Ezequiel 12 - Biblia Dc en Mixe de Quetzaltepec

Ma ja Ezequiel tnikäjpxyën ko yaj'ixkäxa'antë yë Israel ja'ayëty kyajpnjoty

¹ Tä ja Wintsën ojts xymyëkäjpxyës ets xy'ënëmaayës:

² Mijts ye'etyëjk, jap mjuuky'äty ma naax kajpnën mëti'ipë je'eyë käjpxy kyumëtoownajxpën. Myëët'ajtëp yë wyiinëty mëti'ipë tyuk'ixtëpën je'eyëp ko ka'ap y'ixtë; myëët'ajtëp yë tyatskëty mëti'ipë tyukmëtoowtëpën je'eyëp ko ka'ap myëtowtë, jä'ä ko tääpë naax kajpn käjpxy kumëtoownajxpë yë'ë.

³ Paaty nänyipëjktaakët ets mtsoonëty tsumy matsy, xëëny mtsoonëty ma mjëën mtëjkën, ijxnë kä'äxnë ets mnëjkxëty wiink naax wiink kajpn; wä'änxyëp tja'akyukëtëty ko tääpë kajpn je'eyë kyäjpxykyumëtoownaxtë.

⁴ Xëëny ets ijxnë kä'äxnë jap xyajpëtsëmëty winë ma mjëën mtëjkën jëtu'un tä ja'ay tsumy matsy yajmënëjkxa'anyën wiink naax wiink kajpn; näjyëtu'un ënät jënäkyxyëëw mtsoonëty tä yajmënëjkxyën yë ja'ay tsumy matsy wiink naax wiink kajpn.

⁵ Ok xyajjutëty yë potsy, ijxnë kä'äxnë ets jap myatsëty mëët winëjaty mëti'ipë mpapëjkpyën.

⁶ E ko ënety të tsyu'ujënë, tääts mnätyukejkyjyëpipëtëty mëti'ipë mëtsoonäämpyën, ijxnë kä'äxnë mtsoonëty. Këtii mwiin mjëjp xyajkëxë'ëkëty jëtu'un ka'ap ja naax kajpn xy'ixëty. Ntsojkpyës ets mijts ijxpäjtën mwa'anëty mëti'ipë nyikäjpxypën ja ëyo'on jotmay mëti'ipë miimp këtakpën ma ja Israel kajpnën.

⁷ Ënet ni''ijxëyës ja ntsëmy nkë'ëyës mëti'ipës nmëtsonäämpyën jëtu'un tä ënety ja Wintsën të xytyuk'ëne'emyënës ets ntso'onyës; xëënyës ntso'ony ijxnë kä'äxnë, tamës ja ntsëmy mpatsëmy jëtu'un tä ja'ay muum nyijxyën tsumy matsy wiink naax wiink kajpn. Ko jyënäkyxyëëwajty ojtsës yë potsy nyajjuty mëti'ipë naax kajpn nyapots'ajtypyën ets ko kyootsëy täätsës ja ntsëmy nätyukejkyjyëpipëy tam ja ja'ay t'ixtë ets ojts jam nyetyës ma ënety ja potsy të nyajjutyësën.

⁸ Komjëpom, ojts yë Wintsën xymyëkäjpxyës ets xy'ënëmaayës:

⁹ Kopkpëky ko tääpë Israel ja'ayëty, kajpn je'eyëpë kyäjpxykyumëtoownaxyën myajtëwëtë tiitën mtuumpy.

¹⁰ E jëtu'un xy'ënëëmëty ko ya'atë aaw ayuk yë'ë yajtuknikäjxp yë Jerusalén yajkutujkpë ets tëkokyë yë Israel ja'ayëty jënu'un jam tsyëënëtën.

¹¹ Ënëëmë ko mijts ijxpäjtën jëtu'un myäjkpy ma yë'ëjëtyën ets yë'ëjëty kopkpëky ko jëtu'un tuna'antë winë tä mijts të xytyunyën, jä'ä ko yë'ëjëty yajmënëjkxantëp tsumy matsy wiink naax wiink kajpn.

¹² Ja ja'ay mëti'ipë yaj'ënä'ämtëpën kopkpëky ko nëjkx nyätyukejkyjyëpipëty yë tyim kyi'iy ets koots tsu'um nëjkx jam nyäxy potsyjutjoty ma ënety jam ja ja'ay të t'atajtu'utën. Winkupä'änë nëjkx tsyoony këtiipë pën y'ixëtëty ets näjyëtu'un yë'ë këtiipë ja naax kajpn t'ixëty.

