Ezequiel 34 - Biblia Dc en Mixe de Quetzaltepec

Ma yaj'akäjpxyën wi'ix ëxëëk jyata'antën yë kupixyny këwent'ajtpëty jam Israel

¹ Ënet ja Wintsën ojts xymyëkäjpxyës ets xy'ënëmaayës:

² Mijts ye'etyëjk, mëmëtya'ak ëjts nxëëwkyëjxmës yë ja'ayëty mëti'ipë tu'uwinye'eytyëpën, tä kupixyny këwent'ajtpën ma Israel ja'ayëtyën, jëtu'un xy'ënëëmëty: Jëtu'un yë Wintsën y'ënä'äny: Janty mon janty tuk yajpaatë yë kupixyny këwent'ajtpëty mëti'ipë jamëtyën Israel, mëti'ipë kë'ëm näkyëwent'ajtëtëpën. Yë'ë jeexyë kyëwent'ajtëp yë kupixyny.

³ Miitsëty m'uktëp yë tsi'tsknëë, myajkojtëp yë wit mëët yë kupixynyjyëmk ets myaj'o'ktëp yë kupixyny ni'kxëtypë, je'eyëp ko ka'ap xykyëwent'atë yë kupixyny.

⁴ Miitsëty ka'ap xypyutëkëtë kupixyny paki'ixëtypë, ka'ap xytsyooyëtë mëti'ipë pëjkëp ijxëpën, ka'ap xypyijtëtë xymyojtsëtë yë tyeky mëti'ipë tekytyëjën, ka'ap xy'ixta'atë mëti'ipë ye'eytyëkooytyëpën, mëti'ipë jyayajmëyäjtypyën ja näypyutëkë ni'ikyë ëxëëk xytyuntë.

⁵ Yë nkupixynyës jëtu'unyë të wyi'imy ka'ap pën kyëwent'ajtpë, tëë ye'eywya'kxta'atë ets të tsyu'tsta'ajëtë yë jëyujk.

⁶ Jëtu'unyë jam aayjyotm ujtsjotm ets jam kopkëjxm të ye'eywya'kxta'atë, xiitsow yaatsow të kyuye'eyëtya'atë ets ka'ap pën të myëmay të myëtajëtë ets të y'ixta'ajëtë.

⁷ Paaty yam miitsëty kupixyny këwent'ajtpëty n'ënëëmëtë ets xyjyä'äkyukëtëty yë n'aaw n'ayukës.

⁸ Ëjts Wintsën, njuukyajtënës yam ntukajpxpejtyp: Tëë jëyujk kanaakjëjp tmä'tsta'atë yë nkupixynyës ets të ttsu'utstë, jä'äkyëjxm ko ka'ap tmëët'atë këwent'ajtpë. Yë nkupixynykyëwent'ajtpës ka'ap të t'ixta'atë ja nkupixynyës. Yë kupixyny këwent'ajtpë kë'ëm tyäty nyäkyëwent'atëtë ets ka'ap tkëwent'atë yë nkupixynyës.

⁹ Paaty miitsëty kupixyny këwent'ajtpë, mëtoow'itë ja aaw ayuk

¹⁰ mëti'ipë yam ëjts Wintsën miitsëty ntukmëmëtya'akantëpën: Miitsëty kupixyny këwent'ajtpë, mmëtsipës yam näpyëjktä'äkyë ma miitsëtyën ets yë'ë yam ntukpatëkëjantëp ja nkupixynyës; mpëjkëjantëp yam ja tuunk ma mkupixynykyëwent'atën, këtiipë kë'ëm mtsyätynyäkyëwent'atëtëty; mpëjkëtya'ajantëp yam yë nkupixynyës këtiipë xytsyu'tsta'atëty.

Ja oypyë kupixyny këwent'ajtpë

¹¹ Ëjts Wintsën, jëtu'unës n'ëna'any: Ëjts yam kë'ëm nkëwent'atäämpy yë nkupixynyës.

¹² Jëtu'un tä tu'uk yë kupixyny këwent'ajtpën mëti'ipë myëmääpy myëtäjpyën yë kyupixyny ko tyëkoy'ity; jëtu'unës nmëmayä'äny nmëtaja'any yë nkupixynyës; etsës jam nyajpëtsëma'antë ma ojts nyajtskääkëtën ko kyoots'ajty ets ko jyää'ajty ja ëyo'on jotmay.

¹³ Nëjkxëpës jam nyajtsoontë wiink naax wiink kajpn, nyajtu'ukmukantëpës etsës nyajnëjkxa'antë ma kyë'ëm naax kyë'ëmkajpnëtyën. Jamës nyajnëjkxa'antë jë'kxpë pëjkpë jë'kxyotm ma Israel kopkën, ma wokjotmën ets maajaty yë Israel tnitänën yë naaxwiinyëtë.

¹⁴ Jamës nyajnëjkxa'antë ma oypyë jë'kxy pëky tjë'kxtëtyën, ma ja ujts jotmën mëti'ipë jamën ma Israel kopkën. Nëjkxëp jam pyo'kxtë ets aakyë'ë nëjkx oyëtypë aay ujts tjë'kxtë.

