Ezequiel 41 - Biblia Dc en Mixe de Quetzaltepec

¹ Ënet ojts ja ye'etyëjk xywyoownëjkxyës jap tsajptëkoty ets tkijpxtaay yë xeny; jä'ä myëjwiinëty mäjtskëty mäjtsk xajpk.

² Ja tëjk akaj ja pya'a jä'ä y'ayenyëty tëkëëk xajpk ja tu'kkë'ënux ets myëjwiinëty ja pya'a tu'kxajpk ja mäjtsk kë'ënux. Ënet ojts tkijpxy ja wa'atspë it, majktëkëëk xajpk ja tu'kkë'ënux y'ayenyëty ets tëtujk xajpk ja mäjtsk kë'ënux myëjwiinëty.

³ Ënet jap tyëjkëy ma ja jaakwa'atspë it ets tkijpxtaay ja xeny mëti'ipë ja tsajptëjk pya'tënääpyën ma ja tëjkëtyaknën, jä'ä myäjpxyëty mäjtsk kë'ënux; ja tëjk'aaw jä'ä myäjpxyëty mäjtsk xajpk ets ja myäjpxyajtën ja tëjkëtyakn mäjtsk xajpk ja tu'kkë'ënux.

⁴ Ojts näjyëtu'un tkijpxy ja jaakwa'atspë it, jä'ä y'ayenyëty tëtujk xajpk ja mäjtsk kë'ënux ets jä'ä myëjwiinëty nän tëtujk xajpk ja mäjtsk kë'ënux. Etsës xy'ënëmaay: Ya'atë yajtijp jaakwa'atspë it.

Ja tëkot mutskjatyëtypë potsypë'aaypyë

⁵ Ok ojts tkijpxy ja tsajptëjk potsy tëja'ptsowpë, jä'ä myäjpxyëty mäjtsk xajpk; Na'ëwtity kyojyëty yë mutsktëkot, jä'ä myäjpxyëty tu'kxajpk ja tu'kkë'ënux aakjëtu'un y'ëwtity.

⁶ Ja tëkot mutskjatypë tëkëëk nikë'ë ijty, ma mëët tu'uk nikë'ëpën i'px majkjaty ja mutsktëkot. Ja tsajptëjk ja nyipotsy mutskëp maajaty nyänyikë'ëyën ja tëjk kopk, jëtu'un ka'ap tu'knax nyäpyäätyë ja potsy ëjx mëti'ipë jap pa'tkë'p tso'ontakpën.

⁷ Ma ja tsajptëjkpa'ajën tap ijty tu'uk ja nyiye'eypyäjn mëti'ipë pa'tëjkëpën ma ja tëjk kopkën ets jyëkyejpy pën pyätëty ma ja mëmäjtsk ets mëtëkëëk nikë'ëpën

⁸ Etsës n'ijxy xiitsow yaatsow wi'ix ja tëjk yujkpotsyëtyën, ma kyëxkojy'atën ja mutsktëkot; ojtsës näjyëtu'un n'ixy ja potsy'ëjx jä'ä kyëjxmëty mäjtsk xajpk.

⁹ Jä'ä myäjpxyëty ja potsy tëja'ptsowpë tu'kxajpk ja mäjtsk kë'ënux näjyëtu'un tä ja potsyën mëti'ipë tëkotsyowën.

¹⁰ E ma ja tëkot y'apojtstuky'atën jä'ä myëjwiinëty tëtujk xajpk ja mäjtsk kë'ënux, jëtu'un y'ëwtity ja tëjk.

¹¹ Ja nyitëjk'aaw jam tmëëtëty ma jam y'ëwaatsëtyën anëkëjxmtsow ets ëpa'tkë'ëytsyow; jä'ä myëjwiinëty ja tëjk'aaw tu'kxajpk ja mäjtsk kë'ënux, jëtu'un y'ëwtity.

Ja tëjk xëëwkëtä'äky tsyowpë

¹² Xëëwkëtä'äkytsyow, ko yajnajts'ixë, ma ja tëjk'aaw jyëjpkëxyën, jam ijty tu'uk yë tëjk, jä'ä myëjwiinëty, i'px tëkëëk xajpk ja tu'kkë'ënux ets y'ayenyëty i'px majk xajpk; yë nyipotsy jä'ä myäjpxyëty tu'kxajpk ja mäjtsk kë'ënux.

Nu'unaty kyijpxtä'äkyëtyën

¹³ Ojts ja ye'etyëjk tkijpxy ja tsajptëjk ets jä'ä tyajpëtsëëmy ja kijpxën i'px majktëkëëk xajpk ja tu'kkë'ënux ma ja y'ayeny'ajtënën. Ja nyitëja'aw mëët ja y'apojtstuk ets ja nyipotsy jä'ä wyinë'ajty i'px majktëkëëk xajpk ja tu'kkë'ënux.

