëpetyën yë'ëkyëjxm të jyëtu'un'aty ets myëjtëkëty ja oy aaw oy ayuk.

¹³ Koos yap jëtu'un tsumy n'ity tëë tyuny etsës nikajpx nimëtya'akëty ja Kristë mayjä'äyjoty ets näjyëtu'un ma ja kutuunktëjkëtyën ets ma oy pyënëtyën.

¹⁴ Ets ko të t'ixtë ko jap tsumy n'ityës, may ja nmëku'uk'ajtëmë të jyotmëkta'aktë ets të nimëtya'aktëty ja oy aaw oy ayuk amëk jotmëk ets yi'iyë tu'ukyë tyuk'ijxpäjtëp ja Wintsën.

¹⁵ Tëy ko tää ja'ay mëti'ipë Kristë y'aaw y'ayuk tsipkyëjxm äkëkyëjxm kyajpxwa'kxtëpën ets näyjyëtu'un mëti'ipë oyjyot oywyinma'any mëët nyikajpxtëpën.

¹⁶ Pën oyjyot oywyinma'any mëët nyikajpxtëpën, tsojkënkyëjxm ja Kristë tmëtuntë ko tnijawëtë ko Dios tëë xypyëjktä'äkyës ets nkuwa'anëtyës ja oy aaw oy ayuk;

¹⁷ e mëti'ipë tsipkyëjxm nyikajpxtëpën, yë'ë tyuuntëp ko kyë'ëm jä'ä tyajmëjtëkëja'antë, ka'ap ëmuumtu'ukjot tuntë, je'eyë xyajtsiptëkëja'antës maajës tyam n'ityën tsumy.

¹⁸ Tiijës nkëwentëty, wä'än tmëtëy tkamëtëyëty, yë'ë kopkpëky ko ja Kristë yajkajpxwä'kxy. Yë'ës ntukxoontäkpy ets njaaktimtyukxoontäkpyës wäänëni'ik,

¹⁹ jä'ä ko nija'apës koos npaata'any ja nitsokën, nkukajpxëpës ko tëë ja Dios xytyuknija'amyätsëtës ets tëë näjyëtu'un ja Jesukristë ja Kyënu'kxymyëk'ajtën xypyutëkës.

²⁰ Njëjp'ijxypës ëmuumtu'ukjot ko ka'apës ntsëtyu'unpaata'any, ni'ikyës xymyo'oja'any ja Dios ja mëk'ajtën wi'ix yajmëjjaw yajjaantyjäwëtyën ja Kristë, oyës n'ookëty ëkë njuuky'atëtyës.

²¹ Mëët ëjts, koos njuuky'äty, yi'iyës ntsojkpy wi'ix ja Kristë mëjjaw jaantyjawë y'itëtyën; ets pën o'kpës, oy ënety mëët ëjts.

²² Pën jaakjuuky'ajtpës ja ni'kx nkopk, jyëkyejpyës njaaktuunkojëty ja Dios ja jyä'ä. Ka'apës nijawë mëti'ipës nwin'ixëp, ko n'ookëtyës ëkë ko njaakjuuky'atëtyësë.

²³ Aak oy mäjtskpëky, ¿mëti'ipës tëy nwin'ijxnëp? Tu'kpëky, njatsojkpyës etsës jeexyë n'o'knë ets mëët ja Kristë nëjkx nyajpaatyës, yë'ëjës oy nja'ap.

²⁴ E jatu'kpëky, miitskyëjxmëty, oy koos njaakjuuky'atëty.

²⁵ Yë'ëkyëjxm ko jëjp'ixy nmëët'atyës koos njaakjuuky'ata'any mëët miitsëty ets njaakputëkëtëty wi'ix mtu'uye'eytyëtyën ets wi'ix xymyëët'atëtyën ja xoontakën ma mëpëktën.

²⁶ Jëtu'unts jatëkok nyajpaatëtyës ma miitsëtyën ets kyëjääjëty ja Kristë Jesús ja myëj'ajtën.

²⁷ Wä'än t'ixy tii tuunëp jajtëp, juuky'atë miits ijxtëm y'ënä'änyën ja oy aaw oy ayuk ma Kristë yajnimëtyä'äkyën. Oy miits nninëjkxtëty ëkë nkaninëjkxtëty, nijawëpës ko tu'ukyë m'itë ets tu'ukyë ja mwinma'any yajpaatë ets xytyuntë wi'ix ja ja'ay oy tmëpëktëtyën ja oy aaw oy ayuk,

²⁸ je'eyëp ko këtii mnätyuk'ëtsë'ëkëtëty ja mmëtsipëty. Ko xykyatsë'ëkëtëty, yë'ë mtuknijawëtëp ko kutëyoyantëp ënätyëty ets nän yë'ë yajtunijawëp ko ënety ja nitsokën xypyaata'antë. Ya'atë Dios jëtu'un të tuknipëjktaakë.

²⁹ Kristë mëët ja Dios të tuny ja mëyajtën ka'ap yi'iyëty ko xymyëpëktë ja Kristë, näjyëtu'un ko Kristëkyëjxm xymyënax xyajnaxtëty ja ëyo'on jotmay.

³⁰ Tu'knax ëëts ja ëyo'on jotmay nmëët'ajtëmë. Miits tëë xy'ix xynyijawëtë wi'ixës të ntsiptunyën mëët ja ëxëëkpë ku'oypyë ets mnija'awëtëp wi'ixës tyam mëët ntsiptuun'ëtë'ëtyën.