Ezequiel 40 - Biblia Dc en Mixe de Quetzaltepec

Ma yajwin'ixyën ja tsajptëjk

^1-2 Ma myajk anyën yë po'o, jä'ä xëëw ma jemy jëmëjtën, ojts yë Wintsën yë kyë'ë tpëjktä'äky maas ëjtsën ets ojts nwin'ixyës xywyoownëjkxy jam ma Israel nyaaxjotmën. I'px mëkoxk jajëmëjt y'apäjnë ma ënety të nyajmënëjkxtënës tsum matsy jam Babilonyë ets majkmajkts jëmëjt ma ënety ja Jerusalén kajpn të yajnitëkën. Jam ma Israel yë nyaaxjotmën jam ojts yë Wintsën xyajpetyës ma tu'uk yë kopkën; jam n'ijxpatyës ëpa'tkë'ëmtsow, tamtëm yë tëjk jyätyë, mëj kajpnën kyëxë'ëky.

³ Ënet ja Wintsën ojts jam xywyoownëjkxyës ets n'ijxyës tu'uk yë ye'etyëjk, jëtu'un yaj'ixy tä jeexyë y'oytyunyëtyën mëët yë tsuxkpujxn. Jam tëjk'ëkë'ëm tyänë, yë'ë kyë'ëpëk'ajtyp tu'uk linë wit tejpxyën yaj'ixy ets tu'uk yë kepy mëti'ipë mëët winë yajtukijpxyën.

⁴ Ënet tääpë ja'ay xy'ënëmaayës: Ëk'ix yajxon ets yajxon mëtoow'it; yajxon xytyim ix xytyimtunëty mëti'ipë yam ntuk'ixäämpyën, jä'ä ko mijts Wintsën yaa të mwoowminyë ets ntuk'ixëty ya'atë. Ok nëjkx xytyuk'ëwaanë yë Israel ja'ayëty tëkokyë mëti'ipë yam m'ixäämpyën.

Ja tëjkëtyakn xëëwpëtsëmpyë

⁵ Jap ma tsajptëjk jëxkën tap tu'uk yë potsy nyäxy mëti'ipë na''ëwtijtëpën. Ja kepy mëti'ipë ja ja'ay myëët'ajtypyën mëti'ipë kijpxën'ajtpën jä'ä y'ayenyëty mäjtsk xajpk. Ënet ojts tkijpxy ja potsy ets jä'ä myäjpxyëty mäjtsk xajpk ets kyëjxmëty nän mäjtsk xajpk.

⁶ Ënet ojts ja ja'ay nyijkxy ma ja tëjkëtyaknën mëti'ipë yajpatpën xëëwpëtsëmtsyow ets pyejty ma tëjk yajniyujkwä'äkyën ets ojts tkijpxy ja tëjk'aaw ja nyiye'eypyäjn, jä'ä ojts pyëtsimy mäjtsk xajpk myëjwiinëty.

⁷ Ja tëkot mëti'ipë yajpatëpën ma tëjkëtyaknën jä'ä myëj'atë mäjtsk xajpk, jëtu'un myëjwiinëty ets jëtu'un y'ayenyëty ets jä'ä nyäwyä'kxyë ma tu'ukjaty ja tëkotën tu'kxajpk ja mäjtsk kë'ënux. Ets jää näjyëtu'un yajpaaty ja nyitëjkëtyakn ja tëjk ma ja teetyëjk nyäjyääntëkatsëtën, jam nyas'ixë ma tsajptëjkën. Ya'atë tëjk'aaw jä'ä myëjwiinëty ja y'ok mäjtsk xajpk.

^8-9 Ënet ja ye'etyëjk ojts tkijpxy ja tëjkwiin mëti'ipë jam yajpatpën ma ja tsajptëjk yajnitëkën, jä'ä myëjwiinëty mäjtsk xajpk ja mäjtsk kë'ënux, ma tëjkëtyaknën tam mäjtskpa'a yë xeny jä'ä myäjpxyëty mäjtsk kë'ënux.

