Ezequiel 22 - Biblia Dc en Mixe de Quetzaltepec

Yë Jerusalén kajpn nyëë pyoky

¹ Ënet ja Wintsën ojts xymyëkäjpxyës ets xy'ënëmaayës:

² Mijts ye'etyëjk, yë'ë myajnitukëp yë naax kajpn mëti'ipë yaja'ay o'kpën. Mtukwinmëtoowta'ajëp mëti'ipëjaty të tuuntëkoytyën,

³ ets xy'ënëëmëty: Jëtu'un yë Wintsën y'ënä'äny: Mijts naax kajpn ma yajpaatën ja yaja'ay o'kpë mëti'ipë myëkunaax myëkukajpn yaj'o'ktëpën ets ma yajpaatën ja ja'ayëty mëti'ipë yakojtëpën ja awinax ets nyätyukyaj'ëxëëkëtë, pyätyp ja xëëw jëmëjt ma ëxëëk mjata'anyën.

⁴ Mëët ko të myajja'ay ooky paaty të mpokykyä'äy ets mëët ko të xyajkojy yë awinax mëti'ipë m'ëwtajtypyën paaty të mnäyaj'ëxëëktëkëty; tëë ja m'o'kën mtëko'oyën wyinkony ets mkutëkoyëty. Paaty të ntuknipëjktaakës ets kanaak yë naax kajpn m'ojëtëty ets mnëxi'ik mtukxi'ikëtëty.

⁵ Jëkämpë ets wiinkonpë naax kajpn nëjkxëp mnëxi'iky mtukxi'ikyë, kajpn tëëpë mëj'äämpy nyäxyën mëët ko wiink tios të xy'ëwtaty ets ko ëxëëk të m'ëtë'ëtsy të m'ëna'any.

⁶ Yë'ëjës n'antijpy yë Israel yajkutujkpëtëjk, mëti'ipë juuky'ajtëpën ma mijtsën ets yaja'ay ooktë ijxtëm tyimjot tyimwinma'anyëtyën.

⁷ Yë ja'ayëty mëti'ipë tsënaaytyëpën ma mijtsën ka'ap twinkutsë'ëkëtë yë tyaak tyeetyëty; ëxëëk tuntë yë jaaypyo'kxy, yaj'ëyoowtëp yë ku'ooky u'unk ets ku'ookytyo'oxy.

⁸ Ka'ap twinkutsë'ëkëtë n'ijtaknës kënu'kxypyë ets npo'kxën nxëëwës ka'ap tmëjpëjkta'aktë.

⁹ Mëët ko je'eyë wyin'ëëntë, mëti'ipë yajpatëpën ma mijtsën paaty yë wiinkëtypë ja'ay y'ooktë tyëkoytyë; nyinëjkxtëp ja tëkatsypë ja tios mëti'ipë jam tunkëjxm kopkkëjxm nyixëëwtuuntëpën ets tuntë ka'apë tyuunëtyën.

¹⁰ Tam mëti'ipë myëëtko'knaaynyëpën ja tyeety ja tyo'oxytyëjk ets tam mëti'ipë myëëtko'knääpyën ja to'oxytyëjk mëti'ipë ëmaay'ajtpën.

¹¹ Tam mëti'ipë jyiiky myëku'uk myëëtko'knääyëpën ja tyo'oxytyëjk ets tam mëti'ipë ja'ay myëëtko'knaaynyëpën yë myaank yë tyo'oxytyëjk ets t'atsip'ajnë yë'ëpaat yë kyu'uty to'oxytyëjkpë.

¹² Tam yë mëkunaax mëkukajpn mëti'ipë nyimeenypyijkpyën ets nëjkx yaja'ay ooky. Tam mëti'ipë meeny myëku'uk tyuk koontsoopyën ets may'äämpy tyaj'u'unk'aty, tam mëti'ipë je'eyë myëku'uk mëk tjanty yajtunyën ets yë'ë myeeny'äjtyp. Ëjts ka'apës pën xy'ëkja'amyäjtsnë, tëëjës xyjyä'äytyëkooynyëtë. Ëjts Wintsën, ëjts ënaanp.

¹³ Ëjts mëkës yam mijts ntukjoot'anpëky jä'ä ko je'eyë ëyoopëja'ay amëjaaw xyajmëtuny ets mijts mkumeenytyä'äky ets myajja'ay o'kp näjyëtu'un.

¹⁴ Mijts nitii mëk'ajtën xykyamëët'ata'any ko ënety nnipëtë'ëky ets ntëytyuny. Ëjts Wintsën ëjts ënaanp ets koonëmës nkuuytyuna'any:

¹⁵ jëtu'unyë nëjkx n'awojpwa'kxtë ma wiinkëtypë naax kajpnën, xit ko'ow ntuunta'aja'antë wiink naax wiink kajpn ets wa'ats nëjkx nyaj'awinpity;

¹⁶ nëjkxëpës xyajnipäxëtëkëtë ko ënety ëxëëk mjatë mkëpätë ma wiinkëtypë naax kajpnën, e kopkpëky jëtu'un jyatëty kyëpätëty jä'ä ko ënätës nëjkx xy'ixkaptë ko ëjts Wintsën.

