Ezequiel 11 - Biblia Dc en Mixe de Quetzaltepec

Ma ja Jerusalén kajpn yajtëytyuna'anyën.

¹ Ënet ja Dios ja myëk'ajtën ojts xyajpëtë'ëkyës etsës ojts wyoownëjkxy jam ma yajnitëkën yë Wintsën yë tsyajptëjk. Jam ma tëjk'aawën i'px mëkoxk jam yë ja'ay tyänëtë. Yë'ëjës ojts n'ixkäpy yë Jaazanías, yë Azur yë myaank ets Pelatías, yë Benaías yë myaank, mëti'ipë mëj'äämpy ijtpën ma naax kajpnën.

² Jëtu'unës yë Wintsën xy'ënëmaay: Yë'ë jëtu'un tääpë ja'ayëty nyipëjktakëtyëp ets nyima'ay nyitajëtyëp wi'ix yajja'ay'ooktëtyën ets wi'ix yë jyiiky myëku'uk tyuuntëkoytyëtyën ma ja naax kajpnën.

³ Jëtu'un y'ëna'antë: Naamnëm yë tëjk n'akojëmë, yaa ka'ap wi'ix njajtmëty, jëtu'un yaa nyajpaata'anëmë tä tsu'utsy tu'tsjoty y'ityën.

⁴ Paatykyëjxm mijts, nëjkx mëmëtya'aktë ëjts nxëëwkyëjxmës.

⁵ Yë Wintsën yë jya'awën myëk'ajtën të xytyukja'tyës etsës të xytyuk'ëne'emy ets miitsëty min nmëmëtya'aktë: Jëtu'un yë Wintsën y'ënä'äny: Ëjts wa'atsës nijawë mjot mwinma'anyëty ets nija'apës wi'ix mmaytyën mtajtën.

⁶ Miitsëty tëë may myajja'ay ooktë ma naax kajpnën, tëë xyaj'ujtsta'atë në'ë tu'u mëët yë o'kpë.

⁷ Paaty ëjts maas nWintsën'atyën, jëtu'un yam miits n'ënëëmëtë; ko yë Jerusalén jëtu'un yajpëjkta'aka'any tä tu'tsën ets jap tu'tsjoty yë'ë jap mpëjkta'akäämpyës yë o'kpë mëti'ipë miits të xyaj'ooktën; e miitsëty njuutantëp jap tu'tsjoty.

⁸ ¿Mtsë'këtyëp yë tsipë? Oy, tyamës yë tsip nyajmina'any ma miitsëtyën. Ëjts Wintsën, ëjts ënaanp.

⁹ Tyam miitsëty nnitëkëja'antë: nyajpëtsëmantëp yaa ets nkë'ëyaka'antë ma ja'ayëtyën mëti'ipë wiink naaxwiinyëtë tso'ontëpën.

¹⁰ Nëjkxëp kupuxy m'ooktë. Mpaye'eyäämpyës yë mnëë mpokyëty mapaat yë Israel naaxwiinyëtë jyëjpkëxyën ets xy'ixkaptëty ko ëjts Wintsën.

¹¹ Yë naax kajpn ka'ap tjëkyepy xywya'antëty tu'tsën ets ka'ap nëjkx myiitsëty mtsu'utsy'atë. Miitsëty jam nëjkx mpoky mpaye'eyës ma Israel naaxwiinyëtë jyëjpkëxyën,

¹² ets nëjkx xynyijawëtë ko ëjts Wintsën. Miitsëty ka'ap jëtu'un të mjuuky'atë tääjës të ni'ënä'ämën ets ka'ap të xypyatuntë yë ntëyajtënës, miitsëty jëtu'un winë të xytyuntë tä ja'ayëtyën mëti'ipë wiink naax wiink kajpnëtyën.

¹³ Tamës ënety ja Dios ja y'aaw y'ayuk nimëtyakë, ko ojts yë Pelatías jyëpijpkëtä'äky ooky, yë Benaías yë myaank. Ënätës nwintäky nnaaxkooy etsës mëk nyujkyäxy, n'ënanyës: Wintsën, ¿tyam jyaniwäänë'ajtpë yë Israel ja'ayëty ets ni'ikyë xyjyaak timy yajkutëkoyä'änyë?

