Ezequiel 5 - Biblia Dc en Mixe de Quetzaltepec

¹ Jëtu'unës yë Wintsën xy'ënëmaay: Mijts ye'etyëjk ja'ay, koonë'ëk tu'uk yë tsujkn mëti'ipë jëjpën jëtu'un tä yë tsujknën mëti'ipë ja'ay nätyuk'awaay jyäjpëpën ets mnäkyujäpëtëty ets mnäy'awaayjyäpëtëty. Këëyë'ëk tu'uk yë kijpxën mëti'ipë mtukpëjkwa'kxëpën yë mwaay tëkëëkpëky.

² Ko ënety jyëjpkëxy ja tsip ma ja naax kajpn yajnitëkën tääts tu'kpëky xyjyëënmo'ojëty ja waay kajpn itkujky; ënät jatëkok ja tsujkn xykyoonë'ëkëty ets jatu'kpëky ja mwaay xynyëëtsukëty tu'kkajpnpa'a xytsyukëty; e jatu'kpëky mëti'ipë ënety mjaak nëëtsujkpyën jëtu'unyë pojjoty xywyëjwa'kxëty. Yë mayjyä'äy ëx'amës npanëjkxa'any mëët tu'uk yë tëypyujxn nkë'ëkëjxyës.

³ Tu'uk mäjtsk yë mwaay xyajwë'ëmëty mëti'ipë jam mkëxtsumëpën ma mwitën.

⁴ Ets wäänë yë mwaay xyjyëënkupëjkpëty ets tyoyëty. Jap ja jëën tsyoonëty mëti'ipë nëjkx ja Israel kajpn tyajkutëkoyën.

⁵ Ëjts, mëti'ipë Wintsën'ajtpën, jëtu'unës n'ëna'any: Ixtë ja Jerusalén kajpn. Ëjts ojts mpëjktä'äky ma wiinkëtypë ja naax kajpnën ets wiinkëtypë ja it naaxwiinyëtën.

⁶ E yë'ë je'eyë ja n'ënä'ämënës tkäjpxykyumëtoownajxnë ets o'ktëy ni'ik të y'ëtëtsnë këtiinëm jyëtu'un'atë ja kajpn mëti'ipë mëët nyätyu'kmëtsëpa'an'atëtën, jä'ä ko ka'ap ja n'ënä'ämënës ntëyajtënës tmëmëtowtë ets ka'ap tpatuntë ja n'aaw n'ayukës.

⁷ Paaty ëjts maas nWintsën'atyën n'ëna'any: Miitsëty ni'ik o'ktëy të m'ëtë'ëtstë ko mkäjpxykyumëtoownaxtë këtiinëm ja wiinkëtypë ja naax kajpn mëti'ipë mëët mnämyëtsëpa'an'atyën, ka'ap ja n'ënä'ämënës ntëyajtënës tpatuntë ets nän ka'ap të tpatuntë ja naax kajpn ja y'ënä'ämën tyiyajtën mëti'ipë mëët nyämyëtsëpa'an'atëtën.

⁸ Paatyës yam n'ëna'any, ëjts Wintsën: Ëjts nän mëtsipës yam n'awinpita'any mëët mijts, Jerusalén; ntëytyunäämpy yam ets y'ixtëp yë wiinkëtypë naax kajpn,

⁹ Jëtu'un ijxtëmës ka'ap nijëna'a ntunyëmën ets ka'apës jëtu'un n'ëktunanë. Ëxëëkëm yaj'ix mëti'ipë të xytyunyën.

¹⁰ Ma miitsëtyën nëjkxëp yë taak teety yë y'u'unk y'ëna'k tsu'utstë, yë u'unk ëna'k nëjkxëp yë tyaak tyeety tsu'utstë. Ntukumëtowäämpy yë mpoky ets mëti'ipë juuky jaakwë'ëmtëpën taxkpëkyës nyajye'eywya'kxa'any.

¹¹ Ëjts mëti'ipë Wintsën'ajtpën, ëjts ënaanp ets nkë'ëmjuukyajtënës yam ntukajpxpejtyp: Jä'ä ko miitsëty tëë yë ntsajptëjkës xyaj'ëxëëkëtë mëët yë awinax ka'apë ëxëëkpë ets aakjä'ä të xytyuunëtë, mëti'ipë yaj'ëxëëk'ijxpën, näjyëtu'un miitsëty nyajkutëkoyantëp yam ka'ap mpa'ëyowa'antë.

¹² Tu'kpëky ma ja tëkëëk pëkpyën, yuu xëëwës ntukyaj'ookäämpy ets pa'am ëyo'on ets ja mëmäjtskpëkpyë nëjkxëp yë myëtsip yaj'ookëtë mëti'ipë ënety të yajnatukyën, e ja mëtëkëëk pëkpyë jëtu'unyës nwojpwa'xta'aja'antë naaxwiinyëtë apëtsëmy. Etsës mpapo'oja'antë mëët yë tëypyujxn nkë'ëkëjxmës.

¹³ Jëtu'unës nëjkx ja n'äkë nyajnaxy ma yë'ëjëtyën; yë'ëjës ntuk'ëwa'anxäämäämpy etsës njotkujkëty. E ko ënety winë të ntunyës tääts nëjkx tnijawëtë, ko ëjts mëti'ipë Wintsën'ajtpën ojtsës njanikäjpxy maas ënety tëë ntukjoot'anpëknëtën.

¹⁴ Mijts Jerusalén, axit ako'owë nëjkx nyajjaty ets o'ktëy ma ja wiinkëtypë ja naax kajpnën ets nëjkxëp t'ixtë wi'ix ënety mjaty mkëpetyën ko jam nyaxtëty mkajpnjotm.

¹⁵ Ko ënety të nyajnitukë ets ëxëëk mjatëty mkëpätëty ets mëj këjää myajtëytyunëty, aak nëjkxëp ja'ay m'ojyë ets mtukwinmëtoyë ja mpoky ets mijts je'eyë nëjkx myajjoot'anpëky ets myajtsipke'exy ma ja naax kajpnëtyën mëti'ipë na'ëwtity yajpatpën ma mkajpnën. Ëjts Wintsën, ëjts yam jëtu'un nikäjpxyp.

¹⁶ Nyajminäämpyës yë yuu xëëw ma miitsëtyën, jëtu'un tä jeexyë pën tmëjti'pxyën yë ti'pxnkepy mëti'ipë yajkutëkoopyën. Jëtu'un, nyajminäämpyës ma mijtsën yë yuu xëëw, amay jotmay ets mëti'ipë nëjkx myaj'ook myajtëkoyëtën.

¹⁷ Jëtu'un, nyajminäämpyës yë yuu, pa'am o'kën, jëyujk ëwa'anëtypë mëti'ipë nëjkx tsyu'utsëtën ja m'u'unk m'ëna'këty; ets may nëjkx m'ooktë tsipjotm. Ëjts, mëti'ipë Wintsën'ajtpën, ëjts ënaanp.