Ezequiel 14 - Biblia Dc en Mixe de Quetzaltepec

Ma yajni'ojën yë awinax

¹ Ojts may yë mëjja'aytyëjk xynyimintës ets Wintsën winë tyajtëwa'antë.

² Ënet yë Wintsën ojts xymyëkäjpxyës ets xy'ënëmaayës:

³ Ya'atë ja'ayëty yajxon yë jyot wyinma'any të timkyë'ëyaktë ma yi'iyë t'ëwtatën ka'apë tyiosëtyën ets yë'ë të tuk'ijxpätë mëti'ipë yajpokytyuunëtëpën. ¿Ets ënät y'ëna'antë mputëkëtëtyësë?

⁴ Oy xymyëmëtya'akëty ets xy'ënëëmëty: Jëtu'un yë Wintsën y'ënä'äny: Tu'kë'ëyë yë Israel ja'ayëty mëti'ipë näkyë'ëyajkëpën ma ka'apë tyiosëtyën ets yë'ë tyuk'ijxpejtyp mëti'ipë yajpokytyuunëtëpën ets ënät ok myinëty ets tyajtëwëty yë käjpxynyajxpë, nëjkxëp t'ëxajë yë ëtsoowinpijtën ijxtëm pyaat'atyën mëët ko ënety kanaak ja tios t'ëwtaty.

⁵ Ëjts ntuktëkëjäämpy yë jyot wyinma'any yë Israel ja'ayëty mëti'ipës të xy'ëxmatstën ko të tpanëjkxtëkëtë ka'apë tyiosëtyën.

⁶ Paaty mijts, jëtu'un xy'ënëëmëty yë Israel ja'ayëty: Jëtu'un yë Wintsën y'ënä'äny: Wimpitë ma ëjtsën, ëxmatstë mtiosëty ka'apë tyiosëtyën ets majtstu'utë ëxëëk tuunk ëxëëkkajpxk.

⁷ Ko tu'uk yë Israel ja'ay ëkë jaaypyaat jaaypyo'kxy mëti'ipë tsënääpyën ma Israel kajpnën xy'ëxmatsëtyës ets wiink tios tpanëjkxtëkëty ka'apë tyiosëtyën ets jam ja jyot wyinma'any tpëjkta'akëty ma t'ëwtatyën ja wiink tios ets yi'iyë tuk'ijxpätëty ja mëti'ipë yajpokytyuunëpën ets ok tninëjkxëty ja käjpxynyajxpë ets winë tyajtëwëty, ëjts kë'ëm nmo'ojäämpy ja ëtsoowinpijtën.

⁸ Tyamës mëët näy'ixëtëty tääpë ja'ay ets ntëytyunäämpyës yam mëti'ipë nëjkx ijxpät wyi'imyën, mëti'ipë nëjkx ja'ay tnimëtya'aktën etsës njo'otsa'any maas yë nnaax nkajpnën. Ets nëjkx miitsëty xynyijawëtë ko ëjts Wintsën.

⁹ E ko tu'uk yë käjpxynyajxpë tëkatsy winë tkajpxnaxëty, ëjts Wintsën, ëjts ënety të nwin'ëëny tääpë käjpxynyajxpë; nëjkxëpës nixajë'ëky ets ntëytyunyës ets njo'otsa'anyës maas yë nnaax nkajpnën, Israel kajpn.

¹⁰ Yë ja'ay mëti'ipë ënety winë ja käjpxynyajxpë yajtëëpyën ets ja käjpxynyajxpë nëjkxëp tkumëtowtë ja pyoky,

¹¹ këtiipë yë Israel kajpn jatëkok nijëna'a xy'ëkmëjëkämkäknëtyës ets këtiipë yë yajja'ay'o'kën t'ëktuunk'ajnëty. Yë'ëjës nkajpniwa'anäämpy etsës nëjkx xyTyios'atë. Ëjts Wintsën, ëjts ënaanp.