¹⁷ Ënet ja Wintsën ojts xymyëkäjpxyës ets xy'ënëmaayës:

¹⁸ Yë Israel kajpn jëtu'un yë nyäxy maas ëjtsën tä wyinkinyën yë pujxn ko wyin'ëëtsy, tä yë juunpujxn, yu'unk pujxn, yëk pujxn ets poop pujxn.

¹⁹ Paaty ëjts maas nWintsën'atyën, jëtu'unës n'ëna'any: Mëët ko miitsëty jëtu'un të m'awinpijta'atë tä win'ë'tskëta'akën, nyajtu'ukmukantëp jam Jerusalén.

²⁰ Jëtu'un tä yaj'apëjkmukyën jap jëënjoty yë juunpujxn, yëkpujxn, poop pujxn ets yu'unk pujxn ets yajjëënkupëky ets y'ë'tsmukëty; jëtu'un miitsëty nyajtu'ukmuka'antë maas ënety të njoot'anpëkyën ets nyaj'atooymyuka'antë.

²¹ Jëtu'un y'ixë'atëty, nyajmëjëjäämpyës yë jëën mëëtës yë njoot'an; nwoowmukantëp ets nyaj'a'ë'tsmuka'antë jap kajpnjoty.

²² Jëtu'un tä poop pujxn y'a'ë'tsmukyën, jëtu'un m'atooymyuka'antë kajpnjoty ets xynyijawëtëty ko ëjts Wintsën, tëë miitsëty ntukjoot'anpëktë.

²³ Ënet ja Wintsën ojts xymyëkäjpxyës ets xy'ënëmaayës:

²⁴ Mijts ye'etyëjk, jëtu'un xy'ënëëmëty yë Israel ja'ay: Mijts yë'ë mtëytyu'unën'ajtyp ko ka'ap tyu'uy ma mijtsën ets ka'ap nëë xymyëëtëty.

²⁵ Ja kajpn mëti'ipë ja kyutujkpëtëjk jëtu'un ja'ay'ajtëpën tä kaajën, mëti'ipë muutëpën ni'tstëpën ets t'atëj t'amootëtë y'o'kpë; mëti'ipë tsyu'typyën yë ja'ay nyaaxjoty kyajpnjoty, mye'tsyp ja wit meeny ets ja myëk'ajtën mëti'ipë yu'utsy yaj'ijtëpën ets may ja to'oxytyëjk ku'ooky tyajwë'ëmy.

²⁶ Yë teetytyëjkëty mëti'ipë yajpatëpën ma ya'atë kajpnën, wiinkatsy tja'akyukëtë ëjts ja n'ijxpëjkënës ets yaj'ëxë'këtyääytyëp ja mëti'ipës wa'ats nyajnajxypyën; ka'ap t'ixtë mëti'ipë ëxëëkën ets mëti'ipë wa'atsën ets ka'ap pën tukni''ixëtë mëti'ipën oy'ajtp ets ëxëëk'ajtpën. Ka'ap tpo'kxtë npo'kxën nxëëwës ets ka'apës xymyëjpëjkta'aktë.

²⁷ Yë ënä'ämpëtëjkëty mëti'ipë yajpatëpën ma ya'atë kajpnën jëtu'un jyä'äy'atë waxën mëti'ipë piw nuuk tyuunpyën yë y'o'kpë; yaja'ay'ookaanp je'eyë ets tyämäämpy jyä'ätsäämpy ja jot ne'pny ko kyumeenytyä'äky.

²⁸ Yë käjpxynyajxpëtëjkëty yu'tstëp ja tëyajtën, jëtu'un tä ja'ay poop twinkukoyën yë potsy; jëtu'un y'ëna'antë ko tëë Wintsën tyuk'ixëtë winë ets ka'ap myëtëyëty. Jëtu'un y'ëna'antë ko yë'ë nyikajpxtëp mëti'ipës të ntuknipëktën ets ka'apës wi'ix n'ënëëmëtë.

²⁹ Yë ja'ayëty mëti'ipë tsënaaytyëpën ma naax kajpnën aak je'eyë tyontë myäätstë ets tsyiptuntë; je'eyë twoptë ja ëyoopëja'ay ma tyajmëtuntën ets yë'ë tyukumeenytyaktëp, ka'ap tnipaye'eytyë oy wi'ix jyatë kyëpätë mëti'ipë jaaypyo'kxyajtëpën.

³⁰ Ëjts tëëjës ja ja'ay n'ixta'ay ma tääpë naax kajpnën mëti'ipë jeexyë ja kajpn pya'ëyoopyën ets jeexyë tnikajpxtu'uty ma ëjtsën këtiipës nyajkutëkoyëty, je'eyëp ko ka'ap të npaatyës.

³¹ Paatykyëjxmës të nyajkëtä'äky yë ëyo'on ma yë'ëjëtyën etsës të nyajtooytyëkoytyë mëët ja ntsip n'äkës, etsës të ntukëpätë mëët ko të tyuuntëkoytyë. Ëjts Wintsën, ëjts ënaanp.