Ezequiel 15 - Biblia Dc en Mixe de Quetzaltepec

Jerusalén jëtu'un tä tu'uk yë tsatym kyepyën ka'apë tyëëmpetyën

¹ Ënet ja Dios ojts xymyëkäjpxyës, etsës xy'ënëmaay:

² ¿Mëti'ipë ni'ik tsoowpatp ma tsatym kyepyën ko mëët yaj'ijxkijpxy wiinkëtypë kepy?

³ Yë tsatym kyepy tii nyajwa'anmëty, ni nkajäänë'kmëty jam tii.

⁴ Je'eyë tëy jyaak ja'axy'atëty, ko jyëjptooytyu'uty ets të tsyooytyaktaaynyë, ¿tii y'ëkwanëty?

⁵ Ma të kyepy'ätyën ka'ap tii të wyä'äny, ni'ik ma të tyooytyaknën tii y'ëkwanëty.

⁶ Paaty ëjts maas nWintsën'atyën n'ëna'any: Jëtu'un ijxtëm yë tsatym kyepy yajjëënkupëkyën ets tyoyëty, jëtu'unës yë Jerusalén ja'ayëty njëënkupëka'antë ets nyitooytya'atëty.

⁷ Mëtsipës nänyikajpxa'anyë ma yë'ëjëtyën. Jyakukä'äktëp tu'kpëky ja jëën je'eyëp ko nän jëënjoty nëjkx kyukääkëtë. E koos ënety ëjts nänyikäjpxyë mëtsip ma yë'ëjëtyën jäänëm nëjkx xy'ixkaptës ko ëjts Wintsënajtp.

⁸ Aanë'ëk tëëtsë'ëk nëjkx yë nyaax kyajpn nyaj'awinpijtëtës mëët koos ënety të xykyamëj'ixtë. Ëjts, mëti'ipë Wintsën'ajtpën, ëjts ënaanp.