¹⁰ Maajaty ja tëjkëtyaknën mëti'ipë yajpatëpën xëëwpëtsëmy tëkëëkjaty ijty jam ja tëjk, aak tu'knax myëjëty ets ja nyixeny nän tu'knax myëjëty.

¹¹ Ënet ja ye'etyëjk ojts näjyëtu'un tkijpxy ja tsajptëjk ja nyitëjkëtyakn: Tëkëëk xajpk ja tu'kkë'ënux myäjpxyëty ets myëjwiinëty ma yajnitëkën taxk xajpk ja tu'kkë'ënux.

¹² Ma tu'uktu'uk ja tëkotën tam tu'uk yë potsy mëti'ipë wintuuy yajpatpën, tu'kkë'ënuxjaty myëjwiinëty pa'apa'a. Tu'ukpë ja tëkot jä'ä myëjëty mäjtsk xajpk.

¹³ Ojts tkijpxy näjyëtu'un ja myëjwiin'ajtën ja tëjkëtyakn, jap yajkijpxtsoony ma tu'uk ja tëkotën ets kyijpxja'ty ma ja wiinkpë ja tëkotën, jä'ä ojts pyëtsimy tuktujk xajpk ja tu'kkë'ënux.

¹⁴ Ojts näjyëtu'un tkijpxy ja tëjkwiin ets jä'ä ojts pyëtsimy tëtujk xajpk ja mäjtsk kë'ënux. Ja tëjkëty mëti'ipë yajpatëpën pë'aay ma ja tëjkëtyaknën jä'ä ja tsajptëjk tyëja'aw'ajtyp.

¹⁵ Ko yajkijpxtsoony jap tëja'p ets tyimja'ty jap jootjoty ma ja tëjkwiinën, jä'ä pyëtsimy ja kijpxën majkmokx tu'uk xajpk ja mäjtsk kë'ënux.

¹⁶ Tu'ukjaty ja tëjk ojts yajpëjktakta'ay ja nyi'ëwa'atsajtën, jap tëkotsyow yë'ë myëët'ajtyp yë pujxn mëti'ipë y'apëjktujkpyën ets näjyëtu'un ja nyixeny mëti'ipë yajpatpën maajaty yajnitëkën ojts yajpëjktä'äky nyi'ëwa'atsajtën. Näyjyëtu'un ja tëjkwiin ojts yajpëjktä'äky ja nyi'ëwa'atsajtën jootjoty. Ma ja nyixenyën jam ojts kyëxkojy yë tëëxy kepy.

Ja tëja'aw mëti'ipë japën tëjk ëkë'ptsow ma ja tsajptëjkën

¹⁷ Ënet ja ye'etyëjk ojts xywyoownëjkxyës jap tëja'p ma ja tsajptëjk ja nyitëja'awën. Ma ya'atë tëja'awën ojts yajtsaawinpotsë na'ëwtity, i'px majk ja tëjk yajtuknakojëy.

¹⁸ Ya'atë tëja'aw mëti'ipë tsaawinpotsën, naxymyëpë yajpaatyën, yë'ë ijty nyiye'eyëtyääpy ja tëjk mëti'ipë yajpatëpën ma ja tëjkëtyaknën, tu'knax myëjwiinëty ets y'ayenyëty.

¹⁹ Ojts ja ye'etyëjk tkijpxtsoony ja tëja'aw, jam tyajtso'ontäky ma ja tëjkëtyaknën mëti'ipë jam ëpa'tkë'ëmtsow yajpatpën ets jam tkijpxja'ajty ma ja tëjk'aawën mëti'ipë tëja'aw itkujky yajpatpën, jä'ä ojts pyëtsimy i'px majktëkëëk xajpk ja tu'kkë'ënux.

