Ezequiel 10 - Biblia Dc en Mixe de Quetzaltepec

Ma jyëwä'äkyën ja Tios ja myëj'ajt y'oyajtën jam ma tsajptëjkën

¹ Ënätës të n'ixy jam niwits nijuux nëkëjxm mëti'ipë yajpatpën ma ja kyëpajkëtyën ja tsajpjotmëtë kukäjpxy, tu'uk yë kutujkëntakn aak tsuxk uky tsyaa mëët y'oytyunyëty.

² Ets ja Wintsën t'ënëmaay ja ja'ay linë wit mëëtpë: Tëkë jap ma kepy wintëkäämpë ye'eypyäjnën, mëti'ipë tyuktënaaytyëpën yë tsajpjotmëtë kukäjpxy ets xynyu'kpëtsëmëty yë jëënpajk mëti'ipë itkujky yajpatpën ma tsajpjotmëtë kukexyën ets xywëjtëwëty jam kajpnjotm.

³ Yë tsajpjotmëtë kukäjpxy jam ënety yajpaatë ëpa'tkë'ëmtsow ma tsajptëjkën ets tu'uk ja yoots të tyaj'ujtsta'ay ja tsajptëjk tëja'aw.

⁴ Ënet ja Wintsën ja myëj'ajt y'oyajtën të pyëti'iky ma yajpaatën ja tsajpjotmëtë kukäjpxy ets të nyijkxy ma ja tsajptëjk yajnitëkën; ënät ja tsajptëjk të tyuktuky mëët ja yoots ets të jyajtä'äky jap tsajptëjk ëkë'p ja Wintsën ja myëj'ajt y'oyajtën.

⁵ Ko ja tsajpjotmëtë kukexy ja kyäkn tyaj'ëna'antë yajmëtoop jappaat tsajptëjk ëkë'p, mëti'ipë tëja'ptsowën. Jëtu'un yajmëtoy tä jeexyë ja Dios kyäjpxyën mëti'ipë maaytyääyëpën winë.

⁶ Ënet ja Dios t'ënëmaay ja ja'ay mëti'ipë linë wit wyit'ajtypyën ets tpëjkë'ëkëty yë jëën ma ja kepy wintëkäämpë ja ye'eypyäjnën, mëti'ipë itkujky yajpatpë ma ja tsajpjotmëtë kukexyën. Ënet ja ja'ay ojts nyijkxy ets wya'ak'o'oyëy jam winkon ma ja tëkäämpën.

^7-8 Ma ja kyäknpa'tkëtyën ja tsajpjotmëtë kukëxy jëtu'un jap yaj'ixy kyë'ë txajpëtsëmtë tä ja'ay kyë'ëjën. Tu'uk ja kyë'ë jam të tnajtstijë ma ja jëënën itkujkpyë tyoyën ets të tpëjkë'ëky tu'knuuky ja jëën tääts të tmo'oy ja ja'ay mëti'ipë linë wit wyit'ajtypyën, ënät ja ja'ay të t'ëxajë ets të nyijkxy.

⁹ Ma ja tsajpjotmëtë kukexyëtyën taxkës të n'ixy yë tëkäämpë, wiinkonjaty yajpaatë ma yë'ëjëtyën, këëktu'uk twintänëtë. Ja tëkäämpë jëtu'un tyi'kxy tä pu'ts tsaajën.

¹⁰ Ja taxkpë ja tëkäämpë tu'knax yaj'ixtë ets jëtu'un kyëxë'ëktë ajäänmuky yowë.

¹¹ Ko ja tsajpjotmëtë kukäjpxy ye'eytsyoontë ets nyëjkxtë ma tu'uk ja tu'ujën mëti'ipë taxk atu'um yajpatpën, tu'ukyë nyëjkxta'atë ets ka'ap tniwinpitë ja tyu'ujëty, jä'ä pyanëjkxtëp ja mëti'ipë jëyëjp'ajtpën.

¹² Aak të'kxp yaj'ixy ja nyini'kxëty, ja jyëxkëty, kyë'ëjëty ets ma kyäknëtyën, näjyëtu'un ja taxkpë ja tëkäämpë.

¹³ Etsës të nmëtoy ko ja tëkäämpë yajtijtëp näjyëtu'un: Wintëkäämpë.

¹⁴ Tu'ukjatypë ja tsajpjotmëtë kukäjpxy taxkpëky tmëëtëty ja wyiin jyëjp: Tu'uk ja wyiin jyëjp jëtu'un kyëxë'ëky tsajpkaajën; tu'uk jëtu'un kyëxë'ëky ye'etyëjkën; tu'uk tä kaajën ets tu'uk tä witsnën.

¹⁵ Näy yë'ë ya'atë tsajpjotmëtë kukäjpxy ojts n'ixyës ma ja Quebar mëjnëëjën. Ja tsajpjotmëtë kukäjpxy ojts pyëtë'ëktë,

¹⁶ ko ye'eytsyoontë, näjyëtu'un tsyoontë ja tëkäämpë; ko ja kyäkn tyujkxajtë ets pya'atwa'atstë ja tëkäämpë ka'ap myajtstu'utëtë;

¹⁷ ko wya'akwë'ëmtë, näjyëtu'un ja tëkäämpë wya'akwë'ëmtë; ko pya'atwa'atstë, näjyëtu'un ja tëkäämpë pya'atwa'atstë, jä'ä ko ja tëkäämpë yë'ë mëët tu'ukyë ja tsajpjotmëtë kukäjpxy jyuuky'atë.

¹⁸ Ënet ja Wintsën ja myëj'ajt y'oyajtën të pyëti'iky ma ja tsajptëjkën ets të nyäpyëjktä'äkyë ma ja tsajpjotmëtë kukexyëtyën.

¹⁹ Ënet ja tsajpjotmëtë kukäjpxy të kyääkë'ëktë. Tëës n'ixy wi'ix të tmëkääkë'ëktën ja tëkäämpë pyë'aay ets wi'ix jam të nyaaxkëta'aktën ma ja tëjk'aawën mëti'ipë xëëwpëtsëmy wë'ëmpën. Jam kyëpajk këjxm jam ja Dios ja myëj'ajt y'oyajtën yaj'ixy.

²⁰ Näy jä'ä ja tsajpjotmëtë kukäjpxy, mëti'ipës ënety të n'ëk ijxpën y'ënä'ämëtë ja Israel Wintsën, jam Quebar mëjnëë ëkë'ëm. Ënätës yajxon të n'ijxwa'atsy ko jä'ätëm ja tsajpjotmëtë kukäjpxy.

²¹ Nitu'ukjaty taxkjaty ja wyiin jyëjpëty ets taxkjaty ja kyäknëty ets ma ja kyäknpa'tkëtyën jap yaj'ixy ja'aykyë'ë xyajpëtsëmy.

²² Ja wyiin jyëjpëty näjyëtu'un yaj'ixtë tä tsajpjotmëtë kukexyën mëti'ipës ënety të n'ëk ijxpën jam Quebar mëjnëë ëkë'ëm. Aak wintuuytsyow ye'eytyë.