¹⁵ Kë'ëmës nëjkx ntimy kyëwent'aty yë nkupixynyës, kë'ëmës nyajnëjkxa'any po'kxpë. Ëjts Wintsën, ëjts ënaanp.

¹⁶ Nëjkxëpës n'ixta'ay ja kupixyny tëëpë tyëkoyën, mpatäämpyës ja mëti'ipë tëkoy'ijtpën, mpitäämpy nmotsäämpyës mëti'ipë tsëtyutën, mputëkëjäämpyës mëti'ipë ëmaay paki'ixën ets nkëwent'atäämpyës mëti'ipë mëkën ets ni'kxën. Jëtu'unës nkëwent'ata'any ijxtëm pyaat'atyën.

¹⁷ Ëjts Wintsën, jëtu'unës n'ëna'any: Mëtoow'itë miitsëty nkupixynyës: Mpaye'eyäämpyës yam yë nëë poky ma kupixynyëtyën ets ma tsajppaxëtyën.

¹⁸ ¿Këtii xytyukjotkëta'aktë oy xyjyajë'kxtë ja oyëtypë aay ujtsë, koonëmën xy'atääna'an xytyuktääna'antë mëti'ipë të wyi'imyënë? Ko mnëë'ukta'atë tääts jap mkuwa'akëtë ma wa'atsnëëjën mëti'ipë jaakwa'ats nëë'ajtpën.

¹⁹ E ja nkupixynyës yë'ë jyaak jë'kx jyaak pëjktëp tëëpë xy'ëxëëk tääntën ets yë'ë jyaak uktëp tëëpë xyaj'ëxëëkëtën.

²⁰ Paaty ëjts maas nWintsën'atyën, jëtu'un n'ënëëmëtë: Mpaye'eyäämpyës yam wi'ix ko jää kupixyny ni'kxpë ets tää xyëëpëpë.

²¹ Miitsëty mnajtstij mnajtskojtëtyëp ja mëti'ipë ëmaay paki'ixën, mwaj të xytyuknipëtë'ëktë ets të xyajkä'äktë.

²² E ëjts nyajtso'okäänpyës yam yë nkupixynyës. Ka'apës nkupëka'any ets ni'ikyë xymyäätstëty. Mpaye'eyäämpyës yam yë nkupixynyës.

²³ Nyajwinpitäämpyës yë ntuunpës David, yë'ëjës tu'ukyë nyaj'itäämpy kupixyny këwent'ajtpë ets yë'ë oy tkëwent'atëty. Yë'ë nëjkx yë kupixyny tkëwent'ajtpë'atë.

²⁴ Ëjts Wintsën, ëjts nëjkx xyTyios'atë ets ntuunpës David yë'ë nëjkx nyikopk'atëtë. Ëjts Wintsën, ëjts ënaanp.

²⁵ Ntunäämpyës tu'uk yë käjpxytyu'unën mëët yë'ëjëty ets jeky jyuuky'atëty jotkujk. Nyajkutëkoyäämpyës yë jëyujk ma naax kajpnën, jëtu'un yë nkupixynyës jotkujk jyuuky'atëty mëjwintuuy ëwaatsëtuuy ets jotkujk mya'atëty pyo'kxtëty aayjoty kepyjoty.

²⁶ Jamës yë nkupixyny nyajtänëja'any maas yë nkopkën wa'atspë etsës nkënu'kxa'antë; yë'ëjës ntuknikäxantëp ja nëë tuu mëti'ipë kënu'kxën yajkëtäkpyën ma ënety mëtëy myëyätyën.

²⁷ Kamjotypë aay kepy nëjkxëp tyëëmpätë, nëjkxëp yë pëjktä'äky wyintëy kamjoty tu'ujoty ets jotkujk nëjkx jyuuky'atë kyë'ëm naaxjoty. Koos ënety nyaj'ëwaatsëpëtsëmy yë nnaax nkajpnës ma ja'ay ëxëëk tyunëtën, ënät nëjkx tnijawëtë ko ëjts Wintsënajtp.

²⁸ Ka'ap nëjkx wiinkëtypë naax kajpn y'ëk'ënä'ämënëtë ets ka'ap nëjkx yë jëyujk y'ëktsu'tsënëtë. Jotkujk jyuuky'atëty ets ka'ap pën y'ëtsë'ëkëtëty.

²⁹ Nyaj'itäämpy nyajwintëwäämpyës winë ma kyam tyu'ujëtyën ets yë'ëjëty ka'ap nëjkx y'ëk'ayuu'ajnëtë ets ka'ap nëjkx wiinkëtypë naax kajpn y'ëktukxikënëtë.

³⁰ Ënet nëjkx tnijawëtë ko ëjts Wintsën, yë Tyiosëty, ko yajpatpës ma yë'ëjëtyën ets Israel kajpn yë'ëjës nkajpn'ajtyp. Ëjts Wintsën, ëjts ënaanp.

³¹ Miits nkupixyny'ajtëp, mëti'ipë jam tënaaytyëpën maas yë nmëëykyamën. Ëjts xyTyios'ajtëp. Ëjts Wintsën, ëjts ënaanp.