Éxodo 19 - Biblia Dc en Mixe de Quetzaltepec

Yë Israel ja'ayëty jya'të jam Sinaí

¹ Ënet ojts ja Israel ja'ayëty jya'të jam ma tu'uk ja itjot txëëwatyën Sinaí jam të'ëts'itjotm, tëkëëk po'o ënety të nyäxy ma tsyo'ontën jap Egiptë.

² Ko ojts tsyoontë jam Refidim, jam ojts jya'të Sinaí ets jam tsyënaaytyaknpëjktë ma ja mëj kopkën.

³ Ënet jam ja Moisés pyejty kopkkëjxm ets jam nyäpyaata'anyë mëët ja Dios, jä'ä ko Dios ojts jam kë'ëm myëkäjpxyë kopkkëjxm ets y'ënëmaayë: Tukmëtow ya'atë aaw ayuk yë Jacob yë y'u'unk y'ëna'k, yë Israel ja'ayëty:

⁴ Miitsëty tëë kë'ëm xy'ixtë wi'ixës ëxëëk të ntunyën yë Egiptë ja'ayëty ets wi'ix miitsëty yaa të nyajmintën maas yaa nyajpaatyën, pojën yaj'ixy të mintë jëtu'un tä jeexyë jam mkäknëtyën.

⁵ E paaty pën miitsëty xymyëmëtoowtëpës ets mpatuuntëp ja n'aaw n'ayukës, miits jëtu'un nëjkx nkajpn'atë ets oy miits ntsoktëty njawëtëty ma tëkokyë yë naax kajpnën, jä'ä ko tëkokyë yë naaxwiinyëtë ëjts yë xypyatääpy.

⁶ Miitsëty aakjëtu'un nëjkx mja'ay'atë tä yë teetytyëjkëtyën ma Wintsën yë kyutujktaknën, jëtu'un nëjkx njawëtë tä tu'uk yë kajpnën mëti'ipës të natyuknikënu'kxëtyën. Tukmëmëtyakta'a ya'atë aaw ayuk yë Israel ja'ayëty.

⁷ Ënet ja Moisés ojts nyijkxy ets tmëkajpxmujktaay ja mëjja'aytyëjkëty, mëti'ipë ënety nyimëjja'ay'ajtëpën ja naax kajpn ets ojts tukmëmëtyakta'ay ja aaw ayuk tä ënety ja Dios winë të tyuk'ëne'emyën.

⁸ Ënet ja Israel ja'ayëty nitëkokyë y'ëtsoowtaaytyë: Oyës jëtu'un ntuntëty, jëtu'un tä ja Dios të tni'ënä'ämën. Moisés ojts ya'atë ja ëtsoowinpijtën tukninëjkxy ja Dios, ijxtëm ënety ja naax kajpn të y'ëtsoyën,

⁹ ënät ja Dios y'ënëmaayë: Ëk'ix, yootsjoty yam mijts nmëëtmëtya'aka'any ets ja naax kajpn tmëtoow'itëty, ko ënety mijts nmëmëtyä'äky, jëtu'un'äämpy ja ja'ayëty mwinkutsë'ëkëtëty ets mtuk'ijxpätëtëty. Yë Moisés ojts niwinpity ja aaw ayuk ma Wintsënën, ijxtëm ënety ja naax kajpn të y'ëtsoowinpityën,

¹⁰ ets ojts ja Dios y'ënë'ëmxëty: Nëjkx ënëëmë yë naax kajpn, wä'än tyam ets jopy nänyipëjktaakëtë etsës ëjts xytyukxoonta'aktëty ets xymyëjjawëtëtyës. Yajxon yë wyit tyujkxëty tpujtëty tjä'ätstëty,

¹¹ ets nyänyipëjktaakëtëty ko wyëxtëjkm'atëty jëjp'ixy ënety jää yajpaatë, jä'ä ko wëxtëjkmës yaa njënaka'any ma Sinaí kopkë ets tëkokyë ja Israel ja'ay xy'ixtëtyës.

¹² Pëjkta'ak yë tsëpa'an jam na'ëwtityë ma kopk ëjxën këtiipë ja'ay nëkoo nyaxtëty ets xy'ënëëmëtëty ko këtii nëkooyë jam pyätëty ets ka'ap winkon myintëty, jä'ä ko pën nëkooyë wyinkontë tsojk y'ooktëty.