Yë Jerusalén kajpn patëp tkumëtowëty yë pyoky

¹² Ënet ojts ja Wintsën xymyëkäjpxyës ets xy'ënëmaayës:

¹³ Ko tu'uk yë naax kajpn xymyëtëkoyëtyës ets wintsë'kën tyajtëkoyëty ma ëjtsën, nixajë'ëkäämpyës ets ntëytyunäämpyës ko npëjkëtyës yë jyi'kxy pyiky; nkäxäämpyës yë yuu xëëw ma yë'ëjën ets y'ooktëty yë jëyujk ets ja'ay.

¹⁴ E ma tääpë kajpnën ko jeexyë jam y'ëkmintë Noé, Daniel ets Job, yi'iyë jeexyë nitëkëëk tsoktëp jä'ä ko mëtëy yë të jyuuky'atë. Ëjts Wintsën, ëjts ënaanp.

¹⁵ E koos nkäxëty yë jëyujk ëwa'anëtypë jam kajpntum ets tyaj'o'kta'atëty yë ja'ay mëti'ipë jam tsënaaytyëpën ets tyaj'awinpitëty ja naax kajpn kutsë'ëkë ets ka'ap jam pën y'ëknaxanëty mëët ko ënety jam ja jëyujk.

¹⁶ Pën tääpë ja'ayëty nitëkëëkpë yë'ë jam tsënaaytyëp, ka'ap jeexyë tjëkyepy yë myaank ëkë nyëëx tyajtso'oktë; yi'iyë jeexyë nitëkëëk tsoktëp ets ja naax kajpn anë'ëk tëëtsë'ëk y'awinpitëty. Ëjts Wintsën, njuukyajtënës yam mëët nikäjpxy.

¹⁷ E koos njaakyaj'itëty yë tsip ma tääpë kajpnën ets nyajkutukëtyës wä'än t'o'kta'atë yë ye'etyëjktëjkëty ets jëyujkëty,

¹⁸ e ko jeexyë tääpë nitëkëëkpë ja'ay jam y'ëkjuuky'atë, kajxyëp yë myäyëtë tyajtso'oktë yë myaank ëkë nyëëx; yi'iyë jeexyë nitëkëëk tsoktëp. Ëjts Wintsën, njuukyajtënës yam ntukajpxpejtyp.

¹⁹ E pën nkejxypyës yë yuu pa'am ma tääpë kajpnën ets ntukjoot'anpëkëtyës, nyaj'itëtyës yë o'kën tëko'oyën, nyajkutukëtyës ets y'ooktëty yë ye'etyëjktëjk ets jëyujkëty.

²⁰ Pën jam jyuuky'atë yë Noé, Daniel ets Job, kajxyëp yë myäyëtë tyajtso'oktë yë myaank ëkë nyëëx; yi'iyë jeexyë nitëkëëk tsoktëp, jä'ä ko mëtëy yë të jyuuky'atë. Ëjts Wintsën, njuukyajtënës yam mëët jëtu'un nikäjpxy.

²¹ Ëjts Wintsën, jëtu'unës n'ëna'any: Ni'ik o'ktëy nëjkx yë Jerusalén kajpn jyäty kyëpety koos ntuknikäxëty ja majktaxkpë ëyo'on: Tsip, yuu, jëyujk ets pa'am ets y'ooktëty ja ye'etyëjk to'oxytyëjk ets jëyujkpaat.

²² Niwäänë nëjkx wyë'ëmtë mëti'ipë y'u'unk y'ëna'k jyaak mëkä'äktëpën. Ko ënety jam nyëjkxtë ma miitsëtyën, ënät nëjkx xy'ixtë wi'ix ënety winë tuntë ets tiijaty ënety të tuntën ets jëtu'un nëjkx mjotkujkmo'ojëtë ma ënety ja ëyo'on jam Jerusalén të nyajkëtä'äkyënës.

²³ Jëtu'un nëjkx mjotkujkëtë ko xy'ixtëty wi'ix ënety winë të tuntën. Ënet nëjkx xyjyä'äkyukëtë ko mëtëyës winë ntuny ko yë Jerusalén yë ëyo'on të ntuknikexyës. Ëjts Wintsën, ëjts ënaanp.