Éxodo 6 - Biblia Dc en Mixe de Quetzaltepec

¹ Ënet ja Dios y'ëtsoowë: Tyam xy'ixtëty wi'ixës yam yë mëj'ënä'ämpë ntuna'anyën, yë'ë atsip nëjkx m'ëxmajtsënëtë ma nyaax kyajpnën, yë'ëpaat nëjkx kë'ëm y'ënanë: Nëjkxtë.

Tios tmëkäjpxy jatëkok yë Moisés

² Ënet yë Dios ojts tmëkäjpxy yë Moisés ets t'ënëmaay: Ëjts WINTSËN.

³ Ojtsës nnänyikëxë'ëkyë ma Abraham, Isaac ets Jacob, etsës ojts jëtu'un ja nxëëw nkë'ëyäky, Dios mëti'ipë maaytyääyëpën winë. Ëjts ka'apës nëkoo ja nxëëw ojts ntimkyë'ëyajkojy, tääjës mëtëy nxëëwatyën: Wintsën.

⁴ Ntuunës tu'uk yë käjpxytyu'unën mëët yë'ëjëty etsës ojts ntukwinwanëtë, ko nmo'oja'antë tu'uk yë it naaxwiinyëtë jam Canaán. Yë'ës n'antijpy ja naax kam ma ojts miitsëty m'ëk tsënaaytyëpën, tä yë jaaypyaat jaaypyo'kxyën.

⁵ E tyam maas të nijawën wi'ix yë Israel ja'ayëty y'ëyowtën ets wi'ix yë Egiptë ja'ayëty tyiytyunëtën mëët yë tuunk mëkëtypë, paatyës tyam nja'amyetsy ja nkäjpxytyu'unënës, mëti'ipës ojts nyajwë'ëmyën.

⁶ Tyam, nëjkx ënëëmëtë yë Israel ja'ayëty, ko ëjts, mëti'ipë Wintsën'ajtpën nyajpëtsëmantëpës ma je'eyë myëtun y'ëyowtën mëët ja mëktuunk mëti'ipë ja Egiptë ja'ayëty mooyëtëpën. Nyaj'ixanëpës yë nmëjajtën mëj këjää ets nyajpëtsëma'antës mëët tu'uk yë kuttujkën tëypyë jaantypë.

⁷ Jëtu'un miitsëty n'ëxajëja'antë, tääjës yë ntimnyaax ntimkyajpnën etsës miits xyTios'atëp ets xynyijawëtëty, ko ëjts Wintsën, mëti'ipë miits mTiosajtëpën, mëti'ipë të myajpëtsëmëtën, ma ënety miitsëty je'eyë mëtun m'ëyowtën, mëët ja mëkëtypë ja tuunk, mëti'ipë mooyëtëpën ja Egiptë ja'ayëty.

⁸ Jamës yë naax kajpn nyajnëjkxa'any maas ojts yë Abraham, Isaac ets Jacob të ntukwinwanëtën ets yë'ë tjä'ä'atëty. Ëjts jëtu'un Wintsën.

⁹ Moisés ojts ja aaw ayuk tjakajpxnaxy, e yë'ëjëty ka'ap ojts tmëpëktë, jä'ä ko ja mëktuunk jä'ä ënety tyäty myëmaay tyäty myëtajtëp.

¹⁰ Ënet ja Dios t'ënëmaay ja Moisés:

¹¹ Nëjkx ënëëmë yë mëj'ënä'ämpë, ko wä'än t'ëxmatsy yë Israel ja'ayëty jap Egiptë.

¹² Tä yë Moisés t'ëtsoy yë Dios: Yë Israel ja'ayëty nijënu'unës xykyatuntë këwentë. ¿Tyam tiijës ënät tjaaktimtyuunta'akëp ets mëj'ënä'ämpë tmëpëkëty yë n'aaw n'ayukës. Tyamës ka'ap njatukjajtpë wi'ixës oy n'ëwëty nkajpxëty?

¹³ Ënet ojts yë Aarón ets Moisés tyuk'ënä'ämëtë yë Dios: ets t'ënëëmëtëty ja Israel ja'ayëty ets ja mëj'ënä'ämpë näjyëtu'un, ko yë'ëjëty myëët'ajtëp ja kuttujkën ets tëë tuknipëjktaakëtë ko tyajtsoona'antë ja Israel ja'ayëty jap Egiptë.

Yaa myiny kuja'ay kukeetsy yë y'u'unk y'ok yë Aarón ets Moisés

¹⁴ Ya'atë jëtu'un ojts tnikopk'atë yë jyiiky myëku'ukëty jënu'un tu'ktaak tu'kteety tyu'kmëku'uk'atën. Yë'ë Rubén y'u'unk'ajt y'ëna'k'ajt yë Israel yë myëtu'uk u'unk, mëti'ipë xyëëwajtën Hanoc, Falú, Hesrón ets Carmí, ya'atë jëtu'un jyä'äy'ajt.

¹⁵ Yë Simeón yë y'u'unk y'ëna'k jä'ä xyëëwajtë Jemuel, Jamín, Ohad, Jaquín, Zohar ets Saúl mëti'ipë tyaak'ajtën ja Canaán ja'ay. Ya'atë jëtu'un yë Simeón jyä'äy'ajt.

¹⁶ Yë Leví jä'ä jyuuky'äjty mëko'px ja i'px majkmokx mäjtsk jëmëjt. Jä'ä xyëëwajtë ja y'u'unk y'ëna'k, Guersón, Quehat ets Merarí, jëyëjp yë mëjpë ets ok yë mutskpë.

¹⁷ Mëti'ipë ojts yë Guersón t'u'unk'atyën ets jënu'un ojts tyu'kja'ay'atën, jä'ä xyëëwajtë Libní ets Simí.

¹⁸ Yë Quehat jä'ä ojts jyuuky'äty mëko'px ja i'px majktëkëëk jëmëjt ets y'u'unk y'ëna'këty jä'ä ojts txëëwatë: Amram, Ishar, Hebrón ets Uziel.

¹⁹ Yë Merarí y'u'unk y'ëna'k jä'ä xyëëwajtë, Mahli ets Musi, jëyëjp yë mëjpë ets ok yë mutskpë. Ya'atë jëtu'un jyä'äy'ajt yë Leví.

²⁰ Amram yë'ë ojts mëët pyiky ja tsyëkuu mëti'ipë xyëëwajtypyën Jocabed, yë'ë ojts tyajmëxu'unk'aty yë Aarón ets Moisés. Yë Amram jä'ä jyuuky'äjty mëko'px ja i'px majkmokx mäjtsk jëmëjt.

²¹ Yë Ishar yë y'u'unk y'ëna'k jä'ä xyëëwajtë: Coré, Néfeg ets Zicri.

²² Yë Uziel yë y'u'unk y'ëna'k jä'ä xyëëwajtë: Misael, Elsafán ets Sitri.

²³ Yë Aarón yë'ë ojts mëët pyiky tu'uk yë to'oxytyëjk mëti'ipë xyëëwajtypyën Eliseba, yë'ë nyëëx yë Aminadab ets yë'ë yë myëkä'äx yë Nahasón, yë'ë myaank'ajt mëti'ipë ojts txëëwatën; Nadab, Abihú, Eleazar ets Itamar.

²⁴ Yë Coré yë y'u'unk y'ëna'k jä'ä xyëëwajtë: Asir, Elcana ets Abiasaf. Ya'atë jëtu'un ojts ok yajtijtë Coré ja'ayëty.

²⁵ Tu'uk yë y'u'unk yë Aarón mëti'ipë xyëëwajtypyën Eleazar, yë'ë ojts mëët pyiky yë nyëëx yë Futiel ets yë'ë ojts tyajminy tyajja'ty naaxwiiny ja mëti'ipë yajtijyën Finees. Ya'atë jëtu'un ojts tnikopk'atë yë Leví ja'ayëty, jëtu'un ja xyëëwëty këxja'ay myintë tä tyu'kja'ay'ajtën.

²⁶ E ya'atë ojts y'itë Aarón ets Moisés, mëti'ipë ja Dios ënëmaayëtën ets tyajpëtsëmtëty ja Israel ja'ayëty jap Egiptë, jëtu'un tä yë maytsyiptuunpë muum nimay tsyoontën waatswitsy.

²⁷ Näy yë'ë ya'atë Moisés ets Aarón ojts t'ënëëmëtë ja yajkutujkpë, mëti'ipë ënety jap ënä'ämpën Egiptë, ko tyajpëtsëma'antë ja Israel ja'ayëty ma tääpë kajpnën.

Tios tmëkäjpxy yë Moisés ets Aarón

²⁸ Jä'ä xëëw ma Dios ojts tmëkäjpxyën yë Moisés jap Egiptë,

²⁹ jëtu'un t'ënëmaay: Ëjts jëtu'un Wintsën. Tukmëmëtya'ak yë Egiptë mëj'ënä'ämpë tëkokyë mëti'ipë yam ntuk'ënëmääpyën.

³⁰ E yë Moisés ojts y'ëtsoy: Wintsën ëjts ka'apës ntukjaty wi'ixës nkajpxëtyën, ¿tiijës ntuunta'akëp etsës yë yajkutujkpë yë n'aaw n'ayukës tmëpëkëty?