Ezequiel 1 - Biblia Dc en Mixe de Quetzaltepec

Ma ja Tios ja kyutujktakn yajwin'ixyën

^1-3 Ëjts, yë teety Ezequiel, yë Buzí myaank; tëkok ojts nwin'ixyës, jamës näjyawëty ntänë ma Quebar mëjnëëjën, jam Babilonyë; ma ënety yajpaatën ja ja'ayëty mëti'ipë tsumy matsy të yajmënëjkxtën. Ënet ja tsajp y'ëwatsy ets nwin'ijxyës yë Dios. Jää ma myëmëkoxk anyën yë mëmajktaxk po'opë, ma y'apetyën ja më'i'px majk jëmëjtpë, tëë ënety mëkoxk jëmëjt nyajxnë ma ja Joaquín yajkutujkpë yajmënëjkxyën tsumy matsy. Ënet ja Wintsën ojts xykyë'ë nnixajyës.

⁴ Ënätës të n'ixy ko jam anëkëjxmtsow të tsyoony yë tuupoj, jap mëj yootsjoty pyëtsimy jëënën, jëtu'un y'atë'kxy wëtsukën ets na'ëwtityë mëk tyi'kxy. E jam jëënjotm jëtu'un yaj'ixy y'atë'kxy tsuxkpujxnën,

⁵ e itkujky nimajktaxk yë tsajpjotmëtë kukäjpxy yaj'ixy, ja'ayën kyëxë'ëktë.

⁶ Tu'ukjaty, taxk yaj'ixtë kyëpajk ets taxk yë kyäkn;

⁷ tëyë tyeky yaj'ixtë, jëtu'un yë tyekxyookyëty tä tsajpkaajën ets jëtu'un y'atë'kxy tä tsuxkpujxnën tëëpë yajnime'eyën.

^8-9 Ëpëky ja taxkpë ja kyëpajkëty ets ja taxkpë ja kyäknëty; ya'atë tsajpjotmëtë kukäjpxy jëtu'un yë kyë'ëjëty y'ixë'atë tä ja'ay kyë'ëjën; pë'aaytsyow tmëët'atë taxk atu'um, ma kyäknpa'tkëtyën. Aak näpyatëtëp ja kyäknëty. Ko ye'eytsyoontë ka'ap y'ëkwinpijnëtë, tu'ukyë tyu'u tkuuynyëjkxtë.

¹⁰ Ja taxk pa'apë ja wyiin jyëjp; tu'kpa'a jëtu'un yaj'ixy ja'ayën; ja a'oytsyowpë jëtu'un yaj'ixy kaajën; ja anajnytsyowpë jëtu'un yaj'ixy tsajpkaajën ets ja jëxkë'ptsowpë jëtu'un yaj'ixy witsnën.

¹¹ Anëkëjxytsyow ja kyäkn yujkxajy. Mäjtsk nyäpyäätyë ets mäjtsk ja nyini'kx tuknikë'ëtë.

¹² Aak wintuuytsyow ye'eytyë ets ka'ap wyimpitë. Yë'ë pyanëjkxtëp ja tu'u mëti'ipë ja Wintsën tukpaye'eyëtëpën.

¹³ Ya'atë tsajpjotmëtë kukäjpxy jëtu'un yaj'ixtë tä jëënpajkën, ëkë tä jëënyä'änkën mëti'ipë jam najxtëp tëjkëtyëp; ja jëën jä'ä të'kxp jajp ets jap jëënjoty wëtsukën jap pyëtsimy.

¹⁴ Ja tsajpjotmëtë kukäjpxy pe'tym nyaxtë tyëkëtë, jëtu'un tä wyëtsukyën.

¹⁵ Ënätës të n'ixy tääpë tsajpjotmëtë kukäjpxy, naaxkëjxy ma tyänëtën aak tamtëm pya'akëëynyëtë tëkäämpë.

