Éxodo 40 - Biblia Dc en Mixe de Quetzaltepec

Yajkënu'kxy ja tsajptëjk

¹ Ënet yë Dios ojts tmëkäjpxy yë Moisés ets t'ënëmaay:

² Ma tyu'uk anyën mëtu'kpo'opë jää nëjkx xymyä'kxy ja wit tëjk ma ja näpyaatë y'itëtyën mëët ja Dios.

³ Jap xypyëjkta'akëty ja kaaxë, mëti'ipë myë'ijtypyën ja käjpxytyu'unën ets ënät xy'atëëytyukëty mëët ja wit'atëëytyuk.

⁴ Jap xypyëjkta'akëty tëkoty ja kaaypyäjn ets ja mëj jëëntooytyakn, yajxon oy xynyipëjktaakëty ma kaaypyäjn y'itëtyën ets ja mëj jëëntooytyakn pëjktaktaayë ja nyikutë'kxn.

⁵ Pëjkta'ak näjyëtu'un ja poom ja wyintsë'këntyakn, pu'ts pujxn myajtunëp, winkon xypyëjkta'akëty mëët ja kaaxë mëti'ipë ja käjpxytyu'unën myë'ijtypyën ets xykyëxtëyëty ja wit'atëëytyuk ma yajnitëkën yë Dios yë jyëën tyëjk.

⁶ Tä ënät näjyëtu'un xykyiiytya'akëty ja wintsë'këntyakn ma jëyujk nyitoytyëtyën, winkon xypyëjkta'akëty ma ja tsajptëjk yajnitëkën, jä'ä ja wit tëjk ma ja näpyaatë y'ityën.

⁷ Pëjkta'ak ja kë'ëpujtakn, itkujky xypyëjkta'akëty ma yajpaatyën ja wit tëjk ma ja näpyaatë y'ityën mëët ja wintsë'këntyakn ets xy'atääm'utsëty mëët yë nëë.

⁸ Tä ënät näjyëtu'un xyaj'oyëty ja nyitëja'aw ets xypyëjkta'akëty ja nyiwit'atëëytyuk jam ma yajnitëkën.

⁹ Tääts ja on, mëti'ipë winë mëët yajkënu'kxyën xytyuknixijkxta'ajëty ja Dios ja jyëën tyëjk ets jënu'un jap winë y'ityën, aakjëtu'un xykyënu'kxta'ajëty ja apëjk atu'unën jënu'un jap tyuna'anyën ma ja Dios ja jyëën tyëjkën, jëtu'un'äämpy tääpë ja it naaxwiinyëtë wyë'ëmëty kënu'kxy ets wa'ats.

¹⁰ Tuknijaax yë kënu'kxy on yë wintsë'këntyakn ma jëyujk yajnino'oktën ets tëkokyë yë apëjk atu'unën jënu'un mëët tyunyën, jëtu'un xykyënu'kxëty ets wa'ats wyë'ëmëty yë wintsë'këntyakn.

¹¹ Tuknixijkx näjyëtu'un yë pujxn akë'ëpujën ets nyi'ëjx ets jëtu'un'äämpy kënu'kxy wyë'ëmëty.

¹² Woownëjkx ënät yë Aarón mëët yë y'u'unk y'ëna'k jam ma yajnitëkën ja tsajptëjk ets jam xy'ënëëmëty ets tsyi'iwtëty.

¹³ Ko tsyiiwta'atëty tääts ja Aarón ja wyit tpëjkta'akëty mëti'ipë të yajtuknixuyën ets ja on xytyukkujaaxëty ets xykyënu'kxëty, jëtu'un'äämpy tpa'atwa'akëty ja teety'ajtën ma ëjts xymyëtunëtyën.

¹⁴ Mëjwoowëp näjyëtu'un ja y'u'unk y'ëna'k ets xytyuknijänëty ja wit mëti'ipë myëteety'atëpën.

¹⁵ Ets xytyukkuja'axta'ajëty ja on mëti'ipë yajtukkënu'kxpën winë, jëtu'un ijxtëm ja Aarón të xytyukkujaaxyën ets jëtu'un'äämpy tpa'atwa'akëtëty ja teety'ajtën etsës xymyëtuntëty.

¹⁶ Moisés ojts tuunta'ay winë tä ënety ja Dios të tyuk'ëne'emyën.

¹⁷ Paaty ko mäjtsk jëmëjt y'apejty, ma ënety të tsyoontën jap Egiptë, ma tyu'uk'anyën ja mëët tu'ukpë ja po'opë, jää ojts ja Dios ja jyëën tyëjk ëka'any yajpëjktä'äky.

¹⁸ Moisés ojts tpëjktä'äky ja Dios ja jyëën tyëjk ets tpëjktaktaay ja nyi'ëjx, ojts tmä'kxta'ay ja kepyjyiity ets tmooytyääy ja witsë ets tyajwa'akë'ktaay ja xeny.

¹⁹ Ojts twijtstëëwta'ay ja wit ma ja Dios ja jyëën tyëjkën ets ojts tpëjktä'äky ja nyiwits nyijuux jëtu'un tä ënety ja Wintsën të tni'ënä'ämën.

^20-21 Ojts ja Moisés t'apëkë ja tsaatsetsy ma myinyën ja ënä'ämën tëyajtën jap kaaxëjoty mëti'ipë myë'ijtypyën ja käjpxytyu'unën ets ja kaaxë ojts ja nyiwitsë tpëjktäky, näjyëtu'un ja nyi'akë'ë mëti'ipë yajtuk'ajupëpën ets tmënëjkxy jap ma ja Dios ja jyëën tyëjkën, ojts tkutëëytyä'äy ja wit'atëëytyuk ets t'atëëytyujky ja kaaxë, jëtu'un ijxtëm ënety ja Wintsën të tni'ënä'ämën.

²² Ojts ja kaaypyäjn näjyëtu'un tkëëytyä'äky jap ma ja wit tëjkën ma näpyaatë y'ityën mëët ja Dios, tëja'ptsow tpëjktäky ma ja wit'atëëytyukën, anëkëjxy'äämpy ma ja tsajptëjkën.

²³ Ets tpëjktäky näjyëtu'un ja tsajpkääky ma ja nyikaaypyäjnën, jam ma ja Dios jam kyëtä'äkyën, jëtu'un ijxtëm ënety ja Dios të tni'ënä'ämën.

²⁴ Ojts tpëjktä'äky ja jëëntooytyakn jap ma ja wit tëjkën ma ja näpyaatë y'ityën mëët ja Dios, jëtu'un mëët nyäwyinku'ixëty ja kaaypyäjn, ëpa'tkë'ëy'äämpy ma ja tsajptëjkën.

²⁵ Ets tyajmëjëtyääy ja kutë'kxn jam ma ja Dios ijty kyëtä'äkyën, ijxtëm ënety ja Dios të tni'ënä'ämën.

²⁶ Ja pu'ts pujxn wintsë'këntyakn ojts tpëjktä'äky jap ma ja wit tëjkën ma ja näpyaatë y'ityën mëët ja Dios, wiintuuytsyow ojts tpëjktä'äky ma ja wit'atëëytyukën.

²⁷ Ojts tyajtoopyiky ja mëti'ipë oy xu'kp jojkpën, jëtu'un ijxtëm ënety ja Dios të tyuk'ëne'emyën.

²⁸ Ënet ja Moisés ojts tkëxtëy ja wit'atëëytyuk, jam ma ja Dios ja jyëën tyëjk yajnitëkën.

²⁹ Ets ja wintsë'këntyakn tkëëytyäky ma ja jëyujk yajnino'oktëtyën, jam winkon tpëjktäky ma ja wit tëjk yajnitëkën ma ja näpyaatë y'ityën, ojts ja jëyujk kanaak tjantyajnitoy ets näjyëtu'un ja aaytyëëm ujtstëëm tkë'ëyäjky jam ma Tiosën, tä tu'uk yë ayajk ako'onën, jëtu'un tä ënety ja Dios të tyuk'ëne'emyën.

³⁰ Ja kë'ëpujtakn itkujky ojts tpëjktä'äky ma ja wit tëjkën ma ja näpyaatë y'ityën ets ja wintsë'këntyakn, tääts tyaj'ujtsy mëët yë nëë ets jëtu'un jap ja teetytyëjkëty kyë'ëpujtëty.

³¹ Yë Moisés ets Aarón mëët yë y'u'unk y'ëna'k, jap ijty ja nëë tjuutë mëti'ipë kyë'ëpuj'ajtëpën ets mëti'ipë tyekpyuj'ajtëpën.

³² Näpyujëtëp ijtyëty ko jap tyëkëtë ma ja wit tëjkën ma ja näpyaatë y'ityën ets ko twinkuwa'akëtë ja potsy ma ja wintsë'këntyaknën, jä'ä ko jëtu'un ënety ja Wintsën të tuk'ëne'emy ja Moisés.

³³ Ko ojts jyëjpkëjxtaaynyë, tä ja Moisés yi'iyë tjaakyaj'o'oyëtyääy ja nyitëkja'aw ja wit tëjk ma ja näpyaatë y'ityën ets ja wintsë'këntyakn, ojts ja wit'atëëytyuk tkëxtëy jam ma yajnitëkën ja tëja'aw. Ko ja Moisés tkojtaay ja wit tëjk,

Ja yoots nëma'a mëti'ipë këtakën ma ja tsajptëjkën

³⁴ ënät ja yoots nëma'a ojts tyajnituky ja wit tëjk ma ja näpyaatë y'ityën mëët ja Dios ets tyajtuktujktaay mëët ja myëj'ajt y'oyajtën.

³⁵ Jëtu'un'äämpy ojts ka'ap t'ëkjëkyäjpnë ja Moisés jap tyëkëty ma ja wit tëjkën ma ja näpyaatë y'ityën, jä'ä ko ja yoots nëma'a jä'ä ënety jam të nyäkyo'ktaayënë tëjknëkëjxm ets ja Dios ja myëj'ajt y'oyajtën yë'ë ënety të tyajtuktujkta'ay ja tëkot.

³⁶ Ko ja yoots ijty pyëti'iky, mëti'ipë jam ko'knääpyën ma ja tëjk kopkën, yë Israel ja'ayëty ënätyë ijty näjyëtu'un tyajpëtë'ëktë ja tsyënaaytyaknëty.

³⁷ E pën ja yoots ijtp jam jeky, näjyëtu'un ja tsyënaaytyaknëty ka'ap nëkoo tyajpëtë'ëktë; jä'änëm y'ëwxijtëp ja yoots koonëm pyëti'iky.

³⁸ Jëtu'un ojts nyë'ëye'eytyë tyu'uye'eytyë ja Israel ja'ayëty, t'ijxtë tkoowtë winë mëj këjää, ko ijty xyiiny'äty ja Wintsën ja yoots ijty nyitëëynyääpy ja Dios ja jyëën tyëjk e ko kyoots'aty jëtu'un jam kyëxë'ëky ma ja tëjk kopkën, ma ja Dios ja jyëën tyëjkën, tä tu'uk yë mëj jëënyä'änkën.