Ma ja Tios tnikäjpxyën ja jemypyë käjpxytyu'unën

¹⁴ Ënet yë Dios ojts xymyëkäjpxyës etsës xy'ënëmaay:

¹⁵ Yë Israel ja'ayëty mëti'ipë jam Jerusalén tsënaaytyëpën, mijts yë mëku'uk jëtu'un y'ëna'antë: Yë'ëjëty myëjëkäm'ajtëp yë Wintsën. E ëëtsajtëm tëë yë naax kajpn xymyo'oyëm ets njä'ä'ajtmëty.

¹⁶ Paaty ënëëmëtë: Ko jëtu'un yë Dios y'ënä'äny: Ëjts ojts miitsëty nyajnëjkxtë wiink naax wiink kajpn tsumy matsy, ma ja kajpnën mëti'ipë ka'ap xy'ixy'atën, je'eyëp ko wäänë. E nän ëjts jatëkok jam xy'ëwtatëp ma të nyëjkxtën.

¹⁷ Näyjyëtu'un ënëëmë: Jëtu'un yë Wintsën y'ënä'äny: Ëjts jatëkok nyajtsoonäämpy ma tääpë naax kajpnëtyën ma yajpaatën tsumy matsy, nyajtu'ukmukäämpyës jatëkok etsës nmo'oja'antë ja Israel naaxwiinyëtë.

¹⁸ Yë'ëjëty winpitantëp jatëkok ma ja nyaax kyajpnëtyën ets tyajkutëkooytya'aja'antë tëkokyë ja ëxëëk tu'unën ëxëëk kajpxën ets ja awinax mëti'ipë ëxëëk yaj'ijxpën ma tääpë kajpnën.

¹⁹ Njëpëkäämpyës yë jyot wyinma'anyëty, jëtu'unpë tä tsaajën ets nmo'oja'antës ja jyuukyjotëty mëët ja jemypyë ja jot winma'any.

²⁰ Ënet nëjkx jyuuky'atë jëtu'un tääjës ja n'ënä'ämën ntëyajtën myinyën ets nëjkx tpatuntë. Nëjkxëpës nkajpn niwa'antë etsës nëjkx xyTyios'atë.

²¹ E mëti'ipë ënety juuky'ajtëpën ëxëëk ets yi'iyë tyuuntëp kyajpxtëp mëti'ipë yaj'ëxëëk'ijxpën ets ka'apë yaj'oyjyawën, ntukumëtowantëpës ja tyu'unënëty kyajpxënëty. Ëjts Wintsën, ëjts ënaanp.

Ma ja Wintsën ja myëj'ajt y'oyajtën tmëjëkämke'ekyën ja Jerusalén kajpn

²² Ënet ja tsajpjotmëtë kukäjpxy kyääkë'ktë ets pyapëtë'këtë ja tëkäämpë. Ja Israel Wintsën ja myëj'ajt y'oyajtën ojts jam nyäpyëjktä'äkyë këjxm,

²³ ets ja mëj'ajtën oyajtën pyëti'ky ets tmëjëkämkeky ja naax kajpn; jam ojts nyijkxy ma ja kopkën xëëwpëtsëmtsyowpë.

²⁴ Ënet ja Dios ja myëk'ajtën ojts xyajpëtë'ëkyës, etsës xyajwinpijty jam Babilonyë, ma yajpaatën ja wiinkëtypë ja Israel ja'ayëty tsumy matsy. Ya'atë nwin'ijxës ko ja Wintsën ja jyot jya'awën xytyuktëjkëyës. Ok, ka'apës ojts tii n'ëkwin'ijxnë.

²⁵ Ënätës ntukmëmëtyaktë ja ja'ayëty mëti'ipë ënety yajpatëpën tsumy matsy wiink naax wiink kajpn tëkokyë mëti'ipës ënety ja Dios të xytyuk'ixyën.