Ja akaj anëkëjxmtsowpë

²⁰ Jam ijty wiinkpë tëjkëtyakn yajpaaty ma ja tëja'awën anëkëjxmtsowpë. Ojts ja ye'etyëjk tkijpxy jënu'un myëjwiinëtyën ets jënu'un y'ayenyëtyën.

²¹ Tëkëëkjaty ja tëjk ojts yajtukpa'akojë mäjtskpa'ajëty ets mëët yaj'oytyuuny ja nyixeny ets ja tëjkwiin, tu'knax kyojy'atë ets myëj'atë, xëëwpëtsëmtsyowpë yajpaatyën, jä'ä yajkijpxpëtsëëmy majkmokx tu'uk xajpk ja mäjtsk kë'ënux y'ayenyëty ets tuktujk xajpk ja tu'kkë'ënux myëjwiinëty.

²² Ja tëjkwiin, ja nyi'ëwa'atsajtën ets ja tëëxy kepy mëti'ipë ojts kyojtën jëtu'un ja kyijpxyëty tä ja mëti'ipë jam yajpatpën ma ja tëjkëtyaknën xëëwpëtsëmtsyowpë. Ojts yajpotsy ma yajniyujk ye'eyëtyën, wëxtujk nipät e ja tëjkwiin jap itkujkytsyow ojts wyi'imy.

²³ Maatsow ja xëëw pyëtsimyën ets ma ja anëkëjxytsyowpë yajpaatyën, ja tëjkëtyakn mëti'ipë jap tëja'ptsowën, jap ijty wiinkpë tëjkëtyakn ma yajnitëkën ja tëja'aw jootjotypë yajpaatyën. Ojts ja ye'etyëjk tkijpxy mäjtskpëky ya'atë tëjkëtyakn ets jä'ä ojts tyajpëtsëmy i'px majktëkëëk xajpk ja tu'kkë'ënux.

Ja akaj ja ëpa'tkë'ëytsyowpë

²⁴ Ënet ja ye'etyëjk ojts xywoownëjkxyës ëpa'tkë'ëmtsow, ma ja tëjkëtyaknën, ënät ojts tkijpxy ja xeny mäjtskpa'ajëty ets ja tëjkwiin, näjyëtu'un myëjëty tä ja wiinkëtypë.

²⁵ Ja tëjk mëti'ipë jamën ma ja tëjkëtyaknën mëët ja nyitëjkwiin myëët'ajtyp ja nyi'ëwa'atsajtën na'ëwtityë, tä ja wiinkëtypën. Jä'ä myëjwiinëty na'ëwtityë majkmokx tu'uk xajpk ja mäjtsk kë'ënux y'ayenyëty ets tuktujk xajpk ja tu'kkë'ënux myëjwiinëty.

²⁶ Tam näjyëtu'un tmëëtëty yë nyiye'eypyäjn, wëxtujk yujkwä'äky, ja tëjkwiin itkujkytsyow näjyëtu'un wyi'imy. Ma ja xenyën ojts jam tyajkëxkojtë yë tëëxykyepy, tu'ukjaty tu'kpa'ajëtypë.

²⁷ Ja jootjotypë ja tëjkwiin tap näjyëtu'un tmëëtëty ja nyitëjkëtyakn ëpa'tkë'ëytsyow. Ojts ja ye'etyëjk tkijpxy ja tëjk'aaw, jä'ä ojts pyëtsimy i'px majktëkëëk xajpk ja tu'kkë'ënux.

Ja jootjotypë ja tëja'aw: ja akaj ja ëpa'tkë'ëytsyowpë

²⁸ Ënätës ojts jap xywyoownëjkxy jootjotytsyow ma ja tëja'awën, ëpa'tkë'ëytsyowpë yajpaatyën. Ojts tkijpxy ja tëjk'aaw ëpa'tkë'ëytsyowpë, näjyëtu'un ja kijpxën tmëët'aty tä ja më'ëka'anypyën.

