Ezequiel 43 - Biblia Dc en Mixe de Quetzaltepec

Ma ja Wintsën ja myëj'ajt y'oyajtën wyimpityën tsajptëkoty

¹ Ojtsës ja ye'etyëjk xywyoownëjkxy ma ja tëjk'aawën mëti'ipë yajpatpën jamtsow xëëwpëtsëmy,

² etsës të n'ixy ko myiny ja Wintsën ja myëj'ajt y'oyajtën xëëwpëtsëmtsyow. Jëtu'un yajmëtoy tä nëë y'iitsy kyomyën ets ja naaxwiinyëtë të kyujajtä'äky.

³ Jëtu'unës të n'ixy tääjës ojts n'ëk ijxpën ko ja Wintsën ja Jerusalén kajpn tyajkutëkooy ets jëtu'un tääjës ojts jam n'ixyën Quebar. Tëës nwintä'äky naaxkoy,

⁴ ënät ja Wintsën ja myëj'ajt y'oyajtën tyëjkëy ma ja tsajptëjkën, xëëwpëtsëmtsyow.

⁵ Ënet ja Wintsën ja myëk'ajtën ojts xyajpëtë'ëkyës ets xyajnëjkxyës ma ja tëja'awën tëkotytsyowpë, etsës n'ijxy ko tëë ja Wintsën ja myëj'ajt y'oyajtën tyajtuktujkta'ay ja tsajptëjk.

⁶ Ja ye'etyëjk jää ojts nyaaxwä'äky maas ntänën etsës nmëtooy ja Wintsën kyäjpxy ma ja tsajptëjkën

⁷ ets xy'ënëmaayës: Ya'atë jëtu'un mpo'kxtakn'ajtypyës maas nyajkutukyën, maas ja nteky mpëjktä'äkyën; yaajës njuuky'ata'any mëët yë Israel ja'ayëty xëmëkyëjxm. Yë Israel ja'ayëty ets kyutujkpëtëjkëty ka'ap nëjkx t'ëkyajnipäxëtëjkënëtë ja nxëëwës wa'atspë mëët ja y'ëxëëktu'un y'ëxëëk kajpxënëty: ka'ap nëjkx t'ëkojnëtë ja potsy ma tyajkëxkojtëtyën ja yajkutujkpë mëti'ipë ënety të y'o'knën,

⁸ ets ka'ap nëjkx t'ëkojnëtë yë kyutujkëntëjk ets jam tpëjktakëtëty yë nyitëjk'aaw winkon maas yë ntëjkën ets nëjkx yi'iyë tu'uk potsy t'akojtuk'aty. Yë'ëjëty ojts yë nxëëwës nëxi'ik tukxi'iktë ko aakjä'ä tyuuntë mëti'ipës n'ëxëëk'ijxypyën; paatykyëjxmës ëjts njoot'anpëky etsës nyaj'o'ktaaytyë.

⁹ Tyam wä'än tyajëwa'kta'atë yë y'ëxëëktu'un y'ëxëëk kajpxënëty ets potsy ma ojts tyajkëxkojtën yë yajkutujkpë y'awinax, jëtu'un tjëkyäpëty njuuky'atëtyës xëmëkyëjxm ma yë'ëjëtyën.

¹⁰ E mijts ye'etyëjk, tukmëmëtya'ak yë Israel ja'ayëty mëti'ipë të xy'ixyën jap tsajptëkoty ets wi'ix y'ixëtyën ets jënu'un ja kyijpxyajtën tmëëtëtyën, jëtu'un tmëtsëtyuntëty ja nyëë pyokyëty.

¹¹ Pën tsyëtyu'un ja'awëtyëp ja nyëë pyokyëty mëti'ipë të tuuntëkoytyën, tukmëmëtya'ak wi'ix y'ixë'ata'anyën ja tsajptëjk ets wi'ix jap jootjoty kyëxë'ëka'anyën, wi'ix ja nyitëjkëtyaknën ets wi'ix ja pyëtsëëmtaknën, tu'kë'ëyë wi'ix y'ixë'ata'anyën, näjyëtu'un ja ënä'ämën kuttujkën mëti'ipë pyatuntëpën. Myajkojta'ajëp tu'kë'ëyë ya'atë ets tja'akyukëtëty yajxon. Mkëxjaaytya'ajëp näjyëtu'un ja ënä'ämën kuttujkën ets tjëkyäpëty wi'ix tpatuntëtyën.

¹² Ya'atë ënä'ämën jap tunaanp ma tsajptëjkën: Ja naax mëti'ipë nya'ëwtijtypyën ja tsajptëjk wa'ats nëjkx y'ity.