¹⁶ Tu'knax ja tëkäämpë taxkëty ets tu'knax y'oytyunyëty, jëtu'un y'atë'kxy tä pu'ts tsaajën. Ets jëtu'un yaj'ixy jap yowë wiinkpë tëkäämpë, tëkäämpëjoty.

¹⁷ Jyëkyejpy oy maatsow tyimnëjkxa'antëty, ka'ap kopkpëky ja tyu'u tniwinpitë.

¹⁸ Etsës të n'ixy ko ja taxkpë ja tëkäämpë tam tmëëtëty ëpëky yë nyijän, ujts yaj'ixy mëët yë të'kxën jajën na'ëwtity.

¹⁹ Ko ja tsajpjotmëtë kukäjpxy muum nyëjkxtë, ënätyë näjyëtu'un ja tëkäämpë nyëjkxtë mëët yë'ëjëty ets ko ja tsajpjotmëtë kukäjpxy pyëtë'ëktë ënätyë näjyëtu'un ja tëkäämpë pyëtë'ëktë.

²⁰ Yë tsajpjotmëtë kukäjpxy jam nyëjkxtë ma ja Dios tyuk'ënä'ämëtën ets ja tëkäämpë nän mëët nyëjkxtë, jä'ä ko ja tëkäämpë yë'ë mëët tu'ukyë ja tsajpjotmëtë kukäjpxy jyuuky'atë.

²¹ Ko ja tsajpjotmëtë kukäjpxy yu'kxtë näjyëtu'un ja tëkäämpë yu'kxtë, ko yu'kxmontë ja tsajpjotmëtë kukäjpxy näjyëtu'un ja tëkäämpë yu'kxmontë; ko ja tsajpjotmëtë kukäjpxy pyëtë'ëktë näjyëtu'un ja tëkäämpë pyëtë'ëktë jä'ä ko ja tëkäämpë yë'ë mëët tu'ukyë yajpaatë ja tsajpjotmëtë kukäjpxy.

²² Jam këjxm ma kyëpajkëtyën jëtu'un yaj'ixy nyiwits nyijuux y'atë'kxy y'ajajy tä kiikën.

²³ Ma ja niwits nijuux ja pya'tkën jëtu'un ja tsajpjotmëtë kukäjpxy ja kyäkn tkëëytyëwtë ets t'akëëymyuktë. Amäjtsk ja kyäkn nyätyuknikë'ëjëtë.

²⁴ Ojtsës näjyëtu'un nmëtoy wi'ix ja kyäkn y'ëna'antë ko kyääkjëtitë: jëtu'un yajmëtoy tä mëjnëë y'iitsyën ko kyomy, tä kyäjpxyën mëti'ipë maaytyääyëpën winë, tä tsiptuunpëtëjk wya'kta'aktën. Ko wya'ak'oyëtë tääts ja kyäkn tkëëymyuktë.

²⁵ E tu'uk ja mëto'owën të tsyoony jam ma niwits nijuuxën mëti'ipë yajpatpën jam këjxm.

²⁶ Jam niwits nijuux nëkëjxy jëtu'unës të n'ixy jam yowë yë po'kxtakn ma yajkutujktaknën, yë'ë mëët y'oytyunyëty yë tsuxk uky tsyaa; e ma tääpë kutujktaknën jam tu'uk yë ja'ay yaj'ixy.

²⁷ Ma wyëënën ets anëkëjxytsyow ma myoxën ma kyätyën, jëtu'un yaj'ixy y'atë'kxy tä tsuxkpujxnën ets jëënën yaj'ix nya'ëwtityë; ma pyuuy ma tyekyën jëënën yaj'ixy. Pyë'aay jëtu'un yaj'ixy ajajp yowë.

²⁸ Tä i'tyën mëti'ipë këxë'kpën xëëw'an akujky ko tyu'uja'any, jëtu'unës ja Dios ja myëj'ajt y'oyajtën të n'ijxë. Koos jëtu'un të n'ixy täätsës të nwintä'äky të nnaaxkoy, yë'ëjës yë nwinpok ntukpatyp yë naax.