^29-30 Ja tëjk ja mutskëtypë ets ja tëjkwiin ets ja tëjkpa'ateeny, tu'knax ja kyijpxy'atë. Näyjyëtu'un ja tëjk mëti'ipë jam ma ja tëjkëtyaknën ets ja tëjkwiin, tam ja nyi'ëwa'atsajtën tmëëtëty pa'apa'a, jä'ä y'ayenyëty majkmokx tu'uk xajpk ja mäjtsk kë'ënux ets myëjwiinëty tuktujk xajpk ja tu'kkë'ënux.

³¹ Ja tëjkwiin tëja'ptsow nyas'ixë. Ma ja xenyën tëëxykyepy jam këxkojy ijtp, ma ya'atë tëjk'aawën yajnipa'tëkën jä'ä yajniyujkwä'äky tuktujkwä'äky.

Ja jootjotypë ja tëja'aw: ja tëjk'aaw ja xëëwpëtsëmtsyowpë

³² Ënätës ojts xywyoownëjkxy ma ja tëja'awën mëti'ipë jootjotytsyow wë'ëmpën, maatsow ja xëëw pyëtsimyën ets ojts tkijpxy ja tëjkëtyakn, näjyëtu'un myëjwiinëty tä ja wiinkëtypën.

³³ Ja nyitëjk, ja nyixeny ets ma ja tëjkwiinën, näjyëtu'un tu'knax kyijpxy'atë tä ja wiinkëtypën. Ja tëjk mëti'ipë yajpatëpën ma ja tëjkëtyaknën ets mëët ja tëjkwiin, tam tmëëtëty ja nyi'ëwa'atsajtën na'ëwtityëty, jä'ä y'ayenyëty majkmokx tu'uk xajpk ja mäjtsk kë'ënux ets myëjwiinëty tuktujk xajpk ja tu'kkë'ënux.

³⁴ Ja tëjkwiin jap tyimja'ty tëja'p. Ma ja xenyën ojts jam tëëxykyepy tyajkëxkojtë. Ma ya'atë tëjk'aawën ojts yaj'oytyuny yë nyiwa'kpäjn tuktujk yujkwä'äky.

Ja jootjotypë ja tëja'aw: ja tëjk'aaw anëkëjxytsyowpë

³⁵ Ënet ojts ja ye'etyëjk xywyoownëjkxyës ma ja tëjkëtyaknën mëti'ipë jam anëkëjxmtsowën ets ojts tkijpxy ja tëjkëtyakn, näjyëtu'un myëjëty tä ja wiinkëtypën

³⁶ tam näjyëtu'un tmëëtëty yë nyitëjk kanaakpëky ets nyixeny ets nyi'ëwa'atsajtën na'ëwtityë. Ja tëjk mëti'ipë jamën ma ja tëjkëtyaknën jä'ä y'ayenyëty majkmokx tu'uk xajpk ja mäjtsk kë'ënux ets myëjwiinëty tuktujk xajpk ja tu'kkë'ënux.

³⁷ Ja tëjkwiin jap tëja'ptsow nyas'ixë. Ma ja xenyën ojts jam yë tëëxykyepy tyajkëxkojtë. Ma ya'atë tëjk'aawën ojts yaj'oytyuny yë nyiwa'kpäjn tuktujk yujkwä'äky.

Ja tëjkëty ma ja tëjk'aawën anëkëjxytsyowpë

³⁸ Tam ijty wiinkpë ja tëjk mëti'ipë mëët nyäwyinku'ixëtyën ja tëjkwiin mëti'ipë jamën ma tëjkëtyaknën. Jap yajpujtë ja jëyujk ooky mëti'ipë wintsë'kën'ajtpën nino'oky.

³⁹ Ma ja tëjkwiinën mëti'ipë yajpatpën ma tëjkëtyaknën taxk ja kaaypyäjn jam kyiiynyë, mäjtskjaty pa'apa'a, jamts ja jëyujk tyajkëx'ooktë mëti'ipë wintsë'kën'ataanpën ets mëti'ipë ja poky kyunaxäämpyën.

