Ezequiel 13 - Biblia Dc en Mixe de Quetzaltepec

Ma nyitukëtën ja käjpxynyajxpëtëjkëty ka'apë mëtëy tyuntën

¹ Ojts ja Wintsën xymyëkäjpxyës ets xy'ënëmaayës:

² Nikajpxëkës yë n'aaw n'ayuk ets xy'ënëëmëty yë käjpxnyajxpëtëjk mëti'ipë kyë'ëm winma'any kyajpxtëp myëtyaktëpën, jëtu'un xy'ënëëmëty: Mëtoow'itë yë Wintsën yë y'aaw y'ayuk:

³ Janty mon janty tuk yajpaatë yë käjpxynyajxpëtëjkëty mëti'ipë kyë'ëm winma'any nyikajpx nyimëtyaktëpën nitsuu nipoj ets ka'ap tii twinkëma'atë.

⁴ Mijts Israel, yë mkäjpxynyajxpëtëjk, jëtu'un yë'ëjëty tä maywyax muum yajpaatën ma naax kajpnën tëëpë xit ko'ow jyajta'ayën.

⁵ Nitii të tkatuntë ets Israel kajpn tkuwa'antëty ets jeexyë nyäkyuwa'anyë jä'ä xëëw ma ja Wintsën ja tsip tyaj'ita'anyën.

⁶ Mëti'ipë wyin'ijxtëpën ka'ap myëtëyëty ets mëti'ipë y'akajpxtëpën ka'ap jyääntyëty. Jëtu'un y'ëna'antë koos xynyikajpx xynyimëtyaktëp, ka'ap y'ëjtsëty nkäxtë. Y'ëwxijtëp ets y'atëwëty yë y'aaw y'ayukëty.

⁷ Ja wiinkëma'ay mëti'ipë miitsëty mëët'ajtëpën ka'ap tyiyajtënëty. Mëti'ipë m'akajxtëpën ka'ap myëtëyëty. Jëtu'un m'ëna'antë koos yë n'aaw n'ayuk mnikajpxëtëp, e ëjts ka'apës tii të nikäjpxy.

⁸ Paaty ëjts maas nWintsën'atyën jëtu'unës n'ëna'any: Miitsëty ko xynyikajpx xynyimëtya'aktë ka'apë tyiyëtyën ets mëti'ipë m'antijtëpën xy'ixtë ka'ap myëtëyëty, ëjts mëtsipës n'awinpity ma miitsëtyën. Ëjts Wintsën ëjts ënaanp.

⁹ Nkoxäämpyës yë käjpxynyajxpëtëjkëty mëti'ipë ka'ap tii mëtëy twinkëma'atën ets mëti'ipë win'ë'ëntëpën. Ka'ap tjëkyepy jam yajpaatëty ma tyu'ukmuktën yë Israel ja'ayëty; ka'ap nëjkx yë xyëëw yajkëxja'atë ma myintën këxja'ay yë Israel ja'ay yë xyëëwëty ets ka'ap nëjkx tyëkëtë ma Israel ja'ay nyaaxjotëtyën. Ënet nëjkx xy'ijxpaatës ko ëjts Wintsënajtp.

¹⁰ Yë'ëjëty tëë twin'ëëntë yë nnaax nkajpnës, ko y'ëna'antë ko oy winë tyu'uye'ey ma naax kajpnën ets ka'ap jyëtu'unëty. Jëtu'un të y'ëtë'ëtstë tä ja'ay tu'uk yë potsy tyaj'oyën oywyi'ix ets jaam tuknikoy.

¹¹ Ënëëmëtë tääpë ja'ayëty mëti'ipë potsy poop nyikooytyëpën, ko këtawaanp tääpë potsy. Minaanp yë nëë tuu ets tëtsn tuu mëti'ipë tsaajën këxë'ëkaanpën ets mëkpoj tuupoj myina'any,

¹² ets kyëtawa'any yë potsy. Ënet nëjkx tyajtëwtë: ¿Tiixë ja jaam të jyätyë mëti'ipë tyuknikooytyën?

¹³ Paaty ëjts maas nWintsën'atyën n'ëna'any: Koos ënety njoot'anpëky nyajminäämpyës yë mëktuupoj ets koos ënety ja ntsip n'äkë myëjë nyajtëtsntu'ujäämpyës jëtu'un tä jeexyë tsyaatu'uyën etsës winë nyajkutëkoyä'äny mëët ja tsip äkë.

¹⁴ Ets njitë'ëka'anyës tääpë yë potsy mëti'ipë të xyjyaamnikoytyën; jëtu'unyës naaxkëjxy nyajijtkëta'aka'any ets nëjkx ja y'ëjx nyijijtu'uty. Jëtu'un, jijtë'ëkaanp tääpë yë potsy ets nëjkx mnijijtpätëtë. Ënet nëjkx xy'ijxpaatë ko ëjts Wintsën.

¹⁵ Nyajnaxäämpyës yë ntsip n'äkë ma tääpë potsyën ets ma ja'ayëtyën mëti'ipë poop të tnikoytyën ets nëjkx yë ja'ay y'ëna'antë: Nitii të kyawë'ëmy ma potsyën ets ni yë'ëpaat të kyawë'ëmtë yë ja'ay mëti'ipë ojts poop tnikoytyën,

¹⁶ tääpë käjpxynyajxpëtëjkëty mëti'ipë ijty tëkatsy winë nyikajpxtëpën ma Israel ja'ayëtyën ets ma Jerusalén ja'ayëtyën ets ijty y'ëna'antë ko oy yë naax kajpn yajpaaty ets ka'ap jyëtu'unëty. Ëjts Wintsën, ëjts ënaanp.

Ma ja Wintsën tyajnitukën ja to'oxytyëjktëjk mëti'ipë käjpxynyajxtëpën

¹⁷ Mijts ye'etyëjk, tyam yë'ë mëkajpx yë to'oxytyëjktëjkëty mëti'ipë käjpxynyajxtëpën ets nikajpxtë ko yë'ë n'aaw n'ayukës nyikajpxëtëp kë'ëmwinma'any,

¹⁸ ets xy'ënëëmëty: Jëtu'un yë Wintsën y'ënä'äny: Janty mon janty tuk miitsëty myajpaatë ko ja'ay xytsyuu'ixtë; ko mxuuytyëp yë kë'ëjän ets m'ëna'antë ko myëët'ajtyp yë mëj'ajtën ets ja'ay yë'ë nyätyukë'ëjänëtëty ets näjyëtu'un xyuytyë yë mots ets m'ëna'antë ko myëët'ajtyp yë mëj'ajtën ets to'oxytyëjkëty yë'ë nyätyukuyä'äpëtëty. ¿Jëtu'un jëtää maytyë mtajtë? ko mayëtëp ets xy'ëtuktëty yë o'kën ëkë juukyajtën jëtu'un tä mjot mwinma'anyëtyën, maas yë nnaax nkajpnën.

¹⁹ Miitsëty, yë'ë mnätyukwin'ë'ënëtëp tu'knuukpyë tsajpmok, ëkë tu'ukpë mäjtskpë tsajpkääky, etsës xynyëxi'ik xytyukxi'iktë maas ja nnaax nkajpnën; xyaj'ook xyajtëkoytyë yë ja'ay ka'apë jeexyë y'ookyën; xyajwë'ëmtë juuky ka'apë nyitëkëtyën jyuuky'atëty. Jëtu'un yë nnaax nkajpnës xywyin'ëëntë, ko tmëpëky ja win'ë'ënën antakën.

²⁰ Paaty ëjts maas nWintsën'atyën n'ëna'any: Mëtsipës yam näpyëjktä'äkyë ma tääpë kë'ëjänën mëti'ipë mnikajpxtëpën ko tmëët'aty yë mëk'ajtën, kë'ëmpë të xyajkojtën; mëti'ipë ja'ay mtukmajtsëpën tä joon yajmatsyën. Nyajtsoonantëp yam miitsëty ma tääpë ja'ayëtyën mëti'ipë je'eyë win'ë'ëntëpën ets jotkujk mjuuky'atëty;

²¹ nyajpëtsëmäämpyës yë nnaax nkajpnës ma miitsëty o'ktëy xytyuntën ets ma të yajtukwin'ëëntën yë kumots mëti'ipë të nyätyukuyä'äpëtën, këtiipë jatëkok yajwin'ëëntëty. Ënet nëjkx xynyijawëtë ko ëjts Wintsën.

²² Miitsëty, tëë xy'ëtsë'ëkëtë yë oyjyä'äytyëjkëty, mëti'ipës ënety ëjts ka'ap ntuna'anyën, ni'ikyë të xyjyotmëkmo'otë yë ëxëëkja'aytyëjk ets ëxëëkpë tuntëty ets jëtu'un ka'ap yë juukyajtën nmo'otëtyës.

²³ Paaty miitsëty ka'ap tii xy'ëkwin'ijxnëtëty ka'apë myëtëyëtyën ets ka'ap m'ëk win'ë'ënëtëty ma tii xykyajpxnaxtën. Ëjts nyajtso'okäänpyës yë nkajpnës ma miitsëty o'ktëy xytyuntën ets jëtu'un nëjkx xynyijawëtë ko ëjts Wintsën.