Ezequiel 25 - Biblia Dc en Mixe de Quetzaltepec

Ma ja Amón ja'ay yajnikajpxtën wi'ix jyata'antën

¹ Ënet ja Wintsën ojts xymyëkäjpxyës etsës xy'ënëmaay:

² Mijts ye'etyëjk, nëjkx jam ma Amón ja'ayëtyën ets xytyukmëmëtya'aktëty ëjts nxëëwkyëjxmës wi'ix ëxëëk jyata'an kyëpäta'antën.

³ Xy'ënëëmëty ko wä'än t'amëtoow'itë ja aaw ayuk mëti'ipë Wintsën tuknikäjxëtëpën: Miitsëty ojts xytyukxoonta'aktë ko xy'ijxtë ja ntsajptëjkës o'ktëy jyäty kyëpety, ko xy'ijxtë ja naax kajpn kyutëkooy ets ko ojts ja Judá ja'ayëty yajmënëjkxtë tsumy matsy wiink naax wiink kajpn.

⁴ E oy ko jyëtu'unëty, miitsëty jam nkë'ëyaka'antë ma ja naax kajpnën mëti'ipë yajpatpën xëëwpëtsëmtsyow, yë'ë nëjkx tjä'äniwa'antë yë mnaax mkamëty, nëjkxëp tpëjkta'aktë yë këwent'ajtpë ets nëjkx tkojtë jyëën tyëjkëty. Nëjkxëp tjë'kxta'atë mëti'ipë të xynyitunëtën ets t'ukta'atëty ja mtsi'tsk nëëjëty.

⁵ Mëëyjot yë Rabá kajpn nyaj'awinpita'anyës ma nëjkx jëyujk jëku'ux y'oktën ets Amón kajpn kupixynytyënaaytyakn nyaj'awinpita'anyës. Ënet nëjkx xy'ijxpaatës ko ëjts Wintsën.

⁶ Ëjts Wintsën, ëjts ënaanp: Miitsëty Amón ja'ayëty tëë m'ätstë ets tëë mxoonta'aktë, tëë xy'ixtijtë yë Israel kajpn.

⁷ Paaty miitsëty nipëtë'ëka'antë ets ntëytyuna'antë, nkë'ëyakantëp ma ja naax kajpnën ets mpëjkëtya'ajëtëty mëti'ipë mëët'ajtëpën. Nyajjëwa'akantëp ma wiinkëtypë naax kajpnën, nyajkutëkoyantëp ets myaj'ijxtëkoytyëty. Ënet nëjkx xy'ixtë ko ëjts Wintsën.

Ma yajnikäjpxyën wi'ix ja Moab jyata'anyën

⁸ Ëjts Wintsën jëtu'unës n'ëna'any: Moab ja'ayëty ets Seir ja'ayëty jëtu'un y'ëna'antë ko yë Judá kajpn näjyëtu'un yë'ë tä wiinkëtypë kajpnën.

⁹ Paatyës nyaj'ëwa'atsa'any tu'uk yë najxtakn ma Moab kyajpnpa'ajën etsës nyaj'atëkoyä'äny yë naax kajpn mëti'ipë tyijtëpën mëj'äämpy ets kumeeny: Yë'ë yaj'antijp yë Bet-jesimot, Baal-meón ets Quiriataim kajpn.

¹⁰ Ëjts nyajkutukäämpy ets kajpn xëëwpëtsëmtsyowpë yajpaatën yë'ë jyä'ä'atëtëty yë nyaax kyamëty; ëpëky yë Amón ja'ayëty ets jëtu'un ka'ap nijëna'a yaja'amyätstëty yë Amón ja'ayëty.

¹¹ Nyajnitukëjäämpyës yë Moab ja'ayëty, ënätnëm nëjkx tja'akyukëtë ko ëjts Wintsën.

Ma yajnikäjpxyën wi'ix yë Edom ja'ay jyata'antën

¹² Ëjts, Wintsën, jëtu'unës n'ëna'any: Edom tëë tuunwinpity ijxtëm ojts tyunyën yë Judá, paaty ja nëë poky të tsëëmë'ëky.

¹³ Paaty ëjts maas nWintsën'atyën n'ëna'any, ëjts Wintsën: Nnipëtë'ëkäämpyës yë Edom ja'ay ets nyajkutëkoyä'änyës tëkokyë yë ye'etyëjktëjk ets jyëyujk tsyajpkaajëty. Axit ako'owës ntuunta'aja'any yë nyaax kyajpnëty. Tsyo'onta'akëty jam Temán ets jyëjpkëxëty jam Dedán, aak kupuxy y'o'kta'aja'antë.

¹⁴ Jëtu'unës ntuunwinpita'any mëët ijxtëmës ojts xytyimtunyën yë Edom ja'ayëty, yë Israel kajpn ëxëëk tuna'any yë Edom kajpn tääjës ënety ëjts të njoot'anpëkyën. Jëtu'un nijawëtëty wi'ixës winë ntuunwinpityën. Ëjts Wintsën, ëjts ënaanp.

Ma yajnikäjpxyën wi'ix yë filistejë ja'ay jyata'antën

¹⁵ Ëjts Wintsën jëtu'unës n'ëna'any: Yë filistejë ja'ayëty tëë y'äkë tuunwinpitë, tëë ëxëëk y'ëtë'ëtstë y'ëna'antë ijxtëm yë jyot wyinma'any tyim ëna'antën; tëë tyajkutëkooytya'atë winë tä të tuknipëjktaakëtën ma tmëtsip'atën xëmë yë Israel ja'ayëty.

¹⁶ Paaty ëjts maas nWintsën'atyën, jëtu'unës n'ëna'any: Nnipëtë'ëkäämpyës yam yë filistejë ja'ayëty ets ntëytyuna'antës; nyajkutëkooyäämpyës yë quereteos ja'ayëty ets tu'kë'ëyë mëti'ipë jam nëëpë'am të jyaakwë'ëmtën.

¹⁷ Ntuunwinpitäämpyës ets jëtu'un nyanaxa'anyës yë ntsip n'äkës ma yë'ëjëtyën. Koos ënety jëtu'un ntuny, jäänëm nëjkx tnijawëtë ko ëjts Wintsën.