Ja wintsë'këntyakn

¹³ Jëtu'un ja wintsë'këntyakn kyijpxyajtën tmëët'atëty, yë'ë tunëp ja kijpxën mëti'ipë tëëyëp tuunën. Ma ja wintsë'këntyaknën ojts yajnëëtu'utajy na'ëwtity, tu'kkë'ënux myëjwiinëty ets tu'kkë'ënux kyëkëty ets jä'ä y'apojtsë'ëkyëty nëkëjxytsyow tu'kkë'ëkox. Yë wintsë'këntyakn ja y'ëjx jä'ä ojts kyojy,

¹⁴ mäjtsk kë'ënux kyëjxmëty ets tu'kkë'ënux myëjwiinëty. Ets jä'ä y'ayenyëty tu'kxajpk ets tu'kkë'ënux myëjwiinëty.

¹⁵ Ja wintsë'këntyakn jä'ä y'ayenyëty tu'kxajpk ja tu'kkë'ënux, ma ja tyäkën ojts tpëjktakëtë wyaj taxkpëky.

¹⁶ Yë nyini'kx ja wintsë'këntyakn jä'ä y'ëwtity taxk xajpk, tu'knax myëjwiinëty ja pya'a taxkpëky.

¹⁷ Ja nyini'kx ja itkujkpyë jä'ä ja taxktatsk, jä'ä pya'a tu'ukjaty taxk xajpk ja mäjtsk kë'ënux. Ja jut mëti'ipë na'ëwtityën jä'ä myëjwiinëty tu'kkë'ënux ets jä'ä myäjpxëty tu'ktsa'atsy; ja nyiwa'kpäjn jamtsow nyas'ixë ma xëëw pyëtsimyën.

¹⁸ Ënet ja Wintsën xy'ënëmaayës: Ko ënety ja wintsë'këntyakn yajkojy, kopkpëky ko ya'atë tëyajtën yajpatunëty: Tu'uk nëjkx xynyino'oktë yë tsajpkaa mëti'ipë wintsë'kën'atëpën ets nye'pny nëjkx xyijkx jëtijtë ma ja wintsë'këntyaknën.

¹⁹ Ja teetytyëjkëty mëti'ipë Leví ja'ayëtyën, yë Sadoc y'u'unk y'ëna'k, mëti'ipë patëtëpën tyaktëty ja wintsë'kën maas ëjtsën, yë'ë nëjkx xymyo'otë tu'uk yë tsajpkaa ayääkë mëti'ipë nëjkx tkunaxyën ja nëë poky. Ëjts, mëti'ipë Wintsën'ajtpën, ëjts yam jëtu'un ni'ënä'ämëp.

²⁰ Ënet nëjkx ja nye'pny wäänë xypyëjkë ets xytyuknijaaxëty ja wintsë'këntyakn ja nyiwaj ets ja tyäk taxkpëky ets ma ja nyi'awitsën. Jëtu'un nëjkx wa'ats wyë'ëmta'ay mëët ja nëë poky.

²¹ Tääts nëjkx xyajpëtë'ëky ja tsajpkaa ayääkë mëti'ipë ja poky kyunajxypyën ets xynyo'okëty jap tëja'p, ma ja tsajptëjkën, ma të yajnipëjktaakën.

²² Komjëpom wiinkpë wintsë'kën xyakëty, mëti'ipë ja poky kyunajxypyën, tu'uk yë tsajppax ayääkë oypyë mëkpë, ets teetytyëjkëty näjyëtu'un nëjkx tyajwa'atstë ja wintsë'këntyakn tä ënety të tuntën mëët ja tsajpkaa ayääkë.

²³ Ko ënety të xytyuny ja kënu'kxën, ëpëky wiinkpë tsajpkaa ayääkë ets tsajppax ayääkë xyaj'ookëty, aakyë'ë mëti'ipë oy mëkën,

²⁴ ets xytyukwintsë'ëkëtyës. Yë teetytyëjkëty yë'ë kyaanëtëp ets tyajjëëntë'ëtstëty, yë'ë jëtu'un mëti'ipë yajyakëpën tä tu'uk wintsë'kënën nino'oky nixämpyë.

²⁵ Jëpom jëpom, wëxtujk xëëw nëjkx xyaj'ooky yë tsajppax ayääkë mëti'ipë kyunajxypyën yë nëë poky ets tu'uk yë tsajpkaa ayääkë ets tu'uk yë kupixyny ayääkë oyëtypë mëkëtypë.

²⁶ Jëpom jëpom wëxtujk xëëw näjyëtu'un yë teetytyëjkëty tyajwa'atstëty yë wintsë'këntyakn ma yajyäkyën yë wintsë'kën, jä'ä ko yë'ë wa'ats ets kënu'kxy mëpaat xëmë yajpaaty.

²⁷ Jëtu'un kya'pxëty wëxtujk xëëw, e kom tuktujk xëëw jää nëjkx wiinkpë tsyo'ontä'äky ma ja wintsë'kën yajyäkyën ko ja nay'ëëw'oy näykyajpx'oyë y'itëty. Ënet nëjkx miitsëty n'ëxaj nkupëktë winë aaw winëjot. Ëjts mëti'ipë Wintsën'ajtpën, ëjts jëtu'un nikäjpxyp.