⁴⁰ Jap tëja'p ma ja tëjkwiinën, anëkëjxmtsow, tam ijty wiinkpë kaaypyäjn mäjtsk kyiiynyë pa'apa'a,

⁴¹ paaty taxkën ja kaaypyäjn jap tëja'p ets taxk jap tëkotsyow: tuktujk ja kaaypyäjn wyinë'aty. Jam ja jëyujk kyëx'ooktë mëti'ipë wintsë'kën'atantëpën.

⁴² Ja taxkpë ja kaaypyäjn ma ja jëyujk kyëx'ooktën, tsaa mëët y'oytyunyëty; jä'ä y'ayenyëty ets myëjwiinëty tu'kkë'ënux ja tu'ktsa'aty ets kyëjxmëty tu'kkë'ënux, jamts ja tsu'utsy yajkëxpëky tsujktä'äky mëti'ipë wintsë'kën'ajtpën.

⁴³ Jap tëkoty ojts wäänë yë potsy yajyujkpotsy na'ëwtity, tu'ktsa'atsyën myäjpxyëty, jam yajpëjktä'äky ja tsajpmokway ets ja apëjk atu'unën mëti'ipë tuunpën ko ja jëyujk y'ooktë mëti'ipë wintsë'kën'atantëpën.

⁴⁴ Jap tëja'p mëti'ipë jap itkujkyën, pë'aaytsyow ma ja tëjkëtyaknën jootjoty tsyowpë, mäjtsk jap ja tëjk mutskjatyëty, tu'uk anëkëjxytsyow, ëpa'tkë'ëmtsow nyas'ixë ets tu'uk jam ëpa'tkë'ëmtsow, anëkëjxmtsow nyas'ixë.

⁴⁵ Ënet ja ye'etyëjk xy'ënëmaayës: Ja tëjk mëti'ipë ëpa'tkë'ëytsyow najts'ijxëpën yë'ë nëjkx yë teetyëjk tjä'ä'atë mëti'ipë jap tsajptëkoty tuuntëpën,

⁴⁶ e ja tëjk mëti'ipë anëkëjxmtsow najts'ijxëpën yë'ë nëjkx tjä'ä'atë yë teetytyëjkëty mëti'ipë wintsë'kën yajktëpën. Yë Leví ja'ay mëti'ipë yë Sadoc y'u'unk'ajtyp y'ok'ajtypyën yi'iyë myëwinkontëp yë Wintsën ets tmëtuntëty.

Ja tëja'aw ja itkujkpyë ets ja tsajptëjk

⁴⁷ Ojts ja ye'etyëjk näjyëtu'un tkijpxy ja tëja'aw tëkotytsyowpë, i'px majktëkëëk xajpk ja tu'kkë'ënux y'ayenyëty pa'apa'a. Ja wintsë'këntyakn wintuuytsyow yajpaaty ma ja tsajptëjkën.

⁴⁸ Ja ye'etyëjk ojts xywyoownëjkxyës jam ma tëjkwiinën ets tkijpxtaay ja xeny pa'apa'a. Tu'ukjaty jä'ä myäjpxyëty tu'kxajpk ja mäjtsk kë'ënux. Ja tëjk'aaw jä'ä myëjwiinëty taxk xajpk ja mäjtsk kë'ënux, e ja potsy mëti'ipë ja tëjk'aaw myajts'ijtypyën ma ja tëjkwiinën jä'ä myäjpxyëty tu'kxajpk.

⁴⁹ Ja tsajptëjkwiin jä'ä y'ayenyëty tëtujk xajpk ja mäjtsk kë'ënux tu'ukjatypë ets jä'ä myëjwiinëty taxk xajpk; yë'ë mëët yajnipety yë potsy majk yujkwä'äky. Tam ja nyixeny pa'apa'a.