¹⁴ Ja tsajptëjkwiin ja tyëja'aw mëti'ipë apojtstukyën, ja xëëwpëtsëmtsyowpë yajpaatyën, jä'ä y'ayenyëty i'px majktëkëëk xajpk ja tu'kkë'ënux.

¹⁵ Ojts tkijpxy ja y'ayenyajtën ja potsy mëti'ipë jap ma tsajptëjk jëxkën, wintuuytsyowpë ma ja tëja'aw jyëjpkëxyën ets ja nyapots pa'apa'apë jä'ä y'ayenyëty i'px majktëkëëk xajpk ja tu'kkë'ënux. Yë tsajptëjk tëkot ets ma ja nyitëjkwiinën

¹⁶ ma ja tëjk akajën ets ma y'ëwa'atsëtyën ets ja tëkot mëti'ipë na'ëwtity yajpatpën mëti'ipë tëkëëk nikë'ëjën, aak kepy wyinwopë tyimtso'ontä'äky jap pa'tkë'p ets tyimkëpety jap këjxy ma y'ëwa'atsëtyën, ja y'ëwa'atsajtën näjyëtu'un kepy wyinwopë.

¹⁷ Jam tkijpxtso'ony ma tëjk'aawën ets tëkotsyow ets tëja'ptsow, ojts tkijpxy yë potsyjot ets tëja'ptsow.

¹⁸ Ojts jam kyëxkojy yë tsajpjotmëtë kukäjpxy ets mëët yë tëëxykyepy, ma nyäwyinkoowmukyën yë tsajpjotmëtë kukäjpxy yë'ë jam yajpatp yë tëëxykyepy. Tu'ukpë ja tsajpjotmëtë kukäjpxy mäjtskpa'a ja wyiin jyëjp tmëëtëty;

¹⁹ ma tu'kpëkpyë ja wyiin jyëjpën, mëti'ipë këxë'kpën ja'ayën, jä'ä nyajts'ijxëp tu'ukpë ja tëëxykyepy, e ja wiinkpë ja wyiin jyëjp mëti'ipë këxë'kpën kaajën, jä'ä wiinkpë ja tëëxykyepy nyajts'ijxëp. Jëtu'un tyim ëwtity tu'ktsajptëjkpa'a.

²⁰ Jëtu'un jap tyimtso'ontä'äky ix'ajp ets tyimkëpety ojts nyikojtuta'ay yë tsajpjotmëtë kukäjpxy ets tëëxy kyep, aakjëtu'un ja tsajptëjk'aaw ja nyipotsy.

Ja kepy wyintsë'këntyakn

²¹ Tu'ukjaty yë tsajptëjk xeny taxk ijty yë tyäk'ajtën. Jam wintuuytsyow ma yajnitëkën ja ni'ik wa'atspë it,

²² jam tu'uk ja wintsë'këntyakn mëti'ipë oytyunyën mëët ja kepy, mäjtsk kë'ënux myëjwiinëty pa'apa'a jä'ä kyëjxmëty tu'kxajpk, myëët'ajtyp ja y'ëjx ets ja pya'a, kepy mëët y'oytyunyëty. Ënätës ja ye'etyëjk xy'ënëmaay. Ya'atë wintsë'këntyakn mëti'ipë jam ijtpën Wintsën wintuuy.

^23-24 Yë mëjtëkot ets ja tëkot mëti'ipë kënu'kxyën amäjtsk ja nyitëjk akaj ijty tmëëtëty. Ets mäjtsk akëëymyiny ja tëjk'akaj, aak potsywyiiny myëjkëëypyety ko y'ëwa'atsy.

²⁵ Ma ja mëjtëkot ja nyitëjk'aawën ojts jam tyajkëxkojtë yë tsajpjotmëtë kukäjpxy ets tëëxykyepy, näjyëtu'un y'ixëty tä ja mëti'ipë jam potsywinm mëj kooypyetyën. Ma ja tëja'aw yajpaatyën tëkotytsyowpë, jap tëja'ptsow tap ijty tu'uk akëëytyuk mëti'ipë kepy mëët y'oytyunyëtyën.

²⁶ Ma ja pya'ajën aaktam nyi'ëwa'atsajtën, nän yë'ë jam këxkojy yë tsajpjotmëtë kukäjpxy ets tëëxykyepy. Näyjyëtu'un ijty ja tëjk mëti'ipë na'ëwtity kojyën ets maajaty yajnitëkën.