Ezequiel 17 - Biblia Dc en Mixe de Quetzaltepec

Ja tsatym kyepy ets ja witsn

¹ Ënet ja Dios ojts xymyëkäjpxyës ets xy'ënëmaayës:

² Mijts ye'etyëjk, tukmëmëtya'ak yë naax kajpn tu'uk yë ijxpäjtën.

³ Jëtu'un xy'ënëëmëty: Jëtu'un yë Wintsën y'ënä'äny: Tëë tu'uk yë witsn jyä'ty jam Líbano; janty mëj kyäkn ets nëkooyë muum jya'ajnë, kanaak ujkën yë jyëmk. Jam të wya'ak'oyë ma tu'uk yë ajë kepykyopkën,

⁴ jä'ä të tnëtëjy ja xye'enty mëti'ipë oykyëjxmën ets jam të tkojy ma tu'uk yë kajpnën mëti'ipë ajuupy ato'kpën, ma ja'ay tsyëënëtën mëti'ipë juuytyëp to'ktëpën.

⁵ Ënet të tkoonë'ëky naaxkëjxy tu'uk yë tëëmt ets të tni'ipy jam naaxjotm ma winë y'ityën, wok pë'aay, ma nëë ka'ap y'ëmaaytyä'äkyën.

⁶ Tëë ja tëëmt myuxy ets të y'awinpity tu'uk mëj kepy; oy ka'ap nëkooyë kyëjxmëty, tëë ja xye'enty jam jyä'ty ma witsnën, ko të tyikts ke'eky. Ets të y'awinpity tsatym kyepy; tëë ja xye'enty tpëjktä'äky ets tëë jyiitsy.

⁷ E tam ënety wiinkpë witsn mëjpë, mëj ja kyäkn tmëëtëty ets yajxon jyëmknë. Ënet ja tsatym tyikts nyaaxpëjky ets jam nyajts'a'tsëy ma ja witsnën ets ja nëë myo'ojëtëty jëkäm ma ënety kyojyëtyën.

⁸ Je'eyëp ko oy nyaaxjoty ënety kyojyëty ets ka'ap ja nëë y'ëmaaytyä'äky, ma tjëkyepyën wi'ix yonëtyën, tyëëmpätëtyën ets oy y'ujts'atëty.

⁹ Jëtu'un xy'ënëëmëtëty, ëjts nxëëwkyëjxmës: Jëtu'un yë Dios y'ënä'äny: Ya'atë tsatym kyepy ka'ap wyintëwa'any. Yë witsn mëjëyëjpë yë'ë nëjkx ja tyikts tyajtëtstaayë ets ja tyëëm nëjkx tyajka'ataayë; wäänjaty yajwo'on'ëmayä'äny ets tim kë'ëtsë'ëkaanp ets tyëtsta'aja'any ma ënety të jyiitsyën.

¹⁰ Oy jyayajpääntëkatsëty, ka'ap nëjkx jyiitsy; jää nëjkx tyëtsta'ay ko ënety myiny ja jëënpoj mëti'ipë xëëwpëtsëmtsyow tso'onpën; jam tsyë'ëtsa'any ma ënety jyiitsa'anyën.

¹¹ Ënet ja Wintsën ojts xymyëkäjpxyës ets xy'ënëmaayës:

¹² Myajtëwëp yë naax kajpn pën wyinmëtoowtëp tii ya'atë ijxpäjtën jyatijpyën. Jëtu'un xy'ënëëmëtëty: Yë Babilonyë yajkutujkpë ojts myiny jyä'ty ma Jerusalén kajpnën ets tmajtsy yë Judá yajkutujkpë mëët tëkokyë yë wyintsëntëjk ets ojts tsumy matsy tmënëjkxy jam Babilonyë.

¹³ Ënet ojts tuny tu'uk ja käjpxytyu'unën mëët tu'uk ja myaank ja Judá yajkutujkpë ets tukupëjky ja winma'any ets oy yajkutukëty ets myëët'atëp ja näwyinkutsë'ëkë ma ja Babilonyë yajkutujkpën ets tyajnëjkxtaay tsumy matsy ja ja'ay mëj'äämpyë,

¹⁴ këtiipë ja Judá tmëët'atëty ja mëk'ajtën ets këtiipë tnipëtë'ëkëty ja Babilonyë kajpn; yi'iyë tëy pyatunëp ijxtëm ja käjpxytyu'unën të tuntën.

¹⁵ Je'eyëp ko ja Judá yajkutujkpë ja myaank ojts ja Babilonyë yajkutujkpë tmëtsiptsoony ets jap Egiptë tkejxy yë jyä'äy kwaay juupyë ets t'amëtooy ja mayjyä'äy. ¿Miitsëty wi'ix m'ëna'antë, wä'än jëtää tyaapë ja'ay myëta'akëtyë? ¿Wä'än jëtää yë ja'ay juuky wyë'ëmëtyë mëti'ipë ënety të tkäjpxy kyumëtoownaxyën tu'uk yë käjpxytyu'unënë?

¹⁶ Ëjts Wintsën, jëtu'unës n'ëna'any ets njuukyajtënës yam ntukkajpxpejtyp, ko tääpë ja'ay jyëkyejpy y'ookëty jä'ä ko tëë tukxi'iky ja käjpxytyu'unën ets ka'ap të tpatuny ijxtëm të y'ënë'ëmxëtyën ja yajkutujkpë mëti'ipë të jyapëjktä'äkyën ets yajkutukëty.

¹⁷ Paatykyëjxm ko ënety yë Babilonyë yajkutujkpë tnipëtë'ëky yë kajpn ets twinwëëtëty; t'oytyunëty yë ye'eypyäjn jam potsykyëjxm ets jap kajpnjoty tyëkëty ets may yaja'ay ookëty; yë Egiptë yajkutujkpë ka'ap pyutëkëja'anyë ets ka'ap tyuknikäxa'anyë tsiptuunpëtëjk ets mayjyä'äy,

¹⁸ jä'ä ko tëë tnëxi'iky tukxi'iky ja käjpxytyu'unën ets ka'ap të tpatuny ijxtëm ojts yajkäjpxy'ätyën, je'eyë ojts winë tkupëky ets ka'ap t'ëkpatuunë. Paatykyëjxm ka'ap tjëkyepy juuky kyä'äkëty.

¹⁹ Ëjts Wintsën, njuukyajtënës yam ntukajpxpejtyp; tëë tukxi'iky ja käjpxytyu'unën mëti'ipës ojts mëët njatunyën ets ka'ap të tpatuny ja aaw ayuk ijxtëmës ojts xytyukwinwanën; paatykyëjxmës n'amëtoowta'aja'any maajaty të xymyëtëkoyës.

²⁰ Jëtu'unës yam ntuna'any tä ja'ay tkujëpipyën yë nëë jëyujk ets nmajtsmuka'anyës; nmënëjkxa'anyës jam Babilonyë, jamtsës nyajnitukëja'any mëët ko ka'ap të xymyëj'ixyës.

²¹ O'kta'ajantëp ja jotmëkja'ayëty jam tsipjotm, mëti'ipë ënety wë'ëmtëpën juuky, jëtu'unyë ye'eywya'kxa'antë taxkpëky. Ënätnëm nëjkx m'ëna'antë ko ëjts Wintsën, tëëjës n'ayuk njakäjpxy.

²² Ëjts, mëti'ipë Wintsën'ajtpën, jëtu'unës n'ëna'any: Ko jam kepyjyëjp'am ma ajë kepyën mëti'ipë këjxm të yonyën, jamës nkuto'kxtu'uta'any tu'ktëjyën nyikepy: Yë'ë xye'enty naamnëmpë yoonpëtsëmyën, jamës tunkëjxm kë'ëm nkoja'any ma ja kopkën wäänë këjxmëpë,

²³ jam ma ja kopkën ni'ik këjxmëpë mëti'ipë yajpatpën ma Israel y'itjotmën. Mëj yona'any, jam'ataanp yë xye'enty, tëëmpätaanp yajxon ets mëj kepy y'ita'any. Nëjkxëp jam kanaaknax yë jëyujk tpa'tma'ay ets kanaak yë joon jëyujk pyä'än jam tpëjkta'aka'any.

²⁴ Nëjkxëp tëkokyë aay kepy tnijawëtë ko ëjts Wintsënajtp. Ëjts nyajkëtääpyës yë aay kepy mëti'ipë mëj këjxm naxaanpën ets yë'ë nyajyony nyajjiitsyës mëti'ipë ëmaay amutsk yaj'ijxpën. Ëjts nyajtëtsypës yë kepy mëti'ipë tsuxk ijtpën xëmë ets nyajtsuxkëpës yë kepy mëti'ipë të'ëtsën. Ëjts mëti'ipë Wintsën'ajtpën, ëjts ënaanp ets npatuumpyës yë n'aaw n'ayuk.