Ezequiel 9 - Biblia Dc en Mixe de Quetzaltepec

Ma yajwin'ixyën ko yë Jerusalén kajpn yajtëytyuna'any

¹ Ok tu'uk ja mëto'owën mëk nmëtooyës, mëk xytyatsk më''ënanës: Tää jya'të ja ja'ayëty mëti'ipë tyiytyunantëpën ja kajpn, aaktam tmëët'atë yë pyujxnëty mëti'ipë tyukyajkutëkoyantëpën.

² Ënätës të n'ixy nitëtujk ja ja'ay tyëkëtë jam ma tëjkëtyaknën anëkëjxytsyow, aaktam tkë'ëkap'atë yë pyujxnëty mëti'ipë myëtsiptunantëpën. Tam näjyëtu'un itkujky tu'uk ja ja'ay nyijkxy yë'ë wyit'ajtyp linë wit, tam tmëëtëty wyëënkëjxy mëti'ipë tyukjääpyën. Ënet të tyëkëtë jap tsajptëkoty ets të wya'ak'oyëtë ma ja wintsë'këntyaknën mëti'ipë tsuxkpujxn mëët y'oytyunyëtyën.

³ Ënet ja Israel Dios ja myëj'ajt y'oyajtën të pyëti'iky anëkëjxytsyow ma tyänëtën ja tsajpjotmëtë kukäjpxy ets të nyijkxy ma ja tsajptëjk'aawën. Ënet ja Dios të tmëkäjpxy ja ye'etyëjk ja'ay mëti'ipë linë wit xyox'ajtypyën ets wyëënkëjxy tmëëtëty ja mëti'ipë tyukjääpyën,

⁴ ets të t'ënëëmë: Tukjëtijtëtya'a yë Jerusalén kajpn ets xypyëjkta'akëty tu'uk yë ijxpäjn ma wyimpokëtyën yë ja'ayëty mëti'ipë moontëp tujktëpën ko ja ja'ay ëxëëk y'ëtë'ëtstë y'ëna'antë jap kajpnjoty.

^5-6 Etsës të nmëtoy t'ënëëmë ja naaxwiinyëtë ja'ayëty: Panëjkxtë ets xytyukjëtitëtëty mëët ja naax kajpn, jam xyajtso'onta'aktëty maas yë ntsajptëjkën. Këtii xytsyë'ëkëtëty ni pën, yaj'o'kta'atë yë mëjja'aytyëjk, ëna'ktëjk, to'oxy'ëna'k, pi'k ëna'k ets to'oxytyëjk. Je'eyëp tëy ko këtii xymyëwa'antëty ja ja'ayëty mëti'ipë myëët'ajtëpën ja ijxpäjtën ma wyiinpokën. Ënet tyajtso'ontaktë mëët ja mëjja'aytyëjk mëti'ipë ënety jam ma tsajptëjkën yajpatëpën.

⁷ Ënet ok t'ënëmaay: Nëjkxtë ma tsajptëjkën ets yaj'ëxë'këtya'atë; yaj'ujtsta'atë mëët yë o'kpë. Ënet tsyo'ontë ets ojts nyëjkxtë yaja'ay o'kpë.

⁸ E tamtsën jëtu'un yaja'ay ooktë, koos ojts nätyu'uk nwë'ëmy. Ënet nwintäky nnaaxkooyës ets mëët ja monyëtukyë nyujkyäxyës mëk: Wintsën ¿jëtu'un yë m'äkë xyajnaxa'any ma Jerusalén kajpnën ets koonëmën xyajkutëkootya'aja'any ja Israel ja'ay niwäänëpë të jyaak wë'ëmtënë?

⁹ Ënet ja Dios xy'ëtsooyës: Mëj këjää të pyokytyuntë Israel ja'ayëty ets Judá ja'ayëty. Ujts yë naax kajpn yajpaaty mëët yë o'kën tëko'oyën; ka'ap jyam'aty oypyë nipaye'eyën. Jëtu'un yë myäytyë tyajtë ko tëëjës nja'atyëkooynyë yë naax kajpn ets ka'apës n'ixy mëti'ipë tyuuntëpën kyajpxtëpën.

¹⁰ Paaty ka'ap mpa'ëyowa'anyës, ni'ikyës yam n'amëtoowta'aja'antë tiijaty tyuuntëp kyajpxtëpën.

¹¹ Ënet ja ja'ay të wya'akwinpity linë wit mëëtpë, jampë wyëënkëjxy tmëëtëtyën mëti'ipë tyukjääpyën ets të y'ënä'äny: Tëës yam npatuny ja ënä'ämën mëti'ipës të xytyuknipëkyën.