Éxodo 31 - Biblia Dc en Mixe de Quetzaltepec

Ja wijyjyä'äytyëjkëty mëti'ipë tunantëpën ma ja mëjtsajptëjkën

¹ Ënet ja Dios ojts tmëkäjpxy ja Moisés ets t'ënëmaay:

² Ëk'ix, jam ma Judá y'u'unk y'okën yë'ëjës të nwin'ixy yë Besalel, yë Urí myaank, yë Hur y'ok'u'unk,

³ tëëjës nmo'oy yë nmëk'ajtënës n'oyajtënës ets wijyajtën kujk'ajtën ets ja'aykyujkën ets nija'awën wi'ix winë oy t'oytyunëtyën.

⁴ Wi'ix oy tyajkëxë'ëkëtyën winë ets wi'ix oy tuunk'atëtyën ma pu'ts pujxn, poop pujxn ets tsuxkpujxn yajtuk'oytyunyën.

⁵ Wi'ix yë tsaa oy tmo'ojëtyën yë ijxën ets wi'ix yajxon y'atë'kx y'ajajëtyën, wi'ix näjyëtu'un yë kepy oy yë y'ijxën tmo'ojëtyën, oy tyimtiituunkëty aak'oy yaj'ixy tyaj'oyë.

⁶ Tëë mpëjktä'äkyës yë Oholiab, yë myaank yë Ahisamac, yë Dan yë y'u'unk y'ok ets yë'ë pyutëkëtëty, tëkokyë yë ijxpëkyjyä'äytyëjkëty tëëjës nmooytya'atë yë wijyajtën ets jëtu'un tjëkyäptëty t'oytyuntëty winë mëti'ipë yam të ntuk'ëne'emyën.

⁷ Ja wit tëjk ma ja näpyaatë y'ityën mëët ja Dios, ja kaaxë mëti'ipë myë'ijtypyën ja käjpxytyu'unën, ja kaaxë ja nyi'akë'ë ets tëkokyë jënu'un jap winë tyunyën ma ya'atë wit tëjkën,

⁸ ja kaaypyäjn mëët tëkokyë mëti'ipë mëët tyunyën, ja jëëntooytyakn mëti'ipë wa'ats pu'ts pujxn ets mëët tëkokyë mëti'ipë mëët tyunyën, ja poom ja wintsë'këntyakn.

⁹ Ja wintsë'këntyakn ma ja jëyujk yajnino'okyën, mëët tëkokyë jënu'un mëët tyunyën, ja pujxn kë'ëpujtakn mëët ja nyi'ëjx ma këxkë'ëy y'ityën,

¹⁰ ja wit ja jo'okpyë mëti'ipë ja Aarón wyit'ajtypyën ets näjyëtu'un ja wyitëty ja y'u'unk y'ëna'k mëti'ipë myëteetyajtëpën,

¹¹ yë on mëti'ipë mëët winë yajkënu'kxyën ets ja poom mëti'ipë pa'akxu'kpën jap ma tsajptëjkën, yë'ë nëjkx tuunk'atë jëtu'un tä yam të ntuk'ëne'emyën.

Ja po'kxënxëëw

¹² Ënet ja Dios ojts tmëkäjpxy ja Moisés ets t'ënëmaay:

¹³ Mijts kë'ëm timmëëtmëtya'ak yë Israel ja'ayëty ets xy'ënëëmëty: Kopkpëky ko xymyëjjawëtëty ëjts yë npo'kxënxëëwës, jä'ä ko yë'ë yajtuk'ijxp koos ëjts nyajpaaty ma miitsëtyën xëmëkyëjxm, jëtu'un yajnijawë ko ëjts mëti'ipë Wintsën'ajtpën, ëjts jëtu'un miitsëty të nwin'ixtë.

¹⁴ Yë po'kxënxëëw wa'ats mëpaat xymyëët'atë ets kopkpëky ko mëj'äämpy xyjyëkyäptëty. Pën ka'ap tmëj tjawë ya'atë xëëw, kopkpëky ko y'ookëty, pën jää tuunp ye'epy ma tääpë xëëwën, kopkpëky ko nëjkx yajjo'otsy ma ja nyaax kyajpnën.

¹⁵ Tëtujkxëëw ja tu'unën ye'eyën y'itëty e ja mëwëxtujkxëëwpë po'kxënxëëw jäänë, mëti'ipë ja Dios mëpaat yajtukwintsë'ëkën. Pën jää tuunp ye'epy ma pyo'kxënxëëwatyën, kopkpëky ko y'ookëty.

¹⁶ E paatykyëjxm kyopkpëkyëty ko nitëkokyë yë Israel ja'ayëty mëj'äämpy tyaj'itëty yë po'kxënxëëw, jëtu'un nyaxëty tä tu'uk yë käjpxytyu'unën yajmëët'atyën winë xëëw winë jëmëjtpë.

¹⁷ Yë'ë tu'uk yë ijxpäjtën'atëp mëët ëjts ma Israel ja'ayëtyën winë xëëw winjëmëjt. Jä'ä ko yë Dios jä'ä ojts tuunk'aty yë tsajp ets naaxwiinyëtë tëtujk xëëw, e kom wëxtujk xëëw tää ojts pyo'kxy.

Ja tsajpkaa mëti'ipë mëët y'oytyunyëtyën ja pu'ts pujxn

¹⁸ Ko yë Dios ojts myëtyakta'ay mëët yë Moisés jam ma Sinaí kopkën, mäjtsk ojts yë Moisés yajmo'oy yë tsaatsetsy, ma tkëxjaayën ja ënä'ämën tëyajtën mëti'ipë ojts yë Dios kë'ëm timy'oytyunyën.