¹³ Ntukujëpijpë'ëkäämpyës yë ntsaayës ets yë'ë mëët nmatsa'anyës. Jam Babilonyë nyajnëjkxa'anyës, ma Caldeo ja'ayëtyën, ja naax kajpn mëti'ipë ka'ap nëjkx t'ixyën ets jam nëjkx y'ooky.

¹⁴ Taxkpëky nëjkx jëtu'unyë nyajkääkwä'kxyës ja këwent'ajtpëtëjkëty mëti'ipë ënety kuwanëpën ets näjyëtu'un nëjkx jyatë wiinkëtypë tsyiptuunpëtëjk, mëët yë tëypyujxn nkë'ëkëjxmës n'ixjëtita'an mpajëtita'antës.

¹⁵ Ko ënety të nyajkääkwa'kxtës wiink naax wiink kajpn ets wiink naaxwiinyëtë, jää nëjkx xy'ijxpaatës ko ëjts Wintsën.

¹⁶ Nëjkxëpës tu'uk mäjtsk nyajke'eky tsipjoty, yuujoty, pa'amjoty ets tnimëtya'aktëty ma ja naax kajpnën ma ënety yajpaatën wi'ix ëxëëk o'ktëy të y'ëtë'ëtstë y'ëna'antën ets nijawëtëty ko ëjts Wintsën.

Ma jemy yajnikäjpxyën ko ja ëyo'on y'ita'any

¹⁷ Ënet ja Wintsën ojts xymyëkäjpxyës ets xy'ënëmaayës:

¹⁸ Mijts ye'etyëjk, tsë'ëkë mëët mkayëty ets mon tuk mnëë uukëty.

¹⁹ Ets xy'ënëëmëty yë naaxtsënääpyë kajpn tsënääpyëty mëti'ipë yajpatëpën ma Jerusalén naaxwiinyëtën: Ya'atë yë Wintsën të tkäjpxy: Mon tuk nëjkx mkaytyë m'uuktë ets tsë'ëkë tsë'ëkë nëjkx mnëë uuktë; kutëkoyaanp yë naax kajpn ets tukwa'ats wyë'ëma'any, mëët ko je'eyë ja ja'ay tsyiptun tyipkajpxtë.

²⁰ Tu'kë'ëyë kyutëkooytya'aja'any yë naax kajpn maajaty yë ja'ay tsyëënën; aanë'ëk tëëtsë'ëk y'awinpita'any. Ënet nëjkx miitsëty xy'ixkaptës ko ëjts Wintsën.

²¹ Ojts ja Wintsën xymyëkäjpxyës ets xy'ënëmaayës.

²² ¿Tiitën yë Israel ja'ayëty jyatijantëp ko y'ëna'antë: Ix jënu'un yë xëëw jëmëjt të nyajxnë, mëti'ipë ja käjpxynyajxpëtëjk të tja''akajpxtën ka'ap nyäky tyuny nyäkjyätyë?

²³ E jëtu'unts xy'ënëëmëty: Tëë yë Wintsën y'ënä'äny: Ëjts tëëjës ntuknipëjktaakë ets ka'ap jëtu'un pën y'ëk'ënanëty jam ma Israel kajpnën. Näyjyëtu'un xy'ënëëmëty ko tëë timpyääty ja xëëw jëmëjt ma tyuna'any jyata'anyën tä ja käjpxynyajxpëtëjkëty të tnikajpxtën.

²⁴ Ka'ap tii y'ëkyajwin'ixanë ma Israel kajpnën ka'apë myëtëyëtyën ets käjpxynyajxën ka'apë jyääntyëtyën.

²⁵ Jä'ä ko ëjts Wintsën, kajpxaanpës yam ets ja mëti'ipës nikajpxäämpyën atëwaanp tsojk. Kajpn je'eyëpë kyäjpxykyumëtoownaxyën, nëjkxëp kë'ëm xy'ixtë; koos ënety nkäjpxy koonëm nëjkx y'atëy. Ëjts Wintsën, ëjts ënaanp.

²⁶ Ojts yë Wintsën xymyëkäjpxyës ets xy'ënëmaayës:

²⁷ Jëtu'un yë Israel ja'ayëty y'ëna'antë ko ja mwinkuma'ay mëti'ipë mnikäjpxypën jä'ä mëti'ipë jäänëm jëna'a atëwaanpën.

²⁸ Paaty mijts, jëtu'un xy'ënëëmëty. Ya'atë yë Wintsën të tkäjpxy: Yë n'aaw n'ayukës ka'ap pyo'oxa'any ets y'atëwëty; mëti'ipës të nikäjpxyën kopkpëky ko tyuna'any jyata'anyë. Ëjts Wintsën, ëjts ënaanp.