¹³ E ja jëtu'unpë ja ja'ay ni pën mëpaat jëtu'unyë tkakë'ënixajy, yajkuka'atsëp ëkë yajkuti'pxëp, ka'ap mëpaat pën tyajtëy pën ja'ay ënety ëkë pën jëyujk tsajpkaa, ja jëtu'unpë ka'ap mëpaat wyi'imy juuky. Yë ja'ayëty ënätnëm tjëkyäpëty jam pyätëty ma ja kopkën, ko ënety tmëtowtë yajtukxu'uxy ja kupixynwyaj.

¹⁴ Ënet ja Moisés ojts jam tsyo'onë kopkkëjxm ets kyëtaknë ma jap ja ja'ayëtyën tääts nyäjyëjp'ixëtëty, jëtu'unts ja Dios tukxoonta'aktëty ets tmëjjawëtëty. Ja ja'ayëty ojts ja wyit tyujkxëty tpujta'atë tjä'tsta'atë,

¹⁵ ets ja Moisés y'ënëmaayëtë: Näyjyëjp'ixëtë ets jëtu'un jëjp'ixy myajpaatëty wëxtëjkm, këtii mëpaat yë to'oxytyëjk xymyëëtma'atë.

¹⁶ Ko tyëkëëkxëëwpejty, ënät ojts yajmëtoy y'ënaantä'äky y'ëtëtstä'äky yë ënääw wëtsuk ets nyäkyo'ktaayë jam kopkkëjxm yë yoots nëma'a, je'eyë yaj'ijxnë koots pëmiinë, e ko yajmëtoowpaty, jëtu'un tä ja'ay yë pujxnxuxn mëk tukxu'uxyën, ënät ojts yë tsë'ëkë tyuktëjkëtya'ajëtë ja ja'ayëty.

¹⁷ Ënet ja Moisés twoowtso'ontaay tu'kë'ëyë ja ja'ayëty, ma ënety jam tsyëënëtën ets ojts tukninëjkxy ja Dios ets jam wya'ak'o'oyëtyääytyë ma ja kopk'ëjxën.

¹⁸ Jam ma ja kopkën jok jam yaj'ijxp pyëtsimy, mëët ko ënety ja Dios jam të kyëtä'äky jëënjoty. Ja jëënjok jam jantypëtsëëmp kopkkëjxm tä jëëntooytyaknjoty yë jëënjok pyëtsimyën ets ja kopk janty yu'kxtsënääpy.

¹⁹ E ja jëtu'unpë yajmëtoyën, tä ja pujxnxuxn y'ënä'änyën ni'ikyë ënety jyänty myëktä'äky; ënät ja Moisés ojts tyëkë mëtyakpë mëët ja Dios, ja Dios ja y'aaw y'ayuk jëtu'un yajmëtoy tä ënääw y'ënä'änyën ko y'ëtsoy.

²⁰ Yë Dios jam kyëtäky ma jawäänë këjxmëpë ja Sinaí kopkën ets ojts t'ënëëmë ja Moisés ets jam pyätëty. Tä ja Moisés pyejty jam,

²¹ ets ja Dios y'ënëmaayë: Jënak tyam ets xy'ënëëmëty yë naax kajpn, ko këtii tninaxtëty ja tsëpa'an ets xy'ixa'antëtyës, këtiipë nimay y'ëk'o'knëtëty.

²² Oy yë'ëjëty yë teetytyëjkëty, mëti'ipë jyëkyäjptëp xymyëwinkontëtyës, kopkpëky ko jëyëjp nyäpyuj nyäjyä'ätsëtëty, këtiipës ëjts ëxëëk n'ëtë'ëtsëty ma yë'ëjëtyën.

²³ Ënet ojts ja Moisés t'ëtsoy ja Dios: Yë naax kajpn ka'ap yë pyätëty kë'ëmwinma'any ma ya'atë kopkën mëti'ipë xyëëwajtypyën Sinaí. Jä'ä ko mijts tëë xynyikäjpxy ko yajpëjkta'akëty tu'uk yë akeetsyajtën mëti'ipë ka'ap yajwinnaxëtyën, jä'ä ko ya'atë kopk wa'ats yë nyäxy.

²⁴ E yë Dios tyaa y'ëtsoowë: Nëjkx, jëjptakoj ets ok mëët mku'tëty yë Aarón. E yë teetytyëjkëty ets ja'ayëty ka'ap mëpaat twinnaxtë yë tsëpa'an ets yaa näjyëtu'un myina'antëty maas ëjts nyajpaatyën, këtiipës ëxëëk n'ëtë'ëtsëtyës ma yë'ëjëtyën.

²⁵ Ënet ja Moisés jam jyënäjky kopkkëjxm ets ojts tukmëmëtyä'äky yë Israel ja'ayëty ya'